ПОСЛЕДОВАНИЕ УТРЕНИ

УТРЕНЯ ВСЕДНЕВНАЯ И ПОСТНАЯ

Текст греко-католический, но не по тому изданию, которое у меня есть (в нем подробно дана воскресная утреня, а не повсевдневная, которые даны лишь в очень кратком изложении ).

Аще великая четыредесятница, по Благословен Бог наш: глаголем: Трисятое. Пресвятая Троице: По Отче наш: Господи, помилуй, 12. Слава, и ныне: Приидите, поклонимся: трижды и два псалма.

Аще же ни, по благословении: Приидите, поклонимся: трижды, и псалмы.

Псалом 19

Услышит тя Господь в день печали, защитит тя имя Бога иаковля. Послет ти помощь от святаго, и от Сиона заступит тя. Помянет всяку жертву твою, и всесожжение твое тучно буди. Даст ти Господь по сердцу твоему, и весь совет твой исполнит. Возрадуемся о спасении твоем, и во имя Господа Бога нашего возвеличимся: исполнит Господь вся прошения твоя. Ныне познах, яко спасе Господь христа своего, услышит его с небесе святаго своего, в силах спасение десницы его. Сии на колесницах, и сии на конех, мы же во имя Господа Бога нашего призовем. Тии спяти быша и падоша: мы же востахом и исправихомся. Господи, спаси царя, и услыши ны, воньже аще день призовем тя.

Псалом 20

Господи, силою твоею возвеселится царь, и о спасении твоем возрадуется зело. Желание сердца его дал еси ему, и хотения устну его неси лишил его. Яко предварил еси его благословением благостынным: положил еси на главе его венец от камене честна. Живота просил есть у тебе, и дал еси ему в долготу дний во век века. Велия слава его спасением твоим, славу и велелепие возложиши на него. Яко даси ему благословение во век века, возвеселиши его радостию с лицем твоим. Яко царь уповает на Господа, и милостию вышняго не подвижится. Да обрящется рука твоя всем врагом твоим: десница твоя да обрящет вся ненавидящыя тебе. Яко положиши их яко пещь огненную, во время лица твоего. Господь гневом своим смятет я, и снесть их огнь. Плод их от земли погубиши, и семя их от сынов человеческих. Яко уклониша на тя злая, помыслиша советы, ихже не возмогут составити. Яко положиши я хребет: во избытцех твоих уготовиши лице их. Вознесися, Господи, силою твоею, воспоем и поем силы твоя.

Слава, и ныне: Трисвятое. Пресвятая Троице: Отче наш: Яко Твое есть царство:

И тропари сия: Спаси, Господи, люди Твоя, и благослови достояние Твое, победы благоверным царем на сопротивныя даруя, и Твое сохраняя крестом Твоим жительство.

Слава: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

И ныне: Предстательство страшное и непостыдное, не презри, благая, молитв наших, всепетая Богородице: утверди православных жительство, спаси благоверных царей, имже повелела еси царствовати, и подаждь им с небесе победу, зане родила еси Бога, едина благословенная.

Иерей: Помилуй нас, Боже, по велицей милости Твоей, молимтися, услыши и помилуй.

Лик: Господи, помилуй, трижды.

Еще молимся о богохранимых царех и о всем воинстве.

Лик: Господи, помилуй, трижды.

Возглас: Яко милостив и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Чтец: Именем господним благослови, отче.

Иерей: Слава святей, и единосущней, и животворящей, и нераздельней Троице, всегда, ныне и присно, и во веки веков.

Лик: Аминь.

И начинаем шестопсалмие, со всяким молчанием и умилением слушающе.

Учиненный же брат со благоговением и страхом божиим глаголет:

Слава в вышних Богу, и на земли мир, в человецех благоволение. Трижды.

Господи, устне мои отверзеши, и уста моя возвестят хвалу Твою. Дважды.

Псалом 3

Господи, что ся умножиша стужающии ми; мнози востают на мя: Мнози глаголют души моей, несть спасения ему в Бозе его. Ты же, Господи, заступник мой еси, слава моя, и возносяй главу мою. Гласом моим ко Господу воззвах, и услыша мя от горы святыя своея. Аз уснух и спах: востах, яко Господь заступит мя. Не убоюся от тем людей, окрест нападающих на мя. Воскресни, Господи, спаси мя, Боже мой, яко Ты поразил еси вся враждующыя ми всуе: зубы грешников сокрушил еси. Господне есть спасение, и на людех твоих благословение твое.

Аз уснух и спах: востах, яко Господь заступит мя.

Псалом 37

Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя и свет очию моею, и той несть со мною. Друзи мои, и искреннии мои прямо мне прибаижишася и сташа: И ближнии мои отдалече мене сташа, и нуждахуся имущии душу мою: и ищущии злая мне, глаголаху суетная, и льстивным весь день поучахся. Аз же яко глух не слышах, и яко нем не отверзаяй уст своих. И бых яко человек не слышай, и не имый во устех своих обличения. Яко на тя, Господи, уповах, ты услышиши, Господи Боже мой. Яко рех: да не когда порадуютмися врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая возблагая, оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.

Не остави мене, Господи Боже мой, не отступи от мене.

Вонми в помощь мою, Господи спасения моего.

Псалом 62

Боже, Боже мой, к тебе утреннюю, возжада тебе душа моя, коль множицею тебе плоть моя, в земли пусте и непроходне и безводне. Тако со святем явихся тебе, видети силу твою и славу твою. Яко лучши милость твоя паче живот, устне мои похвалите тя. Тако благословлю тя в животе моем, о имени твоем воздежу руце мои. Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя: Яко был еси помощник мой, и в крове крилу твоею возрадуюся. Прильпе душа моя по тебе, мене же прият десница твоя. Тии же всуе искаша душу мою, внидут в преисподняя земли. Предадятся в руки оружия, части лисовом будут. Царь же возвеселится о Бозе: похвалится всяк кленыйся им, яко заградишася уста глаголющих неправедная.

На утренних поучахся в тя, яко был еси помощник мой, и в крове крилу твоею возрадуюся.

Прильпе душа моя по тебе, мене же прият десница твоя.

Слава, и ныне:

Аллилуиа, аллилуиа, аллилуиа, слава Тебе, Боже. Трижды без поклонов.

Господи, помилуй, трижды.

Слава, и ныне:

Иерей же глаголет тайно молитвы утренния, стоя непокровен пред святыми дверьми.

Псалом 87

Господи Боже спасения моего, во дни воззвах, и в нощи пред Тобою. Да внидет пред Тя молитва моя, приклони ухо Твое к молению моему. Яко исполнися зол душа моя, и живот мой аду приближися. Привменен бых с низходящими в ров, бых яко человек без помощи, в мертвых свободь. Яко язвеннии спящии во гробе, ихже не помянул еси ктому, и тии от руки Твоея отриновени быша. Положиша мя в рове преисподнем, в темных и сени смертней. На мне утвердися ярость Твоя, и вся волны Твоя навел еси на мя. Удалил еси знаемых моих от мене: положиша мя мерзость себе; предан бых и не исхождах. Очи мои изнемогосте от нищеты; воззвах к Тебе, Господи, весь день, воздех к Тебе руце мои. Еда мертвыми твориши чудеса; или врачеве воскресят, и исповедятся тебе; Еда повесть кто во гробе милость твою, и истину твою в погибели; Еда познана будут во тьме чудеса Твоя, и правда в земли забвенней? И аз к Тебе, Господи, воззвах, и утро молитва моя предварит Тя. Вскую, Господи, отрееши душу мою, отвращаеши лице Твое от мене; нищ есмь аз, и в трудех от юности моея, вознес же ся, смирихся и изнемогох. На мне предидоша гневи Твои, устрашения Твоя возмутиша мя. Обыдоша мя яко вода, весь день одержаша мя вкупе. Удалил еси от мене друга и искренняго, и знаемых моих от страстей.

Господи Боже спасения моего, во дни воззвах, и в нощи пред Тобою. Да внидет пред Тя молитва моя, приклони ухо Твое к молению моему.

Псалом 102

Благослови, душе моя, Господа, и вся внутренняя моя, Имя святое Его. Благослови, душе моя, Господа и не забывай всех воздаяний Его; очищающаго вся беззакония твоя, исцеляющаго вся недуги твоя, избавляющаго от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Творяй милостыни Господь, и судьбу всем обидимым. Сказа пути Своя Моисеови, сыновом израилевым хотения Своя. Щедр и милостив Господь, долготерпелив и многомилостив. Не до конца прогневается, ниже в век враждует. Не по беззакониям нашим сотворил есть нам, ниже по грехом нашим воздал есть нам. Яко по высоте небесней от земли, утвердил есть Господь милость Свою на боящихся его. Елико отстоят востоцы от запад, удалил есть от нас беззакония наша. Яко же щедрит отец сыны, ущедри Господь боящихся Его. Яко Той позна создание наше, помяну, яко персть есмы. Человек, яко трава, дние его, яко цвет сельный, тако оцветет; яко дух пройде в нем, и не будет и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его, творити я. Господь на небеси уготова престол свой, и Царство Его всеми обладает. Благословите Господа вси ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его. На всяком месте владычествия Его, благослови, душе моя, Господа.

На всяком месте владычествия Его, благослови, душе моя, Господа.

Псалом 142

Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой: посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творении руку Твоею поучахся. Воздех к Тебе руце мои: душа моя яко земля безводная Тебе. Скоро услыши мя, Господи, исчезе дух мой: не отврати лица Твоего от мене, и уоподоблюся низходящим в ров. Слышану сотвори мне заутра милость Твою, яко на Тя уповах. Скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою; и милостию Твоею потребиши враги моя, и погубиши вся стужающия души моей, яко аз раб Твой есмь.

