Яков Кротов. Богочеловеческая комедия. Служебник. Евхаристия. Вспомогательные материалы.

Литургия Иоанна Златоустаго

 

Хотяй священник божественное совершати тайнодействие, должен есть первее убо примирен быти со всеми, и не имети что на кого, и сердце же, елика сила, от лукавых блюсти помыслов, воздержатися же с вечера и трезвитися даже до времени священнодействия. Времени же наставшу, входит в храм, и соединився со диаконом, творят вкупе к востоку пред святыми дверьми поклонения три.

Таже глаголет диакон: Благослови, владыко.

Иерей:

Благословен Бог наш всегда, ныне и присно, и во веки веков. Аминь.

Начинает глаголати диакон:

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава Отцу, и Сыну, и Святому Духу, и ныне и присно, и во веки веков. Аминь.

Пресвятая Троице, помилуй нас: Господи, очисти грехи наша: Владыко, прости беззакония наша: Святый, посети и исцели немощи наша, имене Твоего ради.

Господи, помилуй. трижды. Слава, и ныне:

Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашым: и не введи нас во искушение, но избави нас от лукаваго.

Иерей: Яко Твое есть царство, и сила, и слава, Отца, и Сына, и святаго Духа, ныне и присно, и во веки веков. Аминь.

Таже глаголют:

Помилуй нас, Господи, помилуй нас; всякаго бо ответа недоумеюще, сию Ти молитву яко Владыце грешнии приносим: помилуй нас.

Слава:

Господи, помилуй нас, на Тя бо уповахом, не прогневайся на ны зело, ниже помяни беззаконий наших: но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.

И ныне:

Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.

Таже отходят ко иконе Христове и целуют ю, глаголюще:

Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

Таже целуют и икону Богородицы, глаголюще тропарь:

Милосердия сущи источник, милости сподоби нас, Богородице, призри на люди согрешившыя, яви яко присно силу твою: на тя бо уповающе, радуйся, вопием ти яко иногда Гавриил безплотных архистратиг.

Таже приклонь главу, иерей глаголет сию молитву:

Господи, низпосли руку Твою с высоты святаго жилища Твоего и укрепи мя в предлежащую службу Твою: да неосужденно предстану страшному Престолу Твоему и безкровное священнодействие совершу, яко Твоя есть сила и слава во веки веков. Аминь.

Таже творит и к ликом поклоны по единому, и тако отходят в жертвенник, глаголюще:

Вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающии на Тя, во веки возрадуются, и вселишися в них, и похвалятся о Тебе любящии имя Твое. Яко Ты благословиши праведника, Господи, яко оружием благоволения венчал еси нас.

Вшедше же во святилище, творят поклоны три пред святою трапезою и целуют святое евангелие, святую трапезу и напрестольный крест. Таже приемлют в руки своя кийждо стихарь свой и творят поклоны три к востоку, глаголюще в себе кийждо:

Боже, очисти мя, грешнаго, и помилуй мя.

Таже приходит к иерею диакон, держа в десней руце стихарь со орарем, и подклонив ему главу, глаголет:

Благослови, владыко, стихарь со орарем.

Иерей глаголет:

Благословен Бог наш всегда, ныне и присно, и во веки веков.

Таже отходит диакон во едину страну святилища, и облачится в стихарь, моляся сице:

Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.

И орарь убо целовав, налагает на левое рамо. Нарукавницы же налагая на руки, на десную убо глаголет:

Десница Твоя, Господи, прославися в крепости, десная Твоя рука, Господи, сокруши враги, и множеством славы Твоея стерл еси супостаты.

На левую же, глаголет:

Руце Твои сотвористе мя и создасте мя: вразуми мя, и научуся заповедем Твоим.

Таже отшед в предложение, уготовляет священная. Святый убо дискос поставляет ошуюю страну, потир же, еже есть святую чашу, одесную, и прочая с ними.

Иерей же сице облачится: прием стихарь в левую руку, и поклонився трижды к востоку, якоже речеся, назнаменует, глаголя:

Благословен Бог наш всегда, ныне и присно, и во веки веков.

Таже облачится, глаголя:

Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.

Таже прием епитрахиль, и назнаменав облагается ею, глаголя:

Благословен Бог, изливаяй благодать свою на священники своя, яко миро на главе, сходящее на браду, браду аароню, сходящее на ометы одежды его.

Таже прием пояс и опоясуяся, глаголет:

Благословен Бог, препоясуяй мя силою, и положи непорочен путь мой, совершаяй нозе мои яко елени, и на высоких поставляяй мя.

Нарукавницы же налагая на на руки, на десную убо глаголет:

Десница Твоя, Господи, прославися в крепости, десная Твоя рука, Господи, сокруши враги, и множеством славы Твоея стерл еси супостаты.

На левую же, глаголет:

Руце Твои сотвористе мя и создасте мя: вразуми мя, и научуся заповедем Твоим.

Таже прием набедренник, аще имать, и благословив и, и целовав, глаголет:

Препояши меч твой по бедре твоей, сильне, красотою твоею, и добротою твоею, и наляцы, и успевай, и царствуй, истины ради и кротости и правды, и наставит тя дивно десница твоя, всегда, ныне и присно, и во веки веков. Аминь.

Таже прием фелонь, и благословив, целует, глаголя сице:

Священницы Твои, Господи, облекутся в правду, и преподобнии Твои радостию возрадуются всегда: ныне, и присно, и во веки веков. Аминь.

Таже отшедше в предложение, умывают руки, глаголюще:

Умыю в неповинных руце мои и обыду жертвенник Твой, Господи, еже услышати ми глас хвалы Твоея и поведати вся чудеса Твоя. Господи, возлюбих благолепие дому Твоего и место селения славы Твоея. Да не погубиши с нечестивыми душу мою и с мужи кровей живота моего: ихже в руках беззакония, десница их исполнися мзды. Аз же незлобием моим ходих: избави мя, Господи, и помилуй мя. Нога моя ста на правоте, в церквах благословлю Тя, Господи.

Таже поклонения три пред предложением сотворше, глаголют кийждо:

Боже, очисти мя, грешного, и помилуй мя. И:

Искупил ны еси от клятвы законныя честною Твоею Кровию: на Кресте пригвоздився, и копием прободся, безсмертие источил еси человеком: Спасе наш, слава Тебе.

Таже глаголет диакон:

Благослови, владыко.

И начинает иерей:

Благословен Бог наш всегда, ныне и присно, и во веки веков.

Диакон: Аминь.

Таже приемлет иерей левою убо рукою просфору, десною же святое копие, и знаменуя им трижды верху печати просфоры, глаголет:

В воспоминание Господа и Бога и Спаса нашего Иисуса Христа.

А абие водружает копие в десную страну печати, и глаголет режа:

Яко овча на заколение ведеся.

В левую же:

И яко агнец непорочен, прямо стригущаго его безгласен, тако не отверзает уст своих.

В горнюю же страну печати:

Во смирении Его суд Его взятся.

В долнюю же страну:

Род же Его кто исповесть.

Диакон же, взирая благоговейно на сицевое таинство, глаголет на единем коемждо резании: Господу помолимся, держа и орарь в руце. По сих глаголет: Возми, владыко.

Священник же, вложив святое копие от косвенныя десныя страны просфоры, взимает святый хлеб, глаголя сице:

Яко вземлется от земли живот Его.

И положив и в знак на святем дискосе, рекшу диакону:

Пожри, владыко.

Жрет его крестовидно, сице глаголя:

Жрется агнец божий, вземляй грехи мира, за мирский живот и спасение.

И обращает горе другую страну, имущую крест.

Диакон глаголет:

Прободи, владыко.

Священник же, прободая и в десную страну копием, глаголет:

Един от воин копием ребра Его прободе, и абие изыде кровь и вода, и видевый свидетельствова, и истинно есть свидетельство его.

Диакон же, прием вино и воду, глаголет ко священнику:

Благослови, владыко, святое соединение.

И взем над ними благословение, вливает во святый потир от вина вкупе и мало воды.

Священник же прием в руце вторую просфору, глаголет:

В честь и память Преблагословенныя Владычицы нашея Богородицы и Приснодевы Марии, Ея же молитвами приими, Господи, жертву сию в пренебесный Твой Жертвенник.

И взем частицу, полагает ю одесную святаго хлеба, близ среды его, глаголя:

Предста Царица одесную Тебе, в ризы позлащенны одеяна, преукрашенна.

Таже прием третию просфору, глаголет:

Честнаго славнаго Пророка, Предтечи и Крестителя Иоанна.

И взем первую частицу, полагает ю ошуюю страну святаго хлеба, творя начало перваго чина. Таже глаголет:

Святых славных пророков Моисея и Аарона, Илии и Елисея, Давида и Иессея, святых триех отроков, и Даниила пророка, и всех святых пророков.

И взем частицу, полагает ю доле первыя благочинно.

