Постниковский летописец

К оглавлению тома.

OCR по Полное собрание русских летописей, т. 34, М., 1978, стр. 8 - 30.
Деление на страницы сохранено. Номера страниц проставлены вверху страницы. (Как и в книге.)

-8-

|л. 1| Того же лета приидошя на Москву послы литовские от короля Александра пан Петр Мнишковской, воевода лянчинской, да пан Ян Бузчатской, староста межигожской, поддиячей кралества Польского ^а), да Петр Дроциновской, стольник краковской и конацик познанской ^б), секретарь королевской, да князь Станислав Горенской. А литовские послы пан Станислав Глебович, наместник полотцкой, да Войтих Янович Намекодетской, да писарь Ивашко Сопежич. И взяшя с великим князем Иваном перемирье на 6 лет, и грамоты мирные переписашя. Тоя же весны апреля в 16 день преставися благоверная великая княгини Софья, великого князя Ивана Васильевичя всеа Русии. Тое же весны майя в 7 день отпустил ^в) князь велики к зятю своему х королю Александру окольничего Петра Михайловича Плещеева да Констянтина Григорьевичи Заболотцкого, да Михаила |л. 1 об.| Кляпика, да дияка Губу Моклокова о перемирье. Того же лета соборовал Симон митрополит всеа Русии с архиепископы и епископы, что от ставления у попов мзды не имати, ни вдовцем попом и дияконом не служити; а на том и грамоту утвръженную написали да и руки свои и приклали, и печать привесили.
Лета 7012 священа бысть церковь святого архистратига Михаила и честнаго его чюдеси. Того же лета нояб[ря] преставися княгини Ульяна княж Борисова Васильевича. И тогда князь Федор Борисович, сын ея, женился после ея. А брат его меньшей князь Иван Борисович розболелся на свадьбе его и преставися. Месяца сентября в 21 день князь велики Иван и с сыном своим с великим князем Васильем выехав с Москвы да был у Троици в Сергиеве монастыре, а оттоле в Переславле да и в Ростове, да и вь Ярославле. И приехал на Москву ноября в 9 день. Того же лета |л. 2| уставиша на Москве решетки. Того же лета сведен со архиепископьи ноугородцкие Генадей и приведен на Москву за то, понеже бо чрез свое обещание советом единомысленого любовника своего дияка Михаила Иванова сына Олексеева гостенка, приехав с Москвы, начат у священни­ков от ставления мзду имати паче перваго. И велел князь велики ему жити у Михайлова Чюда. Он же пребысть полтретья году и преставися.
Лета 7013 князь велики Иван со отцем своим Симаном митрополитом и сь епископы обыскашя еретиков Волка Курицина и его товарищев Митю Коноплева да Ивашка Максимова и сожгошя их декабря в 27 день. А Некрасу Рукавову повелешя язык урезать и в Новегороде в Великом сожгошя его. Тое же зимы юрьевъского архимандрита Касьяна да брата его Ивашка Самочерного, да Гридю Квашню, да Митю Пустоселова и иных еретиков сожгошя, |л. 2 об.| а иных в зато­чение, а иных по манастырем розослашя. Тое же весны майя в 21 день повелением великого князя на Москве на площади розобраша старую церковь великого Михаила Архангела, юже созда князь велики Иван Данилович, и в том же месте заложишя новую церковь. Тогда же и другую церковь Иван Лествичник розобрашя. И на том месте новую церковь заложишя. Тое же весны прислал к великому князю Ивану царь Магмед-Яминь казанский з грамотою о некоих делех городового князя Шаинс-Усуфа. И князь велики по своему крепкому слову послал к нему о тех делех в Ка­зань посла Михаила Кляпика да Ивана Брюха Верещягина сына Блеклого, чтобы он тем речем всем не потакал. Того же лета июня в 24 день царь казанский безбожный зловерный Магмед-Аминь, преступив шертные грамоты и клятву, в Казани посла великого князя Михаила Кля­пика |л. 3| поймал да Ивана Брюха Верещягина сына Блеклово, а гостей и торговых людей перегра­бил и избил, много крови крестьяньския пролиял, безчислено было много людей изо всех горо­дов Московского государства. А такова крестьянская кровь не бывала, как и Казань стала. А Брюха в Чагадай сослал, тамо и скончася. Тое же зимы генваря в 18 день преставися великая княгини Ивана Ивановича Елена Волошянка в нятстве.
Лета 7014 сентября в 4, в четвертый ^г) князь велики Иван женил сына своего великого князя Василья, а взял за него дщерь боярина своего Юрья Констянтиновича ^д) Сабурова Соломанию.
_________
^а) В рукописи Подского с выносным д.
^б) В рукописи дозананской с выносным з.
^в) В рукописи подмочено.
^г) Так в рукописи.
^д) В рукописи Констяниновича,