Услыши мя, Господи, в правде Твоей, и не вниди в суд с радом Твоим. Услыши мя, Господи, в правде Твоей, и не вниди в суд с рабом Твоим. Дух Твой Благий наставит мя на землю праву.

Слава, и ныне:

Аллилуиа, аллилуиа, аллилуиа, слава Тебе Боже. Трижды.

Шестопсалмию читаему, иерей глаголет молитвы сия:

Молитва первая

Благодарим Тя, Господи Боже наш, возставившаго нас от ложей наших, и вложившаго во уста наша слово хваления, еже поклонятися, и призивати имя Твое святое: и молимся Твоим щедротам, ихже всегда употреблял еси о нашей жезни: и ныне посли помощь Твою на предстоящыя пред лицем святыя славы Твоея и ожидающыя от Тебе богатыя милости: и даждь им, со страхом и любовию всегда Тебе служащым, хвалит неисповедимую Твою благость.

Яко подобает Тебе всякая слава, честь и поклонение, Отцу, и Сыну, и святому Духу, ныне и присно, и во веки веков, аминь.

Молитва вторая

От нощи утренюет дух наш к Тебе, Боже наш, зане свет повеления Твоя на земли. Правду и святыню совершати во страсе Твоем вразуми ны: Тебе бо славим, воистину сущаго Бога нашего. Приклони ухо Твое, и услыши ны, и помяни, Господи, сущыя и молящыяся с нами вся по имени, и спаси я силою Твоею. Благослови люди Твоя, и освяти достояние Твое, мир мирови Твоему даруй, церквам Твоим, священником, богохранимым царем и всем людем Твоим.

Яко благословися и прославися всечестное и великолепое имя Твое, Отца, и Сына, и святаго Духа, ныне и присно, и во веки веков, аминь.

Молитва третия

От нощи утренюет дух наш к Тебе, Боже, зане свет повеления Твоя. Научи нас, Боже, правде Твоей, заповедем Твоим и оправданием Твоим. Просвети очи мыслей нашх, да не когда уснем во гресех в смерть. Отжени всякий мрак от сердец наших. Даруй нам солнце правды, и ненаветну жизнь нашу соблюди печатию святаго Твоего Духа. Исправи стопы нашя на путь мира. Даждь нам видети утро и день в радовании, да Тебе утренния возсылаем молитвы.

Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков, аминь.

Молитва четвертая

Владыко Боже, святый и непостижимый, рекий из тьмы свету возсияти, упокоивый нас в нощнем сне, и возставивый к славословию и мольбе Твоея благости, умоляемь от своего Ти благоутробия, приими нас и ныне поклоняющихся Тебе, и по силе благодарящих Тя, и даруй нам вся, яже ко спасению, прошения. Покажи ны сыны света и дне, и наследники вечных Твоих благ. Помяни, Господи, во множестве щедрот Твоих, и вся люди Твоя, сущыя и молящыяся с нами, и всю братию нашу, яже на земли, на мори, на всяком месте владычествия Твоего, требующих Твоего человеколюбия и помощи, и всем подай великую Твою милость: да спасени душею же и телом, всегда пребывающе, со дерзновением славим чудное и благословенное имя Твое.

Яко Бог милости, щедрот, и человеколюбия еси, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Молитва пятая

Благих сокровище, источниче приснотекущий, Отче святый, чудотворче, всесильне, и вседержителю, вси Тебе поклоняемся, и Тебе молимся, Твоя милости и Твоя щедроты призывающе на помощь и заступление нашего смирения: помяни, Господи, Твоя рабы, прими всех нас утренняя моления, яко кадило пред Тобою, и да ни единаго от нас неискусна сотвориши, но вся ны снабди щедротами Твоими. Помяни, Господи, бдящыя и поющыя во славу Твою, и единороднаго Твоего Сына и Бога нашего, и святаго Твоего Духа: буди тем помощник и заступник, приими их мольбы в пренебесный и мысленный Твой жертвенник.

Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Молитва шестая

Благодарим Тя, Господи Боже спасений наших, яко вся твориши во благодетельство жизни нашея, да всегда к Тебе взираем, спасу и благодетелю душ наших: яко препкоил еси нас в мимошедшее нощи число, и воздвигл еси ны от лож наших, и поставил еси в поклонение честнаго имене Твоего. Темже молим Тя, Господи, даждь нам благодать и силу, да сподобимся пети о Тебе разумно, и молитися непрестанно, во страсе и трепете свое спасение соделовающе заступлением Христа Твоего. Помяни, Господи, и в нощи к Тебе вопиющыя, услыши я и помилуй, и сокруши под нозе их невидимыя и борительныя враги.

Ты бо еси царь мира, и спас душ наших, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Молитва седмая

Боже и Отче Господа нашего Иисуса Христа, возставивый ны от ложей наших, и собравый ны в час молитвы, даждь нам благодать во отверзение уст наших, и приими наша по силе благодарения, и научи ны оправданием Твоим: зане помолитися, якоже подобает, не вемы, аще не Ты, Господи, святым Твоим Духом наставиши ны. Темже молимся Тебе: аще что согрешихом даже до настоящаго часа, словом или помышлением, волею или неволею, ослаби, остави, прости: аще бо беззакония назриши, Господи, Господи, кто постоит; яко у Тебе избавление есть: Ты еси един святый, помощник державный, защититель жизни нашея, и о Тебе пение наше всегда.

Буди держава царствия Твоего благословена и препрославлена, Отца, и Сына, и святаго Духа, ныне и присно, и во веки веков, аминь.

Молитва осмая

Господи Боже наш, сонное уныние отгнавый от нас, и сопризвавый ны званием святым, еже и в нощи воздевати руки нашя, и исповедатися Тебе о судьбах правды Твоея, приими мольбы нашя, моления, исповедания, нощныя службы. И даруй нам, Боже, веру непостыдну, надежду известну, любовь нелицемерну. Благослови нашя входы и исходы, деяния, дела, словеса, помышления. И даждь нам постигнути в начало дне, хвалящым, поющыя, благословящым Твоея неизреченныя благостыни благость.

Яко благословися всесвятое имя Твое, и прославися царство Твое, Отца, и Сына, и святаго Духа, ныне и присно, и во веки веков, аминь.

Молитва девятая

Возсияй в сердцах наших, человеколюбче Владыко, Твоего богоразумия нетленный свет, и мысленныя наша отверзи очи, во евангельских Твоих проповеданий разумение. Вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще.

Ты бо просвещение душ и телес наших, Христе Боже, и Тебе славу возсылаем, со безначальным Твоим Отцем, и всесвятым и благим и животворяящим Твоим Духом, ныне и присно, и во веки веков, аминь.

Молитва перваянадесятая

Боже, Боже наш, умныя и словесныя составивый силы Твоею волею, Тя молим, и Тебе мили деемся: приими наше по силе славословие, со всеми создании Твоими, и богатыми Твоея благости воздаждь дарованьми: яко Тебе преклоняется всякое колено небесных и земных, и преисподних, и всякое дыхание и создание поет непостижимую Твою славу: един бо еси Бог истинный и многомилостивый.

Яко Тя хвалят вся силы небесныя, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Молитва втораянадесятая

Хвалим, поем, благословим и благодарим Тя, Боже отец наших, яко превел еси сень нощную, и показал еси нам паки свет дневный. Но молим Твою благость: очисти грехи нашя, и приими моление наше, великим Твоим благоутробием, яко к Тебе прибегаем милостивому, и всесильному Богу. Возсияй в сердцах наших истинное солнце правды Твоея, просвети ум наш, и чувства вся соблюди, да яко во дни благообразно ходяще путем заповедей Твоих, достигнем в жизнь вечную: яко у Тебе есть источник жизни, и в наслаждение быти сподобимся непреступнаго Твоего света.

Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Таже ектения великая:

Миром Господу помолимся.

На едином коемждо прошению лик поет: Господи, помилуй.

О свышнем мире, и спасении душ наших, Господу помолимся.

О мире всего мира, благостоянии святых божиих церквей, и соединении всех, Господу помолимся.

О святем храме сем, и с верою, благоговением, и страхом божиим входящих в онь, Господу помолимся.

О господине нашем святейшем вселенстем Архиерее имя рек Папе Римстем, и о господине нашем Митрополите (или Архиепископе, или Епископе) нашем имя рек, егоже есть область, честнем пресвитерстве, во Христе диаконстве, и всем причте и людех, Господу помолимся.

О богохранимом государе нашем Императоре (или Короле,) имя рек, (или О предержащих властех наших) и о всем воинстве, Господу помолимся.

О граде сем (или О веси сей, или О святей обители сей), всяком граде, стране, и верою живущих в них, Господу помолимся.

О благорастворении воздухов, о изъобилии плодов земных, и временех мирных, Господу помолимся.

О плавающих, путешествующих, недугующих, страждующих, плененных, и о спасении их, Господу помолимся.

О избавитися нам от всякия скорби, гнева и нужды, Господу помолимся.

Заступи, спаси помилуй, и сохрани нас, Боже, Твоею благодатию.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашение: Яко подобает Тебе всякая слава, честь и поклонение, Отцу и Сыну, и святому Духу, ныне и присно, и во веки веков.

Лик: Аминь.

И абие поется во глас тропаря настоящаго дне:

Бог Господь, и явися нам, благословен грядый во имя господне.

Стих 1: Исповедайтеся Господеви, яко благ, яко в век милость его.

Стих 2: Обышедше обыдоша мя, и именем господним противляхся им.