Таже паки глаголет:

Святых славных и всехвальных апостолов Петра и Павла и прочих всех святых апостолов.

И тако полагает третию частицу доле вторыя, скончавая первый чин.

Таже глаголет:

Иже во святых отец наших, святителей Василия Великаго, Григория Богослова и Иоанна Златоустаго, Афанасия и Кирилла, Николая Мирликийскаго, Никиты, епископа Новгородскаго, Леонтия, епископа Ростовскаго, и всех святых святителей.

И взем четвертую частицу, полагает ю близ первыя частицы, творя второе начало.

Таже паки глаголет:

Святаго апостола первомученика и архидиакона Стефана, святых великих мучеников Димитрия, Георгия, Феодора Тирона, Феодора Стратилата и всех святых мученик, и мучениц Феклы, Варвары, Кириакии, Евфимии и Параскевы, Екатерины и всех святых мучениц.

И взем пятую частицу, полагает ю доле первыя, сущия началом втораго чина.

Таже глаголет:

Преподобных и богоносных отец наших Антония, Евфимия, Саввы, Онуфрия, Афанасия Афонскаго, Антония и Феодосия Печерских, Сергия Радонежскаго, Варлаама Хутынскаго, и всех преподобных отец; и преподобных матерей Пелагии, Феодосии, Анастасии, Евпраксии, Февронии, Феодулии, Евфросинии, Марии Египтяныни и всех святых преподобных матерей.

И тако взем шестую частицу, полагает ю доле вторыя частицы, во исполнение втораго чина.

По сих же глаголет:

Святых и чудотворцев бессребреник Космы и Дамиана, Кира и Иоанна, Пантелеимона и Ермолая и всех святых бессребреников.

И взем седмую частицу, полагает ю верху, творя третие начало, по чину.

Таже паки глаголет:

Святых и праведных Богоотец Иоакима и Анны: и святаго имя рек, егоже есть храм и егоже есть день: святых равноапостольных Мефодия и Кирилла, учителей словенских: святаго равноапостольнаго великаго князя Владимира, и всех святых, ихже молитвами посети ны, Боже.

И полагает осмую частицу доле первыя благочинно. Еще же к сим глаголет:

Иже во святых отца нашего Иоанна, архиепископа Константинопольскаго, Златоустаго.

И тако взем девятую частицу, полагает ю в конец третияго чина во исполнение.

Таже прием четвертую просфору, глаголет:

Помяни, Владыко человеколюбче, всякое епископство православных, господина нашего имя рек, (егоже есть епархиа), честное пресвитерство, во Христе диаконство и весь священнический чин: братию и сослужебники наша, священники, диаконы и всю братию нашу, яже призвал еси во Твое общение Твоим благоутробием, Всеблагий Владыко.

И взем частицу, полагает ю доле святаго хлеба.

[Таже поминает власти, глаголя сице:

Помяни, Господи, богохранимую страну нашу имя рек, или предержащия власти наша.

Таже поминает, и ихже имать живых, по имени, и на коеждо имя взимает частицу, приглаголя:

Помяни, Господи, имя рек.

И тако взем частицы, полагает я доле святаго хлеба.

Таже взем пятую просфору, глаголет:

О памяти и оставлении грехов святейших патриархов, православных и благочестивых царей и благочестивых цариц, блаженных создателей святаго храма сего (аще во обители: святыя обители сея).

Таже поминает рукоположившаго его архиереа, и других, ихже хощет, усопших по имени. На коеждо имя взимает частицу, приглаголя:

Помяни, Господи, имя рек.

И конечне глаголет сице:

И всех в надежде воскресения, жизни вечныя и Твоего общения усопших православных отец, и братий наших, человеколюбче Господи.

И взимает частицу. По сем глаголет:

Помяни, Господи, и мое недостоинство и прости ми всякое согрешение, вольное же и невольное.

И взимает частицу.

И прием губу, собирает на дискос частицы доле святаго хлеба, якоже быти во утвержении, и не испаднути чесому.

Таже диакон, прием кадильницу и фимиам вложив в ню, глаголет ко священнику:

Благослови, владыко, кадило.

И абие сам глаголет:

Господу помолимся.

И священник молитву кадила:

Кадило Тебе приносим, Христе Боже наш, в воню благоухания духовнаго, еже прием в пренебесный Твой жертвенник, возниспосли нам благодать Пресвятаго Твоего Духа.

Диакон: Господу помолимся.

Священник покадив звездицу, полагает верху святаго хлеба, глаголя:

И пришедши звезда, ста верху, идеже бе отроча.

Диакон: Господу помолимся.

Иерей, покадив первый покровец, покрывает святый хлеб с дискосом, глаголя:

Господь воцарися, в лепоту облечеся: облечеся Господь в силу и препоясася. Ибо утверди вселенную, яже не подвижится. Готов престол Твой оттоле, от века Ты еси. Воздвигоша реки, Господи, воздвигоша реки гласы своя, возмут реки сотрения своя, от гласов вод многих. Дивны высоты морския, дивен в высоких Господь. Свидения Твоя уверишася зело. Дому Твоему подобает святыня, Господи, в долготу дний.

Диакон:

Господу помолимся. Покрый, владыко.

Иерей же, покадив вторый покровец, покрывает святый потир, глаголя:

Покры небеса добродетель Твоя, Христе, и хвалы Твоея исполнь земля.

Диакон:

Господу помолимся. Покрый, владыко.

Иерей же, покадив покров, сиречь воздух, и покрывая обоя глаголет:

Покрый нас кровом крилу Твоею, отжени от нас всякаго врага и супостата. Умири нашу жизнь, Господи, помилуй нас и мир Твой и спаси душы наша, яко благ и человеколюбец.

Таже прием священник кадильницу, кадит предложение, глаголя трижды:

Благословен Бог наш, сице благоволивый, слава Тебе.

Диакон же на коемждо глаголет:

Всегда, ныне и присно, и во веки веков. Аминь.

И покланяются благоговейно оба, трижды. Таже диакон глаголет:

О предложенных честных дарех Господу помолимся.

Священник же, прием кадильницу, глаголет молитву предложения:

Боже, Боже наш, небесный Хлеб, Пищу всему миру, Господа нашего и Бога Иисуса Христа, пославый спаса и избавителя и благодетеля, благословяща и освящающа нас, сам благослови предложение сие и приими е в пренебесный Твой жертвенник. Помяни, яко благ и человеколюбец, принесших и ихже ради принесоша: и нас неосуждены сохрани во священнодействии божественных Твоих таин.

Яко святися и прославися пречестное и великолепое имя Твое: Отца, и Сына, и святаго Духа ныне и присно, и во веки веков. Аминь.

И по сем творит отпуст тамо, глаголя сице:

Слава Тебе, Христе Боже, упование наше, слава Тебе.

Диакон:

Слава, и ныне: Господи, помилуй, трижды. Благослови.

Священник глаголет отпуст:

Аще убо есть неделя:

Воскресый из мертвых: Аще же ни:

Христос истинный Бог наш, молитвами пречистыя своея Матере, иже во святых отца нашего Иоанна, архиепископа Константинопольскаго, Златоустаго, и всех святых, помилует и спасет нас, яко благ и человеколюбец.

Диакон: Аминь.

По отпусте же кадит диакон святое предложение. Таже отходит, и кадит святую трапезу кругом крестовидно, глаголя в себе:

Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй, неописанный.

Таже псалом 50.

И покадив святилище же и храм весь, входит паки во святый олтарь, и покадив святую трапезу паки, и священника, кадильницу убо отлагает на место свое, сам же приходит ко иерею.

И ставше вкупе пред святою трапезою, покланяются трижды, в себе молящеся и глаголюще:

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Слава в вышних Богу, и на земле мир, в человецех благоволение. Дважды.

Господи, устне мои отверзеши, и уста моя возвестят хвалу Твою.

Таже целуют священник убо святое евангелие, диакон же святую трапезу.

И по сем подклонив диакон свою главу священнику, держа и орарь треми персты десныя руки, глаголет:

Время сотворити Господеви, владыко, благослови.

Священник знаменуя его, глаголет:

Благословен Бог наш всегда, ныне и присно, и во веки веков.

Таже диакон:

Помолися о мне, владыко святый.

Священник:

Да исправит Господь стопы твоя.

И паки диакон:

Помяни меня, владыко святый.

Священник:

Да помянет тя Господь Бог во царствии своем, всегда, ныне и присно, и во веки веков.

Диакон же: Аминь.

И поклонився исходит северными дверьми, понеже царския двери до входа не отверзаются. И став на обычнем месте, прямо святых дверий, покланяется со благоговением трижды, глаголя в себе:

Господи, устне мои отверзеши, и уста моя возвестят хвалу Твою.

