Ектенья
Исполним молитву нашу Господеви.
О предложенных Честных Дарех Господу помолимся.
О святем храме сем и с верою, благоговением и страхом Божиим входящих в онь Господу помолимся.
О избавитися нам от всякия скорби, гнева и нужды Господу помолимся.
Заступи, спаси, помилуй и сохрани нас, Боже, Твоею благодатию.
Дне всего совершенна, свята, мирна и безгрешна у Господа просим.
Народ: Подай, Господи.
Ангела мирна, верна наставника, хранителя душ и телес наших у Господа просим.
Прощения и оставления грехов и прегрешений наших у Господа просим.
Добрых и полезных душам нашым и мира мирови у Господа просим.
Прочее время живота нашего в мире и покаянии скончати у Господа просим.
Христианския кончины живота нашего, безболезненны, непостыдны, мирны, и добраго ответа на Страшнем судищи Христове просим.
Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Господи Боже наш, создавый нас и введый в жизнь сию, показавый нам пути во спасение, даровавый нам Небесных тайн откровение, Ты бо еси положивый нас в службу сию силою Духа Твоего Святаго, благоволи убо, Господи, быти нам служителем Новаго Твоего Завета, слугам Святых Твоих Таинств; приими нас, приближающихся святому Твоему Жертвеннику, по множеству милости Твоея, да будем достойны приносити Тебе словесную сию и Безкровную Жертву о наших согрешениих и о людских невежествиих, юже прием во святый, и пренебесный, и мысленной Твой Жертвенник в воню благоухания, возниспосли нам благодать Святаго Твоего Духа. Призри на ны, Боже, и виждь службу сию нашу, и приими ю, якоже приял еси Авелевы дары, Ноевы жертвы, Авраамова всеплодия, Моисеева и Аарбнова священства, Самуилова мирная. Якоже приял еси от святых Твоих апостол истинную сию службу, сице и от рук нас, грешных, приими Дары сия по благости Твоей, Господи, яко да, сподобльшеся служити без порока святому Твоему Жертвеннику, обрящем мзду верных и мудрых строителей в день страшный воздаяния Твоего праведнаго
щедротами единороднаго Сына Твоего, с Ним же благословен еси, со пресвятым, и благим, и животворящим Твоим Духом ныне, и присно, и во веки веков.
Народ: Аминь.
Мир всем.
Народ: И духови твоему.
Возлюбим друг друга, да единомыслием исповемы.
Народ: Отца, и Сына, и Святого Духа, Троицу Единосущную и Нераздельную.
Трижды: Возлюблю Тя, Господи, крепосте моя. Господь утверждение мое и прибежище мое.
Христос посреде нас.
И есть, и будет.
Двери, двери, премудростию вонмем.
Станем добре, станем со страхом, вонмем, святое возношение в мире приносити.
Народ: Милость мира, жертву хваления.
Благодать Господа нашего Иисуса Христа, и любовь Бога и Отца, и причастие Святаго Духа буди со всеми вами.
Народ: И со духом твоим.
Горе имеим сердца.
Народ: Имамы ко Господу.
Благодарим Господа.
Народ: Достойно и праведно есть поклонятися Отцу и Сыну и Святому Духу, Троице Единосущней и Нераздельней.