ЧИН ВЕЧЕРНИ
Возглас: Молитвами святых отец наших, Господи, Иисусе Христе, Боже наш, помилуй нас.
Аминь.
Царю Небесный
Трисвятое. По Отче наш:
Господи, помилуй, 12 раз.
Слава, и ныне:
Приидите, поклонимся Цареви нашему Богу.
Приидите, поклонимся и припадем Христу Цареви нашему Богу.
Приидите, поклонимся и припадем Самому Христу, Цареви и Богу нашему.
Слава Отцу и Сыну и Святому Духу и ныне и присно и во веки веков. Аминь.
Аллилуия, Аллилуия, Аллилуия, слава Тебе, Боже.(Трижды)
Господи, помилуй. ( 12 раз )
Слава Отцу и Сыну и Святому Духу и ныне и присно и во веки веков. Аминь.
И стихословим кафисму рядовую.
По кафисме вместо малыя ектении:
Господи, помилуй. ( Трижды )
Слава Отцу и Сыну и Святому Духу и ныне и присно и во веки веков. Аминь.
И абие поем Господи, воззвах в случившийся глас.
Псалмы 140, 141, 129, 116:
Господи, воззвах к Тебе, услыши мя.
Услыши мя, Господи.
Господи, воззвах к Тебе, услыши мя: вонми гласу моления моего. Внегда воззвати ми к Тебе. Услыши мя, Господи. Да исправится молитва моя, яко кадило пред Тобою: воздеяние руку моею жертва вечерняя. Услыши мя, Господи.
И по чину стихи:
Положи, Господи, хранение устом моим, и дверь ограждения о устнах моих.
Не уклони сердце мое в словеса лукавствия, непщевати вины о гресех.
С человеки, делающими беззаконие, и нее сочтуся со избранными их.
Накажет мя праведник милостию и обличит мя, елей же грешнаго да не намастит главы моея.
Яко еще и молитва моя во благоволениих их, пожерты быша при камени судии их.
Услышатся глаголы моя, яко возмогоша: яко толща земли проседеся на земли, расточишася кости их при аде.
Яко к Тебе, Господи, Господи, очи мои, на Тя уповах, не отыми душу мою.
Сохрани мя от сети, юже составиша ми, и от соблазн делающих беззакония.
Падут во мрежу свою грешницы, един есмь аз, дондеже прейду.
(Псалом 141)
Гласом моим ко Господу воззвах, гласом моим ко Господу помолихся.
Пролию пред ним моление мое, печаль мою пред Ним возвещу.
Внегда исчезати от мене духу моему: и Ты познал еси стези моя.
На пути сем, по немуже хождах, скрыша сеть мне.
Смотрях одесную и возглядах, и не бе знаяй мене.
Погибе бегство от мене, и несть взыскаяй душу мою.
Воззвах к Тебе, Господи, рех: Ты еси Упование мое, Часть моя еси на земли живых.
Вонми молению моему, яко смирихся зело.
Избави мя от гонящих мя, яко укрепишася паче мене.
Отсюда начинаем стихиры на 10:
Изведи из темницы душу мою, исповедатися Имени Твоему.
Мене ждут праведницы, дондеже воздаси мне.
(Псалом 129)
На 8: Из глубины воззвах к Тебе, Господи, Господи, услыши глас мой.
Да будут уши Твои внемлюще гласу моления моего.
На 6: Аще беззакония назриши, Господи, Господи, кто постоит, яко у Тебе очищение есть.
Имене ради Твоего потерпех Тя, Господи, потерпе душа моя в слово Твое, упова душа моя на Господа.
На 4: От стражи утренния до нощи, от стражи утренния, да уповает Израиль на Господа.
Яко у Господа милость, и многое у Него избавление, и Той избавит Израиля от всех беззаконий его.
(Псалом 116)
Хвалите Господа, вси языцы, похвалите Его, вси людие.
Яко утвердися милость Его на нас, и Истина Господня пребывает вовек.
Слава Отцу и Сыну и Святому Духу. Стихира святому, если есть.
И ныне и присно и во веки веков. Аминь. Богородичен ( или стихира праздника, если есть праздник).
Творение Софрониа, патриарха Иерусалимскаго.
Свете Тихий святыя славы Безсмертнаго Отца Небеснаго, Святаго, Блаженнаго, Иисусе Христе! Пришедше на запад солнца, видевше свет вечерний, поем Отца, Сына и Святаго Духа, Бога. Достоин еси во вся времена пет быти гласы преподобными, Сыне Божий, живот даяй, темже мiр Тя славит.
Аще есть Бог Господь, поются прокимены сия:
В неделю вечера, глас 8:
Се ныне благословите Господа / вси раби Господни.
Стих: Стоящии во храме Господни, во дворех дому Бога нашего.
В понедельник вечера, глас 4:
Господь услышит мя, / внегда воззвати ми к Нему.
Стих: Внегда призвати ми, услыша мя Бог правды моея.
Во вторник вечера, глас 1-й:
Милость Твоя, Господи, / поженет мя вся дни живота моего.
Стих: Господь пасет мя, и ничтоже мя лишит, на месте злачне, тамо всели мя.
В среду вечера, глас 5-й:
Боже, во имя Твое спаси мя, / и в силе Твоей суди ми.