И посем начинает глаголати: Благослови, владыко. И начинает священник: Благословено царство:

Ведати подобает: аще без диакона служит иерей, в проскомидии диаконских слов и на литургии пред евангелием, и на ответ его: Благослови, владыко, и Прободи, владыко, и Время сотворити, да не глаголет: точию ектении и чиновное предложение.

Аще же собором служат священнии мнози, действо проскомидии един иерей токмо да творит: прочии же служителе ничтоже проскомидии особно да глаголют.

Аще есть архиерейское служение, священник начинает проскомидию по обычаю, таже полагает частицы Богородицы и святых, а посем покрывает святый дискос и святую чашу воздухом, ничтоже глаголя. Херувимстей же песни певаемей, архиерей сам, прежде великаго входа, оканчивает проскомидию.

БОЖЕСТВЕННАЯ ЛИТУРГИЯ

иже во святых отца нашего

ИОАННА ЗЛАТОУСТАГО

Дьякон:

Благослови, владыко

Иерей:

Благословенно царство, Отца, и Сына, и святаго Духа, ныне и присно, и во веки веков.

Лик: Аминь.

Диакон:

Миром Господу помолимся.

Лик: Господи, помилуй.

О свышнем мире, и спасении душ наших, Господу помолимся.

Лик: Господи, помилуй.

О мире всего мiра, благостоянии святых божиих церквей, и соединении всех, Господу помолимся.

Лик: Господи, помилуй.

О святем храме сем, и с верою, благоговением и страхом Божиим входящих в онь, Господу помолимся.

Лик: Господи, помилуй.

О господине нашем имя рек, (егоже есть область), честнем пресвитерстве, во Христе диаконстве, о всем причте и людех Господу помолимся.

Лик: Господи, помилуй.

О богохранимой стране нашей имя рек Господу помолимся.

Лик: Господи, помилуй.

О граде сем (или О веси сей, или О святей обители сей), всяком граде, стране, и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных, и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй, и сохрани нас, Боже, Твоею благодатию.

Лик: Господи, помилуй.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник глаголет тайно молитву перваго антифона:

Господи Боже наш, егоже держава несказанна, и слава непостижима, егоже милость безмерна, и человеколюбие неизреченно: сам, Владыко, по благоутробию Твоему, призри на ны, и на святый храм сей, и сотвори с нами, и молящимися с нами, богатыя милости Твоя, и щедроты Твоя.

Возглашение:

Яко подобает Тебе всякая слава, честь и поклонение, Отцу, и Сыну, и святому Духу, ныне, и присно, и во веки веков.

Лик: Аминь.

И поется первый антифон от певцев.

Благослови, душе моя, Господа, благословен еси, Господи. Благослови, душе моя, Господа, и вся внутренняя моя Имя Святое Его. Благослови, душе моя, Господа и не забывай всех воздаяний Его: очищающаго вся беззакония твоя, исцеляющаго вся недуги твоя, избавляющего от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Щедр и милостив Господь, долготерпелив и многомилостив. Благослови, душе моя, Господа, и вся внутренняя моя имя святое Его. Благословен еси Господи.

Диакон же поклонився уступает от места своего, и отшед стоит пред иконою Христовою, держа и орарь треми персты десныя руки.

По исполнении же антифона пришед диакон, и став на обычнем месте, и поклонився, глаголет:

Паки и паки миром Господу помолимся.

Лик: Господи, помилуй.

Заступи, спаси, помилуй, и сохрани нас, Боже, Твоею благодатию.

Лик: Господи, помилуй.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Молитва втораго антифона:

Господи Боже наш, спаси люди Твоя, и благослови достояние Твое, исполнение церкви Твоея сохрани, освяти любящыя благолепие дому Твоего, Ты тех воспрослави божественною Твоею силою, и не остави нас, уповающих на Тя.

Возглашение:

Яко Твоя держава, и Твое есть царство, и сила, и слава, Отца, и Сына, и святаго Духа ныне и присно, и во веки веков.

Лик: Аминь.

И поется подобне от певцев вторый антифон: диакон же подобне творит, якоже и в первей молитве.

Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в них же несть спасения. Изыдет дух его, и возвратится в землю свою: в той день погибнут вся помышления его. Блажен, ему же Бог Иаковль помощник его, упование его на Господа Бога своего. Сотворшаго небо и землю, море и вся, яже в них. Хранящаго истину в век, творящаго суд обидимым, дающаго пищу алчущим. Господь решит окованныя, Господь умудряет слепцы. Господь возводит низверженныя, Господь любит праведники. Господь хранит пришельцы, сира и вдову приимет, и путь грешных погубит. Воцарится Господь во век, Бог твой, Сионе, в род и род.

Слава Отцу, и Сыну, и Святому Духу и ныне, и присно, и во веки веков. Аминь.

Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.

Таже диакон:

Паки и паки миром Господу помолимся.

Лик: Господи, помилуй.

Заступи, спаси, помилуй, и сохрани нас, Боже, Твоею благодатию.

Лик: Господи, помилуй.

Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Во Царствии Твоем помяни нас, Господи, егда приидеши во Царствии Твоем.

Блажени нищии духом, яко тех есть Царство Небесное.

Блажени плачущии, яко тии утешатся.

Блажени кротции, яко тии наследят землю.

Блажени алчущии и жаждущии правды, яко тии насытятся.

Блажени милостивии, яко тии помиловани будут.

Блажени чистии сердцем, яко тии Бога узрят.

Блажени миротворцы, яко тии сынове Божии нарекутся.

Блажени изгнани правды ради, яко тех есть Царство Небесное.

Блажени есте, егда поносят вам, и изженут, и рекут всяк зол глагол на вы, лжуще Мене ради.

Радуйтеся и веселитеся, яко мзда ваша многа на небесех.

Молитва третияго антифона:

Иже общыя сия, и согласныя даровавый нам молитвы, иже и двема, или трем, согласующымся о имени Твоем, прошения подати обещавый: сам и ныне раб Твоих прошения к полезному исполни, подая нам в настоящем веце познание Твоея истины, и в будущем живот вечный даруя.

Возглашение:

Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Лик: Аминь.

Зде отверзатся двери на малый вход.

Певаему же третиему антифону от певцев, или блаженнам, аще есть неделя: егда приидут на Славу, священник и диакон, ставше пред святою трапезою, творят поклоны три. Таже прием священник святое евангелие, дает диакону, и идут от десныя страны созади престола, и тако изшедше северною страною, предидущим им лампадам, творят малый вход, и ставше на обычнем месте, приклоняют оба главы, и диакону рекшу: Господу помолимся, глаголет священник молитву входа тайно.

Молитва входа:

Владыко Господи, Боже наш, уставивый на небесех чины, и воинства ангел и архангел в служение Твоея славы: сотвори со входом нашим, входу святых ангелов быти, сослужащих нам, и сославословящих Твою благость.

Яко подобает Тебе всякая слава, честь и поклонение, Отцу, и Сыну и святому Духу, ныне и присно, и во веки веков. Аминь.

Молитве же скончавшейся, глаголет диакон ко священнику, показуя к востоку десницею, держя вкупе и орарь треми персты:

Благослови, владыко, святый вход.

Священник благословляя глаголет:

Благословен вход святых Твоих всегда: ныне, и присно, и во веки веков.

Посем диакон подает святое евангелие священнику, и целует священник святое евангелие.

Исполнившуся же конечному тропарю, входит диакон посреде, и став пред иереем, возвышает мало руце, и показуя святое евангелие, глаголет велегласно:

Премудрость, прости.

Таже, сотворив поклонение, входит во святый олтарь диакон и созади его священник, и диакон убо полагает святое евангелие на святей трапезе, певцы же поют:

Приидите, поклонимся и припадем ко Христу. Спаси ны, Сыне Божий, во святых дивен сый, поющия Ти: Аллилуиа. Единожды.

Аще же неделя:

Воскресый из мертвых, поющыя Ти: Аллилуиа. Единожды.

Таже обычныя тропари. Священник же глаголет молитву сию:

Молитва трисвятаго пения.

Боже Святый, иже во святых почиваяй, иже трисвятым гласом от серафимов воспеваемый, и от херувимов славословимый, и от всякия небесныя силы покланяемый: иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый: даяй просящему премудрость и разум, и не презираяй согрешающего, но полагаяй на спасение покаяние: сподобивый нас, смиренных и недостойных раб Твоих, и в час сей стати пред славою святаго Твоего Жертвенника и должное Тебе поклонение и славословие приносити: сам, Владыко, приими и от уст нас грешных трисвятую песнь и посети ны благостию Твоею. Прости нам всякое согрешение, вольное же и невольное, освяти наша душы и телеса, и даждь нам в преподобии служити Тебе вся дни живота нашего, молитвами Святыя Богородицы и всех святых, от века Тебе благоугодивших.

Егда же певцы приидут на последний тропарь, глаголет диакон ко иерею, приклонь вкупе главу, и орарь в руце держя треми персты:

Благослови, владыко, время трисвятаго.

