Житие и подвизи и чудотворение преподобнаго и богоноснаго отца нашего Авраамия архимандрита Богоявленскаго ростовского чудотворца. Благослови прочести, отче. (РНБ, Тит., 3691. Жития Авраамия и Иринарха Ростовских. XVII в.) л.1. Еже дивитися святых трудом добро есть, а еже ревновати спасению, ходатайственно. Похвалим же и писати чудное их по Бозе житие и еже от Святаго Духа дарованием действуемая в них чудеса Богу угодно и полезно. Понеже и древле Духом (л.1об.) Святым речено бысть пророком: Память праведнаго с похвалами. И похваляему праведнику, возвеселятся людие. Не убо требуют от нас святии никия похвалы, но и удаляются от них: возненавидеша бо мир и яже суть лестная в мире сем. Но мы себе, похвалами святых вразумляеми, преднапутие спасения творим. Святии бо ничтоже от мира возлюбиша, и сего ради свет миру явишася. Возлюбиша бо Господа Бога от всего сердца своего. И яко л.2. бесплотни суще, естественная презревше, // целомудренно и праведно пожиша, страхом Господним уклонишася от всякаго зла. И сего ради быша от ангел славни и бесом страшни. Якоже рече Господь: Прославляющия Мя прославлю. Понеже всякий человек звание от своих дел приемлет: или прославится, или постыдится. И всяк любяй Бога, ненавидит зла, и возлюблен будет Богом; и любяй же неправду, ненавидит свою душу, и возненавиден буде Богом. И сия вся ведуще (л.2об.) святии, десная возлюбиша, шуяя же презревше. От них же убо есть и сей преподобный отец наш великий Аврамий чудотворец, о нем же ныне нам слово предлежит. Сей убо преподобный отец наш блаженный Аврамий чудотворец от предел галицких, града нарицаемого Чухлома, богата родителя сын. Еще бо бе ту людие в то время некрещены быша, имя же бе ему наречено по-чухломски Иверик. И бе от л.3. рождения своего той разслаблен неисцельною болезнию, и // лежа на одре своем 18 лет. Приходяще же купцы ко отцу его из далных стран, из Нова града, изо Пскова и из немец, торгующе со отцем его. И видяще отрока того лежаща на одре в болезни суща. И пришедше, посещаху его, и сказующе ему о вере Господа нашего Иисуса Христа. Како исперва сотвори Бог небо, и землю, и море, и вся, яже в них, и первого человека Адама в раи сотвори. И за преступление свое изгнан бысть из раю. И позна Адам жену, и роди сыны и дщери, и умножишася (л.3об.) людие зело. И со Адамом вси помирая, во аде были вкупе. И Творец всея твари, в Троице славимый Бог наш, Отец и Сын и Святый Дух, явивыйся Аврааму и Сарре у дуба Мамъврийскаго, и по вере Авраамове и Саррине благослови им плод чадородия. И воспомянув свое создание, род человеческий от адовых вечных уз восхоте свободити и спасти, посла Сына Своего единороднаго Спасителя в мир. И от Отческих недр не отступль, преклонь небеса, сниде на л.4. землю. // И Свое создание Матерь Себе избра, Преславную сущую истинную Деву Богородицу Марию, и родися из Нея от Духа Свята, Един Сый от Святыя Троицы, плотию человеком Бог. И все естество человеческое восприят, кроме греха, и на земли с человеки поживе 33 лета, и многая чудеса творил. Болных и разслабленных исцелял, и слепых просвещал, и мертвых воскрешал. И за Адамле преступление, и за наше согрешение от жидов страсть волную претерпев, на кресте пригвоздися, и смерть прият, и воскресе тридневен. И весь род человеческий от адовых вечных (л.4об.) уз свободи, и всему миру спасение дарова нам. По воскресении же Своем женам и апостолом явися, и с ними ядый, и посла их в мир проповедати воскресение, и крестити во имя Отца и Сына и Святаго Духа. И паки со славою Иисус Христос Спас наш взыде на небеса, и седе одесную Бога Отца. И паки приидет судити живым и мертвым, и воздати комуждо по делом его. Грешным же и некрещеным мука вечная. Той же отрок Иверик слышав сия глаголы от новгородцов и от пскович о Христе Бозе л.5. нашем, удивися зело, и отпусти // их с миром. Сам же лежа на одре своем, размышляя и удивляяся, глаголя в себе: како отец мой и мати мнози имут бози, и требы им творят велия, а помощи мне в толико лет никоея несть от них. У новгородцов же един Бог, в Троице славимый, и токмо верою от них славится, и такова многая человеком исцеления подает, и мертвых воскрешает. И аще бы их той новгородцов Бог един Иисус Христос, в Троице славимый, дал мне облегчение по их извещению, то пошел бых аз в ту их страну, и нашел (л.5об.) бых Бога их Иисуса Христа, и веровал бы в Него, якоже и они. И по словеси сем той отрок Иверик, лежа на одре своем, много