Стих 3: Не умру, но жив буду, и повем дела господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

Таже глаголем тропарь случившийся дважды, и богородичен в тойже глас. Аще случатся два тропаря, всегда первый глаголется дважды, таже вторый и богородичен.

Аще же есть Аллилуиа, или великая 40-ца, вместо Бог Господь, поем Аллилуиа, трижды, во глас осмогласника.

Стихи же глаголются сия:

Стих 1: От нощи утренюет дух мой к Тебе, Боже: зане свет повеления Твоя на земли.

Стих 2: Правде научитеся, живущии на земли.

Стих 3: Зависть приимет люди ненаказанныя.

Стих 4: Приложи им зла, Господи, приложи зла славным земли.

И по Аллилуиа, троичны гласа, кийждо по единожды.

Песни троичны, глас 1:

Плотскими образовании безплотных сил к мысленному и невещественному возводими уму, и трисвятою песнию триипостаснаго божества приемлюще сияние, херувимски возопиим единому Богу: свят, свят, свят еси, Боже наш:

Слава: Со всеми небесными силами, херувимски сущему в вышних возопиим, трисвятую возсылающе хвалу: свят, свят, свят еси, Боже наш, молитвами всех святых Твоих помилуй нас.

И ныне: Воставше от сна, припадем Ти, блаже, и ангельскую песнь вопием Ти, сильне: свят, свят, свят еси, Боже, Богородицею помилуй нас.

Ведомо буди, как глаголати в концах во всех первых троичных осми гласов:

В понедельник глаголати сице: Предстательствы безплотных Твоих помилуй нас.

Во вторник: Молитвами предтечи Твоего помилуй нас.

В среду: Силою креста Твоего сохрани нас, Господи.

Такожде и в пяток.

В четверток: Молитвами святых апостол Твоих и святителя Николаа, помилуй нас.

А у прочих двою троичнов глаголати, якоже в концах их писано есть.

Песни троичны, глас 2:

Вышния силы подражающе на земли, победную песнь приносим Ти, блаже: свят, свят, свят еси, Боже наш:

Слава: Несозданное естество всех зиждителю, устне наша отверзи, яко да возвестим хвалу Твою, вопиюще: свят, свят, свят еси Боже наш, молитвами всех святых Твоих помилуй нас.

И ныне: От одра и сна воздвигл мя еси, Господи, ум мой просвети и сердце, и устне мои отверзи, во еже пети Тя, святая Троице: свят, свят, свят еси, Боже, Богородицею помилуй нас.

Песни троичны, глас 3:

Троице единосущная и нераздельная, единице триипостасная и соприсносущная, Тебе яко Богу ангельскую песнь вопием: свят, свят, свят еси, Боже наш:

Слава: Отца безначальна, Сына собезначальна, Духа соприсносущна, божество едино, херувимски славословити дерзающе, глаголем: свят, свят, свят еси, Боже наш, молитвами всех святых Твоих помилуй нас.

И ныне: Напрасно судия приидет, и коегождо деяния обнажатся, но страхом зовем в полунощи: свят, свят, свят еси, Боже наш, Богородицею помилуй нас.

Песни троичны, глас 4:

Умных Твоих слуг приносити смертнии песнь дерзающе, глаголем: свят, свят, свят еси, Боже наш:

Слава: Яко чини ныне ангельстии на небеси, и стояния страхом человеческая на земли, победную песнь приносим Ти, блаже: свят, свят, свят еси, Боже наш, молитвами всех святых Твоих помилуй нас.

И ныне: Безначальнаго Твоего Отца, и Тебе, Христе Боже, и пресвятаго Твоего Духа, херувимски славословити дерзающе, глаголем: свят, свят, свят еси, Боже наш, Богородицею помилуй нас.

Песни троичны, глас 5:

Пению время, и молитве час, прилежно возопиим единому Богу: свят, свят, свят еси, Боже наш:

Слава: Образовати дерзающе умная Твоя воинства, Троице безначальная, усты недостойными вопием: свят, свят, свят еси, Боже наш, молитвами всех святых Твоих помилуй нас.

И ныне: Иже в ложесна девическая вместивыйся, и недр отеческих не разлучивыйся, со ангелы и нас, Христе Боже, приими вопиющих Ти: свят, свят, свят еси, Боже наш, Богородицею помилуй нас.

Песни троичны, глас 6:

Предстояще со страхом херувими, ужасающеся с трепетом серафими, трисвятую песнь приносят немолчным гласом, с нимиже и мы вопием грешнии: свят, свят, свят еси, Боже наш:

Слава: Безплотными усты, немолчными словословеньми, шестокрильнии вопиют Ти трисвятую песнь, Боже наш, и мы иже на земли недостойными усты хвалу Ти возсылаем: свят, свят, свят еси, Боже наш, молитвами всех святых Твоих помилуй нас.

И ныне: Троичныя единицы божество неслиянным соединением славим, и ангельскую песнь вопием: свят, свят, свят еси, Боже наш, Богородицею помилуй нас.

Песни троичны, глас 7:

Вышнею силою херувимски воспеваемый, и божественному славою ангельски покланяемый, приими и нас сущих на земли, недостойными устнами хваление Тебе возсылающих: свят, свят, свят еси, Боже наш:

Слава: Яко сон, леность отложивши, душе, исправление ко хвалению покажи судии, и со страхом возопий: свят, свят, свят еси, Боже наш, молитвами всех святых Твоих помилуй нас.

И ныне: Неприступному божеству во единице Троице, серафимскую трисвятую возсылающе хвалу, со страхом возопим: свят, свят, свят еси, Боже наш, Богородицею помилуй нас.

Песни троичны, глас 8:

На небо сердца имуще, ангельский подражим чин, и со страхом судии припадем, победную взывающе хвалу: свят, свят, свят еси, Боже наш:

Слава: Зрети Тебе не смеюще херувими, летяще зовут со восклицанием божественную песнь трисвятаго гласа, с нимиже и мы вопием Ти: свят, свят, свят еси, Боже наш, молитвами всех святых Твоих помилуй нас.

И ныне: Сляцаеми множеством прегрешений наших, и не смеюще воззрети на высоту небесную, душу с телом преклоньше, со ангелы песнь вопием Ти: свят, свят, свят еси, Боже наш, Богородицею помилуй нас.

Таже стихословим псалтирь.

В повседневной утрени, ектений по кафисмах не бывают, кроме суббот, святых с великим славословием, предпразднства и празднства.

По исполнении же перваго стихословия, творит диакон, или иерей, малую ектению:

Паки и паки миром Господу помолимся.

Лик: Господи, помилуй.

Заступи, спаси, помилуй, и сохрани нас, Боже, Твоею благодатию.

Лик: Господи, помилуй.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашение: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.

Лик: Аминь. И седален по чину.

По 2-м стихословии: Паки и паки: и прочая.

Возглашение: Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь. И седален по чину.

От Пасхи до отдания по стихословии глаголем:

Воскресение христово видевше, поклонимся святому Господу Иисусу, единому безгрешному, Кресту Твоему поклоняемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, все вернии, поклонимся святому христову воскресению: се бо прииде крестом радость всему миру. Всегда благословяще Господа, поем воскресение его: распятие бо претерпев, смертию смерть разруши.

Посем, псалом 50:

Помилуй мя, Боже, по велицей милости Твоей, и по множеству щедрот Твоих, очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих: яко да оправдишися во словесех Твоих и победиши внегда судити ти. Се бо в беззакониих зачат есмь и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся; омыеши мя, и паче снега убелюся. Слуху моему даси радость и веселие: и возрадуются кости смиренные. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отъими от мене. Воздаждь ми радость спасения Твоего, и Духом владычным утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу – дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожигаемая: тогда возложат на олтарь Твой тельцы.

Таже, аще есть святая и великая четыредесятница, кроме суббот и четвертка великаго канона, диакон, или иерей, глаголет молитву сию:

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодеы Марии; силою честнаго и животворящаго Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных и всехвальных Апостол; (или святаго апостола и евангелиста имя рек, и прочиих святых славных и всехвальных Апостол), иже во святых отец наших и вселенских учителей и святителей, Василия Великаго, Григория Богослова и Иоанна Златоустаго; иже во святых отца нашего Николая, архиепископа Мирликийскаго, Чудотворца; святых равноапостольных Мефодия и Кирилла, учителей Словенских, святаго благовернаго и равноапостольнаго великаго князя Владимира, святых славных и добропобедных мучеников; святыя великомученицы Варвары; преподобных и богоносных отец наших Антониа и Феодосиа Печерских, и святаго, (имя рек, егоже есть храм, и егоже есть день), святых и праведных Богоотец Иоакима и Анны, и всех святых; молим Тя, многомилостиве Господи, услыши нас грешных молящихся Тебе, и помилуй нас.

Лик: Господи, помилуй, 12.

Иерей возглас: Милостию и щедротами, и человеколюбием единороднаго Твоего Сына, с нимже благословен еси, со пресвятым и благим и животворящим Твоим Духом, ныне и присно, и во веки веков.

Лик: Аминь.

И начинаем песни и каноны.

По 3-й песни творит иерей малую ектению: Паки и паки: Заступи, спаси: Пресвятую, пречистую:

Возглашение: Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь. Таже седален.

По 6-й песни ектениа: Паки и паки: Заступи, спаси: Пресвятую, пречистую:

Возглашение: Ты бо еси царь мира, и спас душ наших, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Кондак, и икос. И чтение в синаксарии.

По окончании катавасии восмой песни, диакон или иерей возглашают: Богородицу и Матерь света в песнех возвеличим.

Песнь Богородицы, от Луки святаго евангелия.

