Житие Авраамия Смоленского

Авраамий Смоленский - о нем Федотов, 1931. Топоров, 1998.

По изд.: Житие Авраамия Смоленского / Памятники литературы Древней Руси. XIII век. — М., 1981. — С.66-105.

Также см. публикацию Мельникова 1994 (переиздание публикации Редкова, 1909).

Подготовка текста М.Д.Буланина. По изд. С.П.Розанова: Жития преподобного Авраамия Смоленского и службы ему. СПб., 1912, с.1-24, тут по списку ГИМ, собр. Уварова, №350, лл.322-343. Сверено со списками: ГПБ, Софийское собр., № 1492 (лл.56-93зв.); ГИМ, Син. собр., №997 (лл.1073-1083).

ЖИТИЕ И ТЕРПЂНИЕ ПРЕПОДОБНАГО ОТЦА НАШЕГО АВРАМЬЯ, ПРОСВЂТИВШАГОСЯ ВЪ ТЕРПЂНЬИ МНОЗЕ, НОВАГО ЧЮДОТВОРЦА ВЪ СВЯТЫХЪ ГРАДА СМОЛЕНЬСКА

Господи благослови.

О пресвятый царю, отче и сыне и святый душе, слово божие, искони сый вь вЂкы, сътворивый небо и землю, видимая и невидимая, отъ небытья насъ въ бытие приведый; и не въсхотЂ насъ презрЂти въ мнозЂй прелести мира сего, но посла на избавление наше сынъ свой единочадый. Глаголеть бо пророкомъ духъ святый: «Не ходатай, ни аггелъ осия ны, но самъ сый преклонь небеса и сниде»; и родися отъ святыя и пречистыя и неискусобрачныя приснодЂвыя Мариа безъ сЂмене отъ святаго духа, и поживъ яко человЂкъ на земли, и страсть претерпЂ отъ твари своея, и смерть вкуси на крестЂ, безстрастенъ сый и бесмертенъ божествомъ, и въ гробЂ положенъ, и въскресе третий день. явися ученикомъ своимъ и увЂривъ я, и многа знамениа и чюдеса показа предъ ученикы, и взыиде на небо къ отцю, и сЂде одесную, и посла святый свой духъ на святыя апостолы, и тЂми вся языкы просвЂти и научи истиннЂ вЂровати и славити бога, и се, заповЂдаа, глаголаше: «Се азъ с вами есмь по вся дни до скончания вЂка».

И се преже написаниа молю ти ся, господи Исусе Христе сыне божий, молитвами пресвятыя и пречистыа дЂвы матере и всЂхъ небесныхъ силъ, и всЂхъ святыхъ молбами, и дай же ми разумъ, просвЂщенъ божиею благодатью, подаждь мнЂ худому и грЂшнЂишу паче всЂхъ свЂтлый подвигъ житиа и терпЂниа начати, еже о житьи блаженаго Аврамиа, бывшаго игумена монастыря сего святыя владычица нашея богородица, его же день успениа нынЂ празднующи память чтемъ.

Се же, братия, въсгтоминающу житие преподобнаго и не сущу написану, печалью по вся дни обдержимъ быхъ и моляхся богу: «Господи, сподоби мя вся по ряду писати о житьи богоноснаго отца нашего Авраамиа», — да и по насъ сущии черноризци, приемше наказание и почитающе, ти, видяще мужа доблЂсть, въсхвалятъ бога и, угодника его прославляющии, на прочий подвигъ укрЂпяться, паче же въ странЂ сей, яко такъ мужь явися, угодникъ бол<ий. 0 семъ бо рече господь пророкомъ, яко «отъ утробы матерня възвахъ тя». Хотящу же ми начати исповЂдати, преже молюся богови, глаголя сице: «Владыко мой вседержителю, благьшъ подателю, отче господа нашего Исуса Христа, прииди на помощь мнЂ и просвЂти сердце мое на разумЂние заповЂдий твоихъ, отвръзи устнЂ мои на исповЂдание устенъ твоихъ и чюдесъ, и на похваление святаго твоего угодника, и да прославиться имя твое, яко ты еси помощникъ всЂмъ уповающимъ на тя въ вЂкы».

БЂ бо сей блаженый Авраамей отъ вЂрну родителю рождься, бЂста и та въ законЂ господни добрЂ живуща благочестно. БЂ же отець его всЂми чтимъ и любимъ, отъ князя честь приемля, бЂ бо воистинну отъ всЂхъ опознанъ, яко и правдою украшенъ, и многымъ въ бЂдахъ помагая, милостивъ и тихъ къ всЂмъ, къ молит†и ко церквамъ прилежа. Тако же и мати его всЂмъ благочестиемъ украшена. Та же не яко неплодьг бЂста: двЂма на десятъ дшеремъ отъ нею рождьшимся, и не бЂ има отрочате. И се бысть има отъ божиа строениа. Многымъ желаниемъ моляста бога подати има отроча, многы же обЂты и милостыня церквамъ и монастыремъ дающа, — и послуша ею богъ и дасть има отроча. Еще бо ему носиму въ утробЂ матрьни, обави и Христова благодать и възва, освяти, и яко преже Самоила АннЂ подасть. Бысть бо она нЂкая дЂва и блаженая черноризица. Отъ божиа промысла нЂкогда, недЂли сущи, бысть ей у заутрении годЂ опочивающий, и удариша въ двери и възъваша ю: «Скоро въстани и поиди, яко Марья отроча роди, имаши е ты крещати». «И се бысть, — глаголаше, — ми, яко на явЂ. И вшедшу ми в домъ къ матери его, яко отроча мыяху мнози же святители священнолЂпно, яко крещениемъ благодати освяшающи, и нЂкая жена вельми пресвЂтла сияющи, предстоящи и одежу бЂлу, яко подобну снЂгу бЂлЂиши, дръжащи. И слугамъ прашающимъ: «Кому, госпоже, дати отроча се?» — и повелЂ имъ к собЂ принести. Она же свЂтлою оною ризою яко свЂтомъ одеже и дасть матери его. Се же сказающи ми матери его, и она глаголаше: «В тотъ часъ отроча оживе въ утробЂ моей».

И свершившим же ся днемъ рождению, родиста блаженаго дЂтища, таче въ осмый день принесоста къ святителю божью, яко же обычай есть христианомъ, имя дЂтищу нарещи. Прозвитеръ же, видЂвъ дЂтища, сердечныма очима и благодатью божиею прозряше о немъ, яко хощеть измлада богу датися. Таче минуша 40 дни дЂтищу, крещениемъ освятиша и. Отрочя же ростяше и кормимо родителема своима, и благодать бо жиа бЂ с нимъ, и духъ божий измлада в онь вселися. И егда же бЂ отрочатемъ Христовою благодатью въ возрастъ смысла пришедшу, родителя же его даста и книгамъ учити. Не бо унывааше, яко и прочая дЂти, но скорымъ прилежаннемъ извыче, к сему же на игры съ инЂми не исхожааше, но на божественое и на церковное пЂние и почитание преже инЂхъ притекая, яко о семъ родителема радоватися, а инЂмъ чюдитися таковому дЂтища разуму. Господня бо бЂ благодать на немъ, просвЂщающи разум его и наставляющи на путь заповЂдей Христовыхъ. Егда же въ болший възрастъ прииде, всею телесною красотою и добротою яко свЂтъ сияше. Родителема же его къ браку принужающимъ, но тъй самъ не въсхотЂ, но паче поучивъ ею и наказавъ презрЂти и възненавидЂти житейскую сию славу, прелесть мира сего, и въсприяти мнишескый чинъ.

ТЂма же отшедшима житиа сего къ богу, онъ же повелику обрадовася и дасть богу славу, тако изволшему, богатьство же, яже остависта родителя его, убогымъ раздаде, вдовицамъ и сиротамъ, и черноризцемъ все, бояся, и како бы бес печали всЂхъ земныхъ отъити и наставити мысль свою къ богу, и утвержая, и уча ся господню словеси, глаголюшему: «И аще кто не възметь креста своего, не поидеть въслЂдъ мене, нЂсть мнЂ подобенъ». Богодухновеныя же книгы и святыхъ житиа почитая, и како бы ихъ житиа и труды, и подвигъ въсприяти, измЂнися свЂтлыхъ ризъ и в худыя ся облече, и хожааше яко единъ отъ нищихъ, и на уродство ся преложь, и расмотряя, и прося, и моляся богу, како бы спастися и в кое мЂсто приити. И утаився всЂхъ, богу наставляющу, отшедъ отъ града дале 5 поприщь, острижеся, яко же мнози вЂдятъ святые Богородици монастырь, къ въстоку, Селища нарицають. И бысть оттолЂ по благодати Христо†болий на подвигъ, и на вся труды подвизаяся, и мыслью въспоминая святаго града Иерусалима и гробъ господень, и вся чесгная мЂста иже избавитель богъ и спасъ всего мира иде же страсть приятъ нашего ради спасениа, и вся честная мЂста, и преподобныхъ отець пустыня, иде же суть подвигъ и трудъ свершивше; дивнаго началника всЂмъ и восиявшаго, ангеломъ равна, великаго меню Антониа, бывшаго крЂпка, храбра и побЂдившаго силою крестною духы неприязненыя Илариона, бывъшаго ученика его; по немъ свЂтлаго в постьницЂхъ чюдотворца Еуфимья; иже по нихъ Саву и Феодосья архимандрита ... старейша всЂхъ наставника черноризцемъ, сущимъ окрестъ Иерусалима.

Изъ всЂхъ любя часто почитати учение преподобнаго ЕфрЂма и великаго вселеныя учителя Иоанна Златоустаго, и Феодосия Печерьскаго, бывшаго архимандрита всеа Руси. И вся же святыхъ богодухновенныхъ книгъ житиа ихъ и словеса проходя и внимая, почиташе день и нощь, беспрестани богу моляся и поклоняяся, и просвЂщая свою душю и помыслъ. И кормимъ словомъ божиимъ, яко дЂлолюбивая пчела, вся цвЂты облЂтающи и сладкую собЂ пищу приносящи и готовящи, тако же и вся отъ всЂх избирая и списая ово своею рукою, ово многыми писци, да яко же пастухъ добрый, вся свЂдый паствы и когда на коей пажити ему пасти стадо, а не яко же невЂжа, невЂдый паствы, да овогда гладомъ, иногда же по горамъ разыдуться, блудяще, а инии отъ звЂрей снЂдени будуть. Тако всЂмъ есть вЂдомо невЂжамъ, взимающимъ санъ священьства. Тако же и корабленикъ, и хитрии кормници, вЂдуще путь и пристанище ихъ, милости ожидающе отъ бога и подобна вЂтра, а не противу бури и волнамъ морьскымъ, но съ божиею помощью како ити нареченнаго града бес пакости и потопления. Аще ли в градъ далний хотяще поити, тъ вЂдущихъ просимъ, егда суть пути различнии и мЂста сущихъ разбойникъ, и того всего боимся и молимъ бога, дабы безъ всякоя бЂды дойти.

Но на прежереченная възвратимся, отнеле же начахомъ, о дарехъ слова божия, данное отъ бога преподобному Авраамию. Яко же кто хотя нареченъ быти воеводы отъ царя, то не вся ли събираетъ храбрыя оружникы и тако стати крЂпко, урядившеся на противныя, съ божиею помощию наступити и побЂдити? Тако и сей такому дару и труду божественыхъ писаний и прилежа, и почитая, и како бы свой корабль своея душа съ божиею помощию съблюсти многыхъ бурь и волнъ, реку напастей отъ бЂсовъ и отъ человЂкъ, съ упованиемъ непогружену отъ сихъ бЂдъ оного пристанища спасенаго доити и в тишину небеснаго Иерусалима бога нашего приити. Пишетъ бо смерть, искушениа и брань по святымъ книгамъ наше же житие се есть, яко неудобь есть без напасти прЂйти никому же. Аще бо самъ владыко спасъ, господь и творець всЂмъ, и създавый вся, и пришедъ на спасение наше отъ пречистыя дЂвица богородица, толику страсть приятъ отъ своея твари, кромЂ бывъ всякого грЂха, всехъ святыхъ колко не то же ли претерпЂша и тако улучиша царство небесное, его же получити и мы молимся.

Пребысть же блаженый Авраамий въ прежереченнЂмъ монастыри въ трудЂ и въ бдЂнии, и въ алкании день и нощь, яко же и самому игумену, зрящу добраго житья, радоватися, и всей братьи славити бога, и мноземъ отъ мира притекати отъ него утЂшение приимати отъ святыхъ книгъ. И бЂ въ всемъ повинуяся игумену, и послушание имЂа къ всей братьи, и любовь, и смирение имый, и бога ради покоряяся всЂмъ. Искусивъ же его игуменъ, яко въ всемъ повинуется ему и послушаеть й, — бЂ бо и самъ игуменъ хитръ божественымъ книгамъ и вся свЂдый и проходя, яко же мнози свЂдятъ, и никто же смЂя предъ нимъ отъ книгъ глаголати, — и принуди же блаженаго Авраамиа прияти священическый санъ; и поставлену ему бывшу дьякономъ, и потомъ иерЂемъ при княженьи великого и христолюбиваго князя Мьстислава Смоленьскаго и всея Рускыа. Прием же блаженый священный санъ, болшее смирение приатъ, яко таку благодать Христосъ ему дарова.

Божественую же литургию съ всяцЂмъ тщаниемъ, иже за всего мира Христосъ повелЂ приносити, не единого же дне не остави, яко же и мнози вЂдять его бывша и до самое смерти, и не оставившаго церковиая правила и божественая литургиа, и своего подвига. Нищету же и наготу, и укорениа же отъ диявола, и тугу, и искушение отъ игумена и отъ всее братьи, и отъ рабъ — кто можеть исповЂдати? Яко же ему самому глаголати: «Быхъ 5 лЂтъ искушениа терьпя, поносимъ, бесчествуемъ, яко злодЂй». Яко же не терпя его и видя себе диаволъ побежена отъ святого, и воздвиже на нь сию крамолу своими совЂты, хотя и оттоле прогнати; яко же и бысть. Видя бо диаволъ, яко мнози отъ града приходять и учениемъ духовнымъ его множатся, отъ многыхъ грЂхъ на покаяние приходять, аще ли и сице рЂчемъ: богу хотящу, яко «нЂсть лЂпо свЂтилнику во тмЂ сияти и укрытися граду, выше горы сущу». Пишетъ бо о великомъ свЂтитЂли и учители всего мира, о ЗлатаустЂмъ ИоанЂ, яко егда отъиде в пустыню и пребысть нЂколко врЂмя въ пустыни, яко многымъ трудомъ и въздержаниемъ, и алканиемъ приятъ врЂдъ и нужу отъ тЂла, яко же бысть и се ему отъ божиа промысла, да не учитель далече града будеть. ОттолЂ выйде въ градъ, уча и наказуя на страхъ господень.

