Евангелие воскресно 3-е
От Марка, зачало …
Воскрес же (Иисус) заутра в первую субботу, явися прежде Марии Магдалини, из неяже изгна седмь бесов. Она (же) шедши возвести с Ним бывшим, плачущымся и рыдающым: и они слышавше, яко жив есть и виден бысть от нея, не яша веры. По сих же двема от них грядущема явися инем образом, идущема на село. И та шедша возвестиста прочым: и ни тема веры яша. Последи (же) возлежащым им единомунадесяте явися, и поноси неверствию их и жестосердию, яко видевшым Его воставша не яша веры. И рече им: шедше в мир весь, проповедите Евангелие всей твари. Иже веру имет и крестится, спасен будет: а иже не имет веры, осужден будет. Знамения же веровавшым сия последуют: именем моим бесы ижденут: языки возглаголют новы: змия возмут: аще и что смертно испиют, не вредит их: на недужыя руки возложат, и здрави будут. Господь же убо, по глаголании (Его) к ним, вознесеся на небо и седе одесную Бога. Они же изшедше проповедаша всюду, Господу поспешествующу и слово утверждающу последствующими знаменьми. Аминь.
Ексапостилларий 3.
Яко Христос воскресе, никтоже да не верует: явися бо Марии, потом же виден бысть на село идущима: таинником же паки явися возлежащым единонадесятим, ихже крещати послав, на небеса вознесеся, отнюдуже и сниде, утверждаяй проповедание множества знамений.
Богородичен.
Возсиявшее Солнце, яко от чертога жених, из гроба днесь, и ад пленив, и смерть упразднив, Тебе Рождшия молитвами свет нам низпосли: свет, просвещая сердца и душы: свет, ходити всех наставляя на стези повелений Твоих и на путь мира.
Утренняя стихира, глас 3.
Магдалине Марии Спасово благовествующей из мертвых Воскресение и явление, не верующе же ученицы, поносими быша о жестосердии: но знаменьми вооружшеся и чудесы, ко проповеданию посылахуся. И Ты убо, Господи, к начальному свету вознеслся еси Отцу, они же проповедаша всюду слово, чудесы уверяюще. Темже просветившеся теми, славим Твое еже из мертвых воскресение, человеколюбче Господи.