ЖИТИЕ ГУРИЯ И ВАРСОНОФИЯСм. библиографию. Творения святейшаго Гермогена, Патриарха Московскаго и всея России. С приложенiем чина поставленiя в Патрiарха. - Изданiе Церковной Комиссiи по чествованiю юбилейных событiй 1612, 1613 и 1812 годовъ. М.: Печатня А. И. Снегиревой, 1912. - с. 35-51. Житие и жизнь иже во святых отец нашихъ, Гуриа, перваго архиепископа новопросвещеннаго града Казани, и Варсонофия, епископа Тферскаго, Казанских чудотворцовъ. Списано Ермогеномъ, митрополитом Казанскимъ.
Глава 1. В лета благочестиваго и христолюбиваго самодержда Русския земли, великаго князя Василия Васильевича всея Русии, при святейшем митрополите Фотие Киевском и всея Русии. Егда восхоте Бог болма своего угодника прославить, светильнику не под землею быти, но всеми-же видиму быти. Случися и се по некоему строению Божию. Церкви обвалившеся весма во время божественныя Литургия; священником еще во алтари. Но благодатию /л. 358 об./ Христовою и молитвою угодника его Святаго Чудотворца митрополита Алексия вси невредими сохранени быша. И тако тоя место очистивши, хотяще паки воздвигнути новую церковь. И начаша копати рвы во основание церкви, и абие обретоша тело блаженнаго Алексия цело и невредимо, и ризы его не истлевша. О, превеликое чюдо! толиким летом поминувшим и святому во гробе лежащу - не изменися святое его тело и ризы его, яко вчера оболчены; понеже убо да сбудется реченное Богом во святом Евангелии - не может град укрытися верху горы стоя, и никтоже, вжег светильник /л. 359./ поставляет его под спудомъ, или под одромъ. Такоже и саму светильнику не мощно на толико лет сокровену быти под землею; се же все бысть премудраго Бога промышлениемъ. Яко же слышано бысть Святаго обретение, и се слышавше благоверный и христолюбивый князь Василий Васильевич и вси благовернии князи - приидоша скоро на дивное чюдо и на обретение тела Святаго и при святейшем же Фотии, митрополите Киевском и всея Руссии, и с ним же епископы и прозвитеры, весь чин церковный приидоша со псалми и пением и свещами и с кандилы хвалу велию воздающе всемогущему Богу /л. 359 об./ и угоднику его Чудотворцу Алексию. Народи же московстии мнози с радостию стекошася видети честное и святое его тело. Пришед же благоверной и великий князь Василий Васильевич всея Русии и вси благовернии князи - видевша таковую славу Божию и поклонишася Святому и божественному его телу преподобнаго отца нашего Алексея и возрадовася радостию великою зело; и, вздохнув из глубины сердца, глаголя: хвалю и славлю Тя Господи Боже мой и Пречистую и Непорочную Твою Матерь, яко сподобил мя еси раба твоего в моя лета видети таковое сокровище и благости /л. 360./ державы моея явити ми. Якоже убо дал еси нам вторый источник благодатный во граде нашем Москве, творящая намъ, дивныя чюдеса последнему роду нашему, не токмо же единому граду нашему, но и всем градом и страном с верою притекающимъ. Но и такова дивная чюдеса и дары милости Твоея получити, Владыко, уже ничим же охужен есми Божия благодати от всех Святых мужей. О, Предобне Святителю нашъ, Чудотворче Петре, и Святителю Христовъ, преподобне отче нашъ, Чудотворче Алексею! не престайте вкупе к Богу молиста за ны и за вся верныя рабы своя; вы бо еста скорая /л. 360 об./ помощника и заступника земли нашей Рустей и стена необоримая присному граду нашему Москве. Великий же христолюбивый князь и вси с ним благовернии князи и боляре и вельможа их и вси московстии народы целоваста святое его тело любезно. И по сем церковь воздвижена бысть, зело прекрасна, Богу на се поспешествующу. И святаго тело в раце положиша в пределе честнаго Благовещения Владычица нашея Богородица, на десной стране, идеже суть видими святыя его мощи и доныне, всем исцеления обильно подающе; принесены же быша мощи его месяца мая в 20 день, на память св. мученика ?