помышлях, и недоумевахуся, глаголя в себе: да аще ли же помилует мя, и се внезапу почюх силу в себе, нашедшую на него Божиим изволением. И нача превращатися семо и овамо, и рукама и ногама нача владети, и востав здрав в той час, абие озревся в дому отца своего, и изыде тайно, и пойде на запад, и иде многи дни. И егда той отрок Иверик л.6 дошед путем верующих // во Христа, и возрадовася зело. И ту к ним помалу приобщаяся труды своими и послушанием. Да идеже в трудех и в подвизех начнут его верующие похваляти и почитати, он же оттуду избегаше во ину весь и во обитель. И труды к трудом прилагая, и книжному учению внимаше. Они же тамо видяще его труды и послушание, наипаче любляху его. И во всех святых новгородских обителех преходя 17 лет, и книжному учению зело извыкл бе. И прииде в великий Нов град, и видев в нем многонародное (л.6об.) множество, и церковное украшение, и удивися зело, и рече в себе: писано бо есть: Се удалихся, бегая, и водворихся в пустыню, чаях Бога, спасающаго мя. И изыде из града, ища обители, дабы где обрести от градов и весей удалено было, и пойде подле Ладонского езера, и прииде во обитель Пресвятыя Троицы, иже суть на Валаме, и иде ко игумену Феогнасту и ко братии, и пад поклонися им, плачася зело и каяся, яко не крещен бе, и вся по ряду и подробно поведа им о себе. л.7. Игумен же и братия, видев такова благоприятна // мужа, и с радостию прияша его, и крестиша его во имя Отца и Сына и Святаго Духа. И нарекоша имя ему во святом крещении Аверкий. И живяше ту, и служаше им, труждаяся, и во всем угодная им творяше, они же его велми любляше. Видев же Аверкий монашеское пребывание, яко ангельское житие, умоли игумена, дабы его постригл. Игумен же и братия, видевше его несумненное желание,и постригоша его, и нареченно бысть имя ему в монашеском чину Авраамий. И предаде себе Богови. И бе в послушании велице и в покорении ко (л.7об.) всем, наипаче же труды к трудом прилагая, во святей Божии церкви и в келии предстоя день и нощь, работая Господеви, радуяся глаголя, яко от неверия в веру приидох, и обрете Сущаго в Троице славимаго Бога Господа нашего Иисуса Христа. И служаше игумену и братии с радостию, день и нощь без сна пребывая. Бе же ту во обители святей труждаяся чудотворец Авраамий на Валаме 12 лет, и посем игумену Феогнасту состаревшуся зело, и совет сотвориша братия, яко да в него место будет им игумен Авраамий чюхломец. л.8. Уведев же сие преподобный Авраамий, и не восхоте сего, глаголя в себе: стопы моя направи по словеси Твоему, и да не обладает ми всякое беззаконие. Избави мя от клеветы человеческия, и прочее. И прииде ко игумену благословение прияти отъити в дебрь на предния своя труды, и, получив благословение, и поиде к востоку. И дошед до Тихвинских весей. И слышав ту, яко князь Владимир киевский крестит Российскую землю во имя Отца и Сына и Святаго Духа. И оттуду преподобный пойде на полудни, глаголя сице: Настави мя, Господи, на путь Твой, и пойду во истине (л.8об.) Твоей. И дойде града Ростова, и виде, яко ту вера благочестивая просиявает, и бе первый епископ Феодор, да благоверный князь Борис Владимеровичь. И ту епископ Феодор нача приходящих к нему крестити во имя Отца и Сына и Святаго Духа. Мнози же безумнии человецы, неверием одержими во граде том, негодоваху на епископа. И бе распря и нестроение от неверных епископу. Видев же преподобный Авраамий сие от неверных насилие, и изыде из града подле езера, яко едино поприще. И ту созда себе малу колибицу, и нача в ней пребывати// л. 9. з Богом. Видевше же его ту благоразумнии и богобоязнивии человецы, крещеннии же и некрещеннии, тако творяща, Господа ради труждающеся, и начаша приходити к нему послушати слова Божия. Он же наказуя их и учаше Божественному писанию, сице глаголюще, яко земное царство тленно есть и временно. Небесное же царство нетленно и вечно есть, и о всем беседуя к ним, и глаголя полезная коемуждо их. Видев же преподобный ту близ прелесть идольскую сущу, в нечестивых душах (л.9об.) единаче растущу, не убо бе еще прияли святое крещение, но Чюцкий конец бяше, и покланяхуся идолу Велесу каменну, омрачени бо сердца их деянием бесовским. Бе же во идоле бесу злу живущу и страшилища злы и мечты творяща своим омрачением, яко близ его никтоже возможе путем тем ходити, аще пад не поклонится ему. Преподобный же Авраамий, видев сицевую злую прелесть в несмысленных человецех. И огорчися духом зело, и возревновав л. 