Старий припев: Богородицу в песнех возвеличим.

Величит душа моя Господа, и возрадовася дух мой о Бозе спасе моем.

К коемуждо же стиху припеваем: Честнейшую херувим и славнейшую без сравения серафим, без истления Бога Слова рождшую, сущую Богородицу тя величаем.

Яко призре на смирение рабы своея, се бо от ныне ублажат мя вси роди.

Яко сотвори мне величие сильный, и свято имя его, и милость его в роды родов боящымся его.

Сотвори державу мышцею своею, расточи гордыя мыслию сердца их.

Низложи сильныя со престол, и вознесе смиренныя, алчущыя исполни благ, и богатящыяся отпусти тщы.

Восприят Исраиля отрока своего, помянути милости, якоже глагола ко отцем нашым, Аврааму и семени его даже до века.

По девятой песни: Достойно есть яко воистину блажити тя Богородицу, присноблаженную и пренепорочную и Матерь Бога нашего. Честнейшую херувим и славнейщую без сравнения серафим, без истления Бога Слова рождшую, сущую Богородицу тя величаем.

Аще предпразднство же или попразднство. Достойно есть: не поется, но абие ектениа.

По 9 песни, ектениа: Паки и паки: Заступи, спаси: Пресвятую, пречистую:

Возглашение: Яко Тя хвалят вся силы небесныя, и Тебе славу возсылаем, отцу, и Сыну, и святому Духу, ныне и присно, и во веки веков.

Лик: Аминь.

По сем ексапостиларии праздника или дне, по уставу, в случившийся глас.

ЕКСАПОСТИЛАРИА ВСЕЯ СЕДМИЦЫ

В понедельник: Небо звездами украсивый яко Бог, и Твоими ангелы всю землю просветивый, содетелю всех, поющыя Тя спасай.

Богородичен: Сладость ангелов, скорбящих радость, христиан предстательница, дево Мати господня, заступи нас, и избави вечных мук.

Во вторник: Предтечу Иоанна, и крестителя спасова, во пророцех пророка, и пустыни воспитание, елисаветино рождение, восхвалим вси.

Богородичен: Сладость ангелов, скорбящих радость, христиан предстательница, дево Мати господня, заступи нас, и избави вечных мук.

В среду и пяток: Крест хранитель всея вселенныя, крест красота церкве, крест царей держава, крест верных утверждение, крест ангелов слава, и демонов язва.

Крестобогородичен: У креста предстоящи тя безсеменно рождшая, и рыдающе вопияше: увы сладчайшее чадо, како зашел еси от очию моею; како в мертвых вменился еси;

В четверток, подобен: Жены услышите: Во всю подсолнечную текше, проповедасте христово от девы святое воплощение воистинну, от прелести обращающе языки, и просвещающе, и вся научающе Троицу почитати святую, апостоли спасовы.

Подобен: Великаго началопастыря, и иерарха вси, председателя мирликийскаго Николаа хвалим: многи бо мужи спасе, неправедно умрети имущыя: царю является со Авлавием во сне, решя неправедное изречение.

Богородичен: Марие честнейшая, златая кадильнице, невместимаго божества приятелице бывшее, в немже Отец благоволи, Сын же вселися, и Дух святый осенив тя, отроковице, показа Богородицу.

В субботу: Иже и мертвыми и живыми обладаяй яко Бог, и святыми Твоими всю землю просветивый, создателю всех, поющыя Тя спасай.

Богородичен: Мы о тебе хвалимся, Богородице, и к Богу тя имамы предстательство, простри руку твою необоримую, и сокруши враги нашя, твоим низпосли рабом помощь от святаго.

СВЕТИЛЬНЫ

Аще же есть четыредесятница, глаголем светильны по трижды в случившийся глас.

Во исполнения же светильнов глаголем сице:

В понедельник убо к первому: Предстательствы безплотных Твоих, и спаси мя.

Во вторник: Молитвами, Господи, предтечи Твоего, и спаси мя.

В среду и в пяток: Силою, Господи, креста Твоего, и спаси мя.

В четверток: Молитвами, Господи, апостол Твоих, и святителя Николаа, и спаси мя.

Во второе на Слава, глаголати всегда в концах: Молитвами, Господи, святых Твоих, и спаси мя.

В третие же на И ныне, в концах глаголати: Молитвами, Господи, Богородицы, и спаси мя.

В шестом же гласе, в начале светильна, вместо: Предстательствы, Господи, безплотных: Аще во вторник глаголется сице: Молитвами, Господи, предтечи Твоего: и прочая тамо до конца глаголи.

В среду же и в пяток, вместо: Предстательствы, Господи, безплотных: в начале глаголати сице: Силою креста Твоего, Господи, низплосли душам нашым свет Твой присносущный.

В четверток же сице: Молитвами, Господи, святых апостол Твоих, и святителя Николаа, низпосли душам нашым свет Твой присносущный.

Во второе, на Слава, глаголати в начале светильна сице: Молитвами, Господи, всех святых, низпосли душам нашым свет Твой присносущный.

В третие же, на И ныне, в начале светильна глаголати сице: Молитвами, Господи, Богородицы, низпосли душам нашым свет Твой присносущный.

Глас 1: Свет возсияй, Господи, душу мою очисти от всякаго греха, (предстательствы безплотных Твоих), и спаси мя.

Глас 2: Свет Твой присносущный низпосли, Христе Боже, и просвети очи тайныя сердца моего, (предстательствы безплотных Твоих), и спаси мя.

Глас 3: Низпосли свет Твой, Христе Боже, и просвети сердце мое, (предстательствы безплотных Твоих), и спаси мя.

Глас 4: Свет возсияй миру Твоему, во тьме душу мою сущую от всякаго греха очисти, (предстательствы безплотных Твоих), и спаси мя.

Глас 5: Светодавче Господи, низпосли свет Твой, и просвети сердце мое, (предстательствы безплотных Твоих), и спаси мя.

Глас 6: (Предстательствы безплотных Твоих), низпосли душам нашым свет Твой присносущный.

Глас 7: Воздвигни мя, Господи, к Твоему песнопению, и научи мя творити волю Твою, святый, (предстательствы безплотных Твоих), и спаси мя.

Глас 8: Свет сый, Христе, просвети мя Тобою, (предстательствы безплотных Твоих), и спаси мя.

И абие

ХВАЛИТНЫ

Аще убо есть святый имеяй великое славословие, поется Всякое дыхание: и прочая, якоже указася в утрени воскресной.

Аще же иный день, сице:

Первый лик: Хвалите Господа с небес.

Припев: Тебе подобает песнь Богу.

Тойже лик: Хвалите Господа с небес, хвалите его в вышних.

Тебе подобает песнь Богу.

Вторый лик: Хвалите его вси ангели его, хвалите его вся силы его.

Тебе подобает песнь Богу.

Хвалите его солнце и луна, хвалите его вся звезды и свет. Хвалите его небеса небес, и вода яже превыше небес. Да восхвалят имя господне: яко той рече, и быша: той повеле, и создашася. Постави я в век и в век века: повеление положи, и не мимо идет. Хвалите Господа от земли, змиееве, и вся бездны: огнь, град, снег, голоть, дух бурен, творящая слово его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да восхвалят имя господне, яко вознесеся имя того единаго: исповедание его на земли и на небеси. И вознесет рог людей своих: песнь всем преподобным его, сыновом исраилевым, людем приближающымся ему.

Псалом 149

Воспойте Господеви песнь нову, хваление его в церкви преподобных. Да возвеселится Исраиль о сотворшем его, и сынове Сиони возрадуются о царе совем: Да восхвалят имя его в лице, в тимпане и псалтири да поют ему. Яко благоволит Господь в людех своих, и вознесет кроткия во спасение. Восхвалятся преподобнии во славе, и возрадуются на ложах своих. Возношение божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

От зде начинаем стихиры, аще есть:

На 6: Сотворити в них суд написан: слава сия будет всем преподобным его.

Псалом 150

Хвалите Бога во святых его, хвалите его во утвержении силы его.

На 4: Хвалите его на силах его, хвалите его по множеству величествия его.

Хвалите его во гласе трубнем, хвалите его во псалтири и гуслех.

Хвалите его в тимпане и лице, хвалите его во струнах и органе.

Хвалите его в кимвалех доброгласных, хвалите его в кимвалех восклицания. Всякое дыхание да хвалит Господа.

Аще стихир хвалитных не будет, то, по Слава, и ныне, глаголем сице: Тебе слава подобает, Господи Боже наш, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Аще же положены стихиры святому, или предпразднству, или попразднству, тогда по стихирах абие: Слава Тебе показавшему нам свет.

Слава в вышних Богу, и на земли мир, в человецех благоволение. Хвалим Тя, благословим Тя, кланяемтися, славословим Тя, благодарим Тя, великия ради славы Твоея. Господи царю небесный, Боже Отче вседержителю, Господи Сыне единородный, Иисусе Христе, и святый Душе. Господи Боже, агнче божий, Сыне отечь, вземляй грех мира, помилуй нас: вземляй грехи мира, приими молитву нашу. Седяй одесную Отца, помилуй нас. Яко Ты еси един свят, Ты еси един Господь, Иисус Христос, во славу Бога Отца, аминь.

На всяк день благословлю Тя, и восхвалю имя Твое во веки, и в век века.

Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет: пробави милость Твою ведущым Тя.

Таже: Сподоби, Господи, в день сей без греха сохранитися нам. Благосовен еси, Господи Боже отец наших, и хвально и прославлено имя Твое во веки , аминь.

Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, святый, просвети мя оправдании Твоими.

Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает, Отцу, и Сыну, и святому Духу, ныне и присно, и во веки веков, аминь.

Таже диакон, или иерей: Исполним утреннюю молитву нашу Господеви.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Дне всего совершенна, свята, мирна и безгрешна, у Господа просим.

На едином коемждо прошении лик поет: Подай, Господи.

Ангела мирна, верна наставника, хранителя душ и теле наших, у Господа просим.

Прощения и оставления грехов, и прегрешений наших, у Господа просим.

Добрых и полезных душам нашым, и мира мирови, у Господа просим.

Прочее время живота нашего в мире и покаянии скончати, у Господа просим.

Христианския кончины живота нашего, безболезнены, непостыдны, мирны, и добраго ответа на страшнем судищи христове, просим.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашает иерей: Яко Бог милости и щедрот и человеколюбия еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Иерей: Мир всем.

Лик: И духови твоему.

Диакон: Главы нашя Господеви приклоним.

Лик: Тебе, Господи.

И иерей глаголет молитву сию тайно: Господи святый, в вышних живый, и на смиренныя призираяй, и всевидящим оком Твоим призираяй на всю тварь, Тебе приклонихом выя сердца и телесе, и молимся Тебе: простри руку Твою невидимую от святаго жилища Твоего, и благослови ею вся ны. И аще что согрешихом волею или неволею, яко благ и человеколюбец Бог прости, даруя нам мирная и премирная благая Твоя.

Возглашает: Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Таже стихиры на стиховне

Стих 1: Исполнихомся заутра милости Твоея, Господи, и возрадовахомся, и возвеселихомся: во вся дни нашя возвеселихомся, за дни в няже смирил ны еси, лета в няже видехом злая. И призри на рабы Твоя, и на дела Твоя, и настави сыны их.

Стих 2: И буди светлость Господа Бога нашего на нас, и дела рук наших исправи на нас, и дело рук наших исправи.

Слава, и ныне, богородичен.

Таже: Благо есть исповедатися Господеви, и пети имени Твоему, вышний, возвещати заутра милость Твою, и истину Твою на всяку нощь.

Посем, Трисвятое. Пресвятая Троице: Отче наш: Иерей: Яко Твое есть царство: Тропарь святаго.

Слава, и ныне, богородичен.

И абие ектениа сугубая:

Помилуй нас, Боже, по велицей милости Твоей, молимтися, услыши и помилуй.

На едином коемждо прошении лик поет: Господи, помилуй, трижды.

Еще молимся о господине нашем святейшем вселенстем Архиерее имя рек Папе Римстем, и о господине нашем Митрополите (или Архиепископе, или Епископе нашем) имя рек, и всей во Христе братии нашей.

Еще молимся о богохранимом государе нашем Императоре или Короле, егоже есть государство, имя рек, о здравии и спасение его (или о предержащих властех наших), и о всем воинстве.

Еще молимся о блаженных и приснопамятных создателех храма сего (аще во обители: святыя обители сия), и о всех преждепочивших отцех и братиях, зде лежащих и повсюду, православных.

Еще молимся о милости, жизни, мире, здравии, спасении, посещении, прощении и оставлении грехов рабов божиих братии святаго храма сего (аще во обители: святыя обители сея).

Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.

Иерей возглашает: Яко милостив и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

По возгласе, диакон: Премудрость.

Лик же: Благослови.

Иерей: Сый благословен Христос Бог наш всегда, ныне и присно, и во веки веков.

Лик: Аминь. Утверди, Боже, святую православную веру, православных христиан, во век века.

И абие чтец 1-й час. По окончании 1-го часа, иерей творит совершенный отпуст.

Аще есть четыредесятница:

Благо есть исповедатися Господеви, и пети имени Твоему, вышний, возвещати заутра милость Твою, и истину Твою на всяку нощь. Дважды.

И Трисвятое. Пресвятая Троице: По Отче наш: Иерей: Яко Твое есть царство:

Мы же глаголем: В храме стояще славы Твоея, на небеси стояти мним: Богородице, дверь небесная, отверзи нам двери милости твоея.

Таже, Господи, помилуй, 40.

Слава, и ныне:

Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.

Именем господним благослови, отче.

Иерей: Сый благословен Христос Бог наш, всегда, ныне и присно, и во веки веков.

Лик: Аминь.

И мы глаголем: Небесный царю, богохранимаго Императора или Короля нашего, имя рек, (или предержащия власти нашя) укрепи, веру утверди, языки укроти, мир умири, град сей (или весь, или святую обитель сию) добре сохрани: прежде отшедшыя отцы и братию нашу в селениих праведных учини, и нас в покаянии и исповедании приими, яко благий и человеколюбец.

Иерей чтет молитву святаго Ефрема сирина:

Господи и Владыко живота моего, дух праздности, уныния, любоначалия и празднословия не даждь ми. Поклон.

Дух же целомудрия, смиренномудрия, терпения и любве, даруй ми рабу Твоему. Поклон.

Ей, Господи Царю, даруй ми зрети моя согрешения, и не осуждати брата моего, яко благословен еси во веки веков, аминь. Поклон.

Таже малых 12 поклонов, глаголюще на кийждо поклон: Боже, очисти мя грешнаго.

И паки всю молитву святаго Ефрема с единым великим поклоном по скончании ея.

И по поклонех, час первый.

ОТПУСТЫ ДНЕВНИИ

В понедельник

Христос истинный Бог наш, молитвами пречистыя своея Матере: предстательствы честных небесных сил безплотных: святых славных и всехвальных апостол: и святаго, егоже есть храм, и святаго, егоже есть день: святых и праведных богоотец Иоакима и Анны и всех святых, помилует и спасет нас, яко благ и человеколюбец.

Во вторник

Христос истинный Бог наш, молитвами пречистыя своея Матере: честнаго, славнаго пророк, предтечи и крестителя Иоанна: святых славных и всехвальных апостол: и прочая.

В среду и в пяток

Христос истинный Бог наш, молитвами пречистыя своея Матере: силою честнаго и животворящаго Креста: святых славных и всехвальных апостол: и прочая.

В четверток

Христос истинный Бог наш, молитвами пречистыя своея Матере: святых славных и всехвальных апостол: иже во святых отца нашего Николаа архиепископа, мирликийскаго чудотворца: и прочая.

В субботу

Христос истинный Бог наш, молитвами пречистыя своея Матере: святых славных и всехвальных апостол: святых славных и добропобедных мучеников: преподобных и богоносных отец наших: и прочая.

УТРЕНЯ ВОСКРЕСНАЯ И ПРАЗДНИЧНАЯ

По благословении, утреня воскресная начинается также, как и повседневная.

По велицей ектении, поется во глас тропаря настоящаго дне:

Бог Господь, и явися нам, благословен грядый во имя господне.

Стих 1: Исповедайтеся Господеви, яко благ, яко в век милость его.

Стих 2: Обышедше обыдоша мя, и именем господним противляхся им.

Стих 3: Не умру, но жив буду, и повем дела господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

По Бог Господь глаголем тропарь случившийся дважды, и богородичен в тойже глас. Аще случатся два тропаря, всегда первый глаголется дважды, таже вторый, и богородичен.

Таже стихословим псалтирь.

По исполнении же перваго стихословия, творит диакон, или иерей, малую ектению:

Паки и паки миром Господу помолимся.

Лик: Господи, помилуй.

Заступи, спаси, помилуй, и сохрани нас, Боже, Твоею благодатию.

Лик: Господи, помилуй.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашение: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.

Лик: Аминь. И седален по чину.

По 2-м стихословии: Паки и паки: и прочая.

Возглашение: Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь. И седален по чину.

Посем в праздники и, аще положено, в недели поется.

ПОЛИЕЛЕЙ

Псалом 134

Хвалите имя господне, хвалите раби Господа.

Припев: Аллилуиа, трижды.

Стоящии во храме господни, во дворех дому Бога нашего.

Хвалите Господа, яко благ Господь: пойте имени его, яко добро.

Яко Иакова избра себе Господь, Исраиля в достояние себе.

Яко аз познах, яко велий Господь, и Господь наш над всеми боги.

Вся, елика восхоте Господь, сотвори на небеси и на земли, в морях и во всех безднах.

Возводя облаки от последних земли, молнии в дождь сотвори: изводяй ветры от сокровищ своих.

Иже порази первенцы египетския, от человека до скота.

Посла знамения и чудеса посреде тебе, Египте: на Фараона и на вся рабы его.

Иже порази языки многи, и изби цари крепки.

Сиона царя аморрейска, и Ога царя васанска, и вся царствия ханаанска.

И даде землю их достояние, достояние Исраилю людем своим.

Господи имя твое в век, и память твоя в род и род.

Яко судити имать Господь людием своим, и о рабех своих умолится.

Идоли язык сребро, и злато, дела рук человеческих.

Уста имут, и не возглаголют: очи имут, и не узрят.

Уши имут, и не услышат: ниже бо есть дух во устех их.

Подобни им да будут творящии я, и вси надеющиися на ня.

Доме исраилев, благословите Господа: доме ааронь, благословите Господа: доме левин, благословите Господа.

Боящиися Господа, благословите Господа.

Благословен Господь от Сиона, живый во Иерусалиме.

Псалом 135

Исповедайтеся Господеви, яко благ: яко в век милость его.

Припев: Аллилуиа, трижды.

Исповедайтеся Богу богов: яко в век милость его.

Исповедайтеся Господеви господей: яко в век милость его.

Сотворшему чудеса велия единому: яко в век милость его.

Сотворшему небеса разумом: яко в век милость его.

Утвердившему землю на водах: яко в век милость его.

Сотворшему светила велия единому: яко в век милость его.