алилея, да не умолч/л. 361./ано будет истина, и да речено будет праведное: Елма бо обаче Бог не токмо в животе прославляющих его прославляетъ, но и по смерти явлену быти многими различвыми чудесы, о них же да речется мало от многихъ. Повесть полезна, яко близ очима зрится: но недоумение и скудость разума, яко птицу по воздуху парящу, далечайшу от ума нашего творитъ. Но обаче надеяся на множество щедрот Сына Божия, Господа и Бога нашего и Спаса Христа Iсуса, и на молитвы преподобных угодников его, и царскаго ради повеления, и архиерейскаго ради благословения, дерзнух коснутися хартии и трости. Аще бо и не обретох святых сих святителей и преподобных отец от младенства знающих житие их и отечество известно: но обаче еже слышах от ведящихъ, сия и написати дерзнухъ. Обретению же честных и чудотворных нетленных их мощей первый самовидец быхъ, и своима рукама осязах святыя их мощи и чудотворныя прежде всехъ; к сему же еще, во время обретения честных мощей ихъ, и глас некоему верну слышашеся. от гласа же слово сие бысть: во граде обстояния удиви Господь святыя своя. К сему же еще и сие да воспомянуто будетъ: еще бо жив сый святый Варсонофий, к некоему клирику в мире живущу, речь некаку прозрительну посла с духовником своимъ, еже последи и сбыстся по пророчеству святаго; живяше бо тогда святый Варсонофий во граде Казани в созданней от него обители, святаго боголепнаго Спасова Преображения, оставя паству Тферскаго престола. К сему же еще и мне непотребному случися в той святей обители, пятому по нем быти, и на месте его стояти, и жезл его в руку моею держати. Последи же Богу изволившу, аще и зазрит ми кто дело сие, страшно бо сие мне есть, и зазрително от многихъ: понеже неключим бых таковому великому и пресловущему и имени, не токмо делу; но обаче и на святаго Гурия месте стояхъ, и жезл его такожде в руку моею носихъ, числом же от перваго девятый быхъ, в преименовании же первый. И сия вся воспоминахъ, и судих сам в себе: аще не дерзну коснутися повести, боюся осуждения лениваго раба, вземшаго господина своего сребро, и прикупа не сотворшаго, якоже самая истина рече Господь и Бог нашъ; и паки во втором законе: не явишися, рече, пред Господем тощъ, но койждо по сих дароносити; великому же Василию глаголющу: поставленный убо на строителство слова, и не брегий о семъ, яко убийца судится; великий же богословесный Григорий глаголетъ: безчестие бо есть еже молчати, о ихже потреба есть глаголати; многий же и великий в словесех златоустый Иоаннъ: аще удержу, рече, слово, и не подамъ, тогда убог есмь, аще подамъ, богатее буду: аще не подамъ, един богатею, аще подам со всеми радостен плод принесу. Якоже убо и трость писца без пишущаго праздна есть, тако и стрела стрелца без влекущаго ю недвижима естъ, и требует споспешника; или якоже цевница, аще кто не будет ударяяй ю, праздна является и безделна: тако и мы, аще оставим о сих святых повести писати, о обретении честных и чудотворных мощей ихъ, и множестве чудесъ, праздни будем и безделни, и с ленивым рабом точная приимше обрящемся. Обаче же несть мое поспешение или силы, но от Бога есть все человеческое исправление; сам бо Господь глаголетъ: яко без Мене не можете ничтоже творити; мы же елико вемы, то и принесем во славу Богу, и в похвалу святымъ. С О рождении святаго Гуриа, архиепископа Казанскаго, чудотворца.
Глава 2. Сей убо преподобный и святый отец наш Гурий, якоже поведаютъ, рождение его и воспитание во граде Радонежи, родом от менших боляръ, в мире бе имя ему Григорий сын Григорьевъ, по реклу Руготинъ. Случися же ему служити у некоего князя, именем Иоанна, иже именовашеся Пенковы, или за скудость имения, или по насилию, якоже многожды случается силным неволею порабощати меншихъ. Григорий же бе нравом смиренъ, и тихъ, и беззлобивъ, и к Божией Церкви прилежно притекая, и постом и молитвами, и милостынею, и целомудриемъ, и протчими делы добрыми: тщание имея не леностно, како бы угодити Богу, к сему же и девственное житие возлюби, не изволи бо жены пояти, но чистоту телесную паче почте; послушествует же сему и пречестное тело его, нетлением бо почтеся от Бога. И тако Григорию в добродетели живущу, и видя добронравие его господинъ, нача его любити, такоже и госпожа его, за смирение его и кротость. и за протчия добродетели, нача брещи его; господин же его повелел быти Григорию в дому своем стоителемъ, и вся домовная вложи в руку его: и бе строяся в дому его вся добре. О страдании темничном святаго и праведнаго отца нашего Гуриа, архиепископа Казанскаго, чудотворца.