Иерей же, знаменуя его, возглашает:

Яко свят еси, Боже наш, и Тебе славу возсылаем: Отцу, и Сыну, и Святому Духу, ныне и присно и во веки веков.

[Скончавшуся же тропарю.] приходит диакон близ святых дверий, и [показуя орарем, первее убо ко иконе Христове глаголет:

Господи, спаси благочестивыя, и услыши ны.

Таже] наводит, глаголя ко вне стоящым велегласно:

И во веки веков.

Лик: Аминь.

Певаему же трисвятому, глаголют и сами, иерей же и диакон, трисвятое творяще вкупе и поклоны три пред святою трапезою.

Таже глаголет диакон ко иерею:

Повели, владыко.

И отходят к горнему месту: и священник отходя глаголет.

Благословен грядый во имя Господне.

Диакон:

Благослови, владыко, горний престол.

Иерей же:

Благословен еси на престоле славы Царствия Твоего, седяй на херувимех, всегда, ныне и присно, и во веки веков.

Ведательно, яко священнику не подобает на горнее место восходити, ниже седети на нем: но седети во стране горняго престола, из южныя страны.

По исполнении трисвятаго, пришед пред святыя двери, диакон глаголет:

Вонмем.

Иерей же возглашает:

Мир всем.

И чтец глаголет: И духови твоему.

И паки диакон: Премудрость.

И чтец прокимен, псалом давидов.

Посем диакон: Премудрость.

И чтец, надписание апостола:

Деяний святых апостол чтение. Или: Соборнаго послания Иаковля, или: Петрова чтение. Или: К Римляном, или: к Коринфяном, или: к Галатом послания святаго апостола Павла чтение.

И паки диакон: Вонмем.

Апостолу же исполньшуся, глаголет священник:

Мир ти.

Чтец: И духови твоему.

Диакон: Премудрость.

Чтец: Аллилуиа, со стихи.

Певаему Аллилуиа или же Апостолу еще глаголему, диакон, прием кадильницу и фимиам, приходит ко священнику, и прием благословение от него, кадит святую трапезу окрест, и олтарь весь, и священника.

Священник же стоя пред святою трапезою, глаголет молитву сию:

Молитва прежде евангелия.

Возсияй в сердцах наших, человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение: вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще, Ты бо еси просвещение душ и телес наших, Христе Боже, и Тебе славу возсылаем со безначальным Твоим Отцем и всесвятым, и благим, и животворящим Твоим Духом ныне, и присно, и во веки веков. Аминь.

Диакон же, кадило отложив на обычное место, приходит ко священнику, и подклонив ему главу свою, держя орарь крайними персты и указуя на святое евангелие, глаголет:

Благослови, владыко, благовестителя святаго апостола и евангелиста имя рек.

Священник, знаменуя его, глаголет:

Бог молитвами святаго славнаго, всехвального апостола и евангелиста имярек да даст тебе глагол благовествующему силою многою во исполнение евангелиа возлюбленнаго Сына своего, Господа нашего Иисуса Христа.

И подает ему святое евангелие.

Диакон же, рек: Аминь, и поклонився святому евангелию, приимет е, и изшед святыми дверьми, предходящым ему лампадам, приходит и стоит на амвоне, или на учиненном месте.

Иерей же, стоя пред святою трапезою и зря к западу, возглашает:

Премудрость, прости, услышим святого евангелиа.

Таже:

Мир всем.

Людие: И духови твоему.

Диакон:

От имя рек святаго евангелия чтение

Лик: Слава Тебе, Господи, слава Тебе.

Священник: Вонмем.

Аще же суть два диакона, то един да глаголет:

Премудрость, прости: Таже и Вонмем.

И исполнившуся евангелию, глаголет священник:

Мир ти благовествующему.

Лик: Слава Тебе, Господи, слава Тебе.

И отшед диакон даже до святых дверий отдает святое евангелие священнику, и затворяются паки святыя двери.

Диакон, став на обычнем месте, начинает сице:

Рцем вси от всея души и от всего помышления нашего рцем.

Лик: Господи, помилуй.

Господи Вседержителю, Боже отец наших, молим Ти ся, услыши и помилуй.

Лик: Господи, помилуй.

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о господине и отце нашем святейшем вселенстем архиерее имя рек и всей во Христе братии нашей.

Лик: Господи, помилуй, трижды.

Молитва прилежнаго моления:

Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости.

Еще молимся о богохранимой стране нашей имя рек, о здравии и спасении его (или о предержащих властех наших) и о всем воинстве.

Лик: Господи, помилуй, трижды.

Еще молимся о братиях наших, священницех, священномонасех, и всем во Христе братстве нашем.

Лик: Господи, помилуй, трижды.

Еще молимся о блаженных и приснопамятных святейших патриарсех православных, и благочестивых царех, и благоверных царицах, и создателех святаго храма сего (аще во обители: святыя обители сея), и о всех прежде почивших отцех и братиях, зде лежащих и повсюду, православных.

Лик: Господи, помилуй, трижды.

Зде прилагается о особеннем прошении ектениа.

Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.

Лик: Господи, помилуй, трижды.

Возглашение:

Яко милостив и человеколюбец Бог еси, и Тебе славу возсылаем: Отцу, и Сыну, и святому Духу ныне, и присно и во веки веков.

Лик: Аминь.


Аще же будет о усопших приношение, диакон, или священник, глаголет ектению сию:

Помилуй нас, Боже, по велицей милости Твоей, молимтися, услыши и помилуй.

Лик: Господи, помилуй, трижды.

Еще молимся о упокоении душ усопших рабов Божиих имя рек, и о еже проститися им всякому прегрешению, вольному же и невольному.

Лик: Господи, помилуй, трижды.

Яко да Господь Бог учинит душы их, идеже праведнии упокояются.

Лик: Господи, помилуй, трижды.

Милости божия, царства небеснаго и оставления грехов их, у Христа, безсмертнаго царя и Бога нашего, просим.

Лик: Подай, Господи.

Диакон: Господу помолимся.

Лик: Господи, помилуй.

Священник:

Боже духов и всякия плоти, смерть поправый и диавола упразднивый, и жизнь миру Твоему даровавый: сам, Господи, упокой души усопших рабов Твоих имя рек в месте светле, в месте злачне, в месте покойне, отнюду же отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благ и человеколюбец Бог, прости: яко несть человек, иже жив будет и не согрешит, Ты бо един кроме греха, правда Твоя правда во веки и слово Твое истина

Возглас:

Яко Ты еси воскресение и живот, и покой усопших рабов Твоих имя рек, Христе Боже наш, и Тебе славу возсылаем со безначальным Твоим Отцем и пресвятым, и благим, и животворящим Твоим Духом, ныне и присно, и во веки веков.

Лик: Аминь.


Таже диакон:

Помолитеся, оглашеннии Господеви.

Лик: Господи, помилуй.

Вернии, о оглашенных помолимся, да Господь помилует их.

Лик: Господи, помилуй.

Огласит их словом истины.

Лик: Господи, помилуй.

Открыет им Евангелие правды.

Лик: Господи, помилуй.

Соединит их святей своей, соборней и апостольстей церкви.

Лик: Господи, помилуй.

Спаси, помилуй, заступи и сохрани их, Боже, Твоею благодатию.

Лик: Господи, помилуй.

Оглашеннии, главы ваша Господеви приклоните.

Лик: Тебе Господи.

Молитва о оглашенных:

Господи Боже наш, иже на высоких живый и на смиренныя призираяй, иже спасение роду человеческому низпославый единороднаго Сына Твоего и Бога, Господа нашего Иисуса Христа, призри на рабы твоя оглашенныя, подклоньшыя Тебе своя выя, и сподоби я во время благополучное бани пакибытия, оставления грехов и одежди нетления, соедини их святей Твоей, соборней и апостольстей Церкви и сопричти их избранному Твоему стаду.

Возглашение:

Да и тии с нами славят пречестное и великолепое имя Твое Отца, и Сына, и святаго Духа ныне и присно, и во веки веков.

Лик: Аминь.

И простирает антиминс священник.

Диакон глаголет:

Елицы оглашеннии, изыдите.

Аще есть вторый диакон, возглашает и той:

Оглашеннии, изыдите.

Таже паки первый:

Елицы оглашеннии, изыдите.

Да никто от оглашенных, елицы вернии, паки и паки миром Господу помолимся.

Лик: Господи, помилуй.

Аще же един есть точию диакон, или аще иерей служит без диакона, тогда глаголет сице:

Елицы оглашеннии, изыдите: оглашеннии, изыдите: елицы оглашеннии, изыдите: да никто от оглашенных, елицы вернии, паки и паки миром Господу помолимся.

Лик: Господи, помилуй.