10. по Господе Бозе Вседержители, // якоже древле пророк Илия. И помолися Господеви, глаголя: Господи Боже Вседержителю Человеколюбче! Призри с высоты святыя Твоея на раба Твоего, и даждь ми силу и благодать Святаго Твоего Духа, еже разорити многокозненнаго и страстнаго сего идола Велеса, и настави сия прельщенныя человеки, еже творити волю Твою святую. И ста рек, и по молитве тщашеся жилище бесовское разорити, и не можаше. Не дадяше бо ему окаянный ни близ себе приступити пособием сатаниным с велиаром и с тлею своею. Преподобный (л.10об.) же Авраамий недоумеваяся о сем и седяше, скорбя зело и помышляя в себе, како бы ему одолети злаго сего окаяннаго идола Велеса силою Христа Бога моего. И се по смотрению Божию все бысть. Не яко презре Господь молитву святаго, но да яко усерднейша покажет его и прославится в них. Вся бо возможна суть сотворшему всяческая Богу просящим у Него. И абие святый скорбя седяше, и се виде некоего старца, грядуща к себе, благоговейна образом суща и благообразна зело. Преподобный л. 11. же срете его. И оба // поклонистася между собою. И прияста друг от друга благословение. И абие седоста. Начат же блаженный Авраамий к старцу глаголати: Откуду, отче, и камо грядеши, и коея страны еси, святче Божий. И глагола ему старец: Аз есмь, отче, Царя града родом, и пришлец есмь странен на вашей земли. Рцы же ми, отче, ты, чесо ради, скорбя, седиши близ многострастнаго сего идола Велеса? Глагола же ему блаженный Авраамий: Тщание мое ко Господу Богу, отче, да подаст ми помощь, еже разорити многострастнаго сего и (л.11об.) нечистаго идола Велеса, и невозможно ми, презре бо Господь Бог моление мое, и сего ради скорбя седох. Глагола же старец ко блаженному Авраамию: Аще хощеши желаемое получити, отче, иди к Царю граду, и взыщи во граде дому Иоанна Богослова. И вниди в дом его, и помолися образу его, и не изыдеши оттуду тощь, но все желаемое свое получиши. Ащели же не идеши в дом Иоанна Богослова, не можеши желаемое получити. И печален бысть блаженный л. 12. Авраамий о долготе путней. // И рече ему старец: Иди в путь свой, Господь Бог прекратит путь твой малым временем. Блаженный же Авраамий исполнися Духа Свята, и взем у старца благословение, и нача тещи путем, уповая на Бога, забы долготу пути. И яко отыде от града Ростова три поприща, и прейде Ишню реку, и стрете человека страшна и благоговейна образом, взлыса, плешива, браду же круглу велию име, зело прекрасну и благолепну. В руце же своей имеюща трость, на ней же животворящий крест, Распятие Господа нашего (л.12об.) Иисуса Христа. Преподобный же Авраамий узре его и устрашися вельми, и виде, яко апостола Божия, паде пред ногама его, поклонися ему. И глагола ему той страшный муж: Старче, востани, повеждь ми, камо грядеши, скорбя зело? Блаженный же Авраамий воста и поведа ему вся бывшая, коея ради вины и камо грядет, и что ради на взыскание дому Иоанна Богослова. Глагола ему той страшный муж: Возвратися, старче, и возми мою трость, и иди, отнеле же грядеши, и приступи ко идолу Велесу без возбранения, и избоди л.13. его // сею тростию во имя Иоанна Богослова, и будет ти в прах окаянный. Преподобный же Авраамий приим трость у благообразна мужа. Той же муж невидим бысть. Преподобный же, страхом и радостию одержим, возвратися вспять, и прииде ко идолу Велесу без возбранения. И во имя Иоанна Богослова избоде его тростию. И бысть в прах окаянный, исчезе в пропасть, яко в бездну, и с каменем. Сие же место и доднесь ни древесы, ни камением, ничим же не наполнится. Преподобный же Авраамий о сем прослави Бога, давшего ему победу (л.13об.) силою крестною на всю силу вражию помощию святаго апостола и евангелиста Иоанна Богослова, иже бысть ему помощник на злаго диавола и на действо его. И пойде преподобный во град Ростов, и сия вся поведа епископу Феодору и князю Борису. Они же, слышав сия у преподобнаго, и прославиша Бога, сотворившаго велия и преславная чюдеса. И взем преподобный благословение от епископа, идеже стрете Иоанна Богослова, и ту возгради церковь во имя его, иже суть и до сего дни всеми зрима. И потом во второе л.14. время взем благословение // у епископа и возгради церковь малу на том месте, идеже идола Велеса сокруши силою крестною, во имя святаго Богоявления Господня, и келлии поставив, и монахи призвав, печашеся ими, яко чадолюбивый отец чад своих, и сотвори обитель свою общину. Людие же, елицы окрест монастыря живущии, зломыслием своим