Глава 3. Старый же и общий враг наш дияволъ, не хотя видети человека в добродетели живуща, и в заповедех Божиих ходяща, воздвизает на добляго брань, якоже древле на праведнаго и святаго отрока Иосифа, и научает старшия клевреты его завидети праведному, и творит лгати на преподобнаго, якоже и древле старцы оны на целомудренную, и влагагот во уши господину своему суетная, и вяжут венцы преподобному, душам же своим в препинание плетут сети, клевещут на преподобнаго забывше реченнаго: пространно слово клеветнику на языце его, внутрь же его душа его тем страшно связуется; и паки глаголет писание: треми вещми клеветник пакостит клевещущему, клевещущаго, сам себе, обаче вся беды на суде клеветнику единому. Но что убо реку: не единому Григорию творят клеветницы напасть искушения, но и госпожу и чад их сводят в печаль неудобьстерпимую: поведают Григориа сплетшася с госпожею своею беззакониемъ. Господин же Григориев сия слышавъ, вскоре и без испытания повелевает умертвити Григориа. Сын же господина его разумен сый, и ощутив вещь злую сию, и нестерпимый срам отцу своему и матери, и сам себе испытывает по толку клеветников онехъ, якоже и Даниил на целомудренную клевещущихъ; к сему веру емлет и матери своей, яко зло сие замышление ложно, и от диявола содеяся, а никакоже истинна; и умоляет отца, да не ускорит клевещущим веру яти, и не предает себе студу конечному, и их чад своих да не осрамит вечно: и да не обезчестится, рече, весь род нашъ, без испытания бо, глаголетъ, таковому делу не подобает быти. Господин же Григориевъ, яко от изумления во ум прииде, и послушлив бывает отец своему сыну, повелевает от смерти отвести Григориа: обаче же горкому и лютому предает праведнаго заточению, якоже и соименитаго тому преподобнаго святителя арменскаго, или яко акрагантийскаго великаго и чудеснаго: ров убо глубок ископовается, в немже и твердыми стенами древа темница готовится, и ту неповинный яко злодей вводится, и дверь заключается, мало оконце токмо на верху земли оставляется, идеже быти пище метаеме: ядь же бе преподобному даема не человеческа, на три убо дни вметаем бывает преподобному един сноп овса, такожде и воды скудною мерою; и в таковой убо беде преподобный наипаче простирашеся на славословие Божие, терпя и благодаря Бога о всемъ, поминая древних святых мучения и терпение. И в таковой беде преподобному уже ко исходу втораго лета близ приходитъ, отлагает страх некто клеврет его, иже бе прежде друг ему, и умоляет стрегущаго его, приходит ко оконцу темницы Григориевы нощию, и вопрошаетъ: како пребывание его? Григорий же о всем и во всем благодарствует Бога, и Пречистую Богородицу, и всех святыхъ; друг же его обещавается ему приносити ядь; Григорий же не повелевает тому яди приносити к себе; многа бо, рече, и преизобилна благодать Божия питает его; и воспоминает в писании глаголемое: яко всяка душа не наказанна неисцелна, не убо люто, еже уязвену быти, но люто еже не уцеломудритися язвою; токмо повеле приносити к себе бумаги, чернил и трость; друг же его сотвори по повелению его; Григорий же писаше книжицы малыя, яже в научения бывают малым детищамъ, и повелеваше продавати сия, цену же их нищим раздаяти, себе же никакоже ничтоже от яди и от протчих потребныхъ, кроме бумаги и чернилъ, не повелеваше приносити. Господину же его никтоже смеяше о нем воспомянути; сам же господин его, или забывъ, или Божие смотрение тако бысть: понеже никакоже воспомяну Григориа. О изшествии из темницы блаженнаго и приснопамятнаго отца нашего Гуриа архиепископа.
Глава 4. Егда же Григорию преидоша в темнице лета два, тогда во един от дни явися ему во дверех светъ: он же во ужасе бысть, чая быти вражию мечтанию, и востав нача молитися: понеже в два лета никогда же отверсты беша двери тыя; и паки свет бысть во дверех болши перваго, двери же затворены бяху; Григорию же вземшу рукою дверь, и абие отверзеся; он же разуме, яко Божию быти смотрению, и взем образ Пресвятыя Владычицы нашея Богородицы, иже бе в темнице у него, и изыде дню сущу, никимже видимъ, и иде из дому того и из града. О пришествии во обитель Пречистыя Богородицы святаго страдальца отца нашего Гуриа Иосифову Ламскаго, в ней же и пострижен в монашеский чинъ.
Глава 5. И прииде в пречестную обитель Пресвятыя Богородицы, честнаго и славнаго ея Успения, иже Иосифов именуется, бе бо обещался, в темнице седя, ту пострищися; и пострижеся в той обителя, и преименован бысть от Григориа в Гуриа и Божиею благодатию бысть монах чуденъ, и живяше по монастырскому чину и обычаю, и игумену и братии во всем повинуяся, по писанному: повинуйтеся братие наставником вашимъ, рече, и покаряйтеся, тии бо бдят о душах вашихъ, понеже слово им воздати о васъ. Последи же бысть игумен тоя пречестныя и великия обители; потом же оставляет паству немощи ради телесныя, и паки по мале времени самодержцем посылается во игумены святыя живоначальныя Троицы, иже Селижаров именуется. О поставлении во архиепископа святейшаго отца нашего Гуриа.