И сице же и сему бысть отъ дияволя научениа, ибо нЂции отъ ерЂи, друзии же отъ черноризець како бы на нь въстати, овии же отъ града потязати и укорити исходяще, друзии спиру творяще, яко ничто же свЂдуща противу насъ глаголааху, и тако посрамлени съ студомъ отхожааху. И пакы не преставааху, крамолы на нь въздвизающе въ градЂ и везде, глаголюще: «Се уже весь градъ к собЂ обратилъ есть». Есть бо, о братие, о семь приложити слово на утЂшение вамъ: тако бо бЂ благодатью Христовою утЂшая приходящаа, и плЂняя ихъ душа и смыслъ ихъ, дабы възможно и неотходящу быти, яко же и сему мнози суть послуси. Яко же и самому игумену не стерпЂти, многыя к нему видя притекающаа, и не хотя того, его отлучи и глаголаше: «Азъ за тя от′цаю у бога, ты же престани уча»; и много озлоблениа на нь возложи.

И оттолЂ вниде въ градъ, и пребысть въ единомъ монастыри у Честьнаго Креста. И ту начаша болЂ приходити, и учение его множайшее быти, а врагъ сЂтоваашеся, а господь богъ раба своего прославляаше и съблюдааше на всяко время, благодать и силу подавая рабу своему. И пребысть мало время, и отъ многъ приемля утЂшение: подавааху ему на потребу и лише потребы, и потомъ скоро раздаваше вдовицамъ и нищимъ, а самъ еже «а потрЂбу собЂ пркимаше. Украси же церковь иконами и завЂсами, и свЂщами, и мнози начаша отъ града приходити и послушати церковнаго пЂниа и почитаниа божественыхъ книгъ. БЂ бо блаженый хитръ почитати, дасть бо ся ему благодать божиа не токмо почитати, но протолковати, яже мнозЂмъ несвЂдущимъ и отъ него сказаная всЂмъ разумЂти и слышащимъ; и сему изъ устъ и памятью сказая, яко же ничто же ся его не утаить божественыхъ писаний, яко же николи же умлъкнуша уста его къ всЂмъ, к малымъ же и к великымъ, рабомъ же и свободнымъ, и рукодЂлнымъ. ТЂм же ово на молитву, ово на церковное пЂние, ово на утЂшение притекающихъ, яко и в нощи мало сна приимати, но колЂнное покланяние и слезы многы отъ очью безъ щука излиявъ, и въ перси биа и кричаниемъ богу припадая помиловати люди своя, отвратити гнЂвъ свой и послати милость свою, и належащимъ бЂдъ избавити ны, и миръ и тишину подати молитвами пречистыя дЂвы богородица и всЂхъ святыхъ. Написа же д†иконЂ: едину Страшный судъ втораго пришествиа, а другую испытание въздушныхъ мытарьствъ, их же всЂмъ нЂсть избЂжати, яко же великый Иоанъ Златаустъ учитъ, чемеритъ день поминаеть, и самъ господь, и вси святии его се проповЂдають, его же избЂжати нЂгде, ни скрытися, и рЂка огнена предъ судищемъ течеть, и книгы разгыбаются, и судии сЂде, и дЂла открыются всЂхъ. Тогда слава и честь, и радость всЂмъ праведнымъ, грЂшным же мука вЂчная, ея же и самъ сотона боится и трепещеть. Да аще страшно есть, братье, слышати, страшнЂе будетъ самому видети. Се же оставльше, на се пакы обратимся, яже о блаженЂмъ Аврамьи.

И сего убо не престааше Страшнаго поминая суда, испытаниа бояся, и не прЂстая прилЂжно бога моля и в нощь, и въ день, и къ всЂмъ приходящимъ оного страшнаго дне не престая о томъ глаголя и почитая великаго оного и свЂтлаго учителя вселеныя Иоана Златаустаго и преподобнаго ЕфрЂма, и всЂхъ богогласныхъ святыхъ, святаго духа, глаголанаго ими, собЂ внимая и всЂмъ проповЂдая. И бЂ блаженый съ въздерьжаниемъ отъ многаго пития, пьяньства же отинудь ненавидя, ризы же по смирению любя, драгыхъ велми бЂгая и смирение присно имЂа. На трапезы же ІІ на пиры отинудь не исходя многыхъ ради зазираний, яже бывають отъ мЂста избирающихъ, и инЂхъ радм многыхъ, яже бывають отъ многаго ради пьяньства и бЂды, и того ради сего убЂгааше. Образъ же блаженаго и тЂло удручено бяше, и кости его, и състави яко мощи исщести, и свЂтлость лица его блЂдъ имуще отъ великаго труда и въздержания, и бдЂния, отъ многъ глаголъ, яже тружаашеся, поя и почитая, и молитву принося къ богу. И къ божествному егда приступаше жертвенику на божествное приношение отъ господа прЂданую апостоломъ на вечери, и апостолы намъ оного завЂта въ оставление грЂховъ, съ благобоязньствомъ и съ вниманиемъ, отинудь запрЂщаще же въ церкви не глаголати, паче же на литургии, и заповЂдая, и уча, всю имЂти веля мысль и съ душею тогда къ богу стройно же, по чину, лЂпо. Егда устраяшеся въ священчьскый санъ, образъ же и подобье на Великого Василья: черну браду таку имЂя, плешиву раз†имЂя главу. Но не зазрите ми, братье, моей грубости, не лжа бо си глаголю или какою хытростью, или мудростью, но многыхъ ради, иже его не видЂша и не слышаша. И въспоминаю господа, глаголюща: «Рабе лЂнивый и лукавый! Подобааше ти дати сребро мое купцемъ, да азъ быхъ на нихъ взялъ с лихвою». ТЂмъ, бояся сего осуждениа, сия написаю, да сего послушавше, прославимъ бога, давшего сию благодать и помощъ граду Смоленьску, блаженаго Авраамья.

Хотящу же ми и еще глаголати, помозЂте ми в молитвахъ вашихъ, да ми подасть господь и конець свершити — положити хотящимъ почитати и поревновати житью преподобнаго или прЂписати и велику отъ бога милость прияти сде и въ будущий и страшный день възданиа Христова. Но на прежереченая поминая възвратимся, отнюду же поидохомъ. Видя же себе сотона побЂжена Христовою силою отъ святаго, яко являашеся ему овогда в нощи, овогда въ день, устрашая и прЂтя, яко огнь освЂщаа и в нощи, яко мнозЂмъ еще не спящимъ с нимъ, да овогда стужая, ово являяся въ мнозехъ мечтаниихъ, яко и до стропа, и пакы яко левъ нападая, яко звЂрие лютии устрашающе, другое яко воини нападающе и сЂкуще, иногда и съ одра и смещуще. А егда отъ сна въстаяше блаженый, по малу сна укусивъ отъ злыхъ окаянныхъ бЂсовьскыхъ мечтовъ, и въ день болЂ ему о семь стужающе, тЂм же ово собою, ово въ жены бестудныя прЂображающеся, то же, яко о Великомъ Антонии пишется. Видя господь силу неприязнину и его злобу на ны, не попусти вся воли его, но яко же самъ вЂсть, тако и попущаеть по силЂ ... приимати его брань, яко же господь въ Еуангельи рече, яко «ни на свиньяхъ имать власти без божиа повелЂниа»; да искусни божии раби явятся. К сему же учить Златаустъ, глаголя: «Господи, аще попустиши единого врага, то ни весь миръ ему не удолЂеть, то како азъ възмогу, калъ и берние?» УкрЂпивый же Антониа и явлься ему, дръзати повелЂвъ: «Не бойся, азъ ти помогу». Той же и сему блаженому свою благодать и силу подавааше и избавляше.

И сими блаженаго всЂми искусивъ сатана, и не удолЂвъ, богу помагающу, и ту крамолу на нь въздвиже, яко же и при господи бысть: и вшедъ сотона въ сердца июдеомъ, и съвЂтъ сътворше на нь, и много поругавшеся, и страсти предаша господа славы. Сице же и на сего бысть: яко же бо сотона отъ прЂжняго монастыря отгна, сице и нынЂ сътвори, не могый окаянный терпЂти бывающая ради благодати и помощь вЂрнымъ и христолюбивымъ христианомъ и отъ всЂхъ побЂжаемъ силою Христовою. Но яко есть пасущихъ душа приимати бЂды, и вшедъ сотона въ сердца бесчинныхъ, въздвиже на нь: и начаша овии клеветати епископу, инии же хулити и досажати, овии еретика нарицати, а инии глаголаху иа нь — глубинныя книгы почитаеть, инии же къ женамъ прикладающе, попове же зиающе и глаголюще: «Уже наши дЂти вся обратилъ есть»; друзии же пророкомъ нарицающе и ина же многа на нь вЂщания глаголюще, их же блаженый чюжь. Истинною реку тако, никто же аше бы не глаголя на блаженаго Авраамиа въ граде, но диаволъ о семъ радоваашеся, а блаженый все, радуяся, терпяше о господи. Събраша же ся вси от мала и до велика весь градъ на нь: инии глаголють заточити, а инии къ стЂнЂ ту пригвоздити и зажещи, а друзии потопити и, проведше въсквозе градъ. ВсЂм же собравшимся на дворъ владычень, игуменомъ же и попомъ, и черньцемъ, княземъ и боляромъ, диакони и вси церьковници, внегда послаша по блаженаго, уже всЂмъ собравшимся. Посланыя же слугы, емше, яко злодЂа влачяху, овии ругахуся ему, инии же насмихаахуся ему и бесчинная словеса кыдающе, и весь градъ и по торгу, и по улицамъ — вездЂ полна народа, и мужи же, глаголю, и жены, и дЂти, и бЂ позоръ тяжекъ видЂти. Блаженый же бЂ яко птица ятъ руками, не умЂа, что глаголати или что отвЂщати, но едино упование имЂа къ богу и к нему моляся отъ такоя избавитися печали, и в собЂ въспоминая страсть господа нашего Исуса Христа, яко вся си претерпЂ нашего ради спасениа, и за нихъ моляся: «Господи, не постави имъ грЂха сего и не попусти на раба твоего предатися в руцЂ ихъ, но укроти и запрЂти, яко же предъ ученикы на мори вЂтру повелЂ умолкнути».

Яко же и бысть; князю бо и властелемъ умягъчи богъ сердце; игуменомъ же и ереомъ, аше бы мощно, жива его пожрети. Ведому же ему на снемъ, явися господь в то время преподобному ЛуцЂ Прусину у церькви честнаго архангела Михаила. Стоящу ему на молит†въ 9 часъ, и гласъ бысть ему, глаголющь, яко «се возводять блаженнаго моего угодника на снемъ съ двЂма ученикома, истязати хотять, ты же о немь никако же съблазнися». И глаголаше блаженый Лука на снимающихся на блаженаго Аврамия и на уничижающихъ его «Много бо бес правды хулящеи и уничижають; но да быша грЂси его на мнЂ были! И вы слышасте, яко хотЂша сътворити преже сего не имуще страха божия и тации же безумнии и епископъ и како хотЂша бес правды убити и. Иже и еще порокъ золъ и хула, и клятва зла, и гнЂвъ божий и за 30 лЂтъ пребысть, и еще вы прибудеть, аще ся того не покаете». Понеже възвратимся, о нем же начахъ глаголати. Приведену же бывшу блаженному на судъ, ничьсо же на нь вины не обрЂтающимъ, но бе-щину попомъ, яко воломъ, рыкающимъ, тако же и игуменомъ; князю же и велможамъ не обрЂтающимъ такыя вины, но изискавше все, нЂсть неправды никоея же, но все лжуть, тогда яко единЂми усты: «Неповинны да будемъ, владыко, — рекуще къ всЂмъ, — еже таку на нь крамолу въздвигнули есте, и неповинни есмы, иже на нь глаголетЂ или что съвЂщаете како любо безаконно убийство!» И глаголюще: «Благослови, отче, и прости, Аврамие!» — и тако отъидоша въ свояси.

ВидЂвше же сия тако отъидоша и яко нЂсть имъ конца, в чемъ осудити и, и рЂша отъ епископа на се приготованнымъ крЂпко стрЂщи и и блюсти и и ина два отъ ученикъ его, иже преподобному служаща добрЂ. Наутрия же събравшимся игумени и ереи, и вины, яже преже глаголааху, укоривше, озлобивше, възложиша на нь. И отъ того времене пакы вниде в монастырь, идЂ же бЂ преже остриглъся блаженый, яко не приемшу ему никоего зла. Се же отъ сего времене многа зла пребысть: елико бяше блаженнымъ научено, вси ти обратишася на своя дЂла злыхъ грЂхъ. И слава богу, терпяшему сихъ всЂхъ! И еще тогда блаженому Лазарю иерЂемъ сущу и по Игнатьи епископу бывшу, истинною рещи, яко поборникъ и пастухъ Христовы церкве словесныхъ овець, сьй бо бЂаше бога ради оставилъ епискупыо свою и за многое обидЂние святыхъ церквей, иже обидятъ и властели, отъимающе чюжая бес правды и обидящихъ вдовица и сироты. Сьй бо видЂ и слыша, яко вся бес правды, яже на блаженаго Авраамиа ону крамолу въздвигнули, богу убо о семь възложившу, сьй пришедъ глагола къ епископу Игнатию: «Великой есть быти опитемьи граду сему, аще ся добрЂ не опечалиши»; яко же и бысть. Блаженый Игнатий сего послуша, скоро посла по всЂмъ игуменомъ и к всЂмъ попомъ, заповЂдая и запрЂщая всЂмъ отъ всякого речениа зла прЂстати, яже на блаженаго Авраамия. «Се бо, послушавъ васъ, на ся отъ бога въсприяхъ въ вЂкы опитемью. А вы, чада, покайтеся, а сами вЂсте, что прияша отъ бога въставшеи на великого Иоана Златаустаго; аще же не покаетеся, то то же и вы подъимете». Сего же ради блаженый имя нареклъ себЂ, своего святьца подражая, яко же бо и онъ, подражая, много пострадалъ отъ оноя веси и за ня моляся богу, обращая вся къ богу и спасая, блаженый же терпя ихъ запрещение.

