Чинопоследование Панихиды
Свящ: Благословен Бог наш... Аминь.
Лик: Аллилуиа, Аллилуиа, Аллилуиа (на 8 глас)
Глубиною мудрости...
Слава и ныне...
Тебе и стену...
Благословен еси Господи...
Святых лик обрете спасение...
Благословен еси Господи...
Упокой Боже рабы Твоя...
Слава... Трисиятельное единаго Божества...
И ныне... Радуйся Чистая...
Аллилуия, аллилуиа, аллилуиа, слава Тебе Боже - 3 раза
Покой Спасе наш...
От Девы возсиявый миру Христе Боже
Свящ: Запевы: Покой Господи души усопших раб Твоих.
Слава и ныне.
Лик: Молитву пролию ко Господу...
Свящ: Ектения (Паки и паки...)
Лик: Господи помилуй
Свящ: Молитва "Боже духов"
Возглас: Яко Ты еси воскресение... Аминь.
Лик: Со святыми упокой... Сам един еси безсмертный...
Свящ: Запевы.
Богородицу и Матерь Света в песнех возвеличим.
Лик: Дуси и души праведных восхвалят Тя, Господи.
Ужасеся...
Чтец: Трисвятое по Отче наш.
Свящ: Яко Твое есть Царство... Аминь.
Лик: Со духи праведных...
В покоищи Твоем
Слава: Ты еси Бог...
И ныне: Едина Чистая Непорочная...
Свящ: Ектения (Помилуй нас Боже...)
Лик: Господи помилуй - 3 раза.
Свящ: Молитва Боже Духов
Возглас: Яко Ты еси воскресение... Аминь.
Свящ: Премудрость. Пресвятая Богородице спаси нас.
Лик: Честнейшую...
Свящ: Слава Тебе Христе Боже...
Лик: Слава и ныне. Господи помилуй (3р). Благослови.
Свящ: Отпуст: Живыми и мертвыми...
Во блаженном успении...
Лик: Вечная память (3р).
Священник: Благословен Бог наш всегда, ныне, и присно, и во веки веков.
Хор: Аминь.
Глубиною мудрости человеколюбно вся строяй и полезное всем подаваяй, едине Содетелю, упокой, Господи, душы раб Твоих: на Тя бо упование возложиша Творца и зиждителя и Бога нашего.
Слава и ныне: Тебе и стену и пристанище имамы, и молитвенницу благоприятну к Богу, Егоже родила еси, Богородице безневестная, верных спасение.
Благословен еси, Господи, научи мя оправданием Твоим.
Святых лик обрете источник жизни и дверь райскую да обрящу и аз путь покаянием; погибшее овча аз есмь, Воззови мя, Спасе, и спаси мя.
Благословен еси, Господи, научи мя оправданием Твоим.
Агнца Божия проповедавше, и заклани бывше якоже агнцы, и к жизни нестареемей, святии, и присносущней преставльшеся. Того прилежно мученицы молите, долгов разрешение нам даровати.
Благословен еси, Господи, научи мя оправданием Твоим.
В путь узкий хождшии прискорбный, вси в житии крест яко ярем вземшии, и Мне последовавши верою, приидите насладитеся, ихже уготовах вам почестей, и венцев небесных.
Благословен еси, Господи, научи мя оправданием Твоим.
Образ есмь неизреченныя Твоея славы аще и язвы ношу прегрешений. Ущедри Твое создание, Владыко и очисти Твоим благоутробием и возжеленное отечество подаждь ми рая паки жителя мя сотворяя.
Благословен еси, Господи, научи мя оправданием Твоим.
Древле убо от несущих создавый мя и образом Твоим божественным почтый. Преступлением же заповеди паки мя возвративый в землю, от неяже взят бых. Но еже по подобию возведи древнею добротою возобразитеся.
Благословен еси, Господи, научи мя оправданием Твоим.
Упокой Боже рабы Твоя, и учини я в раи, идеже лицы святых, Господи, и праведницы сияют яко светила. Усопшия рабы Твоя упокой презирая их вся согрешения.
Слава: Трисиятельное единаго Божества благочестно поем вопиюще. / Свят еси Отче безначальный, / собезначальный Сыне и Божественный Душе, / Просвети нас верою Тебе служащих / и вечнаго огня исхити.
И ныне: Радуйся Чистая, Бога плотию рождшая во спасение всех / Еюже род человеческјй обрете спасение. / Тобою да обрящем рай, / Богородице чистая, благословенная.
Аллилуия, аллилуия, аллилуия, слава Тебе Боже (трижды).
Паки и паки миром Господу помолимся.
Еще молимся о упокоении душ усопших рабов Божиих (имена); и о еже проститися им всякому прегрешению, вольному же и невольному.
Яко да Господь Бог учинит душы их, идеже праведнии упокояются.
Милости Божия, Царства Небеснаго, и оставления грехов их у Христа безсмертнаго Царя и Бога нашего просим
Господу помолимся. Господи, помилуй.