Молитва верных первая:

Благодарим Тя, Господи, Боже сил, сподобившаго нас предстати и ныне святому Твоему жертвеннику, и припасти ко щедротам Твоим о наших гресех и о людских неведениих: приими, Боже, моление наше, сотвори ны достойны быти, еже приносити Тебе моления, и мольбы, и жертвы безкровныя о всех людех Твоих: и удовли нас, ихже положил еси в службу Твою сию, силою Духа Твоего cвятаго, неосужденно и непреткновенно, в чистем свидетельстве совести нашея, призывати Тя на всякое время и место: да послушая нас, милостив нам будеши во множестве Твоея благости.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Диакон: Премудрость.

Возглашение:

Яко подобает Тебе всякая слава, честь и поклонение: Отцу, и Сыну, и святому Духу ныне и присно, и во веки веков.

Лик: Аминь.

Диакон:

Паки и паки миром Господу помолимся.

Лик: Господи, помилуй.

(Егда священник един служит, сия не глаголет:)

О свышнем мире, и спасении душ наших, Господу помолимся.

Лик: Господи, помилуй.

О мире всего мiра, благостоянии святых Божиих Церквей, и соединении всех, Господу помолимся.

Лик: Господи, помилуй.

О святем храме сем, и с верою, благоговением и страхом Божиим входящих в онь, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Молитва верных вторая:

Паки, и многажды Тебе припадаем. и Тебе молимся, благий и человеколюбче, яко да призрев на моление наше, очистиши наша душы и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящымся с нами преспеяние жития и веры и разума духовнаго: даждь им всегда со страхом и любовию служащым Тебе, неповинно и неосужденно причаститися святых Твоих таин, и небеснаго Твоего царствия сподобитися.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Диакон: Премудрость.

Входит диакон северными дверьми.

Возглашение:

Яко да под державою Твоею всегда храними, Тебе славу возсылаем: Отцу, и Сыну, и Святому Духу ныне, и присно, и во веки веков.

Лик: Аминь.

И отверзаются святыя двери.

Таже, херувимстей песни певаемей, диакон, прием кадильницу, и фимиам вложив, приходит ко священнику, и прием благословение от него, кадит святую трапезу окрест, и олтарь весь, и иконостас, таже священника, лики и люди, глаголет же и 50-й псалом, и тропари умилительныя, елико изволит.

Священник же глаголет тайно молитву сию:

Никто же достоин от связавшихся плотскими похотьми и сластьми, приходити, или приближатися, или служити Тебе, царю славы: еже бо служити Тебе, велико и страшно и самем небесным силам. Но обаче, неизреченного ради и безмернаго Твоего человеколюбия непреложно и неизменно был еси человек, и архиерей нам был еси, и служебныя сея и бескровныя жертвы священнодействие предал еси нам, яко Владыка всех: Ты бо един, Господи Боже наш, владычествуеши небесными и земными, иже на престоле херувимсте носимый, иже серафимов Господь и Царь Исраилев, иже един свят и во святых почиваяй. Тя убо молю единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священнодействовати святое и пречистое Твое тело и честную кровь. К Тебе бо прихожду, приклонь мою выю, и молютися, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим: Ты бо еси приносяй и приносимый, и приемляй и раздаваемый, Христе Боже наш, и Тебе славу возсылаем, со безначальным Твоим Отцем и пресвятым, и благим, и животворящим Твоим Духом ныне, и присно, и во веки веков. Аминь.

Исполньшымся же молитве и каждению, священник и диакон, ставше пред святою трапезою, глаголют херувимскую песнь, трижды: по коемждо же скончании, покланяются по единощи.

Священник:

Иже херувимы тайно образующе и животворящей Троице трисвятую песнь припевающе, всякое ныне житейское отложим попечение.

Диакон:

Яко да царя всех подъимем, ангельскими невидимо дориносима чинми. Аллилуиа, аллилуиа, аллилуиа.

Таже отходят в предложение, предходящу диакону, и кадит иерей святая, в себе моляся:

Боже, очисти мя, грешнаго.

Диакон глаголет ко священнику:

Возмите руки ваша во святая, и благословите Господа.

Таже святый дискос прием, поставляет на главу диакона со всяким вниманием и благоговением, имеет же вкупе диакон и кадильницу на единем от перстов десныя руки. Сам же святый потир в руце приемлет, и исходят оба северною страною молящеся, предходящым им лампадам.

Диакон глаголет:

Господина нашего имя рек да помянет Господь Бог во царствии своем, всегда, ныне, и присно, и во веки веков.

Таже священник:

Господина нашего Митрополита (или Архиепископа, или Епископа) нашего имя рек, да помянет Господь Бог во царствии своем, всегда, ныне и присно, и во веки веков.

Диакон глаголет:

Предержащия власти нашя да помянет Господь Бог во царствии своем, всегда, ныне и присно, и во веки веков.

Таже священник:

Всех вас православных христиан, да помянет Господь Бог во царствии своем, всегда, ныне, и присно, и во веки веков.

Вшед же диакон внутрь святых дверий, стоит одесную: и хотящу священнику внити, глаголет к нему диакон:

Да помянет Господь Бог священство твое во царствии своем.

И священник к нему:

Да помянет Господь Бог священнодиаконство твое во царствии своем, всегда, ныне и присно и во веки веков.

И священник убо поставляет святый потир на святую трапезу: святый же дискос взем со главы диакона, поставляет и той на святую трапезу, [глаголя:

Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв положи.

Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом вся исполняяй неописанный.

Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.]

Таже покровцы убо взем от священнаго дискоса и святаго потира, полагает на единей стране святыя трапезы: воздух же от диаконя рама взем, и покадив, покрывает им святая, глаголя:

Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв, положи.

И прием кадильницу от диаконовы руки, кадит святая трижды, глаголя:

Ублажи, Господи, благоволением Твоим Сиона, и да созиждутся стены иерусалимския: тогда благоволиши жертву правды, возношение и всесожегаемая, тогда возложат на олтарь Твой тельцы.

И отдав кадильницу, приклонив главу, глаголет диакону:

Помяни мя, брате и сослужителю.

И диакон к нему:

Да помянет Господь Бог священство твое во царствии своем.

И священник:

Помолися о мне, сослужителю мой.

Таже и диакон, поклонив главу, держя вкупе и орарь треми персты десницы, глаголет ко священнику:

Дух святый найдет на тя, и сила Вышняго осенит тя.

Священник:

Тойже Дух содействует нам вся дни живота нашего.

И диакон к нему:

Помяни мя, владыко святый.

Священник:

Да помянет тя Господь Бог во царствии своем всегда, ныне, и присно, и во веки веков.

Диакон: Аминь.

И целовав десницу священника, исходит северными дверьми, и став на обычнем месте, глаголет:

Исполним молитву нашу Господеви.

Лик: Господи, помилуй.

О предложенных честных дарех Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих в онь Господу помолимся.

Лик: Господи, помилуй.

О избавитися нам от всякия скорби, гнева и нужды Господу помолимся.

Лик: Господи, помилуй.

Молитва приношения, по поставлении божественных даров на святей трапезе:

Господи Боже Вседержителю, едине святе, приемляй жертву хваления от призывающих Тя всем сердцем, приими и нас, грешных, моления, и принеси ко святому Твоему жертвеннику, и удовли нас приносити Тебе дары же и жертвы духовныя о наших гресех и о людских неведениих: и сподоби нас обрести благодать пред Тобою, еже быти Тебе благоприятней жертве нашей, и вселитися духу благодати Твоея благому в нас, и на предлежащих дарех сих, и на всех людех Твоих.

Диакон:

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Дне всего совершенна, свята, мирна и безгрешна у Господа просим.

Лик: Подай, Господи.

Ангела мирна, верна наставника, хранителя душ и телес наших у Господа просим.

Лик: Подай, Господи.

Прощения и оставления грехов и прегрешений наших у Господа просим.

Лик: Подай, Господи.

Добрых и полезных душам нашым и мира мирови у Господа просим.

Лик: Подай, Господи.

Прочее время живота нашего в мире и покаянии скончати, у Господа просим.

Лик: Подай, Господи.

Христианския кончины живота нашего, безболезненны, непостыдны, мирны, и добраго ответа на страшнем судищи Христове просим.

Лик: Подай, Господи.

Пресвятую, пречистую, преблагословенную, славную владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглашение:

Щедротами единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.

Лик: Аминь.

Иерей: Мир всем.

Лик: И духови твоему.

Диакон:

Возлюбим друг друга, да единомыслием исповемы.

Лик:

Отца и Сына и святого Духа, Троицу Единосущную и Нераздельную.

И священник покланяется трижды, глаголя тайно:

Возлюблю Тя, Господи, крепосте моя. Господь утверждение мое и прибежище мое. Трижды.

И целует святая сице, якоже суть покровена, первее верху святаго дискоса, таже верху святаго потира, и край святыя трапезы пред собою. Аще же будут священников два, или множае, то и они целуют святая вси, и друг друга в рамена.