Тако же бЂ и сему ихъ запрЂщение, яко и никому же не приходити к нему, мнози же мечници на всЂхъ путехъ стрЂжааху, а нЂции разграблени быша. Богу же хотящу всЂмъ спастися, овогда же человЂколюбие свое и милость являеть, овогда же казня, бЂда дая: глады, смерть, бездождье, сушу, туча тяжкыя, поганыхъ нахождениа, градъ плЂнение и вся, яже на ны отъ бога приходятъ. И тЂми обращая и приводя к собЂ, да не бо есмы безъ грЂха, а терпяще сихъ, рассудимъ, помянемъ, колико злыхъ, яже сътворихомъ и забытью предахомъ, в нощи же и въ день съгрЂшающе. Овии осужаютъ и хулятъ святителя и ереа, и черноризца, а сами яко безъ грЂха суще; а слышасте господа, глаголюща: «Святителя моя и черноризца, и ерЂа честьно имЂйте и не осужайте ихъ», — да не сами отъ господа приимете горкый судъ; да не забудете господа, заповЂдающа, рече бо господь: «За весь празднъ глаголъ въздати есть слово въ день судный». А Павелъ апостолъ, вселеныя учитель, глаголеть: «Что осужаете чюжаго раба? Своему господину или стоить, или падаеть, или въстанеть; силенъ же господь поставити и»; и пакы: «Ихъ ради приходить гнЂвъ божий на сыны непокоривыя». ТЂм же внимай мы кождо себе: кождо за ся въздати имать слово въ день суда.

Достойно же есть и сде помянути слово, яже отъ житья преподобнаго Савы и о патриарсЂ ЕрусалимьстЂмъ Ильи, его же Анастасьй царь бес правды повелЂ изгнати отъ престола, иного в него мЂсто възведе. Яко же се услышаша въ ИерусалимЂ гражане, яко изгнанъ бысть патриархъ, и зело порадовашася сему, яко за то прииде на ня гнЂвъ божий и бысть на ня 5 лЂтъ глада, да накажуться не радоватися о злЂ ни о коемъ же. Яко же приити иконому къ преподобному Са†и глаголати: «Уже суть братья не ядше всю недЂлю, да уже есть намъ не ударити в трапезЂ било». И преподобный же Сава, утЂшая, глаголаша, яко «не имать богъ презрЂти рабъ своихъ». По глаголу же преподобнаго бысть: нЂкто христолюбецъ 30 велблудъ имЂа, яже къ блаженому посла въ лавру, всякого брашна наполнивъ до изъобилья. Яко же призва иконома Сава и глагола к нему: «Есть ли ударити въ било?» Икономъ же повелику похули себе. А и еже о цари Анастасьи рекохомъ, иже патриарха Илью съ престола отгна, и гнЂвъ за то постиже божий, яко сказають смерть его: яви бо ся облакъ и молниа раз†о полатЂ царевЂ, тако гонимъ, убьенъ бысть гнЂвомъ.

Достоино же есть помянути зде о великомъ свЂтилЂ всего мира. Иже на святаго Иоана Златаустаго въставше злии, погнаша; и явистася ему великая апостола Петръ и Павелъ, глаголюща: «Дръзай, страстотерпче божий, господь с тобою, Миръ буди, мужайся и крЂпися, прияти бо имаши въздание, небесное царство и вЂнець свЂтелъ отъ бога, а въставшеи на тебе лютою смертью отъ бога казнь приимуть, яже и наскорЂ прияти имутъ и сде, и въ будущий судъ». Скончавъшу же ся блаженому, сбысться проповЂдь святую апостолу на крамольствовавшихъ и на отгнавшихъ святаго, да ови отъ епископъ напрасную смерть приимаху, инымъ же прыщые синиа по ногамъ бьшааху, просЂдающеся, иному напрасенъ огнь, свыше сшедъ, руцЂ и нозЂ усуши, иному же нога обЂтрися и нача гнити, и претираемЂй ей, яко отъ тоя и другой тотъ же врЂдъ прияти, и въ три лЂта едва душю испусти, иному же языкъ яко затыка въ устЂхъ бяше, и в доску вписавъ, глаголаше свой грЂхъ, яко на святаго Иоана Златаустаго хулу глаголахъ; Евдоксию же лютый недугъ порази, лономъ бо ей кровь грядяше, и потомъ бысть смрадъ, и черви породи, и тако горкою смертию животъ свой злЂ сконча. Ибо видЂти гнЂвъ божий, напрасно на нихъ находяй и многымъ мукамъ и смертемъ предая тяжко. Но на иже глаголанная възвратимся, да уже о блаженЂмъ Авраамии помянемъ.

Скоро на сихъ бысть, да овии отъ игуменъ, инии же отъ поповъ напрасную смерть приимаху, яко вЂдуще и бывше въ сонмЂ на блаженнаго тужааху и припадааху ему на ногу, прощениа просяще, а не бывше на сонмЂ радоваахуся. Пишеть бо въ «Златыхъ Чепехъ» всея вселеныя святыхъ отець, яко бысть нЂкый отецъ отъ преподобныхъ, многымъ ползу творя словомъ и житиемъ. НЂции же отъ дЂйства дияволя завидЂвше и оклеветавша, много отсЂкоша отъ него и яже к нему ползы лишиша, послЂди же уразумЂвше диаволю лесть и покаявъшеся к нему, ипрощение отъ него прияша, послЂди овии възбеснЂша, ови въ различныя впадоша бЂды грЂха ради. Рече бо спасъ:

«Смущая васъ, тъй прииметь судъ, кто любо буди». И се есть подобно помянути повЂсть нЂкоего отца духовна къ сыну духовну: корабль есмы мы, кормникъ же богъ, всего мира направляя и спасая своими присными рабы, реку же пророкы и апостолы, святителя и вся учителя божиа, дажде и до скончаниа вЂку сему. Да аще мы на ся възмемъ инЂхъ осужати, изгонити въ правду или бес правды, то уже отняли есмы отъ бога и отдали есмы оному противному, рекше диаволу, божий корабль. НынЂ же не вЂмы ся, в чемъ есмы, понеже ны взяла есть противная буря, а егда ны принесеть къ истоплению, тогда ся помянемъ безгода, яко никто же насъ о своихъ грЂсЂхъ нудится и плачеть, но ины осужаемъ и хулимъ, яко же рече господь: «ЧеловЂци взяша судъ мой, уже бо ихъ судиша, азъ имъ не сужду», того ради да не осужени будете от бога. Аще бо кто прииметь благодать отъ бога и даръ поучениа, то ни весь миръ таковаго можетъ оскорбити, имать бо надо всЂми бога помощника, яко же рече господь: «Азъ есмь с вами, никто же на вы». Се же отставльше, на се възвратимся.

Бьшшу же бездождью велику въ градЂ, яко иссыхати земли и садомъ, и нивамъ, и всему плоду земленому, яко нЂ за колко бысть время, всЂмъ тужащимъ и молящимъ бога. И самъ епископъ, блаженый Игнатий, съ честнымъ крилосомъ и съ богобоязнивыми игумены, и ереи, и дьяконы, и черноризци, и съ всЂмъ градомъ, мужи и женами, и весь младый възрастъ, вкупЂ весь градъ, окрестъ ходяше съ честнымъ крестомъ и съ иконою дръжащею господа, и съ честными святыхъ мощьми, и с великымъ умилениемъ, и съ слезами помиловати люди своя, и послати милость свою на землю, и отвратити гнЂвъ свой: «Пусти, господи, дождь, одожди лице земли, молимся, святый». И кончавшимъ отпустъ, крестомъ и святыхъ мощьми воду освятивше, и отъидоша кождо въ свояси. И не бысть дождя на землю, и быша в печали велицЂ. Се же все бысть отъ божия промышления. И хотя богъ блаженаго Авраамиа обьявити, нЂкоему помянути възложи на сердце богъ, сущу иерею, яко, шедъ, помяну христолюбивому епископу Игнатию яже о блаженЂмъ Аврамии, глаголя сице: «Вси молихомся, не послуша насъ богъ. Кая вина така, яже на преподобнаго Авраамиа, яко лишенъ бысть божественыя литургиа? Егда и того ради бысть отъ бога казнь си?»

Тогда блаженный Игнатий въскорЂ посла по блаженнаго Аврамия, и призвавъ, и испытавъ, яко все лжа и оглаголание по зависти и злобЂ диаволи бысть, ипростии, глаголя: «И благослови, честный отче, за невЂдЂние мое се ти сътворихъ, и весь градъ благослови, и прости послушавшихъ лживыхъ клеветникъ и оглагольникъ». И благослови пакы пречистую и честную литургию съвершати: «И моли бога о градЂ и о всЂхъ людехъ, да помилуеть господь и подасть богатно дождь свой на земьлю». И глагола блаженый къ святителю: «Кто есмь азъ грЂшный, да сице повелЂвае ми выше силы моея?» Но глагола: «Воля божиа да будеть о всЂхъ насъ! И ты преже о насъ помолися, честный о святителю, о своемъ ти богопорученЂмъ избраннЂмъ святемъ стадЂ словесныхъ овець». Отшедшу же блаженому и молящуся богу, и глаголющю: «Услыши, боже, и спаси, владыко вседръжителю, молитвами твоего святителя и всЂхъ иерей твоихъ, и всЂхъ людий твоихъ. И отврати гнЂвъ твой отъ рабъ твоихъ, и помилуй градъ сьй и вся люди твоя, и приими милостиве всЂхъ въздыхание и съ слезами молящих ти ся, и пусти, и одожди, напои лице земли, человЂкы и скоты възъвесели. Господи, услыши и помилуй!» — еще преподобному не дошедшу своея кЂлия, одожди богъ на землю дождь, яко славити бога всЂмъ и глаголати: «Слава тебЂ, господи, яко скоро послуша своего раба!» И бысть многа радость въ градЂ. И оттолЂ начаша притЂкати въ градЂ, и вси глаголати, яко «помилова богъ, избави ны отъ всЂхъ бЂдъ твоими, господи отче, молитвами». И отселЂ болЂ просвЂтися по благодати ХристовЂ. ЛЂпо же есть помянути и о житьи преподобнаго отца Феодосья Печерьскаго всеа Руси. Хотя богъ вЂру раба своего явити и отъ того мЂста на другое преселити, и пресвЂтлЂйшу и пространнЂйшу церковь възградити и уже умножившися братьи, и показа богъ чюдо в нощи, яко сказують, рекуще: бысть яко дуга въ образъ отъ верха церковна, а другый холмъ конець еа, и преподобнаго отца Феодосия идуща съ иконою пречистыя богородица и братьи въслЂдъ идуща и поюща, яко же и бысть потомъ. Тако же и нынЂ помянемъ о преподобнЂмъ Авраамии и о молит†пресвятыя богородица, и братьи въслЂдъ идущи и поюща, яко же и бысть потомъ, и хотящимъ показати мЂсто, на нем же блаженый о бозЂ хощетъ жити, и инЂмъ мнозЂмъ, иже имуть с нимъ спастися. Преподобный и благочестивый Игнатий епископъ мышляше создати церковь камену въ имя святаго Игнатья, в память собЂ, и есть вънЂ града и таково суще мЂсто близь и равьно, угодно на поставьление церкве и вся могуще въсприяти рядъ монастырескъ. И скупи ограды овощньгя окрестъ его, и постави церквицю во имя Богоносца, и потомъ ту раздрушивъ и на ино мЂсто пресели, и основа болшу, и нарече во имя святое владычица нашеа богородица Положение честные ризы и пояса. И быша в немъ нЂколико братье, блаженымъ питаеми епископомъ Игнатием.

Некотории же буяци несмыслении унииждааху, глаголюще: «АІце хощетъ кто, да идеть на игуменьство», имя нарицающе. Преподобный же епископъ к мнозЂм глаголаше и благодатию же божиею прозря духовныма очима, яко имать прославити богъ мЂсто се и молитва пресвятыя богородица, и мнози имутъ в немъ спастися о Христо†благодати о бозЂ, пребывающе и в немъ притекающе христолюбивии людие. По мнозЂ же времени, богу о семъ промысляющу, стужаше же бо в себЂ блаженый Авраамий, яко далече сущу града приходящимъ. Тако же блаженый помянувъ епископъ божию волею тогда, призва единого отъ своего честнаго крилоса перьваго отъ старЂйшихъ протопопу, именемъ Георгий, глагола к нему о блаженЂмъ Авраамии, помянувъ, яко далече ему сущу града, скорбь ему велья, да призоветь и скоро.

Скоро же блаженный прииде по повелЂнию епископа, и вшедъ, сътвори поклонение, глаголя: «Благослови, владыко святый, раба твоего». Призва блаженаго Авраамиа епископъ, утЂшая, глаголаше: «Како, отче, о господи пребываеши?» Оному же рекшу: «Ей, владыко святый, истинною молитвами твоими добрЂ», — и рече к нему епископъ: «Хощу дати ти благословение, аще е приимеши». ОтвЂщавъ блаженый, глаголаше: «Честно есть благословение яже нъ и даръ». И глагола к нему епископъ: «Се благословение: поручаю ти и даю пресвятые богородици дом: поиди, похваля бога и славя, и моли о всЂхъ». Блаженый же радоваашеся и хваляше бога, таку даровавшаго благодать рабу своему молитвами святыя богородица. И входящу ему въ врата монастырьская, нЂкако свЂтъ восия ему въ сердци отъ бога и с радостью просвЂщая душю его и помыслъ, яко же се всЂмъ повЂдааше. Яко же сице Иаковъ во снЂ видЂ лЂствицю, досязающу до небеси, и глаголаше, яко «есть господь на семь мЂстЂ», то же то и сему открываашеся, уже бо господь искусна и яви. И събысться псаломъ Давидовъ: «Възведе человЂкы на главы наша, и проидохомъ сквозЂ огнь и воду, и изведе ны в покой». Яко же бо царь по многыхъ побЂдахъ и трудЂхъ на болший санъ и честь възводить своего воина, да уже и сему господь богъ самъ подаеть рабу своему утЂшение, яко трудившуся, и всЂхъ сердца обращая своею благостью, далнимъ же и ближнимъ, и просвЂщая всЂхъ душа.

