Суббота 5 недели по Пасхе

К оглавлению - Триодь цветная.

На источник пришел еси, источниче чудес, в шестый час, Евин уловити плод: Ева бо в той изыде из рая, прелестию змиевою. Приближи бо ся самаряныня почерпсти воду, юже видев рече Спас: даждь Ми воду пити, и Аз воды текущия насыщу тя. И во град текши целомудренная, народом возвести абие: приидите видите Христа Господа, Спаса душ наших.

На студенец яко прииде Господь, самаряныня моляше Благоутробнаго: подаждь ми воду веры, и прииму купельныя воды, радование и избавление. Животодавче Господи, слава Тебе.

Собезначальный и соприсносущный Сын и Слово Отчее, на источник прииде, источник исцелений, и жена от Самарии прииде почерпсти воду, юже видев рече Спас: даждь Ми воду пити, и шедши пригласи твоего мужа. Она же яко Человеку глаголющи, а не Богу, утаити тщашеся, глаголаше: не имам мужа. И Учитель к ней: истину рекла еси, не имам мужа: пять бо имела еси, и ныне егоже имаши, несть твой муж. Она же о глаголе удивившися, и во град текши, народом вопияше, глаголющи: приидите видите Христа, Иже дарует мирови велию милость.

При студенце Иаковли обрет Иисус самаряныню, просит воду от нея, облаками покрываяй землю. О чудесе! Иже херувимы носимый, блуднице жене беседоваше, воды прося, Иже на водах землю повесивый, воды иский, Иже источники и езера вод изливаяй, хотя привлещи сию воистинну, уловляему от сопостата врага, и напоити ю водою живою, палимую в безместиих люте, яко един Благоутробный и Человеколюбец.

Иже Тебе ради, богоотец пророк Давид, песненно о Тебе провозгласи, величия Тебе сотворшему: предста Царица одесную Тебе. Тя бо Матерь ходатаицу живота показа, без Отца из Тебе вочеловечитися благоволивый Бог: да Свой паки обновит образ, истлевший страстьми, и заблуждшее горохищное обрет овча, на рамо восприим, ко Отцу принесет, и Своему хотению, с небесными совокупит силами, и спасет Богородице мир, Христос имеяй велию и богатую милость.

Животворящему Твоему Кресту, непрестанно кланяющеся Христе Боже, тридневное Воскресение Твое славим: тем бо обновил еси истлевшее человеческое естество Всесильне, и иже на небеса восход обновил еси нам, яко един Благ и Человеколюбец.

Стих: Господь воцарися, в лепоту облечеся.

Древа преслушания запрещение разрешил еси Спасе, на Древе крестнем волею пригвоздився, и во ад сошед Сильне, смертныя узы яко Бог растерзал еси. Темже кланяемся еже из мертвых Твоему Воскресению, радостию вопиюще: всесильне Господи, слава Тебе.

Стих: Ибо утверди вселенную:

Врата адова сокрушил еси Господи, и Твоею смертию смертное царство разрушил еси: род же человеческий от истления свободил еси, живот и нетление миру даровав, и велию милость.

Стих: Дому Твоему подобает святыня:

Господи, возшед на Крест, прадеднюю нашу клятву потребил еси, и сошед во ад, вечныя узники свободил еси, нетление даруя человеческому роду: сего ради поюще славим животворящее и спасительное Твое востание.

Егда явился еси во плоти Христе Боже, за неизреченное смотрение, слышавши самаряныня слово Тебе Человеколюбца, остави почерпало у студенца, и тече глаголющи сущим во граде: приидите видите Сердцеведца, еда Сей есть чаемый Христос, имеяй велию милость?

Воззревша на гробный вход, и пламене ангельскаго не терпяща мироносицы, с трепетом дивляхуся, глаголюща: еда украдеся отверзый разбойнику рай? еда ли воста, Иже и прежде страсти проповедавый востание? Воистинну воскресе Христос, сущим во аде подая живот, и воскресение. [Дважды.]

Еже от века утаеное, и ангелом несведомое таинство: Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Да радуется небо, да веселятся земная, яко Христос от Девы явився яко Человек, избави из истления все человечество Своею смертию, чудесы возсия: жене самаряныне воды просящей, подает источник исцелений, яко един Безсмертный. [Дважды.]

Воскресение Христово: псалом 50.

Канон праздника, на 6: И святаго обители, на 4: И Минеи на 4. Кондак, и ексапостиларий праздника.

Крест претерпевый и смерть, и воскресый из мертвых Всесильне Господи, славим Твое Воскресение.

Крестом Твоим Христе, от древния клятвы свободил еси нас, и смертию Твоею естество наше мучащаго диавола упразднил еси: востанием же Твоим радости вся исполнил еси. Темже вопием Ти: воскресый из мертвых Господи, слава Тебе.

Твоим Крестом Христе Спасе, настави нас на истину Твою, и избави нас от сетей вражиих, воскресый из мертвых, возстави ны падшияся грехом, простер руку Твою Человеколюбче Господи, молитвами святых Твоих.

Отеческих Твоих недр не разлучився, Единородный Слове Божий, пришел еси на землю за человеколюбие, Человек быв непреложен, и Крест и смерть претерпел еси плотию, безстрастный Божеством: воскрес же из мертвых, безсмертие подал еси роду человеческому, яко един Всесилен.

