К оглавлению

На Утрени,

на Бог Господь, тропарь Осмогласника воскресен, и Богородичен, обычное стихословие, и полиелей.

Обычныя два псалма: припеваем же к сим и третий псалом: На реках Вавилонских: со аллилуиею красною.

Степенны, и прокимен гласа. Всякое дыхание: Евангелие утреннее. Таже, Слава, Глас 8: Покаяния отверзи ми двери: И ныне, Богородичен. Подобен: На спасения стези: Таже Глас 6: Помилуй мя Боже: Множества содеянных мною лютых:

Канон воскресен, со ирмосом на 4, и крестовоскресный на два, и Богородицы на два, и Триоди на 6. Минеи же последование поем на Повечерии, в пяток вечера.

Канон, творение господина Иосифа. Глас 2:

Песнь 1: Моисейскую песнь:

Иисусе Боже, кающася приими ныне и мене, яко блуднаго сына, все житие в лености живша, и Тебе прогневавша.

Еже ми дал еси прежде, зле расточих Божественное богатство, удалихся от Тебе, блудно жив: благоутробне Отче, приими убо и мене обращающася.

Слава: Объятия ныне Отеческая простер, приими Господи и мене, якоже блуднаго, Всещедре, яко да благодарно прославлю Тя.

Богородичен: На мне Боже, всю показав благостыню, презри моих множество согрешений, яко благодетель, божественными Матере Твоея мольбами.

Катавасии же поем ирмосы канона. Моисейскую песнь восприимши возопий душе: Помощник и Покровитель бысть мне во спасение: Сей мой Бог, и прославлю Его.

Песнь 3: Неплодствовавший мой ум:

Весь вне быв себе, умовредно прилепихся страстей обретателем: но приими мя Христе, якоже блуднаго.

Блуднаго гласу поревновав, вопию: согреших, Отче, якоже онаго убо, и мене обыми ныне, и не отрини мене.

Слава: Объятия Твоя простер Христе, милостивно приими мя, от страны дальныя греха и страстей обращающася.

Богородичен: Добрая в женах, обогати и мене добрых виды, грехи многими обнищавшаго Чистая, яко да славлю Тя.

Ирмос: Неплодствоваший мой ум, плодоносен Боже покажи ми, делателю добрых, насадителю благих, благоутробием Твоим.

Седален, Глас 1.

Подобен: Гроб Твой:

Объятия Отча отверсти ми потщися, блудно иждих мое житие, на богатство неиждиваемое взираяй щедрот Твоих Спасе, ныне обнищавшее мое сердце не презри. Тебе бо Господи, во умилении зову: согреших, Отче, на небо и пред Тобою.

Слава, тойже. И ныне, Богородичен. Подобен:

Безневестная Чистая Богородице Дево, едина верных предстательнице и покрове, бед и скорбей, и лютых обстояний, всех свободи, на Тя надежды Отроковице имущих, и души наша спаси божественными молитвами Твоими.

Песнь 4: Еже от Девы Твое Рождество: >Богатство благих, еже дал ми еси Небесный Отче, расточих зле, странным гражданом порабощен. Темже вопию Ти: согреших Ти, приими мя яко блуднаго древле, простер объятия мне Твоя.

Всякой злобе поработихся, приникнув окаянно страстей делателем, и себе вне бых несмотрением, ущедри мя Спасе, Пренебесный Отче, прибегающа ко многим Твоим щедротам.

Слава: Всякаго студа исполнихся, не смея воззрети на высоту небесную: ибо безсловесно приникнув греху, ныне же обращься вопию умилением: согреших Ти, приими мя Всецарю.

Богородичен: Человеком помоще, упование твердое всем христианом, прибежище Чистая спасаемым: спаси мя Дево, матерними Твоими мольбами, и будущия жизни сподоби.

Ирмос: Еже от Девы Твое Рождество пророк предзря, возпроповедаше вопия: слух Твой услышах и убояхся: яко от юга, и из горы святыя, приосененныя пришел еси Христе.

