Иаков

ПОСЛАНИЕ КНЯЗЮ ДМИТРИЮ

Оп.: Послание Якова-черноризца к князю Дмитрию Борисовичу / Памятники литературы Древней Руси. XIII век. — М., 1981. — С.66-105.

Подготовка тексту В.В.Колесова. Текст по рукописи конца XV ст.: ГПБ, Q. I. 1130, см.: С.И.Смирнов. Материалы для истории древнерусской покаянной дисциплины. М., 1912, с.189-194.

Добро бо от бога къ божию слузЂ начати, великому князю Дмитрею отъ многогрЂшнаго чериоризьца Якова.

Написалъ еси покаянье свое, велми смирено и жалостно слышати, понеже много с подъпаденьемъ. Да вЂсть умъ твой, иже тя разумомъ кормить, рече господь о покаяньи единого человЂка: «Вси ангели радуются на небесехъ», и самъ хощеть обращенья, а не смерти, и на землю сниде не праведныхъ дЂля, но грЂшныхъ. Жертва бо богу духъ скрушенъ, сердца смирена николи же не уничижить, жертва бо его подъ языкомъ ти, и законъ его посредЂ чрЂва ти, и что ся съдЂяло про мене, того всего простить тя господь Иисусъ, всего мира грЂхи вземъ, отъ тайныхъ твоих очистить тя.

Молюся ему отъ сердца, что ли же уже минуло то и мы слабЂише будемъ, но буди и всега бъдръ и стражь тЂлу своему, блюдися запойства, того бо духъ святый бЂгает, и гордости, сему господь противится, и безаконьнаго смЂса: всякъ бо грЂхъ кромЂ насъ есть, а блудяи свое тЂло оскверняеть. Ни мужь честенъ не внидеть в калню храмину, а ли богъ.

Соломонъ бо, се искусомъ приимъ, всЂмъ заповЂда, глаголя: «Не внимай бо любодЂйци, медъ бо каплетъ отъ устъ ея, а послЂже горчае золчи и чемери», «не стрЂтай жены сничавы, отврати очи отъ жены красны», любодЂянья бо жены во высотЂ очью. Да не удолЂеть ти похоть чюжея доброты, и во слЂдъ ока не идеть сердце ти; видъ бо любодЂйци — стрЂла есть чемерита: уязви лицемъ и ядъ въ сердце вложи, и мысли аки мухи вязнуть в поставъ паучий, аки искра медливши в половахъ, пламеньмъ воспалится; неводъ бо сердце ея, и сЂти уды ея, и узы в руку ея, и ловление бесЂды ея, осилы устенъными заведеть во блудъ, — акы волъ поверъстъ послЂдуеть ей на заколенье, аки песъ жажелемъ, а не вЂсть, яко отъ души течеть. В добротЂ бо женьстЂ мнози заблудишася и пополъзнушася в пагубу, смертию въ адъ, жены бо честныхъ мужь душа уловляют.

Егуптянини не взору ли Иосифову восхотЂ, скорбь и до смерти въведе, и про сестру его Дину, сикимляне погибоша и Самсонъ, с ним же духъ господень хожаше, и Давидъ, его же богъ обрЂте по сердцу си, и бысть рабъ очному взору и двое зло створи, и Амомонъ сестры ради Фамары злЂ убьенъ, и Соломонъ паче всЂхъ человЂкъ имЂя премудрость, женами погибе, и старци, судьи Вавилону, похотЂста СусанЂ, побьена отъ людей. И господь, провЂдый душетлЂнный вредъ, рече: «Весь возрЂвый на жену въ похоти ея, уже прелюбодЂпствовавъ во сердци». Гнушаеть бо ся господь нечестивыхъ мысли, паче же раждающаго ярь сердца и мудрующаго со сластохотЂньемъ, акы Евга съ бесловеснымъ гадом бесЂдуя, съ змиемъ: поползни бо суть змиевы мысли, въ дрязгахъ темныхъ вредъ почивая, гнЂздятся и свЂта не любять, но, акы нетопыреве, во тму пруть: во тмЂ бо есть учитель их.