И оттолЂ нача пребывати в первЂмъ подвизЂ, и всЂмъ же притекающимъ с радостыо великою, ибо велиа благодать божиа на градЂ, вся просвЂщающи и веселящи, и хранящи, избавляющи, тишину же и мир, и всЂхъ благыхъ на многа лЂта подающи, и еще не оскудЂти имать молитвами святыя богородица и преподобнаго ради Авраамия и всЂхъ святыхъ его. И оттолЂ прослави и господь болЂ, зане же злЂ блаженаго оскорбивше ооращатися начаша и припадати на ногу, просяще прощениа. Иже всЂми ненавидимъ бывъ, всЂми любимъ бысть,. да иже преже бояхуся лриити, то убо не боящеся, но радующеся приходяху, не точью гражане едини приходяху, но съ женами и съ дЂтьми, но и отъ князь, и отъ вельможь работнии же и свободнии притекааху, вси своя грЂхы к нему исповЂдающи, и тако отхожааху в домы своа радуюшеся, Приемь же блаженый домъ святыя богородица и украси ю яко невЂсту красну же, яко же и преже и болЂ, рцЂмъ, иконами и завЂсами, и свЂщами; яко же и нынЂ ссть видЂти и всЂмъ притекающимъ в домъ ея милости и заступлению, въ хвалу богу и угодника его. Мнози же хотяху быти черноризцы, но не ту абие постризааше, вЂдый трудъ, искушение велико отъ общаго всего врага, и се братьи числомъ 17. Сице же блаженый искушааше отъ Христовы благости, — вся бо ему господь откровенно даяше разумЂти, — жити хотящимъ и к нему притекающимъ, тако отвЂщевая: глаголаше къ послушливымъ и смЂренымъ, веля имъ часто притекатя к собЂ, елико бо ихъ отъ златолюбьства и злобы, тЂхъ удаляшеся. Сице бо и отъ своихъ напастий много, и отъ черноризець приимаше искушение, да того ради скоро не приимаше и. Искушаше же сице, вЂдый по книгамъ, но слыша нЂкоего игумена сице бывша, точью до 12 числомъ имяше мнихъ, два же въ искусе. А егда кто хотяше отъ него пострищися, то знаменаше преже, къ коему брату внидеть: да аще поидяще къ подвижну брату, то стоя славяше бога, руцЂ въздЂвъ и о немъ моляся къ господу, аще ли не къ такому, то печаленъ бываше. То же на собЂ блаженый помышляше, вЂдый, яко нудьно есть лЂнящимся сий подвигъ черноризьцЂмъ, а подвизающимся рече господь: «ВъзмЂте иго мое на ся, и научитеся отъ мене: яко кротокъ есмь и смиренъ сердцемъ; и обрящете покой душамъ вашимъ и утЂшение. Ибо яремъ мой благъ, и брЂмя мое легко есть», — всЂмъ притекающимъ к тобЂ истиннымъ сердцем.

Велику же любовь потомъ стяжаста блаженая: епископъ радоваашеся, яко таковаго дарова ему богъ свята и блаженна мужа, Авраамий же радоваашеся, яко тако дарова ему богъ свята и блаженна епископа; Авраамий же пакы радовашеся, яко такъ даръ благодати приемъ от него. Мало же по такой любви поживъ епископъ, и преставися къ богу, по правдЂ рещи, воистинну святу и преподобну и къ богу тако подвизався, отъ уности потрудився и до самоя сЂдины великаго священичьства. И тако преставися къ богу святитель великый Игнатий града Смоленьска, яко же въ преставленьи его мнози повЂдають о немъ, глаголюще, яко великъ свЂтъ сниде на нь съ небесе, яко и страхъ нападе на вся, и тако взиде радуяся на небеса, свершивъ течение добрЂ о господЂ бозЂ. И вси въпросимъ милости отъ бога, да помилует ны по милости своей, яко дарова святителя таковаго граду сему. И оттолЂ болЂ начатъ подвизатися блаженый Авраамий о таковЂмъ разлучении преподобнаго въ смЂрении мнозЂ и въ плачи отъ сердца съ воздыханиемъ и съ стенаньми, поминааше бо о собЂ часто о разлучении души от тЂла. Блаженый Авраамий часто собЂ поминая, како истяжуть душу пришедшеи аггели, и како испытание на въздусЂ отъ бЂсовьскыхъ мытаревъ, како есть стати прЂдъ богомъ и отвЂтъ о всемъ въздати, и в кое мЂсто поведутъ, и како въ второе пришестие предстати предъ судищемъ страшнаго бога, и какъ будеть отъ судья отвЂтъ, и како огньная рЂка потечетъ, пожагающи вся, и кто помагая будеть развЂи покаяниа и милостыня, и беспрестанныя молитвы, и кто всЂмъ любы, и прочая иная дЂла благая, яже обрЂтаются помагающия души. Мы же сего ни на памяти имамы, но ово о семь, а другое о иномъ станемъ, не имуще ни единого слова отвЂщати предъ богомъ.

Пребысть же блаженый в таковЂмъ подвизании вся дни лЂтъ живота своего, о семь бдя и моляся съ въздыханиемъ, многы же научивъ и наказавъ пребывати въ добрЂмъ трудЂ, въ бдЂнии же и въ молитвЂ, въ терпЂнии же и смирении, въ милостыни же и въ любви. И сице утверди вся съ слезами многами сихъ не забывати николи же и глаголаше: «И мене смиренаго не забывайте въ молитвахъ вашихъ, моляшися владыцЂ и богу и пресвятЂй его матери съ всЂми святыми его». И потомъ болЂзни на блаженаго нашедши, и тако преставися, предавъ блаженую и святую свою душю господеви, его же желааше и получи, царьство небесное. И пребысть блаженый Авраамий подвизаяся лЂтъ 50, подвизаяся отъ уности до конца живота своего о ХристЂ ИсусЂ господЂ нашемъ, ему же слава и дръжава съ отцемъ и святььмъ духомь нынЂ и присно въ вся бесконечныя вЂкы. Аминь.

А се конець блаженаго и преподобнаго отца нашего Авраамиа и похвала граду сему, и заступление пречистЂй богородици приснодЂвЂ, и похвала. Азъ же грЂшный и недостойный ЕфрЂмъ и в лЂности мнозЂ пребывая, и в послЂдний всЂхъ, и празденъ, и пустъ бывъ всЂхъ благыхъ дЂлъ, раз†въ праздно имя облекохся, въ аггельскый сий санъ, именемъ черноризець нарицаюся, дЂлы же злыми далече его отстою. А како нарекуся, абы послЂдний нарЂщися не могу, дЂла бо злая, яже сдЂяхъ, обличають мя и стужають, тЂм же послЂдний въ житии и блаженому, рцЂмъ, быхъ ученикъ, иже ни по малу быхъ послЂдуя житию, терпЂнию, смирению, любви и молит†и всЂхъ его благыхъ нравовъ и обычай, но по вся дни пианъ и веселяся, и глумяся в неподобныхъ дЂлехъ, иже въ правду быхъ празденъ. Онъ умиленый плачася, азъ же веселяся и глумляся; онъ иже на молитву и почитаниа божественыхъ книгъ, на славословие въ божию церковь тщася, азъ же на дремание и на сонъ многъ; онъ еже трудитися и бдЂти, азъ празденъ ходити и в лЂности мнозЂ, онъ еже непразденъ ходити, азъ же в лЂности мнозЂ; онъ еже не празднословити и не осужати, азъ же осужати и празднословити; онъ же страшный судный день божий поминая, азъ же трапезы велиа и пиры; онъ паметь смертную и разлучение души отъ телеси, испытание въздушныхъ мытаревъ, азъ же бубны и сопЂли, и плясаниа; онъ еже подражати житие святыхъ отецъ и подобитися благому житью ихъ, и почитая святая жития ихъ и словеса, азъ же быхъ подражая и любя пустотная и суетная злыхъ обычая; онъ еже смирити себе и уничижити, азъ же веселитися и гордЂти; онъ нищету любя и безъимЂньство и вся раздавая требующимъ и сиротамъ, азъ еже събрати и не подати, побЂженъ отъ многыя скупости и немилосердия; онъ по смЂрению ризы любя, азъ же красны и многоцЂнны; онъ рогоже положи и постелю жестоку, азъ же постелю мяхъку и теплу; и не могый терпЂти студени и мраза и стерпяше, азъ же баню имЂа утЂшену и теплу; онъ о нищихъ тужа, изволя самъ алченъ быти и не вкуся, азъ же отинудь ихъ ненавидя и презря; онъ нагыхъ видЂвъ плещу и неодЂныхъ, мразомъ изъмерзъшихъ, одЂ, азъ же не вЂмъ, яко ти тако же отъ тоя же утробы произыдоша, и еще же мнози, утаившися, страньствують господа ради, яко же рече Павелъ апостолъ, вселеныя учитель: «Их же ни весь миръ имать, яко ходиша въ овчинахъ и в козьяхъ кожахъ, заблужающе и скрывающеся по вселеннЂй, не имуще ни дому, заблуждающе въ верьтепЂхъ и в пещерахъ земныхъ».

Сего ради, господье, и отци, и братья, не могу дивнаго и божественаго, и преподобьнаго образъ и подобие похвалити, грубъ и неразуменъ сый, оного бо образъ свЂтелъ и радостенъ, и похваленъ, образъ же мой теменъ и лукавъ, и мерзокъ, и безстуденъ, аще хощу, не достигну. Како имамъ похвалити? Прошу милости, помощи отъ господа и все упование имЂа, надежу и помощь възлагаю на пресвятую и пречистую дЂву и богородицю Марию, та бо имать болЂ всЂхъ дръзновение къ сыну и богу нашему Исусу Христу, молящися съ всЂми бесплотными силами и съ всЂми святыми, могущи мя спасти и избавити отъ всЂхъ бЂдъ. И та ми есть помощница и поручница животу и спасению, и зде и въ будущий день, та бо вЂсть избавити и подати помощь своимъ рабомъ, елико и когда требуемъ ея на помощь, в дому и на пути, и на мори, въ буряхъ и волнахъ, и на бранехъ, и въ всЂхъ бЂдахъ скорЂе молниа обрЂтающися на помощь, в нощь же и во день, и на всякъ часъ изъбавляющи и хранящи отъ всЂхъ съвЂтъ, сотонинъ, глаголю, и всЂхъ его дЂмонъ, и отъ всякоя крамолы, и гюганыхъ нашествия, и всЂхъ съвЂтъ и съвЂщаниа испроверьзи. Святителя и черньца, и всего церковнаго чина, и сонма, князя же, ІІ вся христианы въ молитвЂ, госпоже, испроси, пресвятая и приснодЂво богородице Марие, сына своего и бога нашего молящи прилежно за порученное тебЂ стадо новыхъ людий, яже избра сынъ твой и богъ нашь Исусъ Христосъ, иже прииде на землю, родися отъ пречистыя ти утробы, и бысть богъ и человЂкъ, и страсть, и смерть приятъ, яко же изволи, тако и бысть, и отъ гроба въскресъ, и царьство адово испровергъ, и на небеса къ отцю възыде, и раздруши всю неприязнину силу. И тако раздруши нынЂ измаилтескыя языкы, разсыпли и расточи, яко прахъ отъ гумна вЂтру, молитвами пречистыя ти матере, и възвесели новыя люди избранное стадо, гнЂвъ свой устави, избавление и милость подати, да и еще прибудеть, твоею храними милостью, вседръжйтелю господи, да не ркуть языци, гдЂ есть богъ их, но услыши и приими молитву всЂхъ молящих ти ся, иного бо упованиа и помощи не имамъ раз†тебе.

И мое же худое грЂшнаго и недостойнаго раба твоего Ефрема моление умиленое, господи ИсусЂ ХристЂ, приими и помилуй, и не отлучи мене лика преподобныхъ. Аще ти много съгрЂшихъ и тя прогнЂвахъ паче всЂхъ, но не вЂмъ иного бога раз†тебе, иже словомъ всяческая яко въсхотЂ и быша, ты бо повелЂ и създашася, всяко дыхание хвалить тебе, владыку и господа, сътворшему и създавшему всяческая. Направи же и научи мя, господи, творити волю твою, и посли благодать в помощь рабу твоему, да всегда, тобою съхраняемъ, избавляюся отъ всЂхъ нападений вражьихъ. И подаждь всему граду и рабу твоему руку твоея помощи, всегда ми падающу и лютЂ съгрЂшающу, и не повели взяти, о владыко, отъ мене душа моея непокаянны отъ тЂла грЂшна, но малое покаяние мое приими, яко блуднаго сына и блудницю, и разбойника, и въскреси мя, и оживи, въ мнозЂхъ грЂсЂхъ суща, молитвами святыя и пречистыя ти матере дЂвы и всЂхъ небесныхъ силъ, и всЂхъ отъ вЂка святыхъ, послужившихъ и много потружьшихся по тобЂ.