Солнце во область дне: яко в век милость его.

Луну и звезды во область нощи: яко в век милость его.

Поразившему Египта с первенцы его: яко в век милость его.

И изведшему Исраиля от среды их: яко в век милость его.

Рукою крепкою и мышцею высокою: яко в век милость его.

Раздельшему чермное море в разделения: яко в век милость его.

И проведшему Исраиля посреде его: яко в век милость его.

И истрясшему Фараона, и силу его в море чермное: яко в век милость его.

Проведшему люди своя в пустыни: яко в век милость его.

Поразившему цари велия: яко в век милость его.

И убившему цари крепкия: яко в век милость его.

Сиона царя аморрейска: яко в век милость его:

И Ога царя васанска: яко в век милость его:

И давшему землю их достояние: яко в век милость его:

Достояние Исраилю рабу своему: яко в век милость его:

Яко во смирении нашем помяну ны Господь: яко в век милость его:

И избавил ны есть от врагов наших: яко в век милость его:

Даяй пищу всякой плоти: яко в век милость его.

Исповедайтеся Богу небесному: яко в век милость его.

В недели, лик абие поет сия

ТРОПАРИ ВОСКРЕСНЫ

Глас 5

Припев: Благословен еси, Господи, научи мя оправданием Твоим.

Ангельский собор удивися, зря Тебе в мертвых вменившася, смертную же, Спасе, крепость разоривша, и с собою Адама воздвигша, и от ада вся свобождша.

Почто мира с милостивыми слезами, о ученицы, растворяете, блистаяйся во гробе ангел мироносицам вещаше: видите вы гроб, и уразумейте, Спас бо воскресе от гроба.

Зело рано мироносицы течаху ко гробу Твоему рыдающыя, но предста к ним ангел и рече: рыдание время преста, не плачите, воскресение же апостолом рцыте.

Мироносицы жены, с миры пришедшыя ко гробу Твоему, Спасе, рыдаху: ангел же к ним рече глаголя: что с мертвыми живаго помышляете; яко Бог бо воскресе от гроба.

Слава, троичен: Поклонимся Отцу, и его Сынови, и святому Духу, святей Троице во едином существе, с серафимы зовуще: свят, свят, свят еси, Господи.

И ныне, богородичен: Жизнодавца рождши, греха, дево, Адама избавила еси, радость же Еве в печали место подала еси: падшыя же от жизни к сей направи, из тебе воплотивыйся Бог и человек.

Аллилуиа, аллилуиа, аллилуиа, слава Тебе Боже. Трижды.

После тропарей: Ангельский собор: малая ектениа и возглас:

Яко благословися имя Твое, и прославися царство Твое, Отца, и Сына, и святаго Духа, ныне и присно, и во веки веков.

Лик: Аминь.

Таже ипакои и степенны гласа.

Аще чтутся кафисмы 2, 3 и 17-я, сиесть Непорочны, по двух первых глаголет диакон ектении, а по 17, абие лик поет тропари воскресны: Ангельский собор: Посем малая ектениа, с возгласом: Яко благословися имя Твое:

Таже ипакои и степенны гласа.

Аще же есть праздник, по скончании полиелеа, поется величание. Посем, аще несть неделя, абие ектениа малая, с возгласом: Яко благословися имя Твое:

И поются седалны праздника и сия степенны во глас 4:

От юности моея, мнози борют мя страсти: но сам мя заступи и спаси, Спасе мой.

Ненавидящии Сиона, посрамитеся от Господа: яко трава бо огнем будете изсохше.

Слава, и ныне:

Святым Духом всяка душа живится, и чистотою возвышается, светлеется троическим единством, священнотайне.

По степенных абие: Вонмем, премудрость, вонмем, и прокимен гласа, или праздника. И паки диакон:

Господу помолимся.

Иерей возглашает: Яко свят еси, Боже наш, и во святых почиваеши, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Диакон: Всякое дыхание да хвалит Господа.

Лик поет: Всякое дыхание да хвалит Господа.

Диакон же глаголет стих: Хвалите Бога во святых его, хвалите его во утверждении силы его.

Лик: Всякое дыхание да хвалит Господа.

Диакон: Всякое дыхание.

Лик: Да хвалит Господа.

И по сем возглашает диакон: И о сподобитися нам слышанию святаго евангелия, Господа Бога молим.

Лик: Господи, помилуй, трижды.

Диакон: Премудрость, прости, услышим святаго евангелия.

И иерей: Мир всем.

Лик: И духови твоему.

И абие: От имя рек святаго евангелия чтение.

Лик: Слава Тебе, Господи, слава Тебе.

Диакон: Вонмем. И глаголет иерей утреннее евангелие.

По прочтении евангелия, лик поет, аще есть неделя:

Воскресение христово видевше, поклонимся святому Господу Иисусу, единому безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому христову воскресению: се бо прииде крестом радость всему миру. Всегда благословяще Господа, поем воскресение его: распятие бо претерпев, смертию смерть разруши.

Посем псалом 50:

Помилуй мя Боже, по велицей милости твоей, и по множеству щедрот твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред тобою сотворих: яко да оправдишися во словесех твоих, и победиши внегда судити ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости твоея явил ми еси. Окропиши мя иссопом, и очищуся. Слуху моему даси радость и веселие: возрадуются кости смиренныя. Отврати лице твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица твоего, и Духа твоего святаго не отъими от мене. Воздаждь ми радость спасения твоего, и духом владычним утверди мя. Научу беззаконныя путем твоим, и нечестивии к тебе обратятся. Избави мя от кровей Боже, Боже спасения моего: возрадуется язык мой правде твоей. Господи, устне мои отверзеши, и уста моя возвестят хвалу твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением твоим Сиона, и да созиждутся стены иерусалимския. Тогда благоволиши жертву правды, возношение и всесожигаемая: тогда возложат на олтарь твой тельцы.

Таже поется стихира праздника, или песнопение сие:

Слава: Молитвами апостолов, милостиве, очисти множества согрешений наших.

И ныне: Молитвами Богородицы, милостиве, очисти множества согрешений наших.

Таже, глас 6: Помилуй мя, Боже, по велицей милости Твоей, и по множеству щедрот Твоих очисти беззаконие мое.

Таже, аще есть неделя: Воскрес Иисус от гроба, якоже прорече, даде нам живот вечный, и велию милость.

Аще праздник, поется стихира праздника.

Аще ли неделя мытаря, или блуднаго, или мясопустная, и сыропустная, и в прочыя недели великаго поста, вместо, Молитвами апостолов:

Слава, глас 8: Покаяния отверзи ми двери, жизнодавче, утрениюет бо дух мой ко храму святому Твоему, храм носяй телесный весь оскревнен: но яко щедр, очисти благоутробною Твоею милостию.

И ныне, богородичен: На спасения стези настави мя, Богородице: студными бо оскалях душу грехми, и в лености все житие мое ождих: но твоими молитвами избави мя от всякия нечистоты.

Таже, глас 6: Помилуй мя, Боже, по велицей милости Твоей, и по множеству щедрот Твоих очисти беззаконие мое.

Посем: Множества содеянных мною лютых, помышляя окаянный, трепещу страшнаго дне суднаго: но надеяся на милость благоутробия Твоего, яко Давыд вопию Ти: помилуй мя, Боже, по велицей Твоей милости.

Таже диакон или иерей глаголет молитву:

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодеы Марии; силою честнаго и животворящаго Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных и всехвальных Апостол; (или святаго апостола и евангелиста имя рек, и прочиих святых славных и всехвальных Апостол), иже во святых отец наших и вселенских учителей и святителей, Василия Великаго, Григория Богослова и Иоанна Златоустаго; иже во святых отца нашего Николая, архиепископа Мирликийскаго, Чудотворца; святых равноапостольных Мефодия и Кирилла, учителей Словенских, святаго благовернаго и равноапостольнаго великаго князя Владимира, святых славных и добропобедных мучеников; святыя великомученицы Варвары; преподобных и богоносных отец наших Антониа и Феодосиа Печерских, и святаго, (имя рек, егоже есть храм, и егоже есть день), святых и праведных Богоотец Иоакима и Анны, и всех святых; молим Тя, многомилостиве Господи, услыши нас грешных молящихся Тебе, и помилуй нас.

Лик: Господи, помилуй, 12.

Иерей возглас: Милостию и щедротами, и человеколюбием единороднаго Твоего Сына, с нимже благословен еси, со пресвятым и благим и животворящим Твоим Духом, ныне и присно, и во веки веков.

Лик: Аминь.

И начинаем песни и каноны.

По 3-й песни творит диакон малую ектению: Паки и паки: Заступи, спаси: Пресвятую, пречистую:

Возглашение: Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Таже седален минеи.

По 6-й песни ектениа: Паки и паки: Заступи, спаси: Пресвятую, пречистую:

Возглас: Ты бо еси царь мира, и спас душ наших, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Кондак, и икос. И чтние в синаксарии.

По окончании катавасии восмой песни, диакон или иерей возглашает: Богородицу и Матерь света в песнех возвеличим.

Песнь Богородицы.

Величит душа моя Господа, и возрадовася дух мой о Бозе спасе моем.

К коемуждо стиху припеваем, аще положено уставом: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.

Яко призре на смирение рабы своея, се бо от ныне ублажат мя вси роди.

Яко сотвори мне величие сильный, и свято имя его, и милость его в роды родов боящымся его.

Сотвори державу мышцею своею, расточи гордыя мислию сердца их.

Низложи сильныя со престол, и вознесе смиренныя, алчущыя исполни благ, и богатящыяся отпусти тщы.