и неверием одержими, вооружахуся на преподобнаго, паче же с ними сам сатана, иже древле от них чествуем бяше, и действоваше в них. И от тех многонеразумных человек зла приях. (л.14об.) Овогда убо разорити святыню его хотяху, овогда же сожещи, но Богу не попустившу их, молитвами и терпением Авраамия чудотворца. Елико бо они злобою вооружахуся на святаго, толико он молитвою о них подвизашеся. Мнози же невернии, видевше преподобнаго терпение и непреложное утверждение, и верующе. Инии же возвращахуся во град к неверным и совокупляхуся на епископа. Понеже суть мнози во граде невернии. Епископ же Феодор, видев л.15. от неверных безумное насилие и злобу, и не моги терпети // избеже из града. В него же место прииде другий епископ Иларион. И нача святую церковь украшати чюдными иконами и святыми книгами и псалмопением. Верных же укрепляти, и приходящих к нему приимаше. Мнози же невернии, безумием одержими, на епископа брань творяху. Он же с разсуждением на волю их полагаше. Но Богу не попустившу нань. Преподобный же Авраамий пребывая во обители своей в посте и молитвах, и окрест града Ростова живущии людие, приходяще к нему, крещахуся. Он же поучением духовным наслаждаше (л.15об.) и напаяше сердца их, паче меда и сота сладчайши. И толико бо бысть тщание ко благочестию и к духовному просвещению, притекаху ко преподобному. Яко и юныя на ревность подвиже к добродетели, мнози бо, оставлше родители своя, и отай прихождаху ко святому, и крещахуся, и быша монаси. Преподобный же без возбранения вся приходящия с верою приимаше, и с разсуждением духовным постризаше, яко виноград благоплодовитый насаждаше при водах воздержания, и напаяше л.16. их книжным // учением божественных словес, и умножи преподобный монахи. Наипаче же молитвою и постом украси их. И созда преподобный церковь велию, и украси ю, яко невесту Христову, чудными иконами и святыми книгами, и в церкви день и нощь преспевая. И святое пение и славословие наипаче Богови возсылашеся. Князи же ростовстии, живущии окрест монастыря, прияша сами святое крещение пред самим великим князем Владимиром, своих же подданных сущих всех отсылаху во обитель креститися ко Авраамию преподобному. И начаша князи велию веру (л.16об.) и любовь имети ко святому и ко всей братии. И даяху имения многа на строение монастырю, и села даяху на потребу братии. Видев же епископ Ларион множащимся монахом во обители святаго, и всеми потребами изобилну сущу монастырю. И духовною любовию помогаше им преподобный ко спасеным стезям. По времени же епископ Ларион совет сотвори с великим Владимиром и со князем Борисом, дабы ту обитель сотворити архимандритию. И поставити преподобнаго Авраамия л.17. архимандритом, и бысть тако. И освятивше // преподобнаго Авраамия, и поставиша его ту архимандритом. Преподобный же нача болми подвизатися, и труды к трудом прилагати, и вда себе молитве и посту, и образ быв всем, и смиренномудрием, и любовию нелицемерною ко всякому приходящему равно имея, к великому же и к меншему, и к вельможам нетщеславием, а к нищим непрезорством, и ко всякому подобная исправляше по апостолу, глаголющему: Никомуже ничемже должни бывайте. Старый же ненавистник добру диавол вооружашеся на преподобнаго всяческими многими искусы, и пакости ему творяше (л.17об.) во дни и в нощи, но никакоже устраши преподобнаго мечты своими. Всегда бо бе Христовою благодатию огражден и знамением честнаго Креста Господня. Бысть же некогда святому Авраамию хотящу литургисати во святей Божии церкви, и обычные молитвы совершивше ко святому причащению, и умыти хотяще руце ему, и диавол вниде во умывалницу в воду, хотяше преподобному спону сотворити водою. Разумев же преподобный лукаваго духа в сосуде, и взем честный крест Христов, и покры Л.18. сосуд, и около сосуда огради крестным знамением, // и остави сосуд, и не врежаше его на многи дни. Бес же силою крестною жгом в сосуде, и не моги изыте из него дни многи. Близ же святыя обители ту сущи князем живущим, обычай имуще на поле ездити, лов деюще. И паки возвращаяся во град, и вхождаху во святую обитель поклонитися божии церкви, и от святого благословение приимаху. И по обычаю же приидоша князи в келию ко преподобному Авраамию благословения ради. Преподобнаго же не бе в келии. В то время бысть преподобный в пеколнице (л.18об.) мыяше власяницы на братию. Обычай бо имяше преподобный по вся дни на братию труждатися, овогда в поварню дрова секи, иногда