Песнь 5: Нощи прешедшей:

Поработихся гражданом странным, и в страну тлетворную отыдох, и исполнихся студа: ныне же обращаяся зову Ти Щедре, согреших.

Отеческая Твоя благоутробия ныне отверзи ми, от злых обратившуся, Небесный Отче, и не отрини мене, имеяй премногую милость.

Слава: Не смею воззрети горе на высоту, без числа Христе прогневав Тя: но ведый Твоя щедроты милостивныя, взываю: согреших Ти, очисти, и спаси мя.

Богородичен: Всесвятая Дево благодатная, очищение всем рождшая, моих согрешений тяжкое бремя Твоими молитвами облегчи.

Ирмос: Нощи прешедшей, приближися день и свет миру возсия: сего ради хвалят Тя ангельстии чини, и славословят Тя вся всяческая.

Песнь 6: Во глубине греховней:

Глубина согрешений содержит мя присно, и треволнение грехов погружает мя: окорми мя ко пристанищу жизни, Христе Боже, и спаси мя Царю славы.

Богатство Отеческое расточих люте, и обнищав студа исполнихся, порабощен неплодными помышленьми. Темже Ти вопию: Человеколюбче ущедри, и спаси мя.

Слава: Гладом истаявша всяких благ, и устранившася от Тебе Всеблагий, ущедри обращающася мя ныне: и спаси Христе, поюща Твое человеколюбие.

Богородичен: Спаса и Владыку рождшая Христа, спасения мя Отроковице сподоби, обнищавша от всяких благ, Дево Чистая, да пою Твоя величия.

Ирмос: Во глубине греховней содержимь есмь Спасе, и в пучине житейстей обуреваемь: но якоже Иону от зверя, и мене от страстей возведи, и спаси мя.

Кондак, Глас 3.

Подобен: Дева днесь:

Отеческия славы Твоея удалихся безумно, в злых расточив еже ми предал еси богатство. Темже Ти блуднаго глас приношу: согреших пред Тобою Отче щедрый, приими мя кающася, и сотвори мя яко единаго от наемник Твоих.

Икос: Спасу нашему на всяк день учащу Своим гласом, писания услышим о блудном, и целомудренном паки. И сего верою подражаем доброе покаяние, ведущему тайная всех, смирением сердца воззовем согрешихом Ти Отче щедрый, и никогдаже достойни есмы нарещися чада, якоже прежде. Но яко естеством сый человеколюбив, Ты приими, и сотвори мя яко единаго от наемник Твоих.

И бывает чтение прежде синаксаря в Минеи: также в Триоди по чину.

Стихи:

Блудник аще кто есть яко аз, дерзай, гряди:

Божиих бо щедрот всем отверзеся дверь.

