Повесть о Николе Заразском

См. XIII век.

По изд.: Повесть о Николе Заразском / Памятники литературы Древней Руси. XIII век. — М., 1981. — С.176-183. Тут по списку XVI ст. ГБЛ, Волоколамское собрание, №526.

Въ лЂто 6730. Приход изъ Корсуня чюдотворнаго Николы образа Заразскаго, како приде из пременитаго града Херсони в предЂлы рязанския въ третье лЂто по Калском побоище. Тогда убито много князей руских. И сташа князи рустии за половець, а побьени быша за Днепром на речке на Хортицы на Калском поле Половецькой земли, на Калках месяца июня въ 16 день.

Въ лЂто 6733. При великом князе Георгии Всеволодовичи Владимерском, и при великом князе Ярославе Всеволодовичи Ноугородцкомъ, и сыне его князе Алексанъдре Ярославичи Невском, и при Рязанском великом князе Юрьи Ингоревиче, принесенъ бысть чюдотворный образ великаго чюдотворца Николы Корсунскаго Заразскаго из преименитаго града Херсони в предЂлы резаньскыа во область благовЂрна князя Федора Юрьевичя Резанскаго. А стоялъ чюдотворный образ во граде Корсуни посреди града близ церкви апостола Иякова брата Богословле. А у сего бо апостола Иякова крестися самодержавный и великий князь Владимер Святославич Киевской и все Руси. А полата была болшая краснаа у чюдотворцева храма сзади олтаря, в ней же гречестии цари веселяшася Василей, Костянтинъ Парфиенитос — православный. Сии бо цари даша сестру свою Анну за великаго князя Володимера Святославича Киевъского и прислаша ю во град Корсунь. БлаговЂрная царица Анна не сочтася брака со Владимером Святославичем и нача его молити быти крестьяна. Князь велики Владимеръ Святославичь возлюби совЂт православныа царицы нЂвесты своея и призва епископа Анастаса Корсуньскаго и повеле себя просвятити святым крещением. И по божию строению в то время разболЂся Владимеръ очима и ничто же не видяше. Епископъ Анастас с попы царьцыны внЂ града Херусони крестиша Владимера и погрузиша его въ святЂй купили и абие прозрЂ. И видЂ Владимеръ, яко воскорЂ исцелЂ, и прослави бога, и рек: «Во истину велий богъ христьянескъ и чюдна вЂра ся». Не токма очима прозрЂ и душевныма очима позна творца своего. Тогда бысть радость велия во граде Корсуни о крешении благовЂрнаго великаго князя Владимера Святославича.

Въ лЂто 6732-го. Явися святый великий чюдотворець Николае Корсунской в преименитом граде Херсунии служителю своему Астафию именем в привидЂнии. И рече ему великий чюдотворець Николае: «Астафие, возми мой чюдотворный образ Корсунски, супругу свою Феодосию и сына своего Остафиа и гряди в землю Резаньскую. Тамо хощу быти, и чюдеса творити, и мЂсто прославити». Остафей убужся от такова видЂниа и нача ужасатися. А во вторую нощь чюдотворець тако же ему явися. Остафей в боли страх вниде, и нача помышляти: «О великий чюдотворець Николае! Камо волиши ити? И аз рабъ твой ни земли Рязаньскыя знах, ни на сердце мое взыде. Не вЂм бо та земля, яко на востокъ, или на запад, или на юг, или на северъ», — в собЂ помышляше. И в третию нощь чюдотворець явися Остафию, и утыкая в ребра, и веля немедлено ити, яко на восток, и поручаяся его доправити до Рязанскыа земли. Остафей нача трепетен быти от таковаго видЂниа, и мышляше в серцы своем — како остати града Корсуня. И мало позамедли, и абие нападе на нь болЂзнь главная. И от толикие болЂзни абие ослепе, и нападоша на очию его яко чешуя. Остафей же нача скорбЂти и плакатися. И по малЂ нача ум свой собирати, и каятися о них же содЂа. И прилЂжно припаде к чюдотворному образу, и нача плакатися: «О великий чюдотворець Николае, возвеличеный от господа на небесех и прославленый на земли в чюдесех! СъгрЂших пред тобою, владыко, — не послушах твоего повЂление. Прости мя грешнаго раба своего. Буди воля твоа, яко же изволи». И в той час прозрЂ и быша глава его бЂз болЂзни, а очи его без мозоля, яко же преже. Остафей нача молити всемилостиваго бога и пречистую его матерь и великаго чюдотворца Николу, чтобы ему по чюдотворьцеву изволению получити желание свое: доити уречена мЂста Резанския земли. И мыслиша ити вверхъ ио Непру, и паки ити за ДнЂпръ в Половецкую землю на возстокъ к Рязанскиа земли, уповаше бо на всемилостиваго бога и пречистую его матерь, и на великаго чюдотворца Николу, яко той может его съхранити от поганых половець. И не избысся мысль его: великий чюдотворьць Николае явися Остафию и рече ему: «Не полезно ти есть ити чрез землю поганых половець. Иди во устье ДнЂпръское в Понтеньское море и сяди в корабль, и доиди моря Варяжского в Немецкия области. И оттуду ити сухимъ путем до великаго Новаграда и паки н до Рязанския земли невозбрано, но и чти приемлемо». Остафей вборзе взя чюдотворное образъ великаго чюдотворца Николы Корсунскаго, и жену свою Федосию, и сына своего Остафия, и единаго от клирик предстатель своих, и забы преименитаго града Херсони, и отрекъся всего имениа, и поиде в путь, яко же чюдотворець изволи, богу его соблюдающн, а чюдотворець ему путь правяще. Прииде во устье ДнЂпрьское и сяди в корабл в Поньтенское море, — се же словет море Руское. И доиде моря Варяжскаго, и паки прииде в Немецкия области во град Кесь, и мало пребы в нем. И поиде оттуду сухимъ путем, и прииде в Великий Новград к великому князю Ярославу Всеволодовичю и сьшу его князю Алексаньдру; пребысть ту много дни. Велики чюдотворець Николае нача великие чюдеса творити. И жена же Остафиева Феодосия возлюби Великий Новиград, и не хотя ити во слЂд чюдотворнаго образа, и скрыся от мужа своего. И абие разслабЂ всЂ уды и телеси ея, и быша, яко мертва, и недвижима, — едино дыхание в персех ея бяше. И нЂцыи сказаша Остафию, яко жена твоа при смерти. Остафие услыша, яко жена его при кончине живота ея, и припаде к чюдотворному образу, и глаголаше со слезами: «Великий чюдотворець Николае, прости мя, рабу свого, яже ти согреших, яко едина от безумных женъ». И в том часЂ исцелена бысть. Остафей вскоре взя чюдотворный Николин образ, иде в путь свой с великою радостию и славою, и хотя доити желаемаго. И многими денми доидет Рязанскиа земли, и нача помышляти в себе: «О великий чюдотворець Николае, се земля Резанская, камо хощу ити и покой обрести». Остафие согреших в мысли своей, забы прежнаго чюдотворцева видениа и чюдес его. Богъ бо творит чюдеса угодником своим елико хощет.