Настоятель же глаголет:

Христос посреде нас.

И отвещает целовавый:

И есть, и будет.

Такожде и диакони, аще будут два, или три, целуют кийждо орарь свой, идеже креста образ, и друг друга в рамена, тожде глаголюще, еже и священницы. Подобне же и диакон спокланяется, на немже стоит месте, и целует орарь свой, идеже есть креста образ, и тако возглашает:

Двери, двери, премудростию вонмем.

Священник же воздвизает воздух, и держит над святыми дарми. Аще же инии будут священницы служащии, такожде воздвизают святый воздух, и держат над святыми дарми, потрясающе, и глаголюще в себе, якоже и людие, исповедание веры.

Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына божия, единороднаго, Иже от Отца рожденнаго прежде всех век. Света от света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже царствию не будет конца. И в Духа святаго, Господа, животворящаго, иже от Отца исходящаго, иже со Отцем и Сыном спокланяема и сславима, глаголавшаго пророки. Во едину, святую, соборную и апостольскую Церковь. Исповедую едино крещение во оставление грехов. Чаю воскресения мертвых: И жизни будущаго века. Аминь.

Диакон:

Станем добре, станем со страхом, вонмем, святое возношение в мире приносити.

Лик: Милость мира, жертву хваления.

И священник убо, взем воздух от святых и целовав и, полагает на едино место, глаголя: Благодать Господа:

Диакон же, поклонився, входит во святый олтарь, и приим рипиду, веет святая благоговейно. Аще же несть рипиды, творит сие со единем покровцем.

Возглашение:

Благодать Господа нашего Иисуса Христа, и любы Бога и Отца, и причастие святаго Духа буди со всеми вами.

Лик: И со духом твоим.

Священник, обращься к востоку:

Горе имеим сердца.

Лик: Имамы ко Господу.

Священник:

Благодарим Господа.

Лик: Достойно и праведно есть поклонятися Отцу и Сыну и святому Духу, Троице единосущней и нераздельней.

Священник же молится:

Достойно и праведно Тя пети, Тя благословити, Тя хвалити, Тя благодарити, Тебе покланятися на всяком месте владычествия Твоего: Ты бо еси Бог неизреченен, недоведом, невидим, непостижим, присно сый, такожде сый, Ты, и единородный Твой Сын, и Дух Твой святый: Ты от небытия в бытие нас привел еси, и отпадшыя возставил еси паки, и не отступил еси, вся творя, дондеже нас на небо возвел еси, и царство Твое даровал еси будущее. О сих всех благодарим Тя, и единороднаго Твоего Сына, и Духа Твоего cвятаго, о всех, их же вемы и их же не вемы, явленных и неявленных благодеяниих бывших на нас. Благодарим Тя и о службе сей, юже от рук наших прияти изволил еси, аще и предстоят Тебе тысящы архангелов и тьмы ангелов, херувимы и серафимы, шестокрилатии, многоочитии, возвышающиися пернатии

И диакон, приим святую звездицу от святаго дискоса, творит креста образ верху его, и целовав ю, полагает.

Возглашение:

Победную песнь поюще, вопиюще, взывающе и глаголюще.

Лик: Свят, cвят, cвят Господь cаваоф, исполнь небо и земля славы Твоея: осанна в вышних, благословен грядый во имя Господне, осанна в вышних.

Таже приходит диакон, и станет на десней стране: и взем рипиду в руце, омахивает тихо со всяким вниманием и страхом верху святых даров, яко не сести мухам, ни иному чесому таковому.

Священник молится:

С сими и мы блаженными силами, Владыко человеколюбче, вопием и глаголем: свят еси и пресвят Ты и единородный Твой Сын, и Дух Твой святый: свят еси и пресвят, и великолепна слава Твоя, иже мир Твой тако возлюбил еси, якоже Сына Твоего единороднаго дати, да всяк веруяй в Него не погибнет, но имать живот вечный: иже пришед, и все еже о нас смотрение исполнив, в нощь, в нюже предаяшеся, паче же сам себе предаяше за мирский живот, прием хлеб во святыя своя и пречистыя и непорочныя руки, благодарив и благословив (и благословляет), освятив, преломив, даде святым своим учеником и апостолом, рек:

Возглашение:

Приимите, ядите, сие есть тело мое, еже за вы ломимое, во оставление грехов.

Иерей вкупе с диаконом творит поклон.

Лик: Аминь.

Сему же глаголему, показует священнику диакон святый дискос, держя и орарь треми персты десницы. Подобне, и егда глаголет священник: Пийте от нея вси: споказует диакон святый потир.

Священник тайно:

Подобно и чашу (и паки благословляет) по вечери, глаголя:

Возглашение:

Пийте от нея вси, сия есть кровь моя новаго завета, яже за вы и за многи изливаемая во оставление грехов.

И паки иерей вкупе с диаконом творит поклон.

Лик: Аминь.

Аще же священники соборне совершают божественную литургию, глаголют словеса Господня купногласно.

Священник молится:

Поминающе убо спасительную сию заповедь, и вся, яже о нас бывшая: крест, гроб, тридневное воскресение, на небеса восхождение, одесную седение, второе и славное паки пришествие.

Возглашение:

Твоя от Твоих Тебе приносяще о всех и за вся.

Сему же глаголему, диакон, преложь руце крестообразне, и подъем святый дискос и святый потир, поклонится умиленне.

Лик: Тебе поем, Тебе благословим, Тебе благодарим, Господи, и молимтися, Боже наш.

Священник же молится:

Еще приносим Ти словесную сию и безкровную службу, и просим, и молим, и милися деем: низпосли Духа Твоего святаго на ны и на предлежащыя дары сия.

И диакон убо отлагает рипиду, и приходит близ ко иерею, и покланяются оба трижды пред святою трапезою, [молящеся в себе и глаголюще:

Священник:

Господи, иже пресвятаго Твоего Духа в третий час апостолом Твоим низпославый, того, Благий, не отими от нас, но обнови нас, молящихтися.

Диакон стих:

Сердце чисто созижди во мне, Боже, и дух прав обнови во утробе моей.

Паки священник:

Господи, иже пресвятаго Твоего Духа:

Диакон стих:

Не отвержи мене от Лица Твоего и Духа Твоего святаго не отими от мене.

И паки священник:

Господи, иже пресвятаго Твоего Духа:]

Таже главу приклонив диакон и показуя орарем святый хлеб, глаголет тихим гласом:

Благослови, владыко, святый хлеб.

Священник же восклонься знаменует святый хлеб, глаголя:

И сотвори убо хлеб сей, честное Тело Христа Твоего.

Диакон: Аминь.

И паки диакон:

Благослови, владыко, святую чашу.

И священник благословляя глаголет:

А еже в чаши сей, честную кровь Христа Твоего.

Диакон: Аминь.

И паки диакон, показуя и обоя святая, глаголет:

Благослови, владыко, обоя.

Священник же, благословляя обоя святая, глаголет:

Преложив Духом Твоим святым.

Диакон: Аминь, аминь, аминь.

И главу подклонив диакон священнику, [глаголет:

Помяни мя, святый владыко, грешнаго.

Священник же глаголет:

Да помянет тя Господь Бог во царствии своем, всегда, ныне и присно, и во веки веков.

Диакон же, рек: Аминь, ] преходит, на немже первее стояше месте.

Священник же молится:

Якоже быти причащающымся, во трезвение души, во оставление грехов, в приобщение святаго Твоего Духа, во исполнение царствия небеснаго, в дерзновение еже к Тебе, не в суд или во осуждение.

Еще приносим Ти словесную сию службу о иже в вере почивших праотцех, отцех, патриарсех, пророцех, апостолех, проповедницех, евангелистех, мученицех, исповедницех, воздержницех, и о всяком дусе праведнем, в вере скончавшемся.

И прием кадило, священник возглашает:

Изрядно о пресвятей, пречистей, преблагословенной, славней Владычице нашей Богородице и приснодеве Марии.

И кадит пред святою трапезою трижды.

Таже диакон кадит святую трапезу окрест и поминает, яже хощет, усопшыя.

Лик поет:

Достойно есть, яко воистину блажити Тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.

Или за Достойно поется ирмос с припевом праздника.

Священник же молится:

О святем Иоанне пророце, предтечи и крестители, о святых славных и всехвальных апостолех, о святом имя рек, егоже и память совершаем, и о всех святых Твоих, их же молитвами посети нас, Боже.

И помяни всех усопших о надежди воскресения жизни вечныя.

И поминает, ихже хощет, усопших по именом.

И упокой их, идеже присещает свет лица Твоего.

Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство, и всякий священнический чин.

Еще приносим Ти словесную сию службу о вселенней, о святей соборней и апостольстей Церкви, о иже в чистоте и честнем жительстве пребывающих: о предержащих властех наших, да и мы в тишине его (их) тихое и безмолвное житие поживем, во всяком благочестии и чистоте.