Глава 6. И егда убо изволи Бог предати благочестивому и христолюбивому государю царю и великому князю Иоанну Васильевичу всея России самодержцу, болгарския земли отчину его град Казань: тогда благочестивый царь советова с отцем своим и богомолцем святейшим Макарием митрополитом Московским и всея России, и с протчими святыми Росския земли митрополии, кого поставити архиепиекопом новоприятому и новопросвещенному граду Казани; избирают из архимандритов и из игуменов четырех благоговейных и преподобных священномонаховъ, в нихже бе и Гурий преподобный; и любим бывает самодержцу царю и святителю преподобный Гурий; обаче не восхищают на ся суда Божия, но полагают на волю Божию, и апостолски избирают жребиемъ: и повелевают царь же и святитель написати имена сих избранных четырех честных и духоносных священных монаховъ, и положити на престол велицей церкви, Пречистыя Владычицы нашея Богородицы и приснодевы Марии, честнаго и славнаго ея Успения; и певше молебная вземлют от престола два жребия, в нихже обретается един Гуриевъ, и паки полагают oна два жребия, и певше молебная, взимают един от них от престола, и обретается паки имя преподобнаго Гуриа. Царь же и митрополитъ, и весь собор священный и вси людие воздаша о сем славу Богу вси вкупе: яко избра Бог мужа праведна и свята новопросвещенному граду Казани, и овященной пастве первоначалника. Волею же самодержавнаго царя, и благословением преосвященнаго Макария митрополита всея России, и советом всего яже о нем священнаго собора, в лето седмь тысящь шестдесят третие [1555], февруариа в 7 день, поставлен новопросвещенному граду Казани и новому граду Свияжскому и протчим градомъ, в третие лето по взятии города Казани, первый архиепископ преосвященный Гурий. Самодержец же посылает со архиепископом в соборную церковь Пресвятыя Владычицы нашея Богородицы честнаго и славнаго ея Благовещения чудныя местныя иконы, и протчее церковное драгое строение; книги же многие вдает из своея царокия казны; к тому же и из честных монастырей повелевает самодержец архиепископу образы и книги приносити властемъ; самого же Гуриа архиепископа по премногу почти, и честныя и драгия церковныя вещи многи вда ему. Посылает же самодержец со архиепископом два архимандрита на болшую архимандрию, и обитель составити Пресвятыя Богородицы честнаго и славнаго ея Успения во град Свияжскъ, из Старицы града богородицкаго архимандрита Германа Садырева-Полева, иже по первом преосвященном Гурии архиепископе бысть в Казане вторый архиепископъ, его же мощи неисповедимыми Божиими судбами мне недостойному многогрешными моими руками осязати изволи Богъ, и надгробная певше соборне погребсти честныя его мощи в созданней его обители, Пресвятыя Владычицы нашея Богородицы, честнаго и славнаго ея Успения в Свияжском граде; преставибося сей преподобный архиепископ Герман в царствующем граде Москве, в лето седмь тысящ седмдесять шестаго [1567], ноября в 6 день; пас церковь Божию три лета и месяц восемь; бе же тогда на Москве мор силенъ; повеле же себе положити в чину святительскомъ, якоже поведают ученицы его, обаче тогда не сподобися святилски погребен быти, не сущу бо тогда митрополиту, ни иному кому обрестися от святитель во граде Москве грех ради нашихъ. но тако просто погребен бысть архимандритом паствы своея свияжским Иродионом и казанским Иеремиемъ, в чину святителскомъ, якоже повеле, у церкви святаго Николая, яже зовется мокрый, и лежа тамо, дондеже у благочестиваго государя царя ?еодора Иоанновича всея России испросиша мощи его ученицы его, и: привезоша в монастырь в лето седмь тысящь сотое; мы же со благословением господина и отца нашего святейшего Иова, патриарха Московскаго и всея России, честне погребохом его, септемвриа в (?) день. Бе же тогда и благоухание велие от мощей его не токмо во олтаре и в церкве, но и по всему монастырю, якоже всем дивитися. И из монастыря святаго Николая, иже зовется Песношский, посылает самодержец игумена Варсонофиа, о немже нам слово предлежитъ, и сему повелевает быти архимандритом в пресловущем граде Казане, еже и бысть. О отпущении из царствующаго града Москвы в Казань святейшаго Гуриа архиепископа.
Глава 7. И того же лета, в седмую неделю по пасце, совещавает благочестивый самодержец царь и великий князь Иоанн Васильевич всея России со отцем своим митрополитом Макарием всея России, в соборной и великой церкви Пресвятыя Богородицы, честнаго и славнаго ея Успения, повелевает царь митрополиту и всему священному собору молебная пения совершати, и святив воду святым и животворящим крестомъ, и тако с чудотворными иконами и с честными и животворящими кресты, сам самодержец и с братиею своею, и митрополит со всем освященным соборомъ, и всенародное множество, провождают честныя и чудотворныя иконы местныя, коим в Казане быти, и архиепископа Гуриа, с литиею и пришед пред градныя врата, иже именуются Флоровския, и ту совершают молебная; и тако самодержецъ, и братия его, и бояре, у архиепископа Гуриа благословляются, и отпущают касатися путному шествию; такоже и святый Макарий митрополит всея России Гуриа архиепископа, и архимандритов Германа и Варсонофиа. и всех людей, иже с ним в путь грядутъ, осеняет их честным и животворящим крестомъ, и благославляет их в новопросвещенный град Казань. О пришествии в царствующий град Казань святейшаго Гуриа архиепископа, и о прочем жителстве его в пресловущем граде Казане.
