ПРИСЯГА

Хотящим взыти на степень священства утвержденное присяге изложенное,

святейшаго Иоакима патриарха Московскаго и всея России.

Печатным тиснением в Московской типографии издася,

от по плоти Рожества Христова, в лето 1679-е.

Cм. библиографию.

Аз, нижеименованный, верую и исповедую восточную и великороссийскую святую Церковь, в ней же ныне пребывает всепресветлейшая державнейшая великая государыня наша и госпожа, и царица София Алексеевна, сущу истинну и православну во всем едину такову же как изначала от самого святаго Христа, и апостол Его, и святых отец соборами утвержену. ибо она никаких в себе ересей и расколов сопротивных Богу, и нововводств не имеет, и тако во всем ю чисту и непорочну быти, верую и приемлю.

Верую и приемлю, целую, и лобызаю и проповедую предание истинное быти от великороссийских наших архипастырей. Знамение честнаго креста воображати на лицах своих первыми тремя персты, яко сие есть древнейшее апостольское и святых отец предание, верую и приемлю.

Верую, приемлю, проповедаю в священной службе на проскомидии полагаемы быти пять, а не седмь просфир. Печать же на просфирах имети животворящаго святаго креста четвероконечнаго, а не осмиконечнаго тисканием, яко же в лепоту имеет святая греческая восточная церковь, верую и приемлю.

Верую, приемлю и проповедую, яко имя Господа Спасителя нашего Христа, и того двумя письмы тако пишемы и глаголану быти Iисус, яко оно имя Пречистей Богоматери Деве в благовестии архангел Гавриил от Бога с небес на еврейском языце снесено предаде, верую и приемлю.

Верую, приемлю, учу проповедаю иже на псалмех и всюду где в предании церковнем, святая аллилуия пети и глаголати с приглашением слава Тебе Боже не по дважды, но по трижды, ибо тое самое сущее предание святыя церкви древлевосточныя, верую и приемлю.

Верую, приемлю, учу и проповедаю иже ныне все догматы же чины и обряды церковныя (пишемыя) писанныя великия, и не писанныя, мелкия дробности, в восточней и в великороссийстей церкви держащияся, без сомнения и суть православни от святейших архиереов наших в душеспасительную пользу всему великороссийскому народу уставлены, верую и приемлю.

Обещаюся всею моею душею, и всем сердцем, свидетельствующу ми совести обещания моего, кленуся пред всемогущим моим Богом, и святым Его евангелием, яко знамение честнаго креста воображати буду всегда тако полагати на лицах своих первыми тремя персты, а не двумя по раскольнически.

Паки же обещаюся Богом и кленуся, что на проскомидии в служении литургии всегда имети и полагати буду пять, а не седмь просфир, и воображати на них печать образа святаго четвероконечнаго креста, тако же паки и паки от всего сердца моего тем же живым моим Богом кленуся.

И обещаюся, яко имя Господа Спасителя моего как народу проповедывать обещаюся так и самому глаголати, и писати не Iсус, но Iисус, утверждати буду, и во артикул втораго чина точно тако глаголати и во единаго Господа нашего Iисуса Христа и протчее, тако всем сердцем, и душею в Того Iисуса, а не в Iсуса, ниже поименованный верую я.

Кленуся же я пред Богом моим и обещаюся иже по псалмопениях и всюду глаголати и пети буду и люди учить святая божественная аллилуйя не по дважды с приглашением слава Тебе Боже, но по трижды пети, и глаголати, Восточная церковь яко же изначала содержит трижды.

Обещаюся же и кленуся всемогущим Богом, не инако в служении буду себе управляти, или благословение народу рукою моею подавати, но тако во всем яко же и сам приях от отец отцем господина архиерея моего (имярек) просвещати данныя ми люди от него, круг купели к солнцу ходити лицем, благословляти купель, трапезу, люди и протчее, потребнаго старца устава Малакса, такоже и вся иже писанныя, и неписанная мелкости, и великая предания греческия, святыя Восточныя церкви, и великороссийских наших пастырей учение, со именною клятвою моею держати приемлю и обещаюся.

Проклинаю тех, котории не знаменаются тремя персты, а знаменаются двема персты указательным и великосредним, и инех знаменоватися тако научиша и ныне учат, да будут прокляти и анафема.

Проклинаю тех, которыя служат божественную литургию, и полагают на безкровней жертвеннице седмь а не пять просфир не приемлют тискати на совершение тела Христова хлеб, святаго четвероконечнаго креста Христова, да будут прокляти и анафема.

Проклинаю тех иже не приемлют имя глаголати Господа нашего Спасителя Iисус, а глаголют Iсус, и глаголати иных учат, да будут прокляти и анафема.