И по пении стиха, священник возглашает:

В первых помяни, Господи, господина нашего имя рек  и господина нашего имя рек  их же даруй святым Твоим церквам в мире, целых, честных, здравых, долгоденствующих, право правящих слово Твоея истины.

Диакон поминает живых.

Певцы поют: И всех и вся.

Священник молится:

Помяни, Господи, град сей, в нем же живем, (или весь сию, в нейже живем, или обитель сию, в ней живем), и всякий град и страну и верою живущих в них. Помяни, Господи, плавающих, путешествующих, недугующих, страждущих, плененных, и спасение их. Помяни, Господи, плодоносящих и добротворящих во святых Твоих церквах, и поминающих убогия, и на вся ны милости Твоя низпосли.

И поминает по именом, ихже хощет, живых.

Возглашение:

И даждь нам единеми усты и единем сердцем славити и воспевати пречестное и великолепое имя Твое, Отца и Сына и святаго Духа, ныне и присно, и во веки веков.

Лик: Аминь.

И да будут милости великаго Бога и Спаса нашего Иисуса Христа со всеми вами.

Лик: И со духом твоим.

Диакон, прием время от священника, исходит, и став на обычнем месте, глаголет:

Вся святыя помянувше, паки и паки миром Господу помолимся.

Лик: Господи, помилуй.

О принесенных и освященных Честных Дарех Господу помолимся.

Лик: Господи, помилуй.

Яко да человеколюбец Бог наш, прием я во святый и пренебесный и мысленный cвой жертвенник, в воню благоухания духовнаго, возниспослет нам божественную благодать и дар cвятаго Духа, помолимся.

Лик: Господи, помилуй.

О избавитися нам от всякия скорби, гнева и нужды Господу помолимся.

Лик: Господи, помилуй.

Священник же молится:

Тебе предлагаем живот наш весь и надежду, Владыко человеколюбче, и просим, и молим, и мили ся деем: сподоби нас причаститися небесных Твоих и страшных таин, сея священные и духовныя трапезы, с чистою совестию, во оставление грехов, в прощение согрешений, во общение Духа cвятаго, в наследие царствия небеснаго, в дерзновение еже к Тебе, не в суд или во осуждение.

Диакон:

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Дне всего совершенна, свята, мирна и безгрешна у Господа просим.

Лик: Подай, Господи.

Ангела мирна, верна наставника, хранителя душ и телес наших у Господа просим.

Лик: Подай, Господи.

Прощения и оставления грехов и прегрешений наших у Господа просим.

Лик: Подай, Господи.

Добрых и полезных душам нашим и мира мирови, у Господа просим.

Лик: Подай, Господи.

Прочее время живота нашего в мире и покаянии скончати, у Господа просим.

Лик: Подай, Господи.

Христианския кончины живота нашего, безболезненны, непостыдны, мирны и добраго ответа на страшнем судищи Христове, просим.

Лик: Подай, Господи.

Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.

Лик: Тебе, Господи.

Священник возглашение:

И сподоби нас, Владыко, со дерзновением, неосужденно смети призывати Тебе, небеснаго Бога Отца, и глаголати.

Людие:

Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь: и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник:

Яко Твое есть царство, и сила, и слава, Отца, и Сына, и святаго Духа, ныне и присно, и во веки веков.

Лик: Аминь.

Священник: Мир всем.

Лик: И духови твоему.

Диакон:

Главы ваша Господеви приклоните.

Лик: Тебе, Господи.

Священник молится:

Благодарим Тя, царю невидимый, иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоньшыя Тебе главы своя: не бо подклониша плоти и крови, но Тебе страшному Богу. Ты убо, Владыко, предлежащая всем нам во благое изравняй, по коегождо своей потребе: плавающым сплавай, путешествующим спутешествуй, недугующыя исцели, врачу душ и телес.

Возглашение:

Благодатию, и щедротами, и человеколюбием единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.

Лик: Аминь.

Священник же молится:

Вонми, Господи Иисусе Христе, Боже наш, от святаго жилища Твоего и от престола славы царствия Твоего, и прииди во еже освятити нас, иже горе со Отцем седяй, и зде нам невидимо спребываяй: и сподоби державною Твоею рукою преподати нам пречистое тело Твое и честную кровь, и нами всем людем.

Сей молитве глаголемей, диакон стояй пред святыми дверьми, опоясуется орарем крестовидно.

Таже покланяется священник, подобне и диакон, на немже стоит месте, глаголюще тайно, трижды:

Боже, очисти мя, грешного, и помилуй мя.

Егда же видит диакон священника простирающа руце и прикасающаяся святому хлебу, во еже сотворити святое возношение, возглашает:

Вонмем.

Священник же, вознося святый хлеб, возглашает:

Святая святым.

Лик:

Един свят, един Господь Иисус Христос, во славу Бога Отца. Аминь.

И поют лицы киноник дне, или святаго.

Диакон же входит во святый олтарь, и став одесную священника глаголет:

Раздели, владыко, святый хлеб.

Священник же, разрезая на четыре части со вниманием и благоговением, глаголет:

Раздробляется и разделяется агнец божий, раздробляемый и неразделяемый, всегда ядомый и никогдаже иждиваемый, но причащающыяся освящаяй.

Подобает тебе ведати, о иерее, яко, раздробляя святый агнец, полагай части крестным знамением долу ко святому дискосу, закланием же горе, якоже прежде, егда закалашеся. Иисус убо, полагая на вышней стране святаго дискоса, яже есть на востоце: Христос же, от долу, еже есть на западе, а еже Ни, от северныя страны, ка же, с полуденныя страны, якоже зде изобразися:

Иисус убо часть взем, исполняй святую чашу, Христос же, часть, раздробляй священником и диаконом. Тыя же две части святыя, еже ни, и еже ка, причастником да раздробляеши на части малыя, елико будет довольно по разсмотрению твоему.

Диакон же, показуя орарем святый потир, глаголет:

Исполни, владыко, святый потир.

Священник же, взем горе лежащую частицу, яже Иисус, творит с нею крест верху святаго потира, глаголя:

Исполнение Духа святаго.

И тако влагает во святый потир.

Диакон: Аминь.

И приемля теплоту, глаголет ко священнику:

Благослови, владыко, теплоту.

Священник же благословляет, глаголя:

Благословенна теплота святых Твоих, всегда, ныне и присно, и во веки веков. Аминь.

И диакон вливает мало, крестообразно, внутрь святаго потира, глаголя:

Теплота веры, исполнь Духа святаго. Аминь.

И отставив теплоту, стоит мало подале.

Священник же глаголет:

Диаконе, приступи.

И пришед диакон творит поклон благоговейно, прося прощения.

Священник же, держа святый хлеб, дает диакону: и целовав диакон подающую ему руку, приемлет святый хлеб, глаголя:

Преподаждь мне, владыко, честное и святое тело Господа и Бога и Спаса нашего Иисуса Христа.

Священник же глаголет:

Имя рек, священнодиакону, преподается честное и святое и пречистое тело Господа и Бога и Спаса нашего Иисуса Христа, во оставление грехов его и в жизнь вечную.

И отходит диакон созади святыя трапезы, приклонив главу, и молится, яко и священник, глаголя:

Верую Господи: и прочая.

Подобне взем и священник едину частицу святаго хлеба, глаголет:

Честное и пресвятое Тело Господа и Бога и Спаса нашего Иисуса Христа преподается мне, имя рек, священнику, во оставление грехов моих и в жизнь вечную.

И приклонив главу, молится, глаголя:

Верую, Господи, и исповедую, яко Ты еси воистину Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть cамое пречистое тело Твое и cия есть cамая честная кровь Твоя. Молюся убо Тебе: помилуй мя, и прости ми прегрешения моя, вольная и невольная, яже словом, яже делом, яже ведением и неведением: и сподоби мя неосужденно причаститися пречистых Твоих таинств, во оставление грехов и в жизнь вечную. Аминь.

Таже:

Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.

Да не в суд или во осуждение будет мне причащение cвятых Твоих таин, Господи, но во исцеление души и тела.

И тако причащаются в руках держимаго со страхом и всяцем утверждением.

Таже священник восклонься приемлет обема руками с покровцем святый потир и причащается трижды из него, глаголя:

Честныя и святыя крове Господа Бога и Спаса нашего Иисуса Христа причащаюся аз, раб Божий, священник имя рек во оставление грехов моих и в жизнь вечную. Аминь.

И тако свои устне и край святаго потира в руку держимым платом отер, глаголет:

Се прикоснуся устнам моим, и отимет беззакония моя, и грехи моя очистит.

Таже призывает диакона, глаголя:

Диаконе, приступи.

И диакон приходит и покланяется единою, глаголя:

Се прихожду к бессмертному царю и Богу нашему. И:

Преподаждь ми, владыко, честную и святую кровь Господа и Бога и Спаса нашего Иисуса Христа.