власяницы на братию мыяше, и воду с ёзера носяше в поварню и в пеколницу. Слышав же преподобный о князех, яко приидоша в келию его, и поиде, хотя благословити их. Еще же преподобному не дошедшу келии своея, князи же суть в келии, ждуще преподобного, и видеша сосуд, крестом накрыт. Един же от них, дерзнув, восхити крест с сосуда неведением, и Л.19. хотяше // знаменатися им. И абие изыде бес из сосуда, аки дым черн и злосмраден. Яко устраши ту всех сущих привидение его. И устрет лукавый дух преподобнаго, в келию грядуща. И нача на него злы словеса износити, глаголюще: Яко же ты мне окаяние сотвори мучитися силою невидимого Бога и зжену быти ми силою крестною во убозем твоем сосуде, якоже аз тебе спону сотворю начинанию твоему. И в мале времени одолею тя, и муки злы наведу на (л.19об.) тя. И поострю на тя лютейший ков, и сотворю тебе раны, и укор всем, видящим тя, и на пезей ослятице всажден будеши без седалища. И в сандалия женская червлены обувен будеши. И ина многа зла сотворю тебе противу моим злом, яже приях от тебе. Преподобный Авраамий оградив себе крестным знамением. И абие бес исчезе и невидим бысть. Вниде же преподобный в келию свою и князей благослови. Они же Л.20. вопрошающе его о бывшем, яко дым // злосмраден изыде из сосуда. Преподобный же ничтоже им о сем поведа. Но предложи им поучение от божественных писаний, яко во святых обителех живущим монахом и приходяще к ним в келлия ничтоже без благословения творити повелено бысть. И саном величества повеле им не возноситися, и к рабом подручным своим милостивым быти. Якоже рече Господь: Блажени милостиви, яко тии помиловани будут, и паки: Блажени чистии сердцем, яко тии Бога узрят. И ино (л.20об.) рече: Блажен град, благочестивым царем царствуем, и дом его во веки славится. Якожде и корабль искусным кормчим управляется. И множайшее богатство приобретается. Нечестия же ради град и несмысленныя дерзости предается в плен, и дом расхищается, корабль же, от неискусных окормляемь, богатство и слава погибает. И еже душа любит славу человеческую, сиречь тщеславие высокоумие, и того ради бывает Л.21. отвращение, И еже к меншим презорство и гордость, // и от того рождается безместная и несмысленная дерзость. Истинна же любовь и смиренномудрие, и к меншим милость. Вся сия направляет к свету богоразумия. И апостол глаголет, яко любый милость и смиренномудрие покрывает множество грехов. К сим же ина многа о горделивых и несмысленных и дерзостных наказав, и поучив их духовно, и благословив, отпусти их с миром. Князи же, приимше от преподобнаго благословение и прощение, и благодаривше Бога, отидоша в домы своя, радующеся. Ко преподобному же Авраамию (л.21об.) архимандриту наипаче велию веру простираху. И ко братии доволну милостыню, и на монастырское строение даяху. Не по мнозе же времени той бес, иже бе у чудотворца был запечатлен силою крестною, преобразися во образ воина, и ста пред великим князем Владимиром во граде Владимире, и нача на преподобного тяжки словеса износити, глаголя: Господи царю, хощу ти тайну велику поведати, твоему царскому величеству достойну. Есть, царю, в Л.22. твоей державе, во граде Ростове монах некий, зовомый // Авраам, волхв сый, образом творяся, яко свят и смирен, прелщаше люди. И сей обрете влагалище велие в земли, сосуд медян, полн злата и сребра, и камения многоценнаго много множество. Тому ж сосуду, и златым поясом и чепем немощно и цене предати. И та вся возможна и достойна твоему господству. И тем сокровищем он монах монастырь созда, церковь велию воздвиже, а твоему величествию не поведа о том. Князь (л.22об.) же великий Владимир разжегся гневом великим на преподобнаго, и посла воина, люта зело, глаголюще ему тако: Аще где обрящеши того старца, то не глаголи ему ничтоже, ни единого слова, но како обрящеши его, тако и постави предо мною, сия же вся суть по действу и по научению злаго того оболгателя, оболгавшего его воина, иже суть беса. Прииде же той злый воин во обитель по Авраамия чудотворца. В то же время преподобному стоящу на Л.23. келейной молитве после соборного пения // во единой власянице, и в сандалия не обувен, и не даде той злый свирепый воин преподобному Авраамию ни в ризу облещися, ни сапоги на нозе возложити святому отцу. Не имый милости, не дадяше бо окаянный глаголати к себе преподобному. Тако бо сатана обуя ему сердце. Видев же преподобный нань бывшую брань диаволю, ничтоже убояся, но паче благодаряше Бога