К оглавлению - Триодь постная.
Троичны случившагося гласа.
По 1-м стихословии поем седальны умилительныя, Осмогласника два, с Богородичным.
По 2-м же стихословии седален господина Иосифа. Глас 3.
Подобен: Красоте девства:
Краснейшее время наста, достохвальный день возсия воздержания братие, потщимся очиститися, яко да явимся чисти Сотворшему, и красоту Его получим, молитвами Того родившия, единыя Чистыя Богоматере.
Слава, тойже.
И ныне, Богородичен:
Красоте девства Твоего, и пресветлой чистоте Твоей Гавриил удивився, вопияше Ти Богородице: кую Ти похвалу принесу достойную? что же возыменую Тя? недоумеваю, и ужасаюся. Темже яко повелен бых, вопию Ти: радуйся Благодатная.
По 3-м стихословии седален господина Феодора. Глас 7.
Подобен: Господи, мы есмы:
Господи, давый нам предварити днешний день, седмицу святую предсияющую светло, Лазарево от мертвых востание страшное, сподоби рабы Твоя страхом Твоим преити поприще пощения все совершающия. [Дважды.]
Богородичен: Честнейшая преславных херувимов еси Всечистая Дево: они бо Божественныя не терпяще силы, крилами покрывше лица, службу совершают: Ты же воплощенна Слова, самозрительно видящи носиши: Егоже непрестанно моли о душах наших.
Канон в Минеи, и трипеснец господина Иосифа: и стихословится песнь. Глас 3.
Песнь 1.
Ирмос: Воды древле:
Наша помышления божественным ралом возделавше божественнаго пощения, добродетелей клас плодопринесем, яко да не взалчем во веки, наслаждающеся сладостию неиждиваемою радующеся.
Многолетныя страсти внутрь ношу, омрачающия окаянную душу мою, к Твоей безлетне Слове, безначальнаго Отца силе непобедимей, сокрушенным сердцем припадаю и молюся: ущедри, и спаси мя.
Доброе пощение питает сердца, умащающее помышления богоугодная, и страстей бездну изсушающее, тучами умиления очищает, верою хвалу приносящих Вседержителю.
Богородичен: Многоименитая Отроковице, радуйся святая Дево, Богородительнице Марие, верных похвало, клятвы избавление, лествице небесная, недомысленное чудо, купино неопалимая, земле неделанная.
Иный господина Феодора, глас 7.
Ирмос: Поим Господеви:
Живоносному Древу поклонившеся, отсюду идем путем пощения к страсти Христовой радующеся.
Христу последующе, отвержемся мира, и возмем крест на рамо, соображающеся Его Божественным страстем.
Троичен: В трех Лицех, пресущное едино Божество, воспоим вси Отца, и Сына, и Святаго Духа.
Богородичен: Егоже родила еси недомысленно, тления не разумевши Чистая, Иисуса Спаса умилостиви ныне о рабех Твоих.
Слава Тебе Боже наш, слава Тебе.
Егда в славе приидеши со ангелы, судити всяческим, добрый ответ дати Тебе Христе, нас сподоби.
Ирмос: Поим Господеви, погрузившему всю силу фараонову в мори, победную песнь, яко прославися.
Песнь 8.
Ирмос: Вавилонская пещь:
Вредными змия прелестьми извлачимь, и прельщаемь умом по вся дни, язве моей прилагая язву, Спасе зову Ти: врачу болящих, обрати и спаси мя.
Постився воскреси отроча Соманитиды древле, укрепляемь Елиссей яве Духом: мы же умертвившеся сладострастием, живоносным постом вернии оживимся.
Ниневитяны спасл еси Господи Человеколюбче, древле покаявшияся, в плачи и посте, яко благоутробен: нас же милостию Твоею ущедри, недоумеющих делы исповедатися Тебе.
Богородичен: По рождестве нетленно пребывшая Всенепорочная, избави, молимся Чистая, от тли рабы Твоя, верно поющия единомышлением души: благословите дела Господня Господа.