Источник живоначалия Иисус Спас наш, ко источнику пришед патриарха Иакова, пити прошаше воды от жены самаряныни. Сей же неприобщительное иудеом прирекшей, мудрый Зиждитель приводит ю, сладкими глаголы, паче к прошению присносущныя воды, юже и приимши всем проповеда рекущи: приидите, видите сокровенных видца и Бога, пришедшаго плотию, за еже спасти человека.

Источника приснотекущаго седяща на кладязи видевши жена, терпящи зной премногих страстей исцелительную просяше прияти воду жизни, из Него изливаемую аки поток: юже и прият туне от Слова и не ктому ко кладязю тщится, земному и тленному.

Стих: Наляцы, и успевай, и царствуй, истины ради и кротости, и правды.

Иудейския обычаи жене гонящей, и свое прилагающей непричастное, причастию воды Христос, приобщи мудрый Содетель, сладкими провещаньми, и просити животекущую сию воду Божественную, юже пивши, ко граду прииде возвещающи бывшая.

Стих: Возлюбил еси правду, и возненавидел еси беззаконие.

Ни почерпала имаши, и кладязь глубочайший, откуду убо подаси ми воду нетленную? Самаряныня вопияше Ти Христе, Тебе яко человека мнящи, а не Бога, и словесем чудящися: юже вещаньми сладчайшими напоив, и Бога Тя всех тварей исповедати сотворил еси.

Тако глаголет Господь самаряныни: аще бы еси ведала дар Божий, и Кто есть глаголяй тебе, даждь Ми воды пити, ты бы просила у Него, и дал бы ти пити, да не вжаждешися во веки, глаголет Господь.

Во дни оны, Павел и Варнава живяста во Антиохии, учаще и благовествующе слово Господне, и со инеми многими.	Во дни оны, Павел и Варнава жили в Антиохии, уча и благовествуя, вместе с другими многими, слово Господне.
По неких же днех, рече Павел к Варнаве: возвращшеся подобает посетити братию нашу во всех градех, в нихже проповедахом слово Господне, како пребывают.	По некотором времени Павел сказал Варнаве: пойдем опять, посетим братьев наших по всем городам, в которых мы проповедали слово Господне, как они живут.
Варнава же восхоте пояти с собою Иоанна, нарицаемаго Марка:	Варнава хотел взять с собою Иоанна, называемого Марком.
Павел же глаголаше: отступльшаго от наю от Памфилии, и не шедшаго с нама на дело, в неже положени быхом, не пояти сего с собою.	Но Павел полагал не брать отставшего от них в Памфилии и не шедшего с ними на дело, на которое они были посланы.
Бысть убо распря, яко отлучитися има от себе, Варнава убо поем Марка, отплы в Кипр:	Отсюда произошло огорчение, так что они разлучились друг с другом; и Варнава, взяв Марка, отплыл в Кипр;
Павел же избрав Силу, изыде предан благодати Божией, от братий.	а Павел, избрав себе Силу, отправился, быв поручен братиями благодати Божией,
Прохождаше Сирию и Киликию, утверждая церкви.	и проходил Сирию и Киликию, утверждая церкви.

Рече Господь ко пришедшим к Нему иудеем: овцы Моя гласа Моего слушают: и Аз знаю их, и по Мне грядут.	Сказал Господь ко пришедшим к Нему иудеям: овцы Мои слушаются голоса Моего, и Я знаю их; и они идут за Мною.
И Аз живот вечный дам им, и не погибнут во веки, и не восхитит их никтоже от руки Моея.	И Я даю им жизнь вечную, и не погибнут вовек; и никто не похитит их из руки Моей.
Отец Мой, Иже даде Мне, болий всех есть: и никтоже может восхитити их от руки Отца Моего.	Отец Мой, Который дал Мне их, больше всех; и никто не может похитить их из руки Отца Моего.
Аз и Отец едино есма.	Я и Отец — одно.
Взяша же камение паки иудее, да побиют Его.	Тут опять Иудеи схватили каменья, чтобы побить Его.
Отвеща им Иисус: многа добра дела явих вам от Отца Моего, за кое их дело камение мещете на Мя?	Иисус отвечал им: много добрых дел показал Я вам от Отца Моего; за которое из них хотите побить Меня камнями?
Отвещаша Ему иудее, глаголюще: о добре деле камение не мещем на Тя, но о хуле, яко Ты человек сый, твориши Себе Бога.	Иудеи сказали Ему в ответ: не за доброе дело хотим побить Тебя камнями, но за богохульство и за то, что Ты, будучи человек, делаешь Себя Богом.
Отвеща им Иисус: несть ли писано в законе вашем: Аз рех, бози есте?	Иисус отвечал им: не написано ли в законе вашем: Я сказал: вы боги?
Аще оны рече боги, к нимже слово Божие бысть, и не может разоритися Писание:	Если Он назвал богами тех, к которым было слово Божие, и не может нарушиться Писание, —
Егоже Отец святи и посла в мир, вы глаголете, яко хулу глаголеши, зане рех: Сын Божий есмь.	Тому ли, Которого Отец освятил и послал в мир, вы говорите: богохульствуешь, потому что Я сказал: Я Сын Божий?
Аще не творю дела Отца Моего, не имите Ми веры.	Если Я не творю дел Отца Моего, не верьте Мне;
Аще ли творю, аще и Мне не веруете, делом Моим веруйте: да разумеете и веруете, яко во Мне Отец и Аз в Нем.	а если творю, то, когда не верите Мне, верьте делам Моим, чтобы узнать и поверить, что Отец во Мне и Я в Нем.