Иже и нынЂ преподобнаго и блаженнаго Аврамиа успениа память празднуемъ и радующеся ликоствуемъ. Радуйся граде твердъ, набдимъ и хранимъ десницею бога вседръжителя! Радуйся пречистая дЂво, мати божия, иже градъ Смоленескъ всегда свЂтло радуется о тебЂ, хвалится тобою, избавляемъ отъ всякыя бЂды! Радуйся, граде Смоленескъ, отъ всЂхъ находящихъ золъ избавляемъ молитвами пресвятыя богородица и всЂхъ небесныхъ силъ, и всЂхъ святыхъ его! Радуйтеся апостоли и пророци, мученици, и святители, преподобнии, праведнии и вси святии въ день и в память святаго успениа преподобнаго Авраамиа! Радуйтеся пастуси и наставници Христова стада, патриарси, епископи, архимандрити, игумени, иереи, и дьякони, и весь черноризьческый чинъ, и честьныхъ черноризець, и преставльшихся о ХристЂ, и еже и еще о бозЂ и о господи живущеи въ христоименитой вЂрЂ, свЂтло радуйтеся ликоствующе въ память успЂниа преподобнаго Авраамиа! Радуйтеся, о христолюбимии и богохранимии цари и князи, о судьи, богатии и славнии, и нищии о бозЂ, уже преставльшиися о ХристЂ и еще о господЂ здравьствующе, и всякъ, реку, възрастъ мужескъ и женескъ, уноша и старци, въ честное успЂние богоноснаго отца Авраамиа! Радуйтеся о господи множество вездЂ нищии, убозии, слЂпии же, и хромии, трудоватии и вси просители, не имуть же гдЂ главы подъклонити, иже претерпЂша гладъ, наготу, зиму, иже претерпЂша, рцЂмъ, многыя сугубыя напасти и скорби и на мори, и на суши, озлоблении и прогнани, и разграблени бес правды отъ велможь и отъ судьй неправедьныхъ, иже си вся приаша и претерпЂша с похвалениемъ и благодарениемъ о ХристЂ ИсусЂ господЂ нашемъ! И нынЂ радуйтеся и вы, отшедшии и преставльшеися отъ сего свЂта, и пакы и еще живущеи съ трьпЂниемъ о бозЂ, веселитеся и радуйтеся, и ликоствуйте въ святое успение богоноснаго отца Авраамиа! Радуйтеся, граде Сионъ и ЕрусалимЂ, и Христова господа нашего Исуса Христа церкви, ты мати господи всЂмъ церквамъ, в нем же господь волное распятие приятъ и претерпЂ крестъ и смерть, и въскресе за наше спасение и избавление! Радуйтеся святая и честная сущая вся мЂста окрестъ Иерусалима и преподобныхъ пустыня! Се бо суть святыхъ домове, и в нихъ добрЂ поживше, нынЂ веселятся о господЂ. Радуйтеся по всему миру церквы Христовы и домове святыхъ, иже отъ всЂхъ святитель и игуменъ, и ерЂй, и дияконъ, и черноризець, и отъ всЂхъ благовЂрныхъ и христолюбивыхъ христианъ, иже молитвы и молениа, и приношениа приносяще на святый жрътвеникъ за оставление грЂховъ Новаго завЂта. И да презрить вся съдержай владыка господь Саваофъ, и прииметь, и посЂтить яко благъ и всЂхъ иерЂй, молящихся и приношение приносящихъ ему, и стоящихъ съ страхомъ, и с великымъ вниманиемъ послушающихъ святаго Еуангелиа, и святыхъ всЂхъ учениа сладкаго, и всЂхъ любовь и смЂрение имуще, не въздающе зла и противу злу, тружающеся в долзЂмъ дЂлЂ день паче отъ дне и злыхъ всЂхъ отбЂгающе, а къ добродЂтели правымъ дЂломъ и трудомъ понужающеся, радующеся и веселящеся о господи боже помощи по милости его, и дасть благостыню свою и благодать, избавление отъ всЂхъ золъ и бесконечнаго мучение избавит ны. То бо есть благый и великый даръ милости его — входъ въ бесконечное царство господа бога нашего Исуса Христа съ всЂми избранными его, послушающихъ и творящихъ волю его. ТЂм же поимъ и молимся славимому отъ всЂхъ небесныхъ силъ и отъ человЂкъ, яко въ вЂкы милость его на всЂхъ, творящихъ волю его, яко тому слава и честь, и дръжава, и покланяние отцю и сыну и святому духу и нынЂ и присно и в вЂкы вЂкомъ. Аминь.

* * *

По изд.: Кніга жыцій і хаджэнняў. Уклад. А.А.Мельнікаў. Мн., 1994. || Там перепечатка с изд.: Редков Н. Преподобный Авраамий Смоленский и его Житие, составленное его учеником Ефремом. Смоленск, 1909.

Месяца августа в 21 день. Житие и терпение преподобнаго отца нашего Авраамия архимандрита, просветившаго в терпении мнозе и новаго града во святых Смоленскаго.

О пресвятый Царю Отче и Сыне и Святый Душе, Слово Божие, искони сый во веки, сотворивый небо и землю, видимая же и невидимая, от небытие нас в бытие приведый, и не восхоте нас презрети во мнозей прелести мира сего, но посла на избавление наше Сын Свой единочадный. Глаголет бо пророком Дух Святый: "Не ходатай, ни ангел осияны, но сам Сый преклонь небеса и сниде, и родися от святыя приснодевы Марии без семени от Святаго Духа, и пожив, яко человек, на земли, и страсть претерпев от твари Своея, и смерть вкуси на кресте, безстрастен сый и безсмертный божеством, и во гробе положен, и воскресе в третий день, явися учеником своим и уверив я, и многа знамения показа и чюдеса пред ученики, и взыде на небо ко Отцу и седе одесную, и посла Святый Свой Дух на святыя апостолы и теми вся языки просвети и научи истинне веровати и славити Бога, и се заповедая глаголаше: Се Аз с вами есмь по вся дни по скончания века". И се, прежде написания молю Ти ся: "Господи Иисусе Христе, Сыне Божий, молитвами пресвятыя и пречистыя девы Матере и всех небесных сил, и всех святых молбами даждь ми разум, просвещен Христовою благодатию, подаждь мне, худому и грешному паче всех светлый подвиг житие и терпение начати, еже о житии преподобнаго Авраамия, бывшаго игумена монастыря сего Святыя владычицы нашея Богородица, егоже в день успения ныне празнующи памят чтем". Се же, братие, воспоминающу ми житие преподобнаго и не сущу написану, печалию по вся дни держим бых и моляся Богу: "Господи, сподоби мя вси по ряду писати о житии богоноснаго отца нашего Авраамия, да и по нас сущии черноризъци, приемше наказание и почитающе, тии видят доблести, восхвалят Бога, и угодника Его прославляющи, и на прочий подвиг укрепятся, паче же во стране сей, яко таков муж явися угодник Божий, о сем бо рече Господь пророком, яко "от утробы матерня возвах тя". Хотящу же ми начати и исповедати, прежде молю, глаголя сице: "Благослови, Владыко мой Вседержителю, благих подателю, Отче Господа нашего Иисуса Христа, прийди на помощь мне и просвети сердце мое на разумение заповедей Твоих, отверзи устне мои на исповедание устень Твоих и чудес и на похваление святаго Твоего угодника, и да прославится имя Твое, яко Ты еси помощьник и всем уповающим на Тя. Во веки, аминь".

Бе бо сей блаженный Авраамий от верну родителю рождъся; беста и та в законе Господни добре живяща в законе благочестно. Бе же отец его всеми чтим и любим, от князь честь приемля: бе бо воистинну от всех опознан, яко и правдою украшен, и мъногими заступленми в бедах помогая, милостив и тих ко всем, к молитве и к церкви прилежа. Такоже и мати его всем благочестием украшена. Та же не яко неплоды беста (двеманадесяте дщерем от нея рождшимася), и не бе има отрочати, и се бысть има от Божия строения.

Многим желанием моляста Бога подати отроча, многи же обеты и милостыня церквам и монастырем дающи. И послушает ю Бог, и даст има отроча. Еще бо ему носиму во утробе матерни, обави и Христова благодать, и возван бысть святыми, якоже прежде Самоила Анне подаст. Бысть бо она жена некая дева и блаженная черноризица от Божия промысла; некогда недели сущи, бысть ей у заутрени и године опочивающи. И удариша в двери и возваша ю, глаголюще: «Скоро востани и пойди; яко отроча Мария роди, имаши ты его крещати». И се бысть глаголаше ми, яко наяве. И вшедши ми в дом к матери его, яко отроча мыяху; мнози же святители свещеннолепно, яко крещением благодати освящающи, и некая жена велми пресветла сияющи предстоящи, одежду имущи белу, яко подобие снегу белеющу, держащи, и слугам вопрошающим: «Кому, Госпоже, дати отроча сие?» И повеле им к себе принести; она же светлою оною ризою, яко светом, одеже и, и даст и матери его. И она рече, яко в той часотроча оживе в моей утробе. И совершившим же ся днем рождению, родиста блаженнаго детища, таче во осмый день принесоста и к святителю Божию, якоже обычай есть християном имя детищу нарещи. Презвитер же, видев детище сердечными очима и благодать Божию прозряше о нем, яко хощет Богу измлада вдатися. Таче минуша 40 дней детищу, крещением освятиша и. Отроча же растяст и кормим родителема своима, и благодать Божия бе с ним, и Дух Божий измлада в он вселися. И егда же бе отрочатем Христовою благодатию в возраст смысла пришедшу, родители же его даста книгам учити; не бо унываше отрача [так в публикации А.А.Мельникова], яко и прочия дети, но скорым прилежанием извыче; сему же на игры со инеми не исходити, но на божественное и на церковное пение и почитание прежде инех притекая, яко о сем родителема радоватися, а инем чюдитися таковому детища разуму. Господня бо бе благодать на нем, просвещающи разум его и наставляющи на путь заповедей Христовых.

Егда же в болший возраст прииде, всею телесною красотою и добротою, яко свет, сияше; родитела же его к браку понуждающим, но той сам не восхоте, но паче: поучив ею и наказав презрети и возненавидети житейскую славу и прелесть мира сего и восприяти монашеский чин. Тема же отшедшима жития сего к Богу; он же повелику обрадовався, и даст Богу славу, тако изволившему. Родителя же яже остависта богатство, убогим раздаде, вдовицам, и сиротам, и черноризцем все, бояся и како бы без печали всех земных отъити и наставити мысль свою к Богу и утвержаяся и учася Господню словеси, глаголющему: «Аще кто не возмет креста своего и не пойдет вослед Мене, несть Мне достоин». Богодухновенныя же книги и святых житиа почитая, и како бы их жития и труды и подвиги восприяти, изменися светлых риз и в худыя облечеся, и хожъдаше, яко един от нищих, на юродство ся преложи и разсмотряя,и прося и моляся Богу, како бы спастися и в кое время прийти. И утаився всех, Богу наставляющу; отшед от града дале пяти поприщ, и острижеся, якоже мнози ведят святыя Богородицы монастырь к востоку. Селище нарицает е. И бысть оттоле по благодати Христове болий на подвиг и на вся труды подвизаяся и мыслию воспоминая святаго града Иерусалима и гроб Господень и вся честныя места, яко избавитель Бог и Спас всего мира идеже страсть прият нашего ради спасения, и вся честная места и преподобных отец пустыня, идеже суть подвиг и труд совершивше: дивнаго начальника всем и возсиявша равна ангелом великаго мню Антония, бывшаго крепка храбра и победившаго силою крестною духи неприязненныя, Илариона, бывшаго ученика его и по нем светлаго в постницех чюдотворца Евфимиа, и иже по них Савву и Феодосия архимандрита, и старейша всех наставника черноризцем сущим окрестИерусалима. Изо всех любя часто почитати поучение преподобнаго Ефрема и великаго вселенскаго учителя Иоанна Златоустаго и Феодосия Печерскаго, бывшаго архимандрита всеа Росии, и вся святых богодухновенных книг, жития и и словеса проходя и внимаше, почиташе день и нощь, безпрестанно Богу моляся и просвещая свою душу и помысл, и кормим словом Божиим. Яко делолюбивая пчела вся цветы облетает и сладкую себе пищу приносящи и готовящи, тако и вся от всех избирая и списая ово своею рукою, ово многими писцы; да якоже пастух добрый, всеведый паствы иногда на коей пажити ему пасти стадо, а неяко невежа, не ведый паствы, да овогда гладом, иногда по горам разыйдутся блудяще, а инии от зверей снедени будут. Тако всем есть невежам, взимающим сан священства, такоже и корабленик и хитрии кормницы ведуща путь и пристанища их, милости ожидающе от Бога и подобна ветра, а не противу ветру и бури, но з Божиею помощию како достигънути иже нареченнаго града без пакости и потопления. Аще ли во град далний хотяще пойти, то ведущих просим, егда суть пути различнии и места сущих разбойник, и того всего боимся и молим Бога, дабы без всякое беды дойти.

Но на прежде реченная возвратимся, отнележе найдохом - о дарех слова Божия, данное от Бога преподобномуАвраамию. Якоже кто хотя наречен быти воевода от царя,то не вся ли збирает храбрыя оружники и тако стати крепко урядившеся на противныя, с Божиею помощию наступити и победити; тако и сей таковому дару и труду божественных писаний прилежа и почитая, и како бы корабль свой своея души Божиею помощию соблюсти многих волн и бурь, реку же, напастей от бесов и от человек и с упованием не погруженну от сих бед онаго пристанища спасеннаго дойти и в тишину небеснаго Иерусалима Бога нашего прийти. Пришет [так в публикации А.А.Мельникова] бо: «Смерть искушения и брань,— по святым книгам,— наше житие се есть, яко неудобь без напасти преити никому же». Аще бо сам владыко Спас Господь и творец всем, и создавый вся, и пришед на спасение наше от пречистыя девы Богородицы, толику страсть прият от своея твари кроме быв всякаго греха, и всех святых, колико не то же ли претерпеша и тако получиша Царствие Небесное, егоже получити и мы молимся.

И пребысть блаженный Авраамий в прежде реченном монастыре во труде и во бдении и во алкании день и нощь,якоже и самому игумену зрящу добраго жития его, радоватися и всей братии славити Бога, и мнозем от мира притекати от него утешения приимати от святых книг. И бе во всем повинуяся игумену и послушание имея ко всей братии, и любовь и смирение имый Бога ради, покаряяся всем.Искусив же его игумен, яко во всем повинуется ему и послушает; бе бо и сам игумен хитр божественным книгам и вся сведый проходя, якоже мнози сведят, и никтоже смея пред ним от книг глаголати, и принуди же блаженнаго Авраамия прияти священный сан. И поставлену ему бывшу диаконом и потом иереом при княжении великаго и христолюбиваго князя Мстислава Смоленскаго. И приим святый блаженный священный сан, большее смирение прият, яко такову благодать Христос ему дарова. Божественную же Литургию со всяцем тщанием, иже за всего мира Христос повеле приносити, и не единаго дне не остави, якоже мнози ведят его бывша, и до самыя смерти и не оставившаго церковнаго правила и Божественныя Литургии и своего подвига; нищету же и наготу, и укорение, яже от диавола, и тугу и искушение от игумена и от всей братии кто может исповедати, якоже ему самому глаголати.