-9-

Того же месяца сентяб[ря] приходи царь Магмед-Аминь казанской под Новгород Нижней и стоял под городом два дни, а городу не успе ничтоже, а на третей день прочь поиде. Тое же осени октября в 27 день в 1 час нощи преставися благоверный христолюбивый великий князь Иван Василь|л. 3 об.|евич, всеа Русии, был на государстве лет 43 и 7 месяць, а всех лет поживе 66 лет и 9 месяць. А сынове его: князь великий Иван Молодой от великие княгини Марьи от тверянки, от другие его от ве­ликие княгини от царевны от Софьи от римлянки дети: князь Василей, князь Юрьи, князь Дмитрей, князь Семен, князь Андрей. И по великом князе Иване на великом княженье седе сын его старейший князь велики Василей. Тое же осени дек[абря] в 21 день крещен бысть царевич казан­ский Кудакул Абреимов сын, а новокрещенное имя ему Петр царевич Абреимов сын царя ка­занского. И дал за него князь велики сестру свою великую княжну Евдокею. Тое же зимы генваря в 15 день Симон митрополит поставил Серапиона архиепископа Новуграду и Пскову, Сергиева монастыря игумена. Того же месяца в 18 день поставил Васьяна архиепископа Ростову, симановского архимандрита. Того же лета майя послал князь велики под Казань брата своего князя |л. 4| Дмитрея Ивановича и воевод своих на казанского царя Магмед-Аминя Абреимова сына в судех и полем. И прииде князь Дмитрей Иванович судовою ратью под Казань майя в 22 день. И выидошя из судов на поле городное с небреженьем и поидошя ко граду пеши. И татарове про­тив их из града поидошя, а иные татарове заехашя от судов на конех потаенные. И бысть бой. И грех ради наших побита татарове воевод пеших и детей боярских, кои были на поле, а иных поимаша. А иные мнози истопошя на Поганом озере. А Дмитрея Шеина в городе казнили июня в 22 день, не дожидаяся князя Данила Холмьского, которые люди с ним князь велики на помочь послал. Через великого князя указ князь Дмитрей учял к граду приступати с небрежением, и сами же побеждени бышя от татар. Того же лета августа преставися зять великого князя князь вели|л. 4 об.|ки литовской Александр Ондреевич. И седе по нем на великом княженье Литовском брат его Жидимонт.
Лета 7015 октября в 1 день священа бысть церковь в граде Москве камена Никола чюдотворець Гостунской. Того же лета марта прислал к великому князю к Василью царь Магмед-Аминь казанский человека своего Абдулу з грамотою, чтобы его князь велики пожаловал, проступку ему отдал, а с ним бы мир взял. И того же месяца в 25 день князь велики со царевым человеком отпустил в Казань к царю Алексея Лукина, чтобы посла его Михаила Кляпика с товарыщи от­пустил. И царь с Олексеем к великому князю прислал бакшея своего Бозека з грамотою, чтоб князь велики пожаловал, взял с ними мир и дружбу по старине, как была с великим князем с Ываном, а посла его с товарыщы часа отпустит. И князь велики, приговори з братьею и з бояры, проступку его ему отдал и з бакше|л. 5|ем сь его отпустил к нему вместе диака Елизара Сукова, чтобы он посла Михаила Кляпика отпустил, а о миру бы прислал доброго человека. И казан­ский царь Махмед-Аминь посла великого князя Кляпика отпустил того же лета и иных с ним. И прислал к великому князю Бараш сеита о миру и о братстве и о дружбе. И князь велики взя с ним мир и братство и отпусти к царю посла своего окольничего Ивана Григорьевичи Морозова да дияка Олексея Лукина в лето 7016 сентября в 8 день. Того же месяца сентября в 14 день послал князь велики Василей воевод своих князя Данила Васильевичя Щеня да Якова Захарьичя к Мстиславлю Литовские земли воевати. Тое же зимы отъехал от короля на Москву служить к вели­кому кпязю к Василью князь Михайло Глинской. И князь велики его пожаловал, принял в службу и сь его братьею. Тое же весны |л. 5 об.| априля в 30 день князь велики отпустил воевод своих Якова Захарьичя и иных воевод Литовские земли воевать. Они же бышя блиско Вильны, пленующе и жгуще и секуще. И король Жидимонт поиде сам против их к Орше, а от Орши к Смоленску. Воеводы же по великого князя приказу отступишя к Брянску. И король ис Смоленска к вели­кому князю о опасе на посла своего. И князь велики опасную грамоту на посла дал королю. Того же лета ногайские мурзы прислашя к великому князю послов своих бити челом, чтоб их пожаловал, велел ногайским гостем ездить к Москве с коньми и со всяким товаром. Тое же весны майя в 7 день вшел князь велики Василей в новой двор в полаты каменые и с великою княгинею Соломаниею жити, что отець его князь велики Иван заложил. Тоя же весны повеле князь велики подписати Благовещенье на своем |л. 6| дворе златом и иконы все велел облажити серебром и златом, а верх церковный позлатити. Того же лета была засуха велика в Новегороде, половина го­рода, Торговая сторона, выгоре. А людей згоре 2000 и семьсот. Того же лета князь велики Васи­лей Иванович велел заложити Новград Нижней камен.