В сий день блуднаго сына воззвание празднуем, еже божественнии отцы наши второе в Триоди учиниша, вины ради сицевыя. Понеже бо суть нецыи многая безместная в себе сведуще, блудне же зело от юнаго возраста живуще, и пиянствы, и нечистотами упражняющеся, и во глубину злых сице впадше, во отчаяние приходят, еже убо рождение есть гордости: и отсюду к попечению добродетели никакоже приходити хотят, и злых узы предлагающе, темже и горшим злым присно впадают. Человеколюбно и отечески святии отцы, и к таковым человеком имуще, и отвести от отчаяния хотяще таковую притчу зде по первей учиниша, отчаяния страсть из корене востерзающе, и к добродетели восприятию возставляюще, и человеколюбная и преблагая Божия благоутробия множае согрешившим, блудным показующе: яко ничтоже есть от грехов, еже Его человеколюбный разум победит, от сея притчи Христовы сие представляюще. Два убо сына суть человека, сиречь, Богочеловека Слова, праведнии и грешнии. Старейший убо есть, в заповедех Божиих, и во благом Его присно пребываяй, и никогдаже от Него отступаяй. Юный же, грех возлюбивый, и с Богом сопребывания студными делы отрекийся, и о нем Божие человеколюбие иждив, блудне поживый: яко еже по образу цело не соблюдаяй, и лукавому демону последствовавый и работавый сластьми онаго хотением, и не возмог желание исполнити. Несытная бо вещь грех, согревающий обычаем, ради временнаго наслаждения: егоже и рожцем уподобляет, яко свиниям сущая пища. Рожцы бо, первее убо сладко нечто предлагают: последи же жестоко нечто, и аки плевы бывают, яже весьма стяжа и грех. Едва убо возбнув блудный, яко гладом добродетели погибая приходит ко Отцу глаголя: Отче, согреших на небо и пред Тобою, и несмь достоин нарещися сын Твой. Той же приемлет сего кающася, не поношая, но раскриляяся и обымая, Божественныя и отеческия утробы показует. И дает ему одежду, сиречь, святое крещение, и печать и обручение, благодать Всесвятаго Духа. К сим же и сапоги, да не ктому от змиев и скорпий уязвятся по Богу его стопы: но наипаче онех главы сокрушити возмогут. Потом же презельнейшею радостию и тельца упитаннаго его ради закалает, Сына Своего Единороднаго, Отец и плоти Его дает причаститися, и крови. И аще чудяся старейший сын пребезчисленному Его милосердию, глаголет, елико убо и рече. Человеколюбец же, и онаго молчати творит, вводя тихими словесы, и кроткими и любезными: ты всегда со Мною еси, глаголя, и порадоватися подобаше, и Отцу спирствовати, яко сын Мой сей мертв бяше грехом прежде, и оживе, раскаявся о нихже деяше безсловесных: и погибший, яко далече Ми быв обычаем сластей, и обретеся Мною, милосердием Своим пострадавшим, и милостивным нравом призвавшим его. Может же притча сия и к людем еврейским, и к нам взятися. Сея убо ради вины и притча сия зде от святых отец учинися: востерзающи убо, якоже речеся, отчаяние и боязнь, еже добрым делом касатися: поущающи же в покаяние и раскаяние, иже яко блуднаго согрешивша: еже убо и оружие есть величайшее, во отгнание сопротивнаго стрел, и поможение крепкое. Неизреченным человеколюбием Твоим Христе Боже наш помилуй нас, аминь.

Песнь 7: Херувимы подражающе:

Сладостем телесным приклонихся всеокаянно, и поработихся весьма страстным изобретением, и странен бых от Тебе Человеколюбче. Ныне же зову блуднаго гласом: согреших Христе, не презри мене, яко един милостив.

Взываю, согреших, никакоже воззрети дерзая на высоту небесную Всецарю, яко в безумии един Тя прогневах, отвергся Твоих повелений: темже яко един Благий, не отвержи мене от Твоего лица.

Слава: Апостол, Господи, и пророк, и преподобных, и честных мученик, и праведных мольбами прости ми вся, яже согреших, прогневав Христе благость Твою: яко да песнословлю Тя во вся веки.

Богородичен: Херувим явльшися, и серафим Богородице, и всех светлейшая небесных воинств, с сими умоли, Егоже воплотила еси Божественное Слово Всенепорочная, Безначальнаго Отца, яко да благ вечнующих вси сподобимся.

Ирмос: Херувимы подражающе отроцы в пещи ликовствоваху вопиюще: благословен еси Боже, яко истиною и судом навел еси сия вся грех ради наших, препетый, и препрославленный во вся веки.

Песнь 8: В купине Моисею:

Сшедый на землю спасти мир, вольною нищетою за милосердие многое, обнищавшаго мя ныне от всякаго благодеяния, яко милостивый, спаси.

От Твоих заповедей удалився, поработихся всеокаянно лестцу: обращающагося же ныне, яко блуднаго древле припадающа Тебе, приими Пренебесный Отче.

Благословим Отца, и Сына, и Святаго Духа, Господа.

Тлетворными помышленьми объемся омрачихся, и от Тебе удалихся, весь вне себе быв Щедре. Темже в покаянии припадающа Тебе спаси.

Богородичен: Богородительнице Чистая, низверженных исправление едина, исправи и мене всякими грехами сокрушеннаго всего и смиреннаго.