Стих: Боже, услыши молитву мою, внуши глаголы уст моих.
В четверток вечера, глас 6-й:
Помощь моя от Господа, / Сотворшаго небо и землю.
Стих: Возведох очи мои в горы, отнюдуже приидет помощь моя.
В пяток вечера, глас 7:
Боже, Заступник мой еси Ты, / и милость Твоя предварит мя.
Стих: Изми мя от враг моих, Боже, и от востающих на мя избави мя.
В субботу вечера, глас 6:
Господь воцарися, / в лепоту облечеся.
Стих: Облечеся Господь в силу, и припоясася.
Стих: Ибо утверди вселенную, яже не подвижится.
Стих: Дому Твоему подобает святыня, Господи, в долготу дний.
И по прокимне глаголет:
Сподоби, Господи , в вечер сей без греха сохранитися нам.
Благословен еси, Господи, Боже отец наших, и хвально и прославлено Имя Твое во веки. Аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.
Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает, Отцу и Сыну и Святому Духу, ныне и присно и во веки веков. Аминь.
И по Сподоби, Господи, вместо просительныя ектении поем Господи, помилуй, 12 раз.
Слава Отцу и Сыну и Святому Духу, и ныне и присно и во веки веков. Аминь.
И по сем стихиры стиховны, в нихже глаголем припевы.
Стих первый: К Тебе возведох очи моия, Живущему на Небеси. Се яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны.
Стих 2: Помилуй нас, Господи, помилуй нас, яко по многу исполнихомся уничижения: наипаче наполнися душа наша поношениия гобзующих, и уничижения гордых.
Аще же суббота, глаголем: Господь воцарися: якоже предписася. Аще же владычний праздник, его стихи. Такожде, яще случится и празднуемый святый.
Слава, и ныне, Богородичен.
Таже молитва святаго праведного Симеона Богоприимца:
Ныне отпущаеши раба Твоего, Владыко, по глаголу Твоему, с миром: яко видеста очи мои спасение Твое, еже еси уготовал пред лицем всех людей, свет во откровение языков, и славу людей Твоих Израиля.
Трисвятое и по Отче наш: тропарь праздника или святаго.
Слава, и ныне, Богородичен.
Посем:
Достойно есть, яко воистинну, блажити Тя, Богородицу, Присноблаженную и Пренепорочную и Матерь Бога нашего.
Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем.
Слава Отцу и Сыну и Святому Духу, ныне и присно и во веки
веков.Аминь.
Господи, помилуй. Трижды
Господи, благослови.
И отпуст:
Господи, Иисусе Христе, Боже наш, молитв ради Пречистыя Твоея Матери, святых славных и всехвальных Апостол, преподобных и Богоносных отец наших и святаго имя рек, егоже и память ныне совершаем, и всех святых, помилуй и спаси нас, яко Благ и Человеколюбец.
Аминь.
Аще же пост, и аллилуиа пето, глаголем тропари сия, во глас 4:
Богородице Дево, радуйся, Благодатная Марие, Господь с Тобою: Благословенна Ты в женах, и Благословен Плод чрева Твоего, яко спаса родила еси душ наших. Поклон 1.
Слава: Крестителю Христов, всех нас помяни, да избавимся от беззаконий наших: тебе бо дадеся благодать молитися за ны. Поклон 1.
И ныне: Молите за ны святии Апостоли, святии вси, да избавимся от бед и скорбей: вас бо теплыя предстатели ко Спасу стяжахом. Поклон 1.
Под Твое благоутробие прибегаем Богородице, моления наша не презри во обстоянии: но от бед избави ны, Едина Чистая, Едина Благословенная. Без поклона.
Господи, помилуй, 40.
Слава, и ныне.
Честнейшую Херувим:
Молитвами святых отец наших, Господи, Иисусе Христе, Боже наш, помилуй нас.
Аминь.
Таже молитву: Небесный Царю, веру утверди, языки укроти, мiр умири, святый храм сей добре сохрани, прежде отшедшия отцы и братию нашу в селениих праведных учини, и нас в покаянии и исповедании приими, яко Благий и Человеколюбец.
И абие три поклона великия, с молитвою святаго Ефрема.
Посем, Трисвятое.
По Отче наш:
Господи, помилуй, 12.
И молитву: Всесвятая Троице, Единосущная Державо, Нераздельное Царство, всех благих Вина, благоволи же и о мне грешнем, утверди, вразуми сердце мое, и всю мою отыми скверну, просвети мою мысль, да выну славлю, пою, и покланяюся, и глаголю: Един свят, Един Господь, Иисус Христос, во славу Бога Отца, аминь.
Таже: Буди имя Господне благословенно отныне и до века. Трижды.
Слава, и ныне:
Благословлю Господа: [псалом 33] и Вознесу Тя Боже мой, Царю мой: [псалом 144].
Посем, Достойно есть:
Слава, и ныне:
Господи, помилуй, трижды. Господи, благослови.
И отпуст.
Сия же бывают в Великий пост. Аще же ин пост, и пето аллилуиа, по поклонех, и Трисвятом, и по возгласе, Господи, помилуй, 12. Слава, и ныне: и паки: Господи, помилуй, трижды. Господи, благослови. И отпуст.
Аще же есть Бог Господь, по трисвятом отпустительный тропарь дне, и отпуст.