-10-

Лета 7017 сентября в 19 день приидошя к великому князю послы пан Станислав Глебович, воевода полотцкий, да пан Иван Сопежич моршалко, да Войтех Нарбутов моршялко, да писарь Ивашко Богданов Сопежича от литовского короля Жидимонта о миру. И князь велики сотвори с ним мир, и докончяные грамоты написашя. А князя Василья Ивановича Шемяку да князя Василья Семеновича Стародубского и Новосильских князей, и Одоевъских, и Воротынских, |л. 6 об.| и Бельских, и Трубетцких, и Мосальских и сь их вотчинами написал князь великий в свою сто­рону на всей своей воли. А князя Михаила Глинского князь велики пожаловал, дал ему в вот­чину Ярославець, а Боровеск в кормленье. Тое же осени ноября священа бысть церковь на Москве Михайло Архангел ^е) на площяди. Тое же осени ноября поймал князь велики князя Ва­силья Даниловича Холмъского, в тюрьме и преставися на Белеозере. Того же месяца ноября в 26 день послал князь велики в Литву х королю Жидимонту о миру и о докончании боярина своего окольничего Григорья Феодоровичя Давыдовича, наместника новгородцкого, да конюшего своего Ивана Ондреевичя Челяднина, да сокольничего своего Михаила Ондреевичя Кляпика, да дияка Митю Губу Моклокова. Тое же зимы февраля в 14 день |л. 7| князь велики Дмитрей Иванович внук в нужи преставися в тюрьме. Тое же зимы сведен бысть со архиепископьства с новугородцкого Серапион того для, что Осифа не благословил за то, что он от князя Федора Борисовичя ^ж), от волоцкого князя, великого князя с монастырем отъехал.
Лета 7018 сентября в 23 день поехал князь велики Василей Иванович в вотчину свою в Ве­ликий Новгород. А с ним братья его князь Андрей Иванович Меньшей да Петр царевич, да вла­дыка коломенской Митрофан, да архимандрит симановской Варлам. Да в Новегороде велел князь велики псковских посадников переимати за то, что наместников его нечестно дръжат. Да послал во Псков, велел и колокол вечной свесити. Да и самтогды князь велики был в вотчине своей во Пскове, а Псков привел в свою волю генваря в 24 день. И пскович |л. 7 об.| поиманых выпустил ^з), к Москве свел их жити. Да пожаловал тогды Псковом боярина своего Григорья Федоровичя да Ивана Ондреевича Челяднина. Того же лета июня в 21 день прииде на Москву царица Нур-Салтана крымского царя Минли-Гиреева да с нею царевич Минли-Гиреев сын Аип-Кирей салтан. И князь велики встретил ее честно з бояры. А от царя Минли-Гирея послы к великому князю Шихотла Шихзода да Лагим-Берди дуванья. А приходила царица с своими детьми видетися со царем Абдыл-Литифом, что великому князю служит. А отпустил князь велики царицу в Казань августа в 20 день. А царевы послы осталися на Москве. А ко царю Магмед-Аминю послал князь велики посольством Ивана Кобяка.
Лета 7019 князь велики был и с великою княгинею в Переславле да и в Юрьеве, и в Суз­дале, и в Володимере, и в Ростове. Тое же зимы генваря сведал князь велики, что брат его князь Семен хотел бежать в Литву. |л. 8| И князь велики послал к нему дворецкого своего Василья Ондрее­вича да дияка своего Елизара Иванова сына Циплятева. А велел ему у себя быти и речь к нему свою жаловальную приказал. А печаловался о нем Симон митрополит и владыки. А бояр у него и детей боярских всех переменил. Тое же зимы априля в 30 день преставися Симон, митрополит всеа Русии. А бывшей архиепископ Великого Новаграда Серапион по великого князя посылке перед смертью был у него и простил его. Того же лета июня в 22 день прииде ис Казани царица Нур-Салтана на Москву. Того же лета августа в 3 день поставлен бысть на митрополью Варлам, архимандрит симановской.
Лета 7020 декабря в 5 день отпустил князь велики с Москвы в Крым царицу Нур-Салтану Минли-Гирееву цареву да сына ея Сап-Кирея салтана. А проводити ее послал до Путимля князя Ми|л. 8 об.|хайла Даниловича Щенятева. А к царю Мин-Гирею в Крым послал^и) окольничего Михаила Васильевичя Тучкова. Тое же зимы послал князь велики в Казань к Магмед-Аминю царю по­сольством окольничего Ивана Григорьевичи Морозова да диака Ондрея Храммова ^к) и грамоту шертную послал, на чом привести к шерти царя Магмед-Аминя. Тое же зимы февраля в 8 день прислал Магмед-Аминь к великому князю человека своего Бозюка бакшея, чтоб князь велики прислал к нему человека своего верного, а именно: писал о Иване о Андреевиче. А писал к вели­кому князю, что хочет ему сказати: которого для дела такое лихое дело учинил; а вперед хочет с великим князем в вечном миру и в дружбе быти. И князь великий посылал к нему в Казань
_________
^е) Написано неясно.
^ж) В рукописи Бовосолвичя.
^з) Написано на левом поле со знаком вставки.
^и) Написано дважды.
^к) Так в рукописи.