Проклинаю иже по псалмопениях и всюду поют и глаголют трисвятую песнь, божественныя аллилуия по дважды с приглашением слава Тебе Боже, а не по трижды. Такожде пети и глаголати, и иных учат, да будут прокляти и анафема.

Проклинаю всех иже которые святый и четвероконечный крест не нарицают Крестом Христовым, а порицают его печатию антихристовою, да будут прокляти и анафема.

Проклинаю тех, которые не приемлют триперстное сложение чрез Iисус Христос кратчайше пяти перстное благословение, пяти просфорное служение, против солнца в крещении, в бракосочетании, в церквеосвящении, и инде хождении, и обряды яже имать, Матерь наша Великороссийская Церковь, и нарицают то еретическим преданием, а не святыя древле восточныя церкве законоположение. Тако тии глаголющии еретицы, да будут прокляти и анафема.

Проклинаю тех которые святейшаго Никона патриарха Московскаго не нарицают православным, а нарицают его святыя веры отступником и еретиком, да будут прокляти и анафема.

Проклинаю тех, иже по Никоне бывших Российских патриархов, митрополитов, архиепископов, архимандритов, игуменов, протопопов, и попов, и весь освященный чин нарицают не православными, а порицают их еретиками и отступниками святыя веры, да будут прокляти и анафема.

Аз же проклинаю расколоначалников и отступников бывших, и смутителей церковных: Аввакума протопопа, Никиту Пустосвята, Лазаря попа и лжемонаха Сергия, и с прочими последователями. И кто их почитает страдальцами и мучениками а не отступниками святыя Церкве, и не проклинает их, да будут прокляти и анафема.

Тако же да и все их расколы отступства разных их толков, иже святей Божией Церкви не покаряются, от них же мало воспомянувше, а именно: поповщина и беспоповщина, перекрещиванцы, дияковщина, марильщики, ануфриевщина, софонтиевщина, спасовщина, феодосиевщина, нетовщина, и лысовщина, и всех их богоотступных и разных толков и учителей их потаенных, и скверных попов, старцев, и старец и простых мужиков, их послушающих им. жительствующих за границею в Польше, в Литве, в Болохах, и иже зде внутрь России крыющихся в брынских лесах, в пустынях, в слободах, в Поморьи, на Керженце, в чернораменских лесах, иже в градех и селех, на Дону и Астрахани, в Володимере, в Москве, и в Нове граде, и всюду внутрь Государства Российскаго крыющимся и не подчиняющихся православным нашим архиереом, и всех тех богомерских еретиков и отступников от святыя нашея христианския веры, и богохульников с последующими их прелестям, и с самою тою прелестию тех, и з богомерским учением, проклинаю тако, да будут прокляти и анафема.

Сия же мною глаголанная исповедания присяги, обещания и клятва, ей, ей, истинно по залогу души моея, и от всего ума моего и от всего залога моего сердца, и от всея крепости мыслей моих, ибо что помышлях то и глаголах обещахся, и проклинах не ино бо глаголах и ино во уме моем помышлях, но в той единой силе и разуме яже, мыслих, то и глаголах исповедание языком и усты моими утверждах.

А ежели я, нижеименованный, вышеписанное глаголах и обещахся вольности оныя помянутыя и иности, а раскольников проклинал лестно и ложно, и слово мое было не согласно уму моему, или како развращуся во ин след, от господина архиерея моего и возненавижу на главе моей благословения и повеления его, или сопротив стану еже не послушати Матери нашея святей Церкви предания, в чем или како сопротив буду Российским архипастырям нашим, или хотя мало что; в служении церковном не согласен буду господину архиерею моему и сице всяко мерами приметаяся тайно или явно ухищряяся и употребляя буду, в чинах же церковных и в догматех учения и повеление инокое святей Божией Церкви сопротивное, и тако в чем либо в малом противу сего обещания, обещанию и клятве явлюся ложь, то ныне да приидут на мя святых отец вся соборныя клятвы, зде в животе трясение Каиново, проказа Гиозиина, Феофилово томление, Июдино разлияние. Тако да извержется зле душа моя всенужно и всеокаяно, и отдастся в руце лукавых бесов, а зде еще о сем себе повинна подвергаю гражданскому суду и казни, чему буду достоин, без пощады, а и тамо на том свете да буду я проклят же и анафема, и препроклят. Железо, камение, древеса да разрушатся и да растлятся, а я да пребуду со Июдою и с жидовы Христа распеншими не разрешен и с самим сатаною и с бесы его в геене огненней, и со Арием богохульным и прочими еретиками тьмопроклятыми буду аки тимпан с душею мучитися вовеки веков, аминь.

В заключение сих и всея моея присяги обещания же и клятвы, аз, имярек, целую Крест и слова Спасителя моего.