Яко Ты еси воскресение, и живот, и покой, усопших рабов Твоих (имена), Христе Боже наш; и Тебе славу возсылаем, со безначальным Твоим Отцем, и с пресвятым и благим и животворящим Твоим Духом, ныне и присно, и во веки веков.
Хор: Аминь.
Покой, Спасе наш, / с праведными рабы Твоя, / и сия всели во дворы Твоя, / якоже есть писано, / презирая яко благ прегрешения их / вольная и невольная, / и вся яже в ведении и не в ведении, Человеколюбче.
Слава и ныне: От Девы возсиявый миру Христе Боже / сыны света Тою показавый, помилуй нас.
Яко по суху пешешествовав Израиль, по бездне стопами, гонителя фараона видя потопляема, Богу победную песнь поим вопияше.
Покой, Господи, души усопших раб Твоих. Слава и ныне.
Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Покой, Господи, души усопших раб Твоих. Слава и ныне.
Несть свят, якоже Ты, Господи Боже мой, вознесый рог верных Твоих Блаже, и утвердивый нас на камени исповеданя Твоего.
Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Покой, Господи, души усопших раб Твоих. Слава и ныне.
Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, многомилостиве.
Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.
Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.
Сам Един еси Безсмертный, сотворивый и создавый человека: земнии убо от земли создахомся, и в землю туюжде пойдем, якоже повелел еси, Создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа.
Паки и паки миром Господу помолимся.
Еще молимся о упокоении душ усопших рабов Божиих (имена); и о еже проститися им всякому прегрешению, вольному же и невольному.
Яко да Господь Бог учинит душы их, идеже праведнии упокояются.
Милости Божия, Царства Небеснаго, и оставления грехов их у Христа безсмертнаго Царя и Бога нашего просим
Господу помолимся. - Господи, помилуй.
Яко Ты еси воскресение, и живот, и покой, усопших рабов Твоих (имена), Христе Боже наш; и Тебе славу возсылаем, со безначальным Твоим Отцем, и с пресвятым и благим и животворящим Твоим Духом, ныне и присно, и во веки веков.
Хор: Аминь.
Со святыми упокой Христе, душы раб Твоих идеже несть болезнь, ни печаль, ни воздыхание, но жизнь безконечная.
Сам един еси безсмертный, сотворивый и создавый человека. Земнии убо от земли создахомся, и в землю туюжде пойдем якоже повелел еси, создавый мя, и рекий ми: яко земля еси и в землю отыдеши, аможе все человецы пойдем. Надгробное рыдание творяще песнь: Аллилуия, аллилуия, аллилуия.
Покой, Господи, души усопших раб Твоих. Слава и ныне.
Бога человеком невозможно видети, на Него же не смеют чини ангельстии взирати. Тобою бо, Всечистая, явися человеком Слово воплощенно, Егоже величающе, с небесными вои, Тя ублажаем.
Хор: Аминь.
Со духи праведных скончавшихся, душы раб Твоих, Спасе, упокой, сохраняя их во блаженной жизни, яже у Тебя, человеколюбче. В покоищи Твоем Господи, идеже вси святии Твои упокоеваются, упокой и душы раб Твоих, яко един еси человеколюбец.
В покоищи Твоем, Господи, идеже вси святии Твои упокоеваются, упокой и души раб Твоих, яко Един еси Человеколюбец.
Слава Отцу и Сыну и Святому Духу: Ты еси Бог, сошедый во ад, и узы окованных разрешивый, сам и душы раб Твоих упокой.
И ныне и присно и во веки веков, Аминь: Едина чистая и непорочная Дево, Бога без семене рождшая, моли спастися душам их
Помилуй нас, Боже, по велицей милости Твоей, молим ти ся, услыши и помилуй.
Господи, помилуй (трижды).
Еще молимся о упокоении душ усопших рабов Божиих (имена); и о еже проститися им всякому прегрешению, вольному же и невольному.
Яко да Господь Бог учинит душы их, идеже праведнии упокояются.
Милости Божия, Царства Небеснаго, и оставления грехов их у Христа безсмертнаго Царя и Бога нашего просим
Господу помолимся.
Господи, помилуй.
После “Тебе, Господи:”
Священник:
Боже духов и всякия плоти, смерть поправый, и диавола упразднивый, и живот миру Твоему даровавый, сам, Господи, упокой душы усопших рабов Твоих (имена): в месте светле, в месте злачне, в месте покойне, отнюдуже отбеже болезнь, печаль и воздыхание: всякое согрешение содеянное ими, словом, или делом, или помышлением, яко благий человеколюбец Бог прости. Яко несть человек, иже жив будет, и не согрешит: Ты бо един кроме греха, правда Твоя правда во веки, и слово Твое истина.
Яко Ты еси воскресение, и живот, и покой, усопших рабов Твоих (имена), Христе Боже наш; и Тебе славу возсылаем, со безначальным Твоим Отцем, и с пресвятым и благим и животворящим Твоим Духом, нынееи присно, и во веки веков.
Хор: Аминь.
Отпуст и возглашение иерея или диакона:
Во блаженном успении вечный покой подаждь, Господи, усопшим рабом Твоим (имярек) и сотвори им вечную память.
Хор: Вечная память. (Трижды)