И священник глаголет:

Причащается раб Божий диакон имя рек честныя и святыя крове Господа и Бога и Спаса нашего Иисуса Христа во оставление грехов своих и в жизнь вечную.

Причастившуся же диакону, глаголет священник:

Се прикоснуся устнам твоим, и отимет беззакония твоя, и грехи твоя очистит.

Подобает ведати, яко, аще суть хотящии причащатися святых таин, раздробляет священник две части святаго агнца оставшыя, еже ни, и еже ка, на малыя частицы, и тако диакон губою влагает их и вся другия частицы, с агнцем пресуществленныя, во святую чашу.

И покрывает святый потир покровцем, подобне и на святый дискос возлагает звездицу и покровцы

И тако отверзают двери святаго олтаря. И диакон, поклонився единою, приемлет от священника потир со благоговением, и приходит ко двери, и вознося святый потир, показует и людем, глаголя:

Со страхом Божиим и верою приступите.

Лик:

Благословен грядый во имя Господне, Бог Господь и явися нам.

Таже приступают хотящии причащатися. И идут един по единому, и покланяются со всяцем умилением и страхом, согребенне руце к персем имуще: таже приемлет кийждо божественныя тайны.

Священник же, причащая его, глаголет:

Причащается раб божий (раба божия) имя рек, честнаго и святаго тела и крове Господа и Бога и Спаса нашего Иисуса Христа, во оставление грехов своих и в жизнь вечную.

[И диакон отирает ему устне платом:] и целует причастивыйся святую чашу, и поклонився отходит.

И тако причащаются вси.

По причащении же, входит иерей во святый олтарь, и поставляет святая на святем престоле.

[Тогда прием диакон святый дискос верху святаго потира, и глаголя воскресныя песни сия:

Воскресение Христово видевше, поклонимся святому Господу Иисусу, единому безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се бо прииде крестом радость всему миру, всегда благословяще Господа, поем воскресение его: распятие бо претерпев, смертию смерть разруши.

Светися, светися, новый Иерусалиме, слава бо Господня на тебе возсия. Ликуй ныне и веселися, Сионе: ты же, чистая красуйся, Богородице, о востании рождества твоего.

О Пасха велия и священнейшая, Христе! О мудросте, и слове божий, и сило! Подавай нам истее Тебе причащатися в невечернем дни царствия Твоего.

Отирает святою губою зело добре, со вниманием и благоговением глаголя словеса сия:

Омый, Господи, грехи поминавшихся зде кровию Твоею честною, молитвами святых Твоих.]

Священник же благословляет люди, возглашая:

Спаси, Боже, люди Твоя и благослови достояние Твое.

И обращается священник к святей трапезе и кадит трижды, глаголя в себе:

Вознесися на небеса, Боже, и по всей земли слава Твоя.

Лик же поет:

Видехом свет истинный, прияхом Духа небесного, обретохом веру истинную, нераздельней Троице поклоняемся: та бо нас спасла есть.

Таже взем священник святый дискос, возлагает на главу диакона: и диакон, прием и со благоговением, зря вне ко дверем, ничтоже глаголя, отходит в предложение, и поставляет и. Священник же, поклонився, и приим святый потир, и обращься к дверем, зря на люди, глаголет тайно:

Благословен Бог наш.

И возгласно:

Всегда, ныне, и присно, и во веки веков.

И отходит ко святому предложению и поставляет тамо святая.

Лик: Аминь.

Да исполнятся уста наша хваления Твоего, Господи, яко да поем славу Твою, яко сподобил еси нас причаститися cвятым Твоим, божественным, безсмертным и животворящим тайнам: соблюди нас во Твоей святыни, весь день поучатися правде Твоей. Аллилуиа, аллилуиа, аллилуиа.

И диакон, разрешив орарь, исходит северною дверию, и став на обычнем месте, глаголет:

Прости приимше божественных, святых, пречистых, безсмертных, небесных и животворящих, страшных Христовых таин, достойно благодарим Господа.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

День весь совершен, свят, мирен и безгрешен испросивше, сами себе, и друг друга, и весь живот наш Христу Богу предадим.

Лик: Тебе, Господи.

Молитва благодарения.

Благодарим Тя, Владыко человеколюбче, благодетелю душ наших, яко и в настоящий день сподобил еси нас небесных Твоих и безсмертных таинств. Исправи наш путь, утверди ны во страсе Твоем вся, соблюди наш живот, утверди наша стопы, молитвами и моленьми славныя Богородицы и приснодевы Марии, и всех святых Твоих.

Иерей же, согнув антиминс и прямо держа святое евангелие, творит над ним крест.

Возглашает:

Яко Ты еси освящение наше, и Тебе славу возсылаем, Отцу, и Сыну, и святому Духу, ныне, и присно, и во веки веков.

Лик: Аминь.

Иерей: С миром изыдем.

Лик: О имени Господни.

Диакон: Господу помолимся.

Лик: Господи, помилуй.

Молитва заамвонная возгласно:

Благословляяй благословящыя Тя, Господи, и освящаяй на Тя уповающыя, спаси люди Твоя и благослови достояние Твое, исполнение Церкве Твоея сохрани, освяти любящыя благолепие дому Твоего: Ты тех возпрослави Божественною Твоею силою, и не остави нас, уповающих на Тя. Мир мiрови Твоему даруй, Церквам Твоим, священником и всем людем Твоим. Яко всякое даяние благо, и всяк дар совершен свыше есть, сходяй от Тебе, Отца светов, и Тебе славу, и благодарение, и поклонение возсылаем, Отцу, и Сыну, и святому Духу ныне и присно, и во веки веков.

Лик: Аминь.

Таже: Буди имя Господне трижды, и псалом 33: Благословлю Господа:

Молитве же глаголемей, диакон стоит на десней стране пред образом Владыки Христа, держа и орарь свой, главу приклонь, до совершения молитвы: сей же скончавшейся, священник убо входит святыми дверьми, и отшед в предложение, глаголет настоящую молитву.

Молитва глаголемая, внегда потребити святая:

Исполнение закона и пророков сам сый, Христе Боже наш, исполнивый все отеческое смотрение, исполни радости и веселия сердца наша, всегда, ныне и присно, и во веки веков. Аминь.

Диакон же, вшед северною страною, потребляет святая со страхом и со всяцем утверждением. Священник же, изшед, дает людем антидор.

По скончании же псалма и раздаянии антидора глаголет:

Благословение Господне на вас, Того благодатию и человеколюбием, всегда, ныне, и присно, и во веки веков.

Лик: Аминь.

Священник:

Слава Тебе, Христе Боже, Упование наше, слава Тебе

Лик: Слава, и ныне: Господи, помилуй, трижды. Благослови.

Священник:

Христос, истинный Бог наш, молитвами Пречистыя Своей Матере (и прочая), иже во святых отца нашего Иоанна, архиепископа Константина града, Златоустаго: и святаго имя рек, егоже есть храм, и егоже есть день: и всех святых, помилует и спасет нас, яко благ и человеколюбец.

Лик многолетие.

Священник же, вшед во святый олтарь, совлачится священныя одежды, глаголя: Ныне отпущаеши: Трисвятое. И по Отче наш:

Отпустительный тропарь, глас 8:

Уст твоих, якоже светлость огня, возсиявши благодать, вселенную просвети: не сребролюбия мирови сокровища сниска, высоту нам смиренномудрия показа, но твоими словесы наказуя, отче Иоанне Златоусте, моли Слова Христа Бога спастися душам нашим.

Слава, кондак, глас 6: Подобен: Еже о нас:

От небес приял еси божественную благодать, и твоими устнами вся учиши покланятися в Троице единому Богу, Иоанне Златоусте всеблаженне преподобне, достойно хвалим тя: еси бо наставник, яко Божественная являя.

И ныне, богородичен:

Предстательство христиан непостыдное, ходатайство ко Творцу непреложное, не презри грешных молений гласы: но предвари, яко благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Или, аще хощеши, рцы и дню тропарь.

Господи, помилуй, 12. Честнейшую: Слава, и ныне:

И творит отпуст.

Потребившу же диакону святая со всяцем опасением, яко ничему от зело дробнейших пасти крупиц, или остатися, налияв во святую чашу от вина и воды, и потребив, и сопрятав губою всю мокроту, таже слагает святыя сосуды вкупе, и обвязав их, полагает на обычнем месте, глаголя: Ныне отпущаеши: и прочая, якоже и священник, и омывает руки на обычнем месте, и поклонившеся вкупе со священником, творят отпуст, и благодаряще Бога о всех, исходят.

Конец божественныя литургии святаго Иоанна Златоустаго.

Молитвы после причащения

 

 

См.: История. - Жизнь. - Вера. - Евангелие. - Христос. - Свобода. - Указатели.