1

Плен Сионь от лести обратив, и мене. Спасе, оживи, изъимая работныя страсти! В юг сеяй скорби постныя со слезами, сей радостныя пожнет рукояти присноживопитания.

Слава, и ныне: Святым Духом источник Божественных сокровищ, от Него же премудрость, разум, страх, Тому хвала и слава, честь и держава!

2

Аще не Господь созиждет дом душевный; всуе труждаемся: разве бо Того ни деяния, ни слово совершается! Плода чревна, святии духодвижно прозябают отеческая предания, сыноположения.

Слава, и ныне: Святым Духом всяческая еже быти имут: прежде бо всех Бог, всех господьство, свет неприступен, живот всех!

3

Боящийся Господа, пути живота обретше, ныне и присно ублажаются славою нетленною. Окрест трапезы твоея, яко стеблие, видя исчадия твоя, радуйся и веселися, приводя сия Христови, пастыреначальнику.

Слава, и ныне: Святым Духом глубина дарований, богатство славы, судеб глубина велия, единославен Отцу, и Сыну, служимь бо.