Иный.
Ирмос: Страшнаго херувимом:
Воздержания с Богом крепость имуще вернии, прочее юношески тецем святое поприще, и венцы приимем.
Безплодие зря многоболезненныя моея души, еще потерпи Христе, и не посецы мене, якоже смоковницу оную проклятую.
Благословим Отца, и Сына, и Святаго Духа, Господа.
Троичен: Единоначальная Троице, и Триипостасная Единице, Отче, Сыне и Душе, от всяких избави искушений и бед Тя воспевающия.
Богородичен: Радуйся, горо Божия: радуйся, присносветлая свеще: радуйся, новое небо: радуйся, уме блистаяйся: радуйся, храме Господень: радуйся Всепетая.
Слава Тебе Боже наш, слава Тебе.
Страшное Твое испытание помышляя Христе, ужасаюся, трепещу, и вопию: неизмерную имеяй велию милость, спаси мя окаяннаго.
Хвалим, благословим, покланяемся Господеви, поюще и превозносяще во вся веки.
Ирмос: Страшнаго херувимом, и чуднаго серафимом, и миру Творца, священницы, и раби, и дуси праведных, пойте, благословите, и превозносите Его во веки.
Песнь 9.
Ирмос: Новое чудо:
Чашу божественную исполнивши ныне умиления, постная благодать яве, созывает вся верныя, вопиющи с веселием: приидите, насладитеся, пиянство страстей отложивше, да будущаго сподобитеся утешения.
Близ суд, внемли душе, совестию попецыся, и делай добре, тебе неосуждену присно соблюдающая: аще бо себе зде разсуждаем, никакоже тамо осудимся без свидетелей, идеже повиннии осуждаются.
Начала, силы, престоли, серафими, господьства, и власти, и херувими, ангели, архангели, Бога молите, пощения время прейти нам, Сему угодная творящим, да яко раби благоугодившии славу получим.
Богородичен: С мученики, с пророки, Рождшую Тя, с преподобными всеми Христе молящуюся приими присно, о рабех прогневавших Тя, единаго Человеколюбца Владыку, Егоже небеснии чинове трепещут.
Иный.
Ирмос: Паче естества:
Тихое плавание пощения, духовным дыханием преплывше, ко пристанищу страстей Христовых, достигнути помолимся.
Хананеи поревновав, помилуй мя вопию Ти, Сыне Давидов Боже, и исцели мою изнемогшую душу, якоже оныя дщерь.
Троичен: Божества Естество, единствующее Единицу, и начертаньми треми тройствующее, Отца, и Сына, и Духа воспоим.
Богородичен: Во чреве заченшая непостижимаго Слова, и Сего без семене плоти рождшая, моли прилежно спастися душам нашим.
Слава Тебе Боже наш, слава Тебе.
Оправдавый мытаря, очисти мя вопиюща: и мне грешному милостив буди, всех Судие, прощая моя согрешения.
Ирмос: Паче естества Матерь, и по естеству Деву, едину в женах благословенную, песньми вернии Богородицу величаем.
Светилен гласа.
На стиховне самогласен, дважды. Глас 8:
Впадшему в разбойники уподобихся аз, Владыко всех прегрешеньми моими упад, и от них немилостивно уязвихся: но не остави мене неисцельна, не от Самарии, но от Пречистыя Девы пришедый, Иисусе спасительное имя, помилуй мя.
Мученичен: Что вы наречем святии? херувимы ли? яко на вас почил есть Христос. Серафимы ли? яко непрестанно прослависте его. Ангелы ли? тела бо отвратистеся. Силы ли? действуете бо чудесы. Многая ваша имена, и большая дарования: молите спастися душам нашим.
Слава, И ныне, Богородичен:
Небесная поют Тя, обрадованная Мати Безневестная, и мы славословим неизследованное Твое Рождество Богородице, моли спастися душам нашим.