-11-

боярина конюшего Ивана Ондреевичя да диака Елизара Сукова. А речи большие были за Ива­ном. В марте Иван Ондреевич приехал к ве|л. 9|ликому князю ис Казани на Москву, утвердив со а царем мир неподвижим доколе бог даст. Того же лета приходили крымские царевичи, Мен-Гиреевы дети, Ахмат-Кирий да Бурнашь безвестно со многими людьми на великого князя украину на белевские и на одоевские, и на воротынские места, и на Олексин, а Бурнашь к Рязани. А наводил их король Жидимонт, преступив крестное целованье и докончанье. Того же лета июля Махмат, царевич крымской, пошел был на Рязань и послышел, что воеводы стоят великого [князя] ^л) на Осетре, и возвратися. А воеводы ходили за ними великого князя до Сернавы.
Лета 7021 октября Бурнашь царевич приходил на Рязань и острог взял, а граду не успе ничтоже, и отъиде. Тое же осени прииде весть к великому князю, что король приводил на вели|л. 9 об.|кого князя украину крымских царевичев. И князь велики послал к нему за то с розметными грамо­тами, а сам поиде к Смоленску ратью декабря и, много зла учинив, возвратися. Тое же зимы февраля преставися великая княжна Овдотья Петрова жена царевичева. Тое же весны майя преставися князь Федор Борисович Володцкой. Тое же весны июня в 14 день поиде князь велики Василей Иванович всеа Русии с Москвы в Боровск, а из Боровска поиде князь велики к Смоленску.
В лето 7022 город Смоленеск оступишя, а землю Литовскую пусту учинишя, и възвратися. На Москву пришел на веденьев день. Тое же зимы февраля прииде на Москву от цесаря римскаго Максимьяна посол имянем Юрьи Стницен Помер, царского величества съветник, о дружбе и о любви. И князь велики взяв с цесарем братство и любовь и докончанья и, почтив, отпусти его марта в 7 день. А к цесарю с ним |л. 10| послал князь великий своего посла Дмитрея Ласкирева, грека, да дияка Елизара Сукова. Тое же весны майя в 28 день прииде на Москву от турскаго салтана Салим Шагханди-Кирея из Царягорода посол имянем Келмалбех князь. Того же лета по благословленью митрополита Варлаама велел князь велики Василей понови[ти] и красити икону владимерскую пречистый владычица нашея богородица, иже написа святый апостол и евангелист Лука благоволением ея. И уставишя празник по вся лета ходити со кресты и со иконою пречистыя образом к Встретению в монастырь месяца майя в 21 день. Сию же чюдную икону принес из Царяграда благоверный князь Андрей Боголюбивый, сын великого князя Юрья Долгорукого Володимеровича Манамахова. И постави ю в соборной церкви в Володимере |л. 10 об.