Бых пять лет искушение терпя, поносим, безчествуем, яко злодей: якоже не терпя его и виде себе диявол побежденна от святаго, и воздвиже нань крамолу своими советы, хотя и оттоле прогнати, якоже и бысть. Виде бо диявол, яко мнози от града приходят и учением духовным его множатся и от многих грехов на покаяние притекают. Аще ли и сице речем Богу хотящу, яко несть лепо светилнику во тме сияти и укрытися граду выше горы сущу. Пишет бо о великом светиле и учители всего мира — о Златоустем Иоанне, яко егда отиде в пустыню и пребысть неколико время в пустыни, яко многим трудом и воздержанием и алканием прият вред и нужду от тела, якоже бысть се ему от Божия промысла, да не учитель далече града будет; оттоле вниде во град, уча и наказуя всех страху Господню. Сице же и сему бысть. От диавола научения бо нецыи от иерей, друзии же от черноризец, како бы нань востати, овии же от града потязати и укорити хотяще, друзии же спиру творяще, яко «ничтоже сведуще противу нас» — глаголаху, и тако посрамлени, со студом отхождаху, и паки не престаяху крамолы нань воздвизающе, во граде и везде глаголюще: «Се уже весь град к себе обратил еси». Есть бо, о братия, о сем приложити слово на утешение вам: тако бе благодатию Христовою утешая приходящих и пленяя их душа и смысл, дабы возможно, и не отходящу быти, ягоже и самому игумену не терпети, многия к нему видя протекающия, и хотя того его отлучити и глаголаше: «Аз за тя отвещаю Богу; ты же престани уча». И много озлобления нань возложи. И оттоле вниде во град и пребысть во едином монастыри у Честнаго Креста, и ту начаша боле приходити, и учение его множайше быти, а враг сетоваше, а Господь раба Своего прославляше и соблюдаше на всяко время, благодать и силу подавая рабу Своему. И пребысть мало время и от многих приемля утешение: подаваху ему на потребу и лище потребы, и потом скоро раздаваше вдовицам и нищим, а сам, еже потребу себе приимаше, украси же церковь иконами и завесами и свещами. И мнози начаша от града приходити послушати церковнаго пения и почитания божественных книг, бе бо блаженный хитр почитати, и даст бо ся ему благодать Божия не токмо почитати, но и протолковати, якоже мнозем несведущим от него сказана и всем разумети. И слышащим к сему из уст и памятию сказая, яко ничтоже ся его утаит божественных писаний, яко николи же умолкнуша уста его ко всем: к малым и к великим, рабом же и свободным и рукоделным, тем же ово на молитву, ово на церковное пение, ово на утешение притекающим. Яко и в нощь мало сна приимающему на коленное поклонение, слезы многия от очию излияв, и в перси бияся и кричанием Богу припадая помиловати люди Своя, отвратили [так в публикации А.А.Мельникова] гнев Свой и послати милость Свою и належащих бед избавити ны и мир и тишину подати молитвами пресвятыя девы Богородица и всех святых. Написа же две иконе: едину — Страшный суд втораго пришествия, а другую — испытание воздушных мытарьств, ихже всем несть избежати, якоже великий Иоанн Златоустый учит, лют день поминает, и сам Господь и вси святии Его се проповедают, егоже избежати негде, ни скрытися, и река огненная пред судищем течет, и книги разгибаются, и судия седе, и дела открывают всех; тогда слава и честь и радость всем праведным, грешным же — мука вечная, еяже и сам сатана боится и трепещет. Да аще страшно есть, братие, слышати, страшнее будет самому уведети.

Се же оставльше, на се паки обратимся, еже о блаженнем Авраамии: и сего убо не престаше страшнаго поминания суда испытания бояся, и не престая прилежно Бога моля и в нощи и во дни, и ко всем приходящим онаго страшнаго дне не престая же о том глаголя и почитая великого оного светълаго учителя Вселенныя Иоанна Златоустаго и преподобнаго Ефрема и всех святых Святаго Духа глаголаннаго, ими себе внимая и всем проповедуя. И бе блаженный со воздержанием от многаго пития; пьянства же отнюдь ненавидя, ризы же по смирению нося, драгих велми бегая и смирение присно имея, на трапезы и на пиры отнюдь не исходя многих ради зазираний, якоже бывают места же избирающих и инех ради многих, яже бывают от многаго ради пиянства и беды, и того ради всего убегаше. Образ же блаженнаго и тело удручено бяше, и кости его и составы, яко мощи, исчести, и светлость лица его бледа имущи от великаго труда и воздержания и бдениа, от мног глагол, яже труждашеся, поя и почитая и молитву принося к Богу. И божественному егда приступаше жертвеннику, на божественное приношение от Господа преданную апостолам на вечери и апостоли нам онаго завета во оставление грехов, со благобоязнством и со вниманием; запрещаше же в церкви не глаголати, паче же на литургии, и заповеда и уча всю имети мысль с душею тогда к Богу; стройно же по чину лепо егда устрояшеся во священнический сан. Образ же и подобие на великого Василия: черну браду таку имея и плешиву разве имея главу. Но не зазрите. братие, моей грубости, не лжа бо сие глаголю или какою хитростию или мудростию, но многих ради, иже его не видеша и не слышаша, и воспоминаю Господа, глаголюща: «Рабе ленивый и лукавый, подобаше бо ти дати сребро мое купцем, да аз бых на них взял с лихвою»; тем боюсь Его осуждения. Сия написую, да сего послушавше, прославим Бога, давъшаго сию благодать и помощь граду Смоленску — блаженнаго Авраамия. Хотящу ми еще глаголати: «Помозите ми в молитвах ваших, да ми подаст Господь и конец совершити хотящим почитати и поревновати житию преподобнаго или преписати и велику от Бога милость прияти зде и в будущий страшный день суда Христова». Но на прежде реченная возвратимся, отнюдуже пойдохом.

Видя же себе сатана побежденна Христовою силою от святаго, яко являшеся ему овогда в нощи, овогда во дни, устрашая и претя и яко огнь устрашаяй в нощи, яко мнозим еще не спящим с ним, да овогда стужая, ово являяся во мнозех мечтаниих, яко и до стропа, и паки яко лев нападая, яко зверие лютии устрашающе, другое яко воини на падающе и секуще, иногда со одра его смещуще, а егда от сна востааше блаженный, по малу сна вкусив от злых окаянных бесовских мечтов, и в день боле ему о сем стужающе, тем же ово собою, ово в жены безъстудныя преображающеся. То же яко о великом Антонии пишется: видя Господь силу неприязненну и его злобу на ны, не попусти всей воли его, но якоже сам весть, тако и попущает по силе при имати его брань, якоже Господь во Евангелии рече, яко ни на свиниях имать власти без Божия повеления, да искусни Божии раби явятся. К сему же учит Златоустый, глаголя: «Господи, аще попустиши единаго врага, то ни весь мир ему не удолеет; то како аз возмогу, кал и брение». Укрепивый же Антония и явлься ему дерзати повелев: «Не бойся: Аз помогу». Той же и сему блаженному Свою благодать и силу подаваше и избавляше, и сими блаженнаго всеми искусив сатана и не одолев, Богу помагающу. И ту крамолу нань воздвиже, якоже и при о Господи бысть: вшед сатана в сердца июдеов, и совет сотвориша нань и много поругавшеся и смерти предаша Господа славы; сице же на сего бысть, якоже бо сатана от прежнего монастыря отгна, сице и ныне сотвори. Не могий окаянный терпети бывающия ради благодати и помощь верным и христолюбивым християном и от всех побеждаем силою Христовою. Но яко есть пасущих душа приимати беды. И вшед сатана в сердца бесчинных, воздвиже нань. И начаша ови клеветати ко епископу, инии же хулити и досаждати, овии еретика нарицаху и, а инии глаголаху нань: «Глубинныя книги почитает», инии: «К женам прикладающе»; попове же зияюще и глаголюще: «Уже наша дети вся обратил еси», друзии же пророком нарицающе и? и многа нань вещания глаголюще, ихже блаженный чюжь. Истинною тако реку: никтоже аще бы не глаголя на блаженнаго Авраамия во граде, но диявол о сем радовашася, а блаженный все, радуяся, терпяше о Господе. Собраше же ся вси от мала и до велика весь град нань, инии глаголют заточити, а инии — к снету пригвоздити и зажещи, а друзии — побити и проведше сквозе град. Всем же собравшимся на двор владычнь: игуменом же и попом и чернцем, князем и боляром, диякони и вси церковницы: внегда послаша по блаженнаго уже всем собравшимся. Посланные же слуги емше, яко злодея влачаху; овии ругахуся ему и бесчинная словеса кидаху, и весь град, и по торгу, и по улицам везде полно народа: мужи же, глаголю, и жены, и дети, и бе позор тяжек видети. Блаженный же бе, яко птица, ят рукама, не уме что глаголати или отвещати, но едино упование имея к Богу, к Нему моляся от таковыя избавитися скорби и печали и в себе воспоминая страсть Господа нашего Иисуса Христа, яко вся сия претерпе нашего ради спасения, и за них моляся: «Господи, не постави им греха сего и не попусти на раба Твоего предатися в руце их, но укроти и запрети, якоже пред ученики на мори ветру повеле умолкнути», якоже и бысть. Князю же и властелем умягчи Бог сердце, а игуменом же и ереом аще бы мощно жива его пожрети.

Ведому же ему на снем, явися Господь в то време преподобному Луце Прусину в церкви Честнаго архангела Михаила: стоящу ему на молитве в 9 час, и бысть ему глас, глаголющ яко: «Се возводят на блаженнаго Моего угодника на снем со двема ученикома, истязати хотят; ты же о нем никако же соблазнися». И глаголаше блаженный Лука на снимающихся на блаженнаго Авраамия и на уничижающих его: «Много бо без правды хуляще и уничижают, но да быша грехи его на мне были. И вы слышасте, яко хотеша сотворити прежде сего, не имуще страха Божия, тации же безумнии, и епископ, како хотеша без правды убити и, иже и еще порок зол и хула и клятва зла и гнев Божий за тридесят лет пребысть и еще пребудет, аще ся того не покаете». Понеже возвратимся о немже начах глаголати.

Приведену бывшу блаженному на суд, ничтоже нань не обретающим, но безчинну попом, яко волом рыкающим, такожде и игуменом; князю же и вельможам не обретающим такия вины, но изыскавше все, несть неправды никоеяже, но все лжут. Тогда яко единеми усты: «Не повинны да будем,— владыко рекуще ко всем,— еже таку нань крамолу воздвигнули есте, и не повинни есми еже нань глаголете или что совещаете, како либо беззаконное убийство». И глаголюще: «Благослови, отче, и прости, Авраамие». И тако отидоша восвояси. Видевше же сия тако отидоша, яко несть им конца в чем осудити и?, и реша от епископа на се уготованным крепко стрещи и? и блюсти, и ина два от ученик его, иже преподобному служаща добре. Не [так в публикации А.А.Мельникова] утрея же собравшимся игумени и ереи, и вины яже преже глаголаху укоривше озлобивше возложиша нань. И от того времени паки вниде в монастырь, идеже бе преже остриглся блаженный, яко не приемшу ему никоего зла. Се же от сего времени много зла пребысть елико блаженным научени — все тии обратишася на своя дела злых грех. Но слава Богу, терпящему сих всех.

И еще тогда блаженному Лазарю, иереом сущу и по Игнатии епископу бывшу; истинною рещи, яко поборник и пастух Христовы церкве словесных овец. Сей бо бяше Бога ради оставил епископию свою и за многое обидение многих церквей, иже обидят и властели и отимающе чужая без правды и обидяще вдовицы и сироты. Се бо виде и слыша, яко вся без правды яже на святаго и блаженнаго Авраамиа ону крамолу воздвигнули; Богу бо о сем возложиша, сей пришед, глагола к епископу Игнатию: «Великой есть быти епитемии граду сему, аще ся добре не опечалиши». Якоже и бысть.

Блаженный Игнатий, сего послушав, скоро посла по всем игуменом и попом, заповедая и запрещая всем от вся кого речение зла престати, яже на блаженнаго Авраамия: «Се бо,послушах вас, на ся от Бога восприях во веки епитемию. И вы, чада, покайтеся, а сами весте, что прияша от Бога воставше и на великаго Иоанна Златоустаго; аще же не покаетеся, то же и вы приимете.» Сего же ради блаженный имя нарекл себе своего святаго, подражая, якоже бо Иоанн, подражая, много пострадал от оноя веси и за них моляся Богу, обращая вся к Богу, и спасе я. Блаженный же терпя их запрещение, якоже никомуже не приходити к нему, мнози же мечницы на всех путех стрежаху, а нецыи разграблени быша.

Богу же хотящу всем спастися, овогда же человеколюбие Свое и милость являет, овогда же казня беды дая: глад и смерть, бездождие, сушу, туча тяжкия, поганых нахождения, град пленение — вся, яже на ны от Бога приходят, и теми обращая и приводя к Себе. Да не бо есмы без греха, а терпяще сих, разсудим, помянем, колико злых, яже сотворихом и забытию предахом, в нощи же и во дне согрешающе. Овии судят и хулят свята иерея и черноризца, а сами, яко без греха суща. Слышасте ли Господа, глаголюща: «Святителя Моя и черноризца честно имейте и не осуждайте их, да не сами приимете горкий суд». Да не забудете Господа заповедующа, рече бо Господь: «За всяк празден глагол воздати есть слово в день судный». Павел апостол, вселенныя учитель, глаголет: «Что осуждаете чужаго раба: своему господину или стоит, или падает или востает; силен же Господь воставити и». И паки их ради приходит на гнев Божий на сыны непокоривыя; тем же и мы кождо себе: кождо за ся воздати слово имат в день судный.

Достойно есть иже зде помянути слово, яже от жития преподобнаго Савы и о патриарсе Иерусалимстем Илии, егоже Анастасий царь без правды повеле изгнати от престола и иного в него места возведе. Якоже се услышаша во Ерусалиме граждане, яко изгнан бысть патриарх, и зело порадовашеся ему и яко за то прийде на ня гнев Божий и бысть пять лет глад, да накажутся не радоватися о зле ни о коем же; якоже прийти ко оному преподобному Саве и глаголати: уже суть братия не ядше всю неделю, да уже есть нам не ударити в трапезе в било. Преподобный же Сава утешая, глаголаше, яко не имат Бог презрети раб Своих. По глаголу же преподобнаго бысть: некто христолюбец тридесят велбуд имея, яже ко блаженному посла в лавру, всякаго брашна наполнив изобилия. Якоже призва иконома Сава и глагола к нему: «Есть ли ударити в било?» Иконом же повелику похули себе. А иже о цари Анастасии рекохом, иже патриарха Илию с престола отгна: и? гнев Божий за то постиже и яко сказуют смерть его: яви бо ся облак и молния разве о полате царево; тако гоним есмь, убиен гневом.