о приключившейся на нем беде. Взем же его воин и посади на свой конь с собою, и поеха к Володимиру. И яко бысть на оной стране езера (л.23об.) против самыя чудотворцовы обители, по реклому, на Угодном поле, и ту наеха поселянина, едуща от града на пезей ослятицы, и в руках имея сандалия женская червлены, и той лютый посол, пожалев о преподобном, яко зимно бе, а не обувен, и взем у селянина сандалия, и вздев на преподобнаго, и облегчая себе коня своего. И всади преподобнаго на ослятицу и без седалища. И абие постави его пред великим князем Владимером во единой Л.24. власянице, юже на теле своем ношаше // преподобный, и в сандалиях женских червленых. Князь же великий Владимир нача преподобнаго увещати всякими ласкании, и отцем его себе именуя, да объявит ему вся драгие вещи, камение же и бисерие, и со златыми чепми влагалище. Преподобный же Авраамий, осклавляяся, и тихим вещанием рече: Благоверный княже Владимире, откуду ты сие неистовое ухищрение и ложная на мя речения почерпе? И кто ти о сем поведа?. Даждь ми сего истинне свидетеля и ложнаго суперника, и души (л.24об.) твоей святой напрасного губителя. Князь же Владимир повеле того воина пред собою поставити. Став же той мнимый воин во многоценных ризах. И нача те жо злы глаголы износити на преподобнаго Авраамия. О обретении влагалища велия, и вся, якоже прежде рекох. Преподобный же Авраамий воздев руце свои на небо и рече: Запрещаю ти, окаянне, именем Господа нашего Иисуса Христа. Повеждь ми, кто ты еси, иже таковыми глаголы обольсти на мя Л.25. великому князю. Бес же нача трепетати, // не моги терпети от святаго запрещения имени Христа Бога нашего, яко и полатам от него колебатися. Глаголя: Аз есмь бес Зефевус, искони ненавидяй добра роду человеческому. Паче же монахом, боящимся Бога. Се же, калугере, увеждь, яже тебе глаголах прежде, то ти ныне и сотворих. Занеже мя еси мучил во убозем твоем сосуде. И сие изрек, исчезе и невидим бысть. Токмо риза его едина остася. Князь же Владимир, видев сие чудо велие сотворшеся, и прелесть вражию, (л.25об.) яко не стерпе диавол от святаго запрещения, и невидим бысть. Преподобнаго же Авраамия стояща пред князем поругана и странно зрети очима. И ту всех сущих объят страх и трепет, иже суть со князем. И нача князь Владимер молити преподобнаго, прося от него прощения, о нем же согреши. И слезам от очию его текущим, глаголюще: Аз, отче преподобный, повинен есмь нужному твоему сему приходу. И оскорбих тя тако зело диаволим разжением и яростию. Отдай же ми, отче святый, о Л.26. нем // же тя прогневах, се бо, отче, враг оскорби ми сердце. И разъяри мя на тя. И вверже мя в погибелный сей грех, его же ты молитвою своею прогна, и безвестна сотвори, токмо едины ризы его осталися, поистинне бо, отче святый, от сего разумею, иже пророка, Святым Духом глаголюща: Дивен Бог во святых Своих, Бог исраилев. Разума же не имае от неведения, в нечаянныя впадаем согрешения. Преподобный же Авраамий глагола ему: Господь простит тя, самодержавный царю, понеже бо сие дело (л.26об.) стараго врага диаволе суть. И не дивися сему, о царю, искони бо сатана боряся с человеки, паче же боящимися Бога, спону им творит. Князь же Владимер, видев преподобнаго Авраамия смирение и благоразсудное разсуждение, яко бе тихими словесы и смиренными глаголы вещающа к нему, яко ничтоже зла восприимше. Наипаче же нача князь преподобнаго ублажати, и честь велию воздаяти ему, глаголюще: Что ти воздам, отче преподобне, яко много ти должен есмь. Преподобный же Л.27. Авраамий глагола ко князю: // Благий царю, мы вся оставихом и вслед Христа идохом, что убо хотехом прияти. Точию надеждами будущих веселимся. Аще ли же изволиши что дати, то церкви Божией подобает со благим прилежанием, яже к Богу. Рассуждение же имети благо, вам бо дано бысть по Бозе правити и строити мир. Яко праведен Господь во всех путех своих. Сего ради блажени милостиви, яко тии помиловани будут. Клеветы же скоро не приимати, и на повиннаго судом яро не нападати, и владети (л.27об.) не лютостию, ни мучением, ни сребролюбием, но милостию и разсмотрением. Яко той есть суд Божий. И божественный пророк вопиет: Праведен Господь правду возлюби. И апостол рече: Милость на суде хвалится. Да не како зде в суетных упражняяся, будущих погрешим. Такожде и о иных добродетелех много наказуя преподобный. И потом преста, князь же Владимир о всем в сладость у преподобнаго послушаше наказания его. И велми почте