Мужества бо не дошедль и ни разума еще имЂя, что соблазнихомся? Абы не попустилъ и нынЂ уности играти собою, варуйся чресъестественыхъ, сверепа бо есть похоть, акы дикая быль, о себЂ возникъши, на недЂланЂ нивЂ. Имаши силу и удолЂти еи страхом божиимъ, аки тяжарь оттребляти садъ желЂзомъ чюжа прилогы, акы кормьчии волны минуя, направляемъ благодатью, и не ступи праваго пути. Имаши жену, матерь похотемъ, ея же ради остави отца и матерь и, по апостолу, не токмо не скверно ложе, ино честно. Не сравнаеть бо ся смрадъ с вонею, ни зла воня со смрадом, ни безаконие со закономъ.

Живый въ чистотЂ, акы въ церкви святЂи потыкаемъ свЂстью в горнии Ерусалимъ, и тамо в первЂньцЂхъ же вписанъ имаши быти, помня оного, иже по возлежании чертожнЂмь изгонима, гнЂвъ и ярость на согрЂшившая удержи и умалиши грЂхы.

Яко молишися богу — остави ми, якоже оставихъ, благорасуденъ буди, да ни единого вреда на многиЂ възидеть; ни мьщай врагу, пожди господа, да ти поможеть: терпЂнье бо не на лици обрЂтаеться, но въ сердци, не рЂчью издаеться, но дЂлом.

И бысть неприпорно ти слышати, чюдно указанье: сЂдяи на хЂрувимЂхъ, вседержьць воины водимъ связанъ, сЂдяи одесную отца, на судЂ архиерЂю Пилату стоить, воспросим; и, слышавъ отъ него истину, гнЂваются; лице просвЂтивше си паче солнца, безаконьникы ударяемъ, плеваху, храчюще на лице его; плюновеньемъ отъ рода слЂпаго исцЂливъ, а прочая вЂдома ти,

Аще бо божий сынъ и мышца господня се подъятъ отъ человЂкъ без грЂха сы за насъ, да мы, человЂци, отъ человЂкъ тоже стража, не благодать воздаемъ, но искупаемся долгу.

Да не в годы мирныя Иисусъ другъ буди, а в годъ ратенъ врагъ. Малъ квасъ око смутить, мало слово ярость родить и малыми болЂзньми большихъ изъбыти. Мужь бо терпЂливъ по терпЂнью знаеться, Соломонъ рече: «ТерпЂливый лучши крЂпкаго». Обладый душою своею мука есть в мысли тайна симь. И безъ желЂза можемъ быти мученици, аще бо бы молился за пакостьникы, того и бЂси бояться.

Полюби Христа, послушай глаголюща ко апостоломъ: «Отъ сего вы разумЂють вси, яко мои ученици есте, аще любите друг друга, а не аще чюдеса творите», и Павелъ рече: «И аще имЂю вЂру, яко и горы преставляти, и раздаю все имЂнье, любьве же не имЂю — ничтоже успЂю». Богословець рече: «Любяй господа преже и братью возлюби: указъ бо первому второе». Любы и богъ есть снотворенье человЂкомъ, досяжено море смиренью, бездна — долготерпЂнью источьникъ и огньнъ, елико въскипить, толико жажущего душю запалить. Аще и чюдесы подражати апостолы хощеши, и се ти мощно: они хромым ходити створиша и рукы сухымъ исцЂлиша, а ты храмлющая о вЂрЂ научи, и нози текущихъ на игры къ церкви обрати, и руцЂ исъсохши от скупости к нищимъ на подание простерти створи. И, страстемъ ихъ подражатель хотя быти, аще борения таковаго нЂсть, но вЂнцемъ такимъ не отступило время — и не отстала бо рать дьяволя, не гонять бо человЂци, но бЂси, не мучитель, но дьяволъ. Они терпЂша огнь, звЂри и мечи остры, а ты похоть възгарающюся и мысли звЂрины изутрь востающа и языкы злыхъ человЂкъ, по реченному, обостриша, яко копья, языки своя. Сего ради Павелъ велить присно вооруженымъ быти: милостивии помиловани будуть, милость бо на судЂ при всЂмь лишше хвалима есть и смерти избавляеть. «СЂяи щадя, щадя и пожнеть», рече Павелъ: «Все вашею любовью да бываеть». И се ти будеть указъ: Ефъфая князя единородная дщи и убогия вдовы д†мЂдницЂ, не вЂдЂ, сровналъ ли будеть? Кому то принесени быша правила, своего не остави противу силЂ, се же бы добро в тайнЂ: дЂвица бо хранима и любима внЂшними, аще ли исходить, то всЂмъ годЂ есть, от инЂхъ прокудима.