| в лето 6662, и стоя в Володимере 240 лет. По сем же в лето 6903 августа в 26 день повелением великого князя Василья Дмитреевичя принесена бысть из Володимера на Москву для нахожения безбожнаго Темир-Аксака. К сей же чюдной иконе князь великий Василей повеле зделати киот и украсити серебром и златом. Тако же и храм ея честнаго и славнаго ея Успенья повеле подписати. Тое же весны князь велики Василей повеле заложити и зделати церкви каменые и кирпичные на Мо­скве на Большом посаде Введение пречистые да Володимер Святый в Садех, да Благовещение святыя богородица в Воронцове, да в городе на своем дворе Рожество пречистые, у нея же при­дел святый Лазарь, да за Неглинною Леонтей, чюд[о]творець ростовский, да Петр, чюдотворець московский и всеа Русии, да на Ваганько|л. 11|ве Благовещенье богородици, да за Черторье Алексей человек божий в Девичье монастыре, да за рекою Усекновенье честныя главы Ивана Предтечи под Бором, да на Устретенской улице Введенье пречистые. Да того же лета поставишя церковь при ее животе кирпишную Варвару святую Василей Бобр з братьею с Вепрем да со Юшком Сурвихвостовым. А всем тем церквам мастер был Алевиз Фрязин. Того же лета Юрьи Бобынин у Фроловских ворот поставил церковь кирпишную ^м) Афонасей ^м) Святый Александрейский. Того же лета июня поиде князь велики в третьие ратью ко граду Смоленску, а с ним братья его князь Юрьи да князь Семен. И город Смоленеск взят месяца августа 1 день. И посадив нем наместника своего князя Василья Васильевичи Шуйского. Тогда же послал князь велики князя Михаила Глин|л. 11 об.|ского на Дрюцкие поля и иных своих воевод беречи от своего недруга отчины своей города Смоленска и иных мест. И князь Михайло Глинской тогды изменил, ссылался с королем и сам хоте бежати. И воеводы великого князя князя Михаила поймали и к великому князю прислали. А ко­ролевы воеводы тогды пришли на великого князя воевод безвестно по Глинского присылке. И бысть им бой под Оршею на Рожество пречистые лета 7023 месяца сентября в 8 день. И по гре­хом нашим великого князя воевод поймали князя Михаила Ивановича Булгакова Голицу и з бра­том да Ивана Андреевича, и иных многих. Тое же зимы февраля в 15 день поставлен бысть Иосиф,
_________
^л) В рукописи пропущено.
^м-м) Написано по счищенному.