Глава 8. И Божиею благодатию, и молитвами Пречистыя Владычицы нашея Богородицы, и всех святых молитвами, преподобный Гурий архиепископ со архимандриты, и со священными мужи, и с честными монахи, и с прочими людми, иже с ними путь шествоваша, в пресловущий град Казань здрави приидоша, и молебная пения Господу Богу и Спасу нашему Iсусу Христу, и Пречистой Богородице, и всем святым совершиша, и святив воду честным и животворящим крестомъ, и служив божественную Литоргию со архимандриты и со всеосвященным соборомъ, и посылает к самодержцу и к митрополиту о своем благополучном прибытии в град Казань. И тако преподобный Гурий архиепископ первопрестольник бывает новопросвещенному граду Казани и прочимъ, не украд власти, ниже восхитивъ, ниже гонив честь, но честию гонимь, ниже человечу благодать, но от Бога и Божественну приимъ; и сбыстся о немъ, якоже речено бысть в Писании: Аз предах тя, и Аз помогу ти, яростию малою поразих тя, и милостию вечною прославлю тя: болши мера человеколюбия твоего, паче меры наказания. Живяше же преподобный богоугодно, нищия кормя, и неимущия всеми потребами удовляя, и бедныя, и вдовицы, и сироты заступая, и от бед изимая, и труды к трудом прилагая, и обнощное стояние присно в молитвах выну принося к Богу, близ бо келлии его церковь святых великих страстотерпцев Бориса и Глеба, и в той многотрудне обычай бе ему молитвы творити, и всякими добрыми делы угождая Богу, и крепким житием по Бозе живяше, и к верным слово здраво и немятежно и учително имея, и неверныя уча и наказуя познати истиннаго Бога и творца всему, и веровати во Отца и Сына и Святаго Духа, во святую и неразделиму Троицу единосущну, и многи неверныя в веру приведе, и крести их множество и жены и дети; всюду убо Божия богатно излияся благодать, по писанному: посетил еси землю, и упоил еси ю, умножил еси обогатити ея даром благодати Святаго Духа, святым крещениемъ; и явишися мнози от неверия православнии, ихже имена в книгах животныхъ. И бывает преподобный. яко некое древо доброродно, кипящее плоды красными, и всем произносящее богатно овощие: тако и сей божественный муж Гурий архиепископ учением своим множество душ присвояет Христу. О преставлении преблаженнейшаго, великаго во иерарсех архиереа, святейшаго пастыря и учителя, Казанскаго владыки Гуриа.
Глава 9. Егда же убо прииде время, о нем же и псаломник рече: дние лет нашихъ, в нихже семдесять летъ, аще же в силах осмдесят летъ, и множае их труд и болезнь: тако и сему преподобному прииде время: старость бо, рече пророкъ, честна, но немноголетна, ни в числе лет исчитается. В болезни же слежа святый много время; поведают бо, яко на трилетное время протягнутися болезни его; токмо на святыя великия праздники господския к церкви к Литоргии ношаху его; и тогда в церкви лежаше или седяше, стояти же не можаше; обаче душевнаго любомудрства не преможе телесная болезнь; о Бозе бо ревность легце криле творитъ, якоже и здрава телеса имущимъ, тако и сей преподобный душу име над телом яко воеводу; аще бо и в болезни лежаше, но пение непрестанно к Богу возсылаше, потом же и воздержанием удручая тело свое, по вселенныя учителя глаголющему слову: егда изнемогаю, тогда силен есмь; тогда убо глаголаше возмогати душевней симъ, егда телесныя изнемогают слабости, и на всяк день яко начало полагаше; зде бо человеческое житие, рече, требует трудом делание, будущее же воздаяние, и подвизавшиися на земли наследят в радости небесныя, и отложще тленная, нетленная восприимутъ; не бо суть достойна страдания нынешняго века противу хотящей славе открытися; аще бо и писано есть: от болящаго не истязует Бог поста ни трудовъ, токмо терпения и благодарения, но сей преподобный муж к сим и сия совокупи, всех трудов касается, и к Богу сим присвояется; и многих неверных учением своим сотвори отступити от злоб ихъ, и от бесерменския их веры, и просвети их банею Святаго Духа, святым крещениемъ, и прежде бывшия хулники устроив славити Отца и Сына и Святаго Духа. И в старости добрей бывъ, позна отшествие свое к Богу; и декемвриа во второй день призывает предпомянутаго архимандрита Варсонофиа, имя же бо к нему любовь велию духовную, и повелевает ему возложити на себя великий образъ, еже есть святая схима; в четвертый же день тогоже месяца декемвриа в осмый час нощи отходит ко Господу, в лето 7072; пас Церковь Божию лет восемь и месяц девять; и повеле положити святое и трудолюбное тело свое во обители боголепнаго Спасова Преображения за алтарем у болшия церкви; и погребоша земли сродное честное и святое тело его честне со псалмы и песнми духовными. О болярине святаго Гуриа, архиепископа Казанскаго, Иоанне Застолобском и о сыне его Димитрии.