тропарь пророчества. Глас 3:
Яко беззакония наша восташа на ны, воскресни Господи помози нам: Ты бо еси Отец наш, кроме бо Тебе иного не знаем.
Прокимен, псалом 83, глас 4: Олтари Твоя Господи сил, Царю мой, и Боже мой.
Стих: Коль возлюбленна селения Твоя Господи сил.
Пророчества Исаиина чтение. [Глава 37, ст. 33 - 38. Глава 38, ст. 1 - 6.]
Прокимен, псалом 84, глас 8: Яви нам Господи милость Твою, и спасение Твое даждь нам.
Стих: Благоволил еси Господи землю Твою, возвратил еси плен Иаковль.
Понеже должно есть ведати о кафисмах четвертка Великаго канона, яже суть три, яко да прочтутся прежде, и не оставятся, зри напреди, и якоже расположены суть на своих им местех, сице чти.
стихословим вместо, Ко Господу: рядовую кафисму Псалтира, сиесть, 10-ю. На Господи воззвах, поставим стихов 6: и поем настоящия подобны 3, и Минеи 3.
Стихиры подобны трипеснца, господина Иосифа, глас 3.
Подобен: Крестоявленно:
Давый нам пощения время обратитися и живым быти, и никакоже погибнути, Слове Божий, сподоби всех благоугодити Тебе добре, и теплым умилением послужити Тебе Христе, якоже блудница оная целомудренная и честная, иногда миром и излияньми теплых слез, прегрешений приимши оставление.
Якоже слепый от сердца зову Ти: Сыне Божий, просвети мои очи сердечныя. Якоже верная хананеа вопию Ти: помилуй мя Щедре, ибо душу беснующуюся имам в сластех: юже пременив от тьмы страстей, прочее жити чисте сотвори, да славлю Твою многую благостыню.
Иный, господина Феодора, глас 8.
Подобен: Богозванный мученик:
Богосветлая благодать воздержания, возсиявши нам днесь солнца светлее, души наша просвещает, якоже облаки страсти греховныя отгоняющи. Сего ради вси притецем, благодушно сию лобызающе: радующеся совершаем божественное поприще того, егоже в веселиих учреждающеся возопиим Христу: освяти Блаже, сие совершающия верно.
И Минеи 3. Слава, И ныне, Богородичен.
Прокимен, псалом 85, глас 4: Настави мя Господи на путь Твой, и пойду во истине Твоей.
Стих: Приклони Господи ухо Твое.
Бытия чтение. [Глава 13 ст. 12 - 18.]
Прокимен, псалом 86, глас 4: Любит Господь врата Сионя, паче всех селений Иаковлих. Стих: Основания его на горах святых.
Притчей чтение. [Глава 14, ст. 27 - 35. Глава 15 ст. 1 - 4.]
На стиховне самогласен, глас 7, единожды:
Якоже впадый в разбойники и уязвен, тако и аз впадох от моих грехов, и уязвена есть душа моя: к кому прибегну исцелитися? токмо к Тебе душ же и телес врачу: излей на мя Боже великую Твою милость.
Иный самогласен, единожды, глас 4:
Прегрешивше от преступления перваго, от райския сладости и наслаждения ведени быхом в безчестнейшую жизнь: добродетелей бо подобающаго и хвальнаго жития совлекшеся прегрешеньми, яко в разбойники впадохом: исполу же мертвы есмы, прегрешивше от спасительных учений Твоих, но молим Тя от Марии явившагося, и безстрастно страстем приближившагося Владыку: обяжи наша яже от греха прибывшия струпы, и безмерное Твое милосердие изливай на ны, Твое исцелительное попечение, яко Человеколюбец.
Мученичен: Святых мученик приемый терпение, и от нас приими пение Человеколюбче, даруя нам тех молитвами велию милость.
Слава, И ныне, Богородичен:
От всех бед рабы Твоя сохраняй, благословенная Богородице: да Тя славим надежду душ наших.