Достойно же есть помянути зде о великом светиле всего мира, яже на святаго Иоанна Златоустаго воставше, злии погнаша. И явистася ему великая апостола Петр и Павел глаголюще: «Дерзай, страстотерпче Божий, Господь с тобою, мир ти буди: мужайся и крепися, прияти бо имаши воздаяние — Небесное Царство и венец светел от Бога. А воставши на тя лютою смертию от Бога казнь приимут, яже и на скоро прияти имут зде и в будущий суд». Скончавшу же ся блаженному, сбыстся проповедь святую апостолу на крамолствующих и на изгнавших святаго, да овии от епископ напрасную смерть приимаху, инем же прыщи синия по ногам бываху проседающеся, иному же напрасен огнь свыше сшед, руце и нозе усуши, иному же нога объятрися и нача гнити, и претираеме ей, яко от тоя и другой тожде вред прияти, и в три лета едва душу испусти; иному же яко затыка язык во устех бяше, и на дску вписав, глаголаше свой грех, яко на святаго Иоанна Златоустаго хулу глаголах. Евдоксию же лютый недуг порази, лоном бо ея кровь идяше, и по том бысть смрад и черви породи, и тако горкою смертию живот свой зле сконча, ибо видети гнев Божий напрасно находяй и многим мукам и смерьтем предая тяжко.

Но на преже глаголанное возвратимся еже о блаженном Авраамии помянем. Скоро на сих бысть, да овии от игумен, инии же от попов напрасную смерть приимаху, яко ведуще бывшии в сонме на блаженнаго; тужаху и припадаху ему на ногу, прощение просяще, а не бывшии в сонме радовахуся. Пишет бо в Златых Чепех всея Вселенныя святых отец, яко быст некий отец от преподобных, многим ползу творя словом и житием; нецыи же от действа диявола завидевше и оклеветаше, многи отсекоша от него и якоже к нему ползы лишиша, последи же уразумевша дияволю лесть и покаяшеся к нему и прощение от него прияша: последи же овии возбеснеша, овии в различныя беды впадоша греха ради. Рече бо Спас: «Смущаяй вас, той приимет суд кто любо буди». И не есть подобно помянути повесть некоего отца духовна к сыну духовну: корабль есмы мы, кормник же — Бог всего мира, направляя и спасая своими присными угодными рабы, реку же: пророки и апостолы, святителя и вся учителя Божия, даже и до скончания веку сему; да аще мы на ся возмем инех осуждати, изгоняти в правду или без правды, то уже восхитили есмы от бога и отдали есмы оному противному, рекшему дияволу, Божий корабль. Ныне же не вемы ся, в чем есмы, понеже взяла ны есть противная буря, и егда ны принесет ко истоплению, тогда ся помянем безуспешно, яко никтоже нас о своих гресех печется и плачет, но ины осуждаем и хулим. Якоже рече Господь: «Человецы взяша суд Мой; уже бо их осудиша, Аз им не сужду, того ради да не осуждении будете от Бога». Аще бо кто приимет благодать от Бога и дар поучения, то ни весь мир таковаго может оскорбити, имат бо надо всеми Бога помощьника. Якоже рече Господь: «Аз есмь с вами и никтоже на ны».

Се же оставльша, на прежнее возвратимся. Бывшу же бездождию велику во граде, яко изсыхати земли и садом и нивам и всему плоду земному, яко незаконно бысть время; всем тужащим и молящим Бога, и сам епископ блаженный Игнатий с честным крилосом и з богобоязнивыми игумены и иереи и дияконы и черноризцы и со всем градом, с мужы и жены и весь младый возраст: вкупе весь град окрест ходяще с честным крестом и со иконою Господа, и с честными мощми святых и с великим умилением и со слезами помиловати люди Своя и послати милость Свою на землю и отвратити гнев Свой: «Пусти, Господи, дождь и одожди лице земли, молим Ти ся. Господи святый». И скончавшим отпуст, крестом и святых мощми воду освятивше и отидоша кождо во свояси. И не бысть дождя на землю, и быша в печали велице. Се же бысть от Божия промышления. И хотя Бог блаженнаго Авраамия объявити, некоему возложи Бог на сердце сущу иерею, яко сошед помяну христолюбивому епископу И[гн]атию еже о блаженнем Авраамии, сице глаголя: «Вси молихомся, не послуша нас Бог, кая вина такова яже на преподобнаго Авраамия, яко лишен бысть Божественныя Литургии. Егда и того ради бысть от Бога казнь сия». Тогда блаженный Игнатий вскоре посла по блаженнаго Авраамия и призва испытав, яко лжа и оглаголание по зависти и злобе дияволе бысть, и глаголя: «Прости и благослови, честный отче, за неведение мое се ти сотворих; и весь град благослови и прости послушавших лживых клеветник и оглагольник». И благослови его паки пречистую и честную Литургию совершати и моли Бога о граде и о всех людех, да помилует Господь и подаст богатно дождь Свой на землю. И глагола блаженный к святителю: «Кто есмь аз, грешный. Да сице повелеваеши выше силы моея. Но,— глагола,— воля Божия да будет о всех нас. Ты прежде о сих помолися, о святителю честный, о своем ти богопорученном ти избранном святом стаде словесных овец». Отшедшу же блаженному и молящуся Богу и глаголющу: «Услыши, Боже, и спаси, Владыко Вседержателю, молитвами святителя Твоего и всех иерей Твоих и всех людей Твоих, и отврати гнев Свой от раб Твоих и помилуй град сей и вся люди Твоя, и приими, Милостиве, всех воздыхание и со слезами молящих Ти ся, и пусти и одожди, напой лице земли, человеки и скоты возвесели; Господи, услыши и помилуй». Еще преподобному не дошедшу своея келлии, одожди Бог землю дожьчем, яко славити Бога всем и глаголати: «Слава Тебе, Господи, яко скоро услыша Бог раба Твоего». И бысть многа радость во граде, и оттоле начаша притекати во граде вси и глаголати, яко помилова Бог, избави ны от всех бед твоими, отче, молитвами. И отселе боле просветився по благодати Христове.

Лепо же есть помянути и о житии преподобнаго отца Феодосия Печерскаго всея Росии; хотя Бог веру раба своего явити и от того места на другое преселити, и пресветлейшу и пространнейшу церковь возгради, и уже умножившимся братии, и показа Бог чудо в нощи: яко сказуют рекуще, бысть яко дуга во образ от верха церковнаго, а другий холм конец яе [так в публикации А.А.Мельникова], и преподобнаго отца Феодосия идуща со иконою пресвятыя Богородица и братия вслед идуща и поюща, якоже и бысть потом.

Такоже и ныне помянем о преподобном Авраамии и о молитве пресвятыя Богородица и братии вслед идуща и поюща, якоже и бысть потом, и хотящим показати место, на немже блаженный хощет жити и инем мнозем иже с ним спастися. Преподобный же и богочестивый Игнатий мысляше создати церковь каменну во имя святаго Игнатия в память себе и есть вне града таково суща место близ равно угодно на поставление церкве и все могуще восприяти ряд монастырьский; искупи ограды овощныя окрест его и постави церквицу во имя святаго Игнатия Богоносца, и потом ту разрушив и на ино место пресели, и основа большу, и нарече во имя святыя владычицы нашея Богородицы положения честныя ризы и пояса. И быша в нем неколико братии, блаженнем питаеми епископом Игнатием. Некоторые же буяве несмыслени, уничижаху, глаголюще: «Аще хощет кто да идет на игумменство, имя нарицающе». Преподобный же епископ ко мнозем глаголаше и благодатию Божию прозря духовныма очима, яко имат Бог прославити место се и молитвами пресвятыя Богородицы, и мнози имут в нем спастися о Христове благодати о Бозе пребывающе, и в нем притекающе христолюбивии людии.

По мнозе же времени Богу о сем промышляющу, стужаше бо в себе блаженный Авраамий, яко далече сущу града приходящим. Такожде блаженный помянув епископ Божиею волею, тогда призва единаго от своего честнаго крилоса — перваго от старейших протопопа именем Георгия, глагола к нему о блаженном Авраамии, помянув, яко далеча ему сущу града, скорбь ему велия, да призовет и? скоро. Блаженный же скоро прииде по повелению епископа и вшед сотвори поклонение, глаголя: «Благослови, владыко святый, раба своего». Епископ же призва блаженнаго Авраамия, утешая, глаголаше: «Како, отче, о Господе пребываеши?» Оному же рекшу: «Ей, владыко святый, истинною молитвами твоими добре». И рече к нему епископ: «Хощу дати тебе благословение, аще приимише е». Отвеща блаженный, глаголаше: «Честно есть благословение, яже но и дар». И глагола к нему епископ: «Се, благословение поручаю ти и даю пресвятыя Богородицы дом; пойди, хваля Бога и славя, и моли о всех».

Блаженный же радовашеся и хваля Бога, такову даровавшего благодать рабу Своему молитва святыа Богородица. И входящу ему во врата монастырская, и свет возсия ему в сердцы от Бога и с радостию просвещая душу его и помысл, якоже се всем поведаше, яже сице: во сне виде лествицу досязающу до небесе и глаголаше, яко есть Господь на сем месте. То же и сему открывашеся, уже бо Господь искусна яви и? и сбытся псалом Давидов: «Возведе человеки на главы наша, проидохом сквозе огнь и воду и изведе ны в покой». Якоже бо царь по многих победах и трудех на болший сан и честь возводит своего воина, да уже и сему Господь Бог сам подает рабу Своему утешение, яко трудившуся и всех сердца обращая Своею благостию, дальним же и ближним, и просвещая всех душа.

И оттоле нача пребывати в первом подвизе, и всем же притекающим с радостию великою, ибо велия благодать Божия на граде, вся просвещающи и веселящи и хранящи и избавляющи, тишину же и мир и всех благих на многа лета подающи и еще не оскудети имат молитвами святыя Богородицы и преподобнаго ради Авраамия и всех святых Его. И оттоле прослави и? Господь болше, занеже зде блаженнаго оскорбивше, обращатися начаша и припадаше на ногу, просяще прощения, иже всеми ненавидим быв; ныне же всеми любим быст, да иже прежде бояхуся прийти, тии убо не боящеся, но радующеся приходяху; не точию граждане едини прихождаху, но с женами и з детми, и от князь и от велмож, работнии же и свободнии притекаху, вси своя грехи к нему исповедающе, и тако отхождаху в домы своя радующеся.

Приим же блаженный дом святыя Богородицы и украси ю, яко невесту красно, якоже и прежде рекохом,— иконами и завесами и свещами, якоже и ныне есть видети всем притекающим ея милости и заступлению в хвалу Богу и угодника его; мнози же хотяху быти черноризцы, но не ту абие пострыгаше, ведый труд и искушение велико от общаго всех врага. И се братии числом 17, сице же блаженный искушаше от Христовы благости, вся бо Господь ему откровенно даяше разумевати; жити хотящим и к нему притекающим тако отвещавая, глаголаше к послушливым и смиренным, повелевая им часто притекати к себе, елико бо их от златолюбия и злобы — тех удаляшеся, сице бо и от своих напастей много и от черноризец приимаше искушения. Да того ради не приимаше скоро, искушаше же сице ведый по книгам, но слыша некоего игумена сице бывша точию 12 числом имяше монахов, два же во искусе, а егда кто хощет от него пострищися, то знаменаше прежде, к коему брату внидет: да аще вхождаше к подвижну брату, то стоя славяше Богу, руце воздев и о нем моляся к Богу, и аще ли к такому, то печален бываше. Но в себе блаженный помышляше, ведый, яко нужно есть ленящимся сий подвиг черноризцем, а подвизающимся рече Господь: «Возмите иго Мое на себе и научитеся от Мене, яко кроток есмь и смирен сердцем, и обрящете покой душам вашим и утешение, ибо ярем Мой благ и бремя Мое легко есть». Всем притекающим к тебе истинным сердцем велику же любовь стяжаста блаженная; епископ же радовашеся, яко таковаго дарова ему Бог свята и блаженна мужа, Авраамий же радовашеся, яко таковаго дарова ему Бог свята и блаженна епископа и паки радовашеся Авраамий, яко таков дар благодати приим от него. Мало же по таковей любви пожив епископ и преставися к Богу, по правде рещи воистинну святу и преподобну и к Богу подвизася, от юности потрудися и до самыя седины великаго священничества. И тако преставися к Богу святитель великий Игнатий града Смоленска, яко же в преставлении его мнози заповедают о нем глаголюще, яко велик свет сниде нань с небесе, яко страх нападе на всех, и тако взыде, радуяся, на небеса, совершив течение о Господе Бозе. И вси вопросим милости от Бога, да помилует ны по милости Своей, яко таковаго святителя дарова граду сему.

Оттоле нача больше подвизатися блаженный Авраамий о таковем разлучении преподобнаго, во смирении мнозе и в плачи от сердца со воздыханием и со стенанием, поминаше бо часто о своем разлучении души от тела блаженный Авраамий, и како истяжут душу пришедшии ангели, и како испытание на воздусе от бесовских мытарев, како есть стати пред Богом и ответ о всем воздати, и в кое место поведут и како и в которое пришествие предстати пред судищем страшнаго Бога, и каков будет от судии ответ, и како огненная река потечет, пожигающи вся, и кто помагая будет, разве покаяние и милостыня и безпрестанныя молитвы и ко всем любы и прочая дела благая, яже обретаются помогающи душа. Мы же сего ни на памети имамы, но ово о сем, а другое о ином станем, не имущи не единого слова отвещати пред Богом.