Глава 10. В тоже время, в дому Пречистыя Богородицы честнаго и славнаго ея Благовещения, царевым повелением служа преподобному Гурию архиепископу болярин именем Иоанн Застолобский, муж благъ, ненавидя неправды, и от всякаго зла огребаяся, и ум крепок имея, к преподобному же Гурию архиепископу велию веру и любовь имея при животе святаго, такожде и по смерти, и гробницу над гробом святаго, и клеть каменну немалу соделавшу ему. Ему же Иоанну сын бе по плоти, именем Несторъ. по реклом Димитрий, тако же тих и кротокъ, смирен и беззлобивъ, и во младости стар смысл обреташеся в немъ, и разум многолетных седин живяше в немъ; постом же и молитвою, и бдениемъ, и суходеянием удручая тело свое; ктомуже, никомуже ведящу, ношаше на теле своем под срачицею власяницу жестоку; и бе видети умилен взоръ, ризою убо светлою одеян бе, якоже боляром обычай, бледностию же лица и тонкостию тела его поста ради, яко и хлеба не ядый являшеся; бе же и той служа на трапезе архиепископове, полагая им хлебъ. Предпомянутый же Иоаннъ, отец сего Нестора. зовомаго Димитрия, богат зело. Сему же Нестору никакоже о богатстве мира сего радети, ниже о чем о мирских вещех попечение имети, якоже обычай сверстников его, якоже всем нам знаемь бе, и прежде монашества монах познавашеся; потом же умоляет отца, и в монашеская облачится, в той же велицей обители боголепнаго Спасова Преображения, и Нектарий преименуется; и мало время пребывъ, отходит ко Господу, егоже измлада возлюби. Отец же его Иоанн погребает тело его в тойже клети, идеже преподобный Гурий лежаше; верую бо, рече, молитвами святаго, якоже обещамися, да умолит и о нас Христа. Потом же и Иоанн постригает власы главы своея, и Иона преименуется; и мало поболевъ, конец жития приятъ, и в той же клети каменной, юже сам созда, повелевает погребсти тело свое, близ святаго Гуриа. О рождении святаго Варсонофиа, епископа Тферскаго, Казанскаго чудотворца, и о пленении его в Крымъ.
Глава 11. Преподобный отец наш Варсонофий рождение и воспитаяие име во граде Серпухове; в мире же бе имя ему Василий, сын некоего иереа именем Василиа; и дан бе отцем своим в научение граммате; и еще не у достигшу ему совершеннаго возраста, пленен бысть от крымских татар и заведен в пленъ, и пребывая в плене и благодаря Бога, работая неверным со всяким усердием и со смирением и кротостию, и воздержанию многу обучая себе, сна же мало приемля, и всякия добродетели прилежно касаяся, и из уст поя псалмы Давыдовы, ихже помня, и биет ратники Iсусовою молитвою, по писанному: не обрящеши бо, рече, крепчайши того оружия ни на небеси, ни на земли. Невернии же, имже служаше Василий, видяще его в таковом устроении, дивятся многому разуму, и добронравию, и правде, и нелицемерным трудом его, и смирению, и на всяку страду без хулнаго роптания, и послушание, и во всем беззлобие, и непрекословна послyшателя, повелевают Василию во ослабе жити и страде не касатися. О изведении из плена блаженнаго Варсонофиа, Казанскаго чудотворца, и о пришествии во обитель, Андроникову зовомую, в нейже и пострижеся в монашеский образъ.
Глава 12. Егда же трие лета преидоша в плене Василию, тогда Божиим смотрением приходит в неверных землю иерей Василий, отец Василиевъ, и искупует его от плена и тако возвращается Василий в Российскую землю, извык до конца бесерменский языкъ, и граммоту срацынскую, бе бо глубок ум имея. И прииде в пресловущий град и великий царствующий Москву, и входит в монастырь зовомый Андрониковъ, и отлагает власы главы своея, вкупе же соотлагает и мирская вся мудрования, и бывает зовом Варсонофий; изящно же бе доволен и книжному учению, и божественному гласованию; и помнит в божественном писании лежащая: яко здесь убо и злая и благая конец имутъ, будущая же вечна и безсмертна, и во веки не имут конца; и проходит добре монашеская натрижнения, яко и самодержцу царю знати его, монашескаго ради труда и добронравия; и бывает достоин пасти Христова стада словесных овецъ. О произведении во игуменство Варсонофиа, епископа Казанскаго, чудотворца.
Глава 13. Посылается самодержцемъ, и благословляется святителемъ, хранити путь, иже вводит в некончаемое блаженство царства небеснаго; и бывает полконачалник Христовым воиномъ, игумен и отец чадом честныя обители, иже на Песноше, великаго во святителях и всемирнаго ко Христу молебника Николая, безпрестани аки реки милостивых чудес изливающаго; и оттоле водим водящим в радость безконечную, и ключимь бывает на составление паствы новыя. О послании архимандритом в Казань святаго отца Варсонофиа, Казанскаго чудотворца, и о создании от него обители боголепнаго Преображения Христова.