Буди, аки пчела, извону нося цвЂты, а внутрь соты дЂлая, да не дымъ въ солнца мЂсто примеши. И не рцы, что зло творя: «Аще бы се не годно богу, не попустилъ бы самъ». Власть далъ есть человЂку нераскаяненъ даръ его: не терпить идолослужащимъ и отмЂтающимся его, и еретиком, и дьяволу. Или, готову имЂя цЂлбу покаяньи, и будеши часто огражаяся, еже не любо богу?

А без вЂсти и утрений день, а, рку, и днешний, и нЂсмЂ тому властели, и никтоже вЂсть отъ себЂ в тайных божиихъ судЂхъ, да вси трепещемъ о своемъ дЂлЂ. Позорище бо есмы ангеломъ и человЂкомъ, и ангелы знамепаются на всяк день, кто что предложить, и ты вникъ во сердци си и мыслью, лроиди всю тварь и расмотри и: торгъ житья человЂча как ся расходить по писаному, все стЂня и немощнЂе. И зри господа с небесъ уже грядуща на судъ человЂческымъ тайнамъ и всЂмъ воздати по дЂломъ его. ВЂдомо ти буди: огнь нас ждеть и огньмь питану быти, и огньмь открывается житье же человЂчЂ, и огньмь искушена будуть дЂла наша. Буди, акы в геонЂ уже врящи! Се жестоко глаголю, да жестока не искушь и преже времене сготовимъ ищемаго въ время. По пяти дЂвиць мудрыхъ — се есть цЂла ума дЂло и свершеныхъ свершеное свЂршеньство. Аще знаемы ти будуть божия, то во свЂте еси божий свЂтъ мирови, и възлюбить доброту сердца ти, и благословить мощь твою, и дЂла руку твоею прииметь.

Се не ласкаяся тебЂ или явити хотя, что вЂдая, или самъ что добро творя, сердовидець есть богъ, но отъ любви и отъ печали и о души твоей, абы ты успЂлъ на добрая. Моего ума, и самъ вЂси, разумъ несвершенъ и всякого невидЂнья исполнь, крыти немощно. Паулъ кореньфЂемь рече: «Аще изумЂхомъся — то богови, аще умудрихомся — то вамъ». Не уничижаю силы божья всемощныя, ни отмещю дара, туне данаго ми: отъ скверна тЂла и отъ скаредна сердца, отъ нечистый души и груба ума и нестройны мысли, отъ безърасудна языка, и отъ нищю устну слово богато силою и разумомъ, святыя троица умножено, ни на небеси горЂ, ни на земли долЂ. И ничтоже боле сего, еже знати господа и повиноватися десници его, и шюйци его, и творити волю его, и блюсти заповЂди его. Имя бо велико не введеть во царство небесное, ни слово бездЂлно пользуеть слышащимъ, слово бо, дЂлы утворено, вЂры достойно ся творить. Ему же слава в вЂкы вЂком, аминь.