Ирмос: В купине Моисею Девы чудо, на Синайстей горе, прообразившаго иногда, пойте, благословите и превозносите во вся веки.

Песнь 9: От земнородных кто слыша таковое?

Виждь Христе печаль сердца, виждь мое обращение, виждь слезы Спасе, и не презри мене: но обыми паки благоутробия ради, множеству спасаемых Пречистая, яко да пою благодарно милости Твоя.

Яко разбойник вопию: помяни мя, яко мытарь умилився, бию в перси, и зову ныне: очисти, якоже блуднаго приими мя Всещедрый, от всех зол моих Всецарю: яко да пою Твое крайнее снизхождение.

Воздохни ныне душе моя всеокаянная, и возопий Христу: мене ради волею обнищавый Господи, обнищавшаго мя от всякаго благодеяния, добрых богатством яко Благий и Многомилостивый един обогати мя.

Слава: Еже иногда соделал еси веселие блуднаго, Блаже, обращением вольным: сие ныне сотвори и на мне окаянном, простирая ми честная Твоя объятия: да спасся песнословлю крайнее Твое снизхождение.

Богородичен: Светлыми молитвами Твоими Дево, мысленная моя очеса омраченная злобою, просвети, молюся, и к путем покаяния введи мя: яко да должно Тя песнословлю, паче слова Слово воплотившую.

Ирмос: От земнородных кто слыша таковое? Или кто виде когда, яко Дева обретеся во чреве имущая, и безболезненно Младенца порождшая? Таковое Твое чудо, и Тя Чистая Богородице величаем.

Ексапостиларий Осмогласника: таже настоящий Триоди.

Подобен: Жены услышите:

Богатство, еже ми дал еси, благодати, окаянный отшед, непотребно зле иждих, Спасе, блудно пожив, демоном льстивно расточих. Темже мя обращающася, якоже блуднаго приими, Отче щедрый, и спаси.

Иный, подобен: Расточих богатство Твое иждив, Господи, и лукавым демоном повинухся окаянный: но Спасе Всеблагоутробне, блуднаго ущедри, и оскверншася очисти, первую отдаяй мне одежду Твоего Царствия.

Богородичен, подобен: Святая Мати Дево, велие проповедание апостолов, мучеников, и пророков, и преподобных, Твоего Сына и Господа умилостиви нам рабом Твоим Богородительнице, егда сядет судити по достоянию коегождо.

На хвалитех стихиры Осмогласника воскресны, 4: и анатолиев, 1: и Триоди самогласны, 3. Глас 2.

Блуднаго глас приношаю Ти, Господи: согреших пред очима Твоима Благий, расточих богатство Твоих дарований. Но приими мя кающася Спасе, и спаси мя.

Глас 4. Стих: Воскресни Господи Боже мой:

Яко блудный сын приидох и аз Щедре, житие все иждивый во отшествии: расточих богатство, еже дал ми еси Отче: приими мя кающася Боже, и помилуй мя.

Глас 8: Стих: Исповемся Тебе Господи, всем сердцем моим:

Иждих блудно Отеческаго имения богатство, и расточив, пуст бых, в страну вселився лукавых граждан, и ктому не терпя с ними сожительства, обращься вопию Ти щедрому Отцу: согреших на небо и пред Тобою, и несмь достоин нарещися сын Твой: сотвори мя яко единаго от наемник Твоих Боже, и помилуй мя.

Слава, Глас 6: Отче Благий, удалихся от Тебе, не остави мене, ниже непотребна покажи Царствия Твоего: враг вселукавый обнажи мя и взят мое богатство, душевная дарования блудно расточих. Востав убо обращься к Тебе вопию: сотвори мя яко единаго от наемник Твоих: мене ради на Кресте пречистеи Твои руце прострый, да лютаго зверя исхитиши мя, и в первую одежду облечеши мя, яко един Многомилостив.

И ныне: Преблагословенна еси Богородице Дево:

Славословие великое. ектении, и отпуст. И обычно литиа, на нейже поется Слава, И ныне: стихира евангельская: и чтутся оглашения. И час первый в притворе. И совершенный отпуст.