Глава 14. И повелеваемь бывает благочестивым царемъ, и святителемъ, быти архимандритом боголепнаго Преображения Господа и Бога и Спаса нашего Iсуса Христа, и составити обитель новую в новопросвещенном граде Казани; еже и бысть: Христовою благодатию, и по благословению преосвященнаго Гуриа архиепископа, монастырь сооружаетъ, и церкви созидаетъ, и келлии поставляетъ, и до ныне убо Богом соблюдаем младеет и распространяется, яко древо при водах благолиственно и доброплодно; приносит же убо не яко древо тленен плод и единем временем кончающся, но нетленен и безконечен плодъ, от негоже и хвала Творцу возсылается: святыя, глаголю, святители и преподобныя монахи, ихже имена в книгах животных написана суть. Да не зазрит ми кто о словеси семъ: видех бо во святей обители сей, не токмо сих святых телеса нетлением почтени от Бога, но и монаси и мирстии нетленни мнози обретошася, еще же и святаго града Иеросалима благоволи Бог святому мужу и преподобному Епифанию, архиепископу монастыря святыя Голго?ы, в той же честней обители положитися. К преподобному же святителю Гурию Варсонофий архимандрит имяше во всем послушание, и духовный союзъ, и любовь нелицемерну, и во всем повинуяся и совопрошаяся, и с молитвою и со благословением его вся творяше; постом же и молитвою, и слезами и бдениемъ, и всенощным стоянием тело свое удручая; ношаше же преподобный Вароонофий и вериги на теле своемъ, никомуже ведущу. И бысть во всем образ братии к добродетели, монахи наставляя, и мирския поучая, и неверныя приводя во Христову веру, бе бо, якоже и преди рекохом навык писанию срацынскому, и мухамедова скверная предания срацыном добре ведый, и языками многими ведяше глаголати, и стязаяся с неверными, и укоряя ихъ, и препирая, и ко крещению приводя, уча и наказуя веровати во святую Троицу, Отца и Сына и Святаго Духа; всякому бо делающему благое Бог помогает на благое, якоже рече некто от древних святыхъ: благодарение, рече, приемлющаго подвижет дающаго, яко и болша дарования подати ему. О поставлении во епископство блаженнейшаго отца Варсонофия славному граду Тфери.
Глава 15. Потом же Божиим смотрениемъ, по повелению самодержца государя царя и великаго князя Иоанна Васильевича всеа России, в лето седмь тысящь седмдесять [1] А?анасиемъ, митрополитом Московским и всея России, поставляется на епископство славному граду Тфери, на Акакиево место преподобнаго епископа, сему убо ко Господу отшедшу: жившу на епископстве сорок летъ, и добре Богу угодивъ, преставися. Сему же преподобному Варсонофию еще диакону сущу у преподобнаго Акакиа живущу ему, якоже сам поведа учеником своимъ, и многащи к нему Акакию глаголати, за многая лета преставления своего: яко быти тебе, рече, Варсонофие, зде Тфери епископом по моем к Богу отшествии и правити люди Божия; еже и бысть. И добре пасяше словесное стадо Христовых овецъ, паче убо и паче протяг усердие к подвигу, и множа умножи талант господина своего, и пребывая в посте и молитвахъ, и слезахъ, и во всенощном стоянии молитву принося выну к Богу. И прият от Бога благодать разсуждения; разсуждение бо, рекоша отцы, корень всем добродетелемъ. К сему же и врачебней хитрости преподобный Варсонофий искусен бе, и во имя Господне многия болящия телесне уврачева, еще жив сый, мзды же не приемля, якоже и прежнии святии врачеве не приемляху мзды, но туне врачеваху: кая бо потреба, рече, та стяжати, яже не можем с собою взяти; болных же паче врачеваше Духа Святаго благодатию душевныя страсти, врачь бо бе искусен по Господни благодати обоим сим врачеваниемь; псалмы же Давыдовы непрестанна бе молитва к Богу из уст его; ручное же бе ему делати клобуки гречестии, еже ношаху святителие; то бо делаше, и посылаине братии своей, и моляше их молити о нем Бога, то бо бе за рукоделие нетленная мзда ему. О преставлении преблаженнаго великаго архиереа Варсонофия, епископа Тферскаго, Казанскаго чудотворца.
Глава 16. Егда же бе преподобный Варсонофий во глубочайшей старости, оставляет паству, и преселяется паки в созданный им монастырь, во обитель боголепнаго Спасова Преображения, ея же сам состави, в ново просвещенной град Казань; и паки касается делу своему, емуже бе обыклъ, угождая Богу постомъ, и молитвою, и бдениемъ, и милостынею, и всенощным стояниемъ, и труды ко трудом прилагая; и возлагает на себе великий образъ. Скорбию же многою преподобный и болезнию дряхлствуя другим бываше, правила же своего не пременяше никогдаже; к церковною пению старости ради и многих ради болезней не можаше уже ходити, но ученицы его к церкви вожаху его на колесцахъ, дондеже изнеможе зело, и нача конечно болети; и познав от мира сего отшествие свое к Богу, и причастився божественных и животворящих Христовых Таинъ, отъиде ко Господу, егоже возлюби. Преставися же преподобный Варсонофий, епископ Тферский, в лето 7084 [1576], априлия месяца 11 дня, на память священномученика Антипы, епископа Пергама Асийскаго, и погребен бысть честно в созданем от него монастыре, боголепнаго Спаса Господня Преображения, архиепископом Тихоном первымъ, по числу же пятымъ, близ преподобнаго Гуриа архиепископа. Тогоже лета, иуниа в 14 день, архиепископ Тихон ко Господу отходитъ, и повеле положити себе в монастыре святыя и живоначалныя Троицы, иже внутрь града Казани близ двора архиепископля. И о сем до зде. Месяца октовриа в 4 день сказание о обретении мощей, иже во святых отец нашихъ, Гуриа перваго архиепископа Казанскаго, и епископа Варсонофиа Тферскаго, Казанских чудотворцовъ, в лето 7104 [1595].
