Каждение. Диакон: Возми, владыко. При возложении на плечо воздуха: Возмите руки ваша во святая и благословите Господа.
Великий вход: Диакон: Великого Господина и Отца вселенского архиерея (имярек) Папу Римского и Господина нашего Высокопреосвященного митрополита (имярек) да помянет Господь Бог во Царствии Своем всегда: ныне, и присно, и во веки веков.
Преосвященныя митрополиты, архиепископы, и епископы, и весь священнический и монашеский чин, и причет церковный, братию святаго храма сего, вас и всех православных христиан, да помянет Господь Бог во Царствии Своем всегда: ныне, и присно, и во веки веков.
Народ: Аминь. Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа.
Диакону: Да помянет Господь Бог священнодиаконство твое во царствии своем всегда: ныне, и присно, и во веки веков.
При поставлении даров и каждении престола: Благообразный Иосиф с древа снем пречистое Тело Твое, плащаницею чистою обвив и благоуханьми во гробе нове покрыв, положи.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом вся исполняяй неописанный.
Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.
При покрытии даров: Благообразный Иосиф с древа снем пречистое Тело Твое, плащаницею чистою обвив и вонями во гробе нове покрыв, положи.
Кадя: Ублажи, Господи, благоволением Твоим Сиона, и да созиждутся стены иерусалимския: тогда благоволиши жертву правды, возношение и всесожегаемая, тогда возложат на олтарь Твой тельцы.
Священник кланяется диакону, говоря: Помяни мя, брате и сослужителю.
Диакон: Да помянет Господь Бог священство твое во царствии своем. Помолися о мне, владыко святый.
Священник: Дух святый найдет на тя, и сила Вышняго осенит тя.
Диакон: Тойже Дух содействует нам вся дни живота нашего. Помяни мя, владыко святый.
Священник: Да помянет тя Господь Бог во царствии своем всегда: ныне, и присно, и во веки веков.
Диакон: Аминь.