-12-

архимандрит чюдовской, Варламом митрополитом на епископьство в Смоленеск. Тое же зимы отпустил князь велики турского посла Кемалабеха, а с ним |л. 12| вместе к салтану послал посоль­ством Василья Ондреева сына Коробова. А в Святую гору послал князь велики с милостынею Василья Копыла Спячего да Ивана Варавина. Тоя же зимы отпустил князь велики цесарева посла Якова Докторова, а с ним вместе послал к цесарю Алексея Григорьева сына Заболотцкого да дияка Елизара Сукова. Тоя же весны майя Мен-Гирея, царя крымского, в животе не стало. А по нем седе на царство в Крыме сын его Магмед-Кирей салтан. И того же лета августа великого князя посол окольничей Михайло Васильевич Тучков пришел ис Крыму. А с ним к великому князю пришел от Магмед-Кирея, царя крымского, посол Янчюра-Дуван о дружбе.
Лета 7024-го зиме прииде из Царяграда на Москву Василей Коробов. А Копыл с Варавиным осталися во Цареграде. Того же лета |л. 12 об.| марта в 16 день преставися Серапион, архиепископ Великого Новаграда, у Троици в Сергиеве монастыре. После святительства жил 6 лет. Того же, лета июня прииде к великому князю посол из Казани Магмед-Аминя царя бити челом великому князю, что сам царь Магмед-Аминь болен, и князь велики бы пажаловал его ради брата его Абдыл-Летифа царя, с серца сложил и из нятства его выпустил, учинил бы его на Казани царем. А Магмед-Аминь да и вся земля Казанская дадут великому князю правду, какову хочет, что им без великого князя ведома на Казань царя, ни царевича никакова не взяти, да и записи на том Шаусеин написал, на чом царю и всей земли дати шерты. И князь велики того посла отпустил, а в Казань к Магмед=Аминю послал с теми записьми окольничего Михаила Тучкова да оружни=чего Никиту Карпова, да диака Ивана Телешова. Они же ^н) |л. 13| шед в Казань, царя и всю землю на записех к шерти приведошя. И князь великий Абдел-Летифа царя из нятства выпустил и дал ему лета 7025 ноября город Коширу в своей земли.
Лета 7025 априля в 18 день прииде посол от цесаря и навышшего короля римского имянем Жидимонт от Максимьяна, моля и прося, чтоб его для князь велики изволил приехати к себе Жидимонта, польского короля, послом и с королем бы помирился, а кровь бы крестьяньская не лилася. И князь велики для цисаря с королем похотел миру, как пригоже быти, да и опасные грамоты на королевы послы велел дати. И цисарев посол Жидимонт опасные грамоты послал х королю с племянником сь Яном. А король того же лета посылал в Крым пана своего Ольбрехта Мартынова с великою казною к Менли-Гиреевым царевым детем, наводя их на крестьянство, на великого князя украину. Того же |л. 13 об.| лета августа по королеву совету приходили мурзы и татарове крымские на Тулу и на Безпуту, и на олексинские места. И божиим повелением тогда много побишя татар на Глутне на лесу и по селом, и по крепостей, и на бродех, а полон олексинской весь отполонишя. А приходило с крымскими мурзы 20 000. И яко же слышяхом о том от достоверных, паче же и от самех татар, что от 20 000 токмо их в Крым приидошя, и те пеши и наги, и боси. Того же лета февраля в 12 день Варлам митрополит поставил Генадья епископа в Суздале, архимандрита Рожества пречистые из Володимеря, а Сергия епископа на Рязани, архимандрита андрониковского. Тоя же зимы присылал к великому князю бити челом высокий маистр пружский Альбрехт, чтоб пожаловал его, оборонял от короля литовского Жидимонта. И князь велики его пожаловал, |л. 14| в одиначестве с собою учинил.
Лета 7026 король польский Жидимонт, умыслив своим лукавством, посла к великому князю послов своих по опасным грамотам Яна Щита да писаря Богушя, а сам пошол король в ту пору к Полотцку со всем нарядом, да ис Полотцка отпустил воевод своих к псковскому пригородку к Опочке князя Констянтина Острожского и иных многих воевод лятцких и литовских. И тогды их из города из Опочки наместник Василей Михайлович Салтыков под городом многих людей побил. И убишя литовского под градом под Опочкою большого ляцкого воеводу Сокола ^{о) - п)}. А передовово полку воеводы великого князя князь Федор Лопата да Иван Ляцкой в дву местех мно­гих литовских людей побита. В то же время прииде весть к Ивану к Ляцкому, что многие люди ляхово идут на по|л. 14 об.|собь королеву войску. И Лятцкой с товарищи шед против их, бьяшеся с ними. И уби лятцкие силы 4000, а иных живых пойма и пушки и пищали у них поотняшя и к большим воеводам послашя. И князь Констянтин Ос[т]рожский побеже вскоре от града от Опочки по­срамлен. Великого же князя люди гониша за ними, многих людей литовских побишя и все их направление взяшя. Князь же великий послов королевых Яна Щита и писара Богуша для брата
_________
^н) В рукописи х выносное.
^{о) - п)} В рукописи Ссокола. Далее текст писан более светлыми чернилами.

-13-

своего цесаря не вреди их ничем и к себе им не велел быти, а корм им давали. А как от Опочки Ос|т]рожской отступил, и князь великий, выслушяв речи у Королевых послов, отпустил их х королю ни с чем же. Тое же осени ноября в 18 день отпустил князь великий цесарева посла Жидимонта Гербенстеня к его государю. А с ним послал к цесарю диака Володиме|л. 15|ра Племянникова. Ноября в 19 день Абдыл-Летифа царя не стало. Тое же осени ноября приходили татарове крымские на путимльские места. И князь Василей Шемячич ходил за ними до Суды да многих татар побил, а иных живых поймав, послал к великому князю. Тоя же зимы марта пришел к ве­ликому князю на Москву из Царяграда от патриярха Фиолипта митрополит Григорей грек от града Жихна да старци от святыя горы Афоня милостыни ради. Того же лета бысть умножение дождем, много в реках воды бышя, болыпи вешних, и много жита и обилия истопошя грех ради наших. Князь же великий повеле митрополиту Варламу молебны пети со всеми соборы, а потом, помыслив с митрополитом, посласта во град Владимер |л. 15 об.| и повелешя священником Пречистые церкви соборные, молебны пев, принести иконы от Володимеря на Москву образ спасов вседер­жителя, образ пречистые богородици на устроенье и поновленье. И бысть дело вскоре. Тогда бысть князь велики в монастыре у Сергия чюдотворца, хотя итти на своего недруга на короля польского. Егда же приспешя святыя иконы к Москве июня в 2 день, и по митрополичью веленью крутