Евангелие воскресно 5-е,
От Луки, зачало …
Петр же востав тече ко гробу, и приник виде ризы едины лежаща: и отиде, в себе дивяся бывшему. И се два от них беста идуща в тойже день в весь, отстоящу стадий шестьдесят от Иерусалима, ейже имя Еммаус: и та беседоваста к себе о всех сих приключшихся. И бысть беседующема има и совопрошающемася, и Сам Иисус приближився идяше с нима: очи же ею держастеся, да Его не познаета. Рече же к нима: что суть словеса сия, о нихже стязаетася к себе идуща, и еста дряхла? отвещав же един, емуже имя Клеопа, рече к Нему: Ты ли един пришлец еси во Иерусалим, и не уведел еси бывших в нем во дни сия? И рече има: киих? Она же реста ему: яже о Иисусе Назарянине, иже бысть Муж Пророк, силен делом и словом пред Богом и всеми людьми: како предаша Его архиереи и князи наши на осуждение смерти, и распяша Его: мы же надеяхомся, яко Сей есть хотя избавити Израиля: но и над всеми сими, третий сей день есть днесь, отнелиже сия быша. Но и жены некия от нас ужасиша ны, бывшыя рано у гроба: и не обретша телесе Его, приидоша, глаголюща, яко и явление Ангел видеша, иже глаголют Его жива. И идоша нецыи от нас ко гробу, и обретоша тако, якоже и жены реша: Самаго же не видеша. И Той рече к нима: о несмысленная и косная сердцем, еже веровати о всех, яже глаголаша пророцы: не сия ли подобаше пострадати Христу и внити в славу свою? И начен от Моисеа и от всех пророк, сказаше има от всех писаний яже о Нем. И приближишася в весь, в нюже идяста: и Той творяшеся далечайше ити. И нуждаста Его, глаголюща: облязи с нама, яко к вечеру есть, и приклонился есть день. И вниде с нима облещи. И бысть яко возлеже с нима, и приим хлеб благослови, и преломив даяше има. Онема же отверзостеся очи, и познаста Его: и Той невидимь бысть има. И рекоста к себе: не сердце ли наю горя бе в наю, егда глаголаше нама на пути и егда сказоваше нама писания? И воставша в той час, возвратистася во Иерусалим, и обретоста совокупленных единагонадесяте и иже бяху с ними, глаголющих, яко воистинну воста Господь и явися Симону. И та поведаста, яже быша на пути, и яко познася има в преломлении хлеба.
Ексапостилларий 5.
Живот и путь, Христос воста из мертвых, Клеопе и Луце спутешествова, имаже и познася во Еммаусе, преломляяй хлеб: ихже душы и сердца горяща бяху, егда тема глаголаше на пути и писания сказоваше, яже претерпе. С нимиже, воста, зовем: явися же и Петрови.
Богородичен:
Пою безчисленную Твою милость, Творче мой, яко Себе истощил еси, понести и спасти человеческое естество озлобленое: и Бог сый, изволил еси от чистыя Богоотроковицы по мне быти и снити даже до ада, хотя ми спастися, молитвами Рождшия Тя, Владыко Всещедрый.
Утренняя стихира, глас 5.
О, премудрых судеб Твоих, Христе! Како Петру убо плащаницами единеми дал еси разумети Твое воскресение, Луце же и Клеопе спутешествуя, беседовал еси, и беседуяй не абие себе являеши? Темже и поносимь бываеши, яко един пришельствуяй во Иерусалим и не причащаяйся в конец совета их. Но Иже вся к создания пользе строя, и яже о Тебе пророчествия открыл еси, и внегда благословити хлеб, познался еси им, ихже и прежде того сердца к познанию Твоему распаластася: иже и учеником собранным уже ясно проповедаста Твое воскресение, имже помилуй нас.