Глава 17. Божиим изволениемъ, повелевает благочестивый государь царь и великий князь ?еодор Иоанновичь всея России самодержец в монастыре воздвигнути церковь каменну боголепнаго Спасова Преображения. И егда начаша рвы копати, тогда гробницы каменныи, иже беша над гробы святыхъ, преподобнаго Гуриа архиепископа Казанскаго, и Варсонофиа епископа Тферскаго, повелеша сняти, золожена бо бе новая церковь болши первыя; и егда доидоша до целбоносных гробов преподобных отецъ, октовриа в 4 день, тогда поведаша мне смиренному. Нам же со всем освященным собором принесше Господу Богу безкровную жертву, и певше панихиду, и шедше в монастырь, приидохом на место, и поклонихомся нетленным гробом преподобных отец Гуриа и Варсонофиа. И вскрывше гроб Гуриа архиепископа, и видехом дивно, еюже не надеяхомся, рака бо бе святаго полна благоуханна мира, мощиже святаго Гуриа оки губа ношахуся, части же ни единой погружене бывши: нетлением бо одари Бог честное и многотрудное его тело, яко и ныне зрится всеми, токмо мало верхния губы тление коснуся, протчия же уды его целы быша; мне же недостойному многогрешною моею рукою святаго телеси коснувшуся: святое же тело его бе плавая; осязахом же и погребалныя ризы его, и бяху крепка зело; покусихомся же и мантии его, и прочей погребалной одежды его зелно потягнути, и быша новых крепчае; в главах же у преподобнаго Гуриа лежаше клобук греческий вязен недовершенъ, о немже поведают Варсонофиевы ученицы, яко той клобук делаем бе преподобным Варсонофием преосвященному Гурию архиепископу, и егда Гурий архиепископ преставися, тогда Варсонофий положи во гроб Гурию в возглавие клобук той не довершенъ; нам же соборне смотрившим клобук той, и едину прядь из него вземше, и едва преторгнуша, всяко бо новаго крепчае бе; благоуханное же честное и святое миро устроиша в сосуд новъ; православнии же христиане, монаси и мирстии, и жены и младенцы, мажущеся святым тем миромъ, исцеления неоскудна приемляху. Потом же открыхом раку преподобнаго Варсонофиа, и видехом многим нетлением почтени от Бога мощи святаго Варсонофиа, к ногам же преподобнаго тление коснуся, но обаче не токмо кости неразрушены, но и крепки бяху зело, и никакоже слабости в составех имуще, якоже и Гурию святителю, своими бо руками с Арсением архимандритом святыя их и чудотворныя мощи преложихом от гробов в ковчеги, и погребалныя ризы, такожде яко и Гурию, преподобному Варсонафию новых крепчае. Мы же неизреченному человеколюбию Божию дивящеся, со слезами и радостию певше надгробная над преподобными отцы, и поставихом их на верху земли, да вси приходяще видятъ, и дивящеся славят Бога, прославляющаго святыя своя, и целуют с верою честныя и святыя их мощи. Два же монаха Иона и Нектарий, иже к Гурию архиепископу веру несумненну держаста, и во единой гробнице положистася с нимъ, о нихже прежде речено бысть, тии такожде многим нетлением почтени быша, и ризы их не истлеша; и над сими такожде надгробная певше, земли предахомъ. Возвестихом же о сем государю царю самодержцу великому князю ?еодору Иоанновичу всея России, и святейшему Иову патриарху Московскому и всея России, писанием со архимандритом Арсением тояжде святыя обители. Святый же царь, и святый патриархъ, и весь царский синклитъ, и множество благочестивых воздаша о сем славу Богу, яко неверныя люди в веру привели, и устроили веровати, и покланятися единому в Троице славивому Богу, и святым крещением просветили, и яко неплодную землю, доброплодну сотворили, и в Троице славимый Бог преподобных сих святителей нетленны показа. Благочестивый же самодержецъ, и святый патриархъ, повелеша хранити честныя их и многотрудныя и многоцелебныя мощи на верху земли; и у болшия церкви, со южныя страны олтаря, повелеша церковь создати, и ту поставити мощи святых отец наших Гуриа и Варсонофиа, еже и бысть. Болшая же церковь благолепнаго Спасова Преображения, милостию в Троице славимаго Бога, и молитвами Пресвятыя Владычицы нашея Богородицы и преподобных отец наших Гуриа и Варсонофиа молитвами, изрядна и прекрасна лепотою устроися о пяти главахъ, величеством же и красотою малым чим недостаточествует церкви Пресвятыя Богородицы, честнаго и славнаго ея Одигитрия, иже в девичи монастыре в Новомъ, близ царствующаго града Москвы. Егда же убо благоволением Божиим обретошася мощи, иже во святых отец наших Гуриа, перваго архиепископа новопросвещеннаго града Казани, и Варсонофиа, епископа славнаго града Тфери, тогда начаша бывати многа и различна чудесная исцеления от святых мощей их с верою приходящимъ. И приставиша хранити четырех монахов благоговейных и богобоязливыхъ, Псалтырь говорити над святых мощами. Конец житий святых чудотворцов казанскихъ. Примечанiе: [1] Здесь в рукописи пробелъ. |