Восприят Исраиля отрока своего, помянути милости, якоже глагола ко отцем нашым, Аврааму и семени его даже до века.

По девятой песни, ектениа: Паки и паки: Заступи, спаси: Пресвятую, пречистую:

Возглашение: Яко Тя хвалят вся силы небесныя, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Посем диакон, аще положено уставом, глаголет: Свят Господь Бог наш.

Лик поет: Свят Господь Бог наш.

Стих: Яко свят Господь Бог наш.

Лик поет: Свят Господь Бог наш.

Стих: Над всеми людьми Бог наш.

Лик поет: Свят Господь Бог наш.

Ексапостиларий воскресный, или праздника, или дне, по уставу. И абие

ХВАЛИТНЫ

в случившийся глас.

Всякое дыхание да хвалит Господа.

Псалом 148

Хвалите Господа с небес, хвалите его в вышних.

Припев: Тебе подобает песнь Богу.

Хвалите его вси ангели его, хвалите его вся силы его.

Тебе подобает песнь Богу.

Хвалите его солнце и луна, хвалите его вся звезды и свет. Хвалите его небеса небес, и вода яже превыше небес. Да восхвалят имя господне: яко той рече, и быша: той повеле, и создашася. Постави я в век и в век века: повеление положи, и не мимо идет. Хвалите Господа от земли, змиеве, и вся бездны: огнь, град, снег, голоть, дух бурен, творящая слово его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да сохвалят имя господне, яко вознесеся имя того единаго: исповедание его на земли и на небеси. И вознесет рог людей своих: песнь всем преподобным его, сыновом исраилевым, людем приближающымся ему.

Псалом 149

Воспойте Господеви песнь нову, хваление его в церкви преподобных. Да возвеселится Исраиль о сотворшем его, и сынове Сиони возрадуются о царе своем: Да восхвалят имя его в лице, в тимпане и псалтири да поют ему. Яко благоволит Господь в людех своих, и вознесет кроткия во спасение. Восхвалятся преподобнии во славе, и возрадуются на ложах своих. Возношения божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

От зде начинаем стихиры, аще есть:

На 6: Сотворити в них суд написан: слава сия будт всем преподобным его.

Псалом 150

Хвалите Бога во святых его, хвалите его во утверждении силы его.

На 4: Хвалите его на силах его, хвалите его по множеству величествия его.

Хвалите его во гласе трубнем, хвалите его во псалтири и гуслех.

Хвалите его в тимпане и лице, хвалите его во струнах и органе.

Хвалите его в кимвалех доброгласных, хвалите его в кимвалех восклицания. Всякое дыхание да хвалит Господа.

Слава, стихира евангельская или праздника.

И ныне: настоящий богородичен: Преблагословенна еси, Богородице дево, воплощшимбося из тебе ад пленися, Адам воззвася, клятва потребися, Ева свободися, смерть умертвися, и мы ожихом. Тебе поюще возопием: благословен Христос Бог наш, изволивый тако, слава Тебе.

Иерей возгалашет: Слава Тебе показавшему нам свет.

Лик поет: Слава в вышних Богу, и на земли мир, в человецех благовелоение. Хвалим Тя, благословим Тя, кланяемтися, славословим Тя, благодарим Тя, великия ради славы Твоея. Господи царю небесный, Боже Отче вседержителю, Господи Сыне единородный, Иисусе Христе, и святый Душе. Господи Боже, агнче божий, Сыне отечь, вземляй грех мира, помилуй нас: вземляй грехи мира, приими молитву нашу. Седяй одесную Отца, помилуй нас. Яко Ты еси един свят, Ты еси един Господь, Иисус Христос, во славу Бога Отца, аминь.

На всяк день благословлю Тя, и восхвалю имя Твое во веки, и в век века.

Сподоби, Господи, в день сей без греха сохранитися нам. Благословен еси, Господи Боже отец наших, и хвально и прославлено имя Твое во веки, аминь.

Буди, Господи, милость Твоя на нас, якоже уповахом на Тя.

Благословен еси, Господи, научи мя оправданием Твоим. Трижды.

Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет: пробави милость Твою ведущым Тя.

Святый Боже, святый крепкий, святый безсмертный, помилуй нас. Трижды.

Слава, и ныне: Святый безсмертный, помилуй нас.

Таже высочайшим гласом, единожды: Святый Боже, святый крепкий, святый безсмертный, помилуй нас.

Аще есть праздник владычный, или богородичный, тропарь праздника.

Аще же есть неделя, глаголем тропарь воскресный. И в первый убо глас, 3, 5, 7, глаголем сей:

Днесь спасение миру бысть, поем воскресшему из гроба, и начальнику жизни нашея: разрушив бо смертию смерть, победу даде нам и велию милость.

Во глас же 2, 4, 6, 8, глаголем сей:

Воскрес из гроба, и узы растерзал еси ада, разрушид еси осуждение смерти, Господи, вся от сетей врага избавивый, явивый же себе апостолом Твоим, послал еси я на проповедь, и теми мир Твой подал еси вселенней, едине многомилостиве.

Таже ектениа:

Помилуй нас, Боже:

Еще молимся о господине:

Еще молимся о богохранимом:

Еще молимся о блаженных:

Еще молимся о милости, жизни:

Еще молимся о плодоносящих:

Иерей возглашает: Яко милостив:

Таже диакон или иерей:

Исполним утреннюю молитву:

Заступи, спаси:

Утра всего совершенна:

Ангела мирна:

Прощения и оставления:

Добрых и полезных:

Прочее время:

Христианския кончины:

Пресвятую, пречистую:

Возглашение: Яко Бог милости:

Лик: Аминь.

Иерей: Мир всем.

Лик: И духови твоему.

Диакон: Главы вашя Господеви приклоните.

Лик: Тебе, Господи.

И иерей глаголет молитву сию тайно: Господи святый, в вышних живый, и на смиренныя призираяй, и всевидящим оком Твоим призираяй на всю тварь, Тебе приклонихомся выя сердца и телесе, и молимся Тебе: простри руку Твою невидимую от святаго жилища Твоего, и благослови вся ны. И аще что согрешихом волею или неволею, яко благ и человеколюбец Бог прости, даруя нам мирная и премирная благая Твоя.

Возглашает: Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Диакон: Премудрость.

Лик: Благослови.

Иерей: Сый благословен Христос Бог наш, всегда, ныне и присно, и во веки веков.

Лик: Аминь. Утверди, Боже, святую православную веру, православных христиан, во век века.

Иерей: Пресвятая Богородице, спаси нас.

Лик: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.

Иерей: Слава Тебе, Христе Боже, упование наше, слава Тебе.

Лик: Слава, и ныне: Господи помилуй, трижды. Благослови.

Иерей творит отпуст праздника, аще положен, или дне.

Отпуст неделы:

Воскресый из мертвых, Христос истинный Бог наш, молитвами пречистыя своея Матере: святых славных и всехвальных апостол: и святаго, егоже есть храм, и святаго, егоже есть день: святых и праведных богоотец Иоакима и Анны и всех святых, помилует и спасет нас, яко благ и человеколюбец.

По отпусте же и многолетии, чтец абие 1-й час: Приидите, поклонимся: и псалмы.

УТРЕНЯ ЗА УСОПШИХ

Поется в субботу.

По велицей ектении, поется Аллилуиа, трижды, на глас 8. Глаголем стихи сия:

Стих 1: Блажени яже избрал, и приял еси, Господи.

Стих 2: Память их в род и род.

Стих 3: Душы их во благих водворятся.

Таже тропари сия, глас 2: Апостоли, мученицы и пророцы, святителие, преподобнии и праведнии, добре подвиг совершившии, и веру соблюдшии, дерзновение имуще ко Спасу, о нас того яко блага молите спастися, молимся, душам нашим.

Слава: Помяни, Господи, яко благ, рабы Твоя, и елика в житии согрешиша, прости: никтоже бо безгрешен, токмо Ты могий и преставленым дати покой.

И ныне, богородичен: Мати святая неизреченнаго света, ангельскими тя песньми початюще, благочестно величаем.

В субботу мясопустную и пред Пятьдесятницею поем тропари сия, глас 8:

Глублиною мудрости, человеколюбно вся строяй, и полезное всем подаваяй, едине содетелю, упокой, Господи, душы раб Твоих: на Тя бо упование возложиша, творца и зиждителя и Бога нашего.

Слава, и ныне: Тебе и стену и пристанище имамы, и молитвенницу благоприятну к Богу: егоже родила еси, Богородице безневестная, верных спасение.

И стихословим псалтирь.

Таже ектениа малая с возгласом: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.

Лик: Аминь. И седален, по гласу осмогласника.

Посем же поем непорочны. Разделяем же их на две статии.

Блажени непорочнии в путь, ходящии в законе господни.

В конце же коегождо стиха поем: Помяни, Господи, душы раб Твоих.

Блажени испытающии свидения его, всем сердцем взыщут его:

Не делающии бо беззакония, в путех его ходиша:

Ты заповедал еси заповеди твоя сохранити зело:

Дабы исправилися путие мои, сохранити оправдания твоя.

Тогда не постыжуся, внегда призрети ми на вся заповеди твоя.

Исповемся тебе в правости сердца, внегда научитимися судьбам правды твоея.

Оправдания твоя сохраню, не остави мене до зела.

В чесом исправит юнейший путь свой; внегда сохранити словеса твоя.

Всем сердцем моим взысках тебе, не отрини мене от заповедей твоих.

И прочее псалма.

Егда же приидут в конечный стих, сиесть: Яко аще бы не закон твой поучение мое был, тогда убо погибл бых во смирении моем. Во век не забуду оправданий твоих, яко в них оживил мя еси, поют его трижды, и посем припев: Помяни, Господи, душы раб Твоих.

