Благоволил eси, Господи, землю твою, возвратил eси плен иаковль. Оставил eси беззакония людий твоих, покрыл eси вся грехи их. Укротил eси весь гнев твой, возвратился eси от гнева ярости твоея. Возврати нас, Боже спасений наших, и отврати ярость твою от нас. Еда во веки прогневаешися на ны? или простреши гнев твой от рода в род? Боже, ты обращься оживиши ны, и людие твои возвеселятся о тебе. Яви нам, Господи, милость твою, и спасение твое даждь нам. Услышу, что речет о мне Господь Бог; яко речет мир на люди своя, и на преподобныя своя, и на обращающыя сердца к нему. Oбаче близ боящихся eго спасение eго, вселити славу в землю нашу. Милость и истина сретостеся, правда и мир облобызастася; истина от земли возсия, и правда с небесе приниче; ибо Господь даст благость, и земля наша даст плод свой. Правда пред ним предидет, и положит в путь стопы своя.