Великий чюдотворець Николае явися благовЂрному князю Федору Юрьевичю Резанскому и повЂда ему приход чюдо творнаго своего образа Корсуньскаго, и рек: «Княже, гряди во стрЂтение чюдотворнаго моего образа Корсунскаго, Хощу бо здЂ быти и чюдеса творити. И умолю о тобе всемилостиваго и человеколюбиваго владыку Христа сына божия — да подарует ти венець царствиа небеснаго, и женЂ твоей, и сынови твоему». БлаговЂрный князь Федоръ Юрьевич возбну от сна, и устрашися от таковаго видЂниа, и нача помышляти в тайнем храме сердца своего, яко страхом обьят бысть. И не повЂда ни единому страшнаго видЂния, и нача помышляти: «О великий чюдотворець Николае, како умолиши о мнЂ милостиваго бога — да сподобит мя венца царствиа небеснаго, и жене моей, и сынови моему: аз бо ни браку сочтася, ни плода чреву не имЂх». И вскоре иде во стрЂтение чюдотворнаго образа, яко же ему чюдотворец повелЂ. И прииде предреченое мЂсто, и увиде издалече от чюдотворнаго образа, яко свЂт неизреченый блистаяся. И припаде къ чюдотворному Николину образу любезно сокрушеным сердцем, и испущая слезы от очию, яко струю. И приа чюдотворный образ, и принесе во область свою. И вскоре посла вЂсть ко отцу своему великому князю Юрыо Ингоревичю Резанскому, и веля ему поведати приход чюдотворнаго образа Николина изъ Корсуня града. Великий князь Георгий Ингоревич услыша приход чюдотворнаго Николина образа, и возблагодари бога и угодника его чюдотворца Николу, яко посЂти богь люди своих, и не забы дЂло руку своею.

Князь велики взя собою епископа Ефросима Святогорца, и вскоре поиде во область сыну своему князю Федору Юрьевичю. И увидЂ от чюдотворнаго образа великиа и преславны чюдеса, и радости наполнися о преславных чюдесех. И создаша храм во имя святаго великаго чюдотворца Николы Корсунскаго. И святи ю епископъ Ефросин, и торжествовав свЂтло, и отъиде во свой град.

Не по мнозе же лЂтех князь Федоръ Юрьевич сочтася браку, и поят супругу от царьска рода именем ЕупраксЂю. И гюмалЂ и сына роди имянем Ииоана Посника.

Въ лЂто 6745. Убиен бысть благовЂрный князь Федоръ Юрьевич РЂзанский от безбожнаго царя Батыа на рекЂ на Воронежи. И услыша благовЂрная княгиня ЕупраксЂа царевна убиение господина своего блаженаго князя Федора Юрьевичя, и абие ринуся ис превысокаго храма своего и сыном своимъ со князем Иваном Федоровичем, и заразишася до смерти. И принесоша тЂло блаженаго князя Федора Юрьевича во область его к великому чюдотворцу Николе Корсунскому, и положиша, и его благовЂрную княгиню ЕупраксЂю царевну, и сына их князя Ивана Федоровича во едином мЂсте, и поставиша над иими кресты камены. И от сея вины да зовется великий чюдотворець Николае Зараский, яко благовЂрнаа княгиня ЕупраксЂа с сыном князем Иваном сама себе зарази.