Пребысть же блаженный в таковем подвизании по вся дни и лета живота своего, о сем бдя и моляся со воздыханием. Многи же научив и наказав пребывати в добром труде, во бдении же и молитве, в терпении же и смирении, в милостыни же и в любви и сице утвердися со слезами многими сих не забывати николиже и глаголаше: «И мене, смиреннаго, не забывайте в молитвах ваших, молящеся владыце Богу и пречистой Его Матере со всеми святыми Его». И по том болезни на блаженнаго нашедши, и тако преставися, предав блаженную и святую свою душу Господеви, Егоже желаша, и получи Царство Небесное. И пребысть блаженный Авраамий подвизася лет 50 от юности до конца живота своего о Христе Иисусе, Господе нашем, Емуже слава со Отцем и со Святым Духом ныне и присно и в безконечныя веки. Аминь.

А СЕ КОНЕЦ БЛАЖЕННАГО И ПРЕПОДОБНАГО ОТЦА НАШЕГО АВРААМИЯ, И ПОХВАЛА, И ГРАДУ СЕМУ ЗАСТУПЛЕНИЕ, И ПРЕЧИСТЕЙ БОГОРОДИЦЕ ПРИСНОДЕВЕЙ ПОХВАЛА

Аз же, грешный и недостойный Ефрем, в лености мнозе пребывая и в последний всепразден и пуст быв всех благих дел, разве в праздно имя облекохся во ангельский сий сан: именем черноризец нарицаюся, делы же злыми далече отстою. И како нарекуся, но и последний нарещися не могу, дела бо злая, яже содеях, обличают мя и стужают, темже последний в житии блаженному рекохом бысть ученик, иже ни по малу бых последуя житию, терпению, смирению, любви, молитве и всех его благих нрав и обычай, но по вся дни пиян, веселяся и глумяся в неподобных делех, иже в правду бых празден. Он умильно плачася — аз же веселяся и глумяся, он убо на молитву и на почитание божественных книг и на славословие в Божию церковь тщася — аз же на дремание и на сон мног, он еже трудитися и бдети — аз празден ходити и в лености мнозе, но [так в публикации А.А.Мельникова] убо не празнословити и не осуждати — аз же осуждати и празно словити, он страшный судный день Божий поминая — аз же трапезы велия и пиры, он памят смертную и разлучение души от телесе и испытание воздушных мытарей — аз же бубны и сопели и плясания, он еже подражати жития святых отец и подобитися благому житию их и почитая жития их и словеса — аз же бых подражая и любя пустощная и суетная злых обычай, он еже умалити себе и уничижити — аз же веселитися и гордети, он нищету любя и безымейство и вся раздавая требующим и сиротам — аз же еже собирати и не подаяти, побежден от многий скупости и немилосердия, он по смирению ризы нося — аз же красны и многоценны, он храмину и постелю жестоку — аз узре постелю мякку и теплу и не могий терпети, он студень и мраз терпяше — аз же баню имея утешну и терпя, он о нищих терпя и тужа, изволяя сам алчен быти и не вкуся — аз же отнюдь их ненавиде и презре, он нагих видев плещу и неодеянных, мразом измерзша, одея — аз же не вем, яко тии такоже от тоя же утробы произыдоша, и еще же мнози утаившеся странствуют Господа ради, якоже рече Павел апостол, Вселенныя учитель: «Их же ни весь мир имать, яко ходиша во овчиах и в козиях кожах, заблуждающе и скрывающеся по вселенней, не имуще дому, скитающеся в вертепах и в пещерах земных Господа ради».

Ей, отцы и братия, не могу дивнаго и божественнаго и преподобнаго образ и подобие похвалити, груб и неразумен сый; оного бо образ светел и радостен и похвален — мой же образ темен и лукав и мерзок и безстуден, аще хощу, не достигну, како имам похвалити: прошу милости и помощи от Господа и все упование имея, надежду и помощь возлагаю на пречистую деву Богородицу Марию, та бо больше всех дерзновение к Сыну своему и Богу нашему Иисусу Христу, молящеся со всеми безплотными силами и со всеми святыми, могущи мя спасти и избавити от всех бед, та ми есть помощница и поручница животу и спасению зде и в будущий день, та бо вест избавити и подати помощь своим рабом елико и когда требуем ея на помощь — в дому и на пути и на мори, в бурях и волнах, на бранех и во всех бедах скорое моление обретающися на помощь в нощи же и во дни, и на всяк час избавляющи и хранящи от все дел сатанин, глаголю, и всех его демон, и от всякия крамолы и поганых нашествия, и всех совет и совещания испроверзи святителя и монахи и всего церковнаго чина и сонма, князя же и вся христианы в молитве, госпоже, исъпроси, пресвятая и приснодева Марие, Сына своего и Бога нашего, молящи прилежно за порученное тебе стадо новых людий, яже избра Сын твой и Бог наш Иисус Христос, иже прииде на землю, родися от пречистыя ти утробы и бысть Сын, Бог и Человек, и страсть и смерть прият, якоже изволи, тако и бысть, от гроба воскрес и царство адово испроверг, и на небеса ко Отцу взыде, и разруши всю силу неприязнену, тако разруши ныне измаильтеския языки, разсыпли и расточи, яко прах от гумна ветру, молитвами пречистыя Ти Матере и возвесели новыя люди избранное стадо, гнев Свой устави избавление и милость подати, да и еще пребудем Твоею милостию, Вседержителю Господи, да не рекут языцы: Где есть Бог их? Но услыши и приими молитву всех молящих Ти ся, иного бо помощи не имамы, разве Тебе. И мое же худое, грешнаго и недостойнаго раба Твоего Ефрема, моление умаленное: «Господи Иисусе Христе, приими и помилуй, и не отлучи мене лика преподобных, аще Ти и много согреших и Тя прогневах паче всех, но не вем иного Бога, разве Тебе. Иже словом всяческая яко восхоте и быша; Ты бо повеле — и создашася, и всяко дыхание хвалит Тебе, Владыку и Господа, сотворшему и создавшему всяческая. Направи мя и научи мя, Господи, творити волю Твою, и посли благодать в помощь рабу Твоему, да всегда Тобою направляем и сохраняем, избавлюся от всех нападений вражиих. И подаждь всему граду и рабу Твоему руку Твою помощи всегда ми падающу и люте согрешающу, и не повели взяти, о Владыко, от мене души моея непокоянны от тела грешна, но малое покаяние мое приими, яко блуднаго сына и блудницу и разбойника, и воскреси мя и оживи, во мнозех гресех суща молитвами святыя и пречистыя Ти Матере девы и всех небесных сил и всех от века святых послуживших и много потруждшихся по Тебе, иже и ныне преподобнаго и блаженнаго отца Авраамиа успение празднуем и радующеся ликовствуем.

Радуйся, граде, тверд снабдим и храним десницею Вседержителя. Радуйся, пречистая дево Мати Божия, иже град Смоленск всегда светло радуется о тебе, хвалится, тобою избавляем от всякия беды. Радуйся, граде Смоленск, от всех находящих зол избавляем молитвами пресвятыя Богородицы и всех небесных сил и всех святых Его. Радуйтеся, апостоли, пророцы и мученицы и святители, преподобнии и праведнии, и вси святии, в день и в памет святаго успения преподобнаго отца Авраамия. Радуйтесь, пастуси и наставницы Христова стада: патриярси, епископи, архимандриты, игумени, иереи и диакони и весь черноризческий чин и честных черноризец и преставльшихся о Христе, иже и еще о Бозе и о Господе живущии в христоименитой вере — светло радуйтеся, ликовствующе, в память успения преподобнаго Авраамия. Радуйтесь о Христе, любимии и богохранимии цари и князи и судии богатии и славнии, нищии о Бозе уже преставльшиися о Христе и еще о Господе здравствующии и всяк, реку, возраст, мужеск пол и женеск, юноша, старцы, в честное успение богоноснаго отца Авраамия. Радуйтеся о Господе, множество везде нищии и убозии, слепии же и хромии, трудоватии и вси просители, не имуще где главу подклонити, иже претерпеша глад, наготу, зиму, иже претерпеша многия сугубыя скорби и напасти и на мори и на суши: озлобление, прогьнание и разграбление без правды от вельмож и от судей неправедных, иже сия вся прияша и претерпеша с похвалением и благодарением о Христе Иисусе, Господе нашем. И ныне радуйтеся и вы, отшедшии и преставлшиися от сего света и паки и еще живущии с терпением о Бозе, веселитеся и радуйтеся и ликовствуйте во святое успение богоноснаго отца Авраамия. Радуйся, Сионе и Ерусалиме и Христова Господа нашего Иисуса Христа Церкви, мати всем церквам, в немже Христос волею прият и претерпев крест и смерть и воскресе за наше спасение и избавление. Радуйтеся, святая и честная сущая вся места окрест Иерусалима и преподобных пустыня, се бо суть святых домове, в нихже добре поживша ныне веселятся о Господе. Радуйтеся, по всему миру Церкви Христовы и домове святых, иже от всех святитель и игумен, иерей и диякон и черноризец и от всех боговерных и христолюбивых христиан, иже моление и приношение приносяще на святый жертвеник за оставление греховнаго завета, и да призрит вся содержай Владыко Господь Саваофь и приимет и посетит, яко благ, всех иерей, молящих Ти ся и приношение приносящих Ему и стоящих со страхом и с великим вниманием послушающих святаго Евангелия и святых всех учения сладкаго и всех любовь имуще и терпение, не воздающих зла противу злу, труждающеся во блазем деле день паче от дне, злых отбегающе, а к добродетели, благим делом и трудом повинующися, радующеся и веселящеся о Господе Бозе помощи милости Его, и да подаст нам Свою благодать и избавление от всех зол, и безконечнаго мучения избавит ны, то бо есть благий и великий дар милости Его — вход в безконечное Царство Господа нашего Иисуса Христа со всеми избранными Его, послушающих и сотворивших волю Его, темже поем и молимся славимому от всех небесных сил и от человек, яко во веки милость Его на всех творящих волю Его, яко Тому слава и честь и держава и поклонение — Отцу и Сыну и Святому Духу ныне присно и во веки веком. Аминь.

Па сваіх літаратурных якасцях, асаблівасцях кампазіцыі i аўтарскай мовы жыціе Аўраамія, смаленскага архімадрыта-прапаведніка — відавочны працяг таго тыпу агіяграфічных твораў, якія складаліся ў XI—XII стст. Аўтар жыція, вучань i паслядоўнік Аўраамія Яфрэм спрабуе пераймаць стыль і кампазіцыйна-вобразную сістэму Нестара, аўтара жыція Феадосія Пячэрскага. Сам жа Аўраамій, паводле сведчання Яфрэма, наследаваў жыццю Аўраамія Затворніка (памёр каля 360 г.), апісанага Яфрэмам Сірыным.

Жыціе Аўраамія створанае, відаць, у хуткім часе пасля смерці святога (памёр жа ён не пазней за 1219 г.), i адносціца ўжо да мангольскай эпоxi. Аб гэтым красамоўна сведчыць малітва аўтара да Багародзіцы («знішчы народы ізмаільцянаў»). Першае ж нашэсце манголаў на Смаленск адбылося ў 1238 г., i прыблізна гэтым часам належыць датаваць стварэнне жыція.

Твор гэты напісаны ў поўнай адпаведнасці з хрысціянскай традыцыяй, ён цалкам пазбаўлены элементаў народных вераванняў, паэтычных паданняў i мae гісторыка-інфармацыйны характар; Урэшце, як i ў любым іншым агіяграфічным творы, напісаным у адпаведнасці з патрабаваннямі жанру, ў жыціі Аўрамія цяжка знайсці дакладныя даты, фактычныя звесткі. Скажам, меркаваць пра год нараджэння святога можна толькі па ўскосных звестках: у тэксце згадваецца чарнарызіца (эпізод нараджэння героя), а першы жаночы манастыр у Смаленску быў заснаваны каля 1146 г.; такім чынам, Аўраамій нарадзіўся не раней гэтага часу. Пачатак жа дзейнасці святога адносіцца да часу княжання Мсціслава Раманавіча (кipaваў Смаленскам у 1197—1214 гг.).

Жыціе Аўраамія — яркае, npaўдзівае апавяданне пра надзвычай адукаванага i пабожнага манаха, выдатнага прамоўцу, чыя пропаведзь насіла эсхаталагічны характар, звычайны для ўсходняга славянства. У творы апавядаецца пра ганенні на Аўраамія з боку мясцовага духавенства, якое зайздросціла яго папулярнасці i любові народа, што надоўга захаваў памяць аб сваім духоўным настаўніку (таму i Яфрэм заўжды суправаджае апавяданне заўвагамі: гэта шмат хто ведае, гэтаму шмат сведкаў). Аўтар хоча паведаміць ужо наступнаму пакаленню праўдзівую гісторыю жыцця настаўніка, паказаць яго ворагаў i сяброў, а можа, i высветліць непаразуменні, якія ўзнікалі ў народнай памяці з некаторымі фактамі жыцця i дзейнасці святога.

Жыціе — не простае, сухое апавяданне; немалую ролю ў ім адыгрывае аўтарскі элемент. Пісьменнік з павагаю ставіцца да сваей працы i сваей асобы i нават называе ўласнае імя — з'ява надзвычай рэдкая ў літаратуры славянскага Сярэднявечча, большай часткаю ананімнай. У жыціі Яфрэм разважае, аздабляе твор рытарычнымі канструкцыямі, праводзіць аналогіі з жыціямі святых Савы i Іаана Залатавуснага, згадвае прыпавесці з «Залатога Ланцуга»,не кажучы ўжо пра шматлікія запазычанні са Свяшчэннага пісання. Згодна з жыційным канонам, Яфрэм пачынае твор красамоўнаю прадмоваю з кароткім выкладам новазапаветнай гісторыі і заканчвае яго заключэннем з пахвалою святому, якая ўяўляе сабой шэраг доўгіх красамоўных перыядаў. Багаслоўская ж гістарычная малітва, з якой пачынаецца ўступ, складзеная на ўзор прадмовы да Нестаравага жыція Феадосія і заканчваецца цытатай з яго.

Дзень святых Аўраамія Смаленскага і ягонага вучня Яфрэма Царква адзначае 23 жніўня.

Тэкст жыція публікуецца па выданні: Редков Н. Преподобный Авраамий Смоленский и его Житие, составленное учеником его Ефремом: Опыт историко-литературного исследования,— Смоленск, 1909. Кніга Рэдкава — найбольш сур'ёзны дослед жыція Аўраамія; апрача таго, ў ей публікуецца тэкст помніка па некалькіх спісах.

(А.А.Мельнікаў)