его, и Л.28. много имения вда ему на церковное строение // и монастырю на создание, и люди многи на службу. И землю около монастыря от градской земли и от княжих земель вда на препитание монастырю и людем данным своим. И села, и всякия угодия, и рыбные ловли в езере и в реках, и Угодное поле на оной стране езера. Идеже преподобный обувен в сандалия женская и всажден на пегу ослятицу. И устрои его своим монастырем. И учини его болши всех обителей, иже суть в Ростове. И грамоты подаде многи жаловалные преподобному (л.28об.) иже суть и до сего дни. И приим князь от преподобнаго прощение и благословение, и отпусти его с великою честию. И с многим богатством в свой монастырь. Слышавше же братия в монастыре пришествие преподобнаго отца Авраамия, и вся бывшая о нем, како Бога прослави, а диавола посрами и безвестна сотвори его. Царя же и вся люди удиви. И како его царь одарова златом и сребром, и людми, и вотчинами, и всяким Л.29. угодием. И сретоша его вся братия с радостию, славяще // Бога и Пречистую Богоматерь, и преподобнаго Авраамия чудотворца. Преподобный же Авраамий, видев свою братию, возрадовася. И вся своя скорби забы. И вшед в церковь, моля Бога и Пречистую Богоматерь и всех святых о управлении и утвержении веры Христовы. И о распространствии всея Российския земли во благоверии, и потом братию благослови. И вниде в келию свою, радуяся и славя Бога. И паки нача труды к трудом прилагати. И около монастыря домы строити. И от князя Владимира (л.29об.) данных людей тамо построил, и землю разверстав, на монастырь им пахати и труждатися повеле, яже и доныне. И на оной стране езера против самыя обители на Угодном поле, идеже преподобный от воина обувен в сандалия и всажен на пегу ослятицу. И на том месте преподобный постави церковь во имя святое Богоявление Господне, священником, и клириком, и рыболовом постави келлии, и на Л.30. монастырь на братию повеле рыбы ловити. В далных же // селех досмотрив, и вся указанная повеле собирати на монастырь и до днесь. Сам же преподобный Авраамий чюдотворец пожив во обители своей 22 лета, пребывая в посте и в молитвах, и в смиренномудриии, и в терпении мнозе, и в трудех тело свое удручая. А душу свою омывая слезами. И тако с миром почи о Господе в лето 6518 месяца октября в 29 день. Святыя же его мощи положены быша подле олтаря (л.30об.) на правой стране. Гроб же преподобнаго Авраамия со святыми его мощами явися в лето 6683 октября в 27 день во времена великого князя Всеволода Юрьевича Владимирского, внука Мономахова. И обретены святыя его мощи во гробе нетленны, и быша чюдеса и исцеления многа в людех, и доднесь с верою приходящим. Преподобный же предстоя Господеви со всеми святыми, молящеся о утверждении веры христианския, и Л.31. о благостоянии святых Божиих церквей // и о спасении всего мира. И о избавлении и от нахождения иноплеменных варвар, и молитвами святого и преподобнаго Авраамия чюдотворца, да избавит нас Христос Бог наш от всех бед и зол в славу и в похвалу Христу Богу нашему со Отцем и со Святым и благим и животворящим Твоим Духом, ныне и присно и во веки веков. Аминь. Л.31об. Слово о явлении чудотворца Авраамия, и о снискании родословия его, и о чудесех ныне бывших, и о трости Богословли. Отисперва же, святии отцы и братия, о родословии чудотворца Авраамия, в прежденаписанном житии его не вписаша, токмо возвещено о нем бысть, от предел галицких, града нарицаема Л.32 го Чухлома, и пострижен во обители на Валаме. Потом же // в древних летех и во многовременных днех о родословии чудотворцове снискано бе того же монастыря архимандритом Иоакимом, иже бе и церковь каменну с четырма пределы постави. Повелением царя Иоанна Василиевича, его царскою казною. Ко освящении же той божии церкви со святыми иконы корсунскими, и со всею церковною утварию, сам царь прииде, и образы и книгами, и божественными службами церковь Божию украси, яко невесту (л.32об.) Христову, и молебная совершив, и у чудотворца Авраамия из гроба Иоанна Богослова трость взем на одоление Казанского царства, да тако и бысть взята Казань, в 61 году, октовриа в день. О родословии же чудотворца Авраамия у архимандрита Иоакима снисканием его к прежде написанному чудотворцову житию не вписано, не вем, чесо ради, церковнаго ли ради строения и совершения, Л.33. или царскаго ради // пришествия в забвение и тако улучися, и преставися той архимандрит Иоаким в 63 году. Таже его снискания о родословии чудотворцове остася у ученика его, у уставщика Гурия. И той о родословии чудотворцове, и о пребывании, и о преставлении, и о обретении мощей его святых многим совершенным юным людем поведа, к древнему же чудотворцову житию не вписа, понеже стар бе зело, за сто лет жив, и другому уставщику (л.33об.) Саве писцу не отда, мню, яко зависти ради, жесток бо бе. И в 79-м году преставися, потом же и иоакимова снискания, и всякия писмена остася в келлии у ученика его у Никифора, и той ему не внят, но собра его вся писмена, и положи сокровенно, и той Никифор в 99-м году преставися. Старец же его Тарасий вся его писмена и Гуриева собра во едино место, и запечатав, посла к сыну его к Москве, в Посолской приказ. Сын же Никифоров приим, и взя своя и царския грамоты, и наказы, и всякия крепости избра в себе, монастырская же не внимах, но вся вон метах, и в свяске повеле в просте поврещи. Да егда в Московском государстве наста мятеж и крамола, и той Никифоров сын послан бе на Бело езеро, и в Галицкия, и в поморския городы, и бе тамо, укрепляя с чернью над воровскими и над литовскими людми, засеками промышлял, и многих побивали, молитвами чудотворца (л.34об.) Авраамия. А московских людей 15 князей, да 75 человек дворян в великий Нов град отослал. И услышав то, что многия грады от прелести вражия к Богу и государю обратились, и с повинными на Бело езеро прислали, и стали за один. И собрався со всеми людми, под Москвою был, и над царствующим градом спасение Божие видев, и царя царствующаго видел. Потом по обещанию своему поверже себе ко Л.35. иночеству во 7149 году. И прииде к // чудотворцу Авраамию з грамотою, и его на монастырь не пустили, и отыде печален. И потом паки во 154 году прииде ко другому архимандриту, и той такожде отказа. И отыде скорбя в весь свою, в печали зело глаголя сице: яко много работах дому чудотворцову, и вклады давал великие, а в монастырь мене не впустиша, и с печали тое впаде в недуг лют зело, и много скорбя, и моляся чудотворцу Авраамию, глаголя: Чим тебе, государя, аз прогневах, и кое зло твоей (л.35об.) святой обители сотворих, за что от своея обители отлучи мя, и скорбя зело, и плачася, и успе, и видех пришедша ко мне Авраамия чудотворца, во святем сану со многими, и посохом мя удари, глаголя: востани и отдаждь снискание Иоакимово родословия моего. Аз же падая и вопия, молясь, никакоже, господи, не вем. Он же рече ми: Идеже рабская хранилищная места от неверных, и показа ми в Л.36. дебри три древа, и коснуся ми тягостно // и невидим бысть. Аз же воспряну от сна трепеща, и быв в недоумении о вопрошении его, и очютився, яко здрав бе. И созва раб своих, и вопроси их о хранилищах их, они же реша ему, яко и мест не вемы, где обрести, все бо землею наполнило, и лет есть 50. Аз же повеле себе вести в дебрь по хранилищным местом, и много показаша ми мест. И внезапу узре та древеса, показанная ми чудотворцем, и обрете место хранилищное, и повеле мотыками землю копати (л.36об.) и вон носити, и три дни копаху, и до пошвы выкопаху, и обретох связок велий писания, вся истлеша, и на реце в мучных плетеных сосудех с того писма землю измывах, и собирая лоскутки, и воспоминая слышанная во младенчестве своем от уставщика Гурия. И помалу вся помощию чудотворца Авраамия списа, и пойде во святую обитель, и у чудотворца молебная совершив, и прииде ко архиманд Л.37. риту и ко братии, они же любезно мя прияша // и постригоша мя и учиниша мя в братию, и учителю вручиша мя, и пребывая в келии, и помышлях, како бы сие Иоакимово снискание к преженаписанному чудотворцову житию присовокупив, по достоинству вписати, и у священнаго Космы уставщика испроси книгу древняго чудотворцова жития, и помоляся Богу и Пречистой Его Богоматери, и преподобному Авраамию чудотворцу, и помалу памятуя Гуриева сказания о сем, и сие Иоакимово снискание присовокупив к прежнему чудотворцову жижию (л.37об.) И нача делу касатися, и присовокупив, вписа, давшему ми помощь чудотворец Авраамий. Богу нашему слава, ныне и присно, и во веки веков. Аминь. Л.38 Молю же вас, святии отцы и братия, чтущии и послушающии, аще что вашему преподобнству в присовокуплении сего к прежде написанному чудотворцову житию неугодная явится, и вы Господа ради, благословите, а не клените, и своим благочестием исправляйте, понеже бо состарехся, 90 лет, в дряхлости обезпамятствовах, аще не присовокупить и не вписати не сме, по явлению чудотворца Аврамия и по наказанию его. |