И чтется ектениа о преждеусопших:

Паки и паки миром Господу помолимся.

Лик: Господи, помилуй.

Еще молимся о упокоении душ усопших раб божиих имя рек, и о еже проститися им всякому прегрешению вольному же и невольному.

Лик: Господи, помилуй, единожды.

Яко да Господь Бог учинит душы их, идеже праведнии упокояются.

Лик: Господи, помилуй, единожды.

Милости божия, царства небеснаго, и оставления грехов их, у Христа безсмертнаго царя и Бога нашего просим.

Лик: Подай, Господи.

Диакон: Господу помолимся.

Лик: Господи, помилуй.

Иерей глаголет молитву сию: Боже духов и всякия плоти, смерть поправый, и диавола упразднивый, и живот миру Твоему даровавый: сам, Господи, упокой душы усопших раб Твоих имя рек, в месте светле, в месте злачне, в месте покойне, отнюдуже отбеже болезнь, печаль и воздыхание: всякое согрешение, содеяное ими словом, или делом, или помышлением, яко благ и человеколюбец Бог, прости: яко несть человек, иже жив будет, и не согрешит: Ты бо един кроме греха, правда Твоя правда во веки, и слово Твое истина.

Возглас же вторый иерей глаголет: Яко Ты еси воскресение и живот и покой усопших раб Твоих имя рек, Христе Боже наш, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков.

Лик: Аминь.

И по сем начинаем вторую статию:

Твой есмь аз, спаси мя: яко оправдании твоих взысках.

На коемждо конци стиха глаголем: Упокой, Господи, душы раб Твоих.

Мене ждаша грешницы погубити мя: свидения твоя разумех.

Всякия кончины видех конец, широка заповедь твоя зело.

Коль возлюбих закон твой, Господи: весь день поучение мое есть.

Паче враг моих умудрил мя еси заповедию твоею, яко в век мое есть.

Паче всех учащих мя разумех, яко свидения твоя поучение мое есть.

Паче старец разумех, яко заповеди твоя взысках.

От всякаго пути лукава возбраних ногам моим, яко да сохраню словеса твоя.

От судеб твоих не уклонихся, яко ты законоположил ми еси.

Коль сладка гортани моему словеса твоя, паче меда устом моим.

И прочее псалма.

Егда же приидут в конечный стих, сиесть: Жива будет душа моя, и восхвалит тя, и судьбы твоя помогут мне. Заблудих яко овча погибшее: взыщи раба твоего, яко заповедей твоих не забых, поют его трижды, и посем припев: Упокой, Господи, душы раб Твоих.

Таже тропари поем за упокой на глас 5:

Припев: Благословен еси Господи, научи мя оправданием Твоим.

Святых лик обрете источник жизни и дверь райскую: да обрящу и аз путь покаянием, погибшее овча аз есмь, воззови мя, Спасе, и спаси мя.

Агнца божия проповедавше, и заклани бывше якоже агнцы, и к жизни нестареемей, святей, и присносущней преставльшеся, Того прилежно мученицы молите, долгов разрешение нам даровати.

В путь узкий хождшии прискорбный, вси в житии крест яко ярем вземшии, и Мне последовавши верою, приидите насладитеся, ихже уготовах вам почестей, и венцев небесных.

Образ есмь неизреченныя Твоея славы, аще и язвы ношу прегрешений: ущедри Твое создание, Владыко, и очисти Твоим благоутробием, и возжеленное отечество подаждь ми, рая паки жителя мя сотворяя.

Древле убо от не сущих создавый мя, и образом Твоим божественным почтый: преступлением же заповеди, паки мя возвративый в землю, от неяже взят бых, на еже по подобию возведи, древнею добротою возъобразитися.

Упокой, Боже, раб Твоих, и учини их в раи, идеже лицы святых, Господи, и праведницы сияют яко светила, усопших раб Твоих упокой, презирая их вся согрешения.

Слава, троичен: Трисиятельное единаго божества, благочестно поем вопиюще: свят еси, Отче безначальный, собезначальный Сыне, и божественный Душе, просвети нас верою Тебе служащих, и вечнаго огня исхити.

И ныне, богородичен: Радуйся, чистая, Бога плотию рождшая во спасение всех, еюже род человеческий обрете спасение, тобою да обрящем рай, Богородице чистая, благословенная.

Аллилуиа, аллилуиа, аллилуиа, слава Тебе Боже. Трижды.

Таже диакон:

Паки и паки:

Еще молимся о упокоении:

Яко да Господь Бог учинит:

Милости божия:

Господу помолимся, и иерей молитву: Боже духов: с возгласом: Яко Ты еси воскресение:

И по возгласе поем седален, глас 5: Покой, Спасе наш, с праведными раб Твоих, и сия всели во дворы Твоя, якоже есть писано, презирая яко благ прегрешения их вольная и невольная, и вся яже в ведении и не в ведении, человеколюбче.

Слава, и ныне, богородичен: От девы возсиявый миру, Христе Боже, сыны света тою показавый, помилуй нас.

Таже псалом 50

И поется канон по уставу.

По 3-й песни творит диакон обычную малую ектению:

Паки и паки:

Заступи, спаси:

Пресвятую, пречистую:

Возглашение: Яко Ты еси Бог наш:

Кондак и седален минеи, по уставу.

По 6-й песни малую ектению за упокой и молитву Боже духов:

Кондак, глас 8: Со святыми упокой Христе, душы раб Твоих, идеже несть болезнь, ни печаль, ни воздыхание, но жизнь безконечная.

Икос: Сам един еси безсмертный, сотворивый и создавый человека, земнии убо от земли создахомся, и в землю туюжде пойдем, якоже повелел еси, создавый мя и рекий ми: яко земля еси и в землю отъидеши, аможе вси человецы пойдем, надгробное рыбание творяще песнь: аллилуиа. трижды.

По окончании катавасии восьмой песни, поется песнь Богородицы.

По 9-й песни: Достойно есть яко воистину блажити тя Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.

И диакон малую ектению: Паки и паки:

Таже ексапостиларий октоиха.

В субботу мясопустную глаголем светилен сице:

Подобен: Небо звездами:

Живыми и мертвыми обладаяй яко Бог, упокой Твоя рабы в селениих избранных: аще бо и согрешиша, Спасе, но не отступиша от Тебе.

Слава: Подобен: Жены услышите: Упокой рабы Твоя во стране живых, Господи, отонудуже отбеже болезнь, печаль вкупе и воздыхание. Очисти яко человеколюбец яже в житии согрешиша: един бо безгрешный еси и милостивый, мертвых и живых Владыка.

И ныне, богородичен: Марие богоневесто, Христа непрестанно моли о нас рабех твоих, с богоглаголивыми пророки и мученик соборы, иерархи же и преподобными, и всеми праведными, снаследники быти небеснаго царствия.

В субботу же пред Пятьдесятницею глаголем светилен сице: Подобен: Небо звездами: Память совершающе всех усопших во Христе, и конечный день воспомянем, вернии, о нас и о оных Христа присно моляще.

Слава, и ныне, богородичен: Сладость ангелов, скорбящих радость, христиан предстательнице, дево Мати господня, заступи нас и избави от вечных мук.

И абие

ХВАЛИТНЫ

в случившийся глас.

Хвалите Господа с небес: и прочая.

На хвалите поем стихиры мученичны гласа.

Славословие малое.

И посем ектениа:

Исполним утреннюю молитву нашу Господеви.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Дне всего совершенна, свята, мирна и безгрешна, у Господа просим.

На едином коемждо прошении лик поет: Подай, Господи.

Ангела мирна, верна наставника, хранителя душ и телес наших, у Господа просим.

Прощения и оставления грехов, и прегрешении наших, у Господа просим.

Добрых и полезных душам нашым, и мира мирови, у Господа просим.

Прочее время живота нашего в мире и покаянии скончати, у Господа просим.

Христианския кончины живота нашего, безболезнены, непостыдны, мирны, и добраго ответа на страшнем судищи христвое, просим.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашает иерей: Яко Бог милости и щедрот и человеколюбия еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь. И молитва.

Таже стихиры на стиховне по уставу.

Посем: Благо есть исповедатися Господеви, и пети имени Твоему, вышний, возвещати заутра милость Твою, и истину Твою на всяку нощь.

Таже, Трисвятое. Пресвятая Троице: Отче наш: Иерей: Яко Твое есть царство: троари сия, глас 2:

Апостоли, мученицы и пророцы, святителие, преподобнии и праведнии, добре подвиг совершившии и веру соблюдшии, дерзновение имуще ко Спасу, о нас того яко блага молите спастися, молимся, душам нашим.

Слава: Помяни, Господи, яко благ, рабы твоя, и елика в житии согрешиша, прости: никтоже бо безгрешен, токмо ты могий и преставленым дати покой.

И ныне, богородичен: Мати святая неизреченнаго света, ангельскими тя песньми початиюще, благочестно величаем.

В субботу мясопустную и пред Пятьдесятницею поем тропари сия, глас 8:

Глубиною мудроти человеколюбно вся строяй, и полезное всем подаваяй, едине содетелю, упокой, Господи, душы раб Твоих: на Тя бо упование возложиша, творца и зиждителя и Бога нашего.

Слава, и ныне, богородичен: Тебе и стену и пристанище имамы, и молитвенницу благоприятну к Богу: егоже родила еси, Богородице безневестная, верных спасение.

Посем диакон глаголет ектению Помилуй нас, Боже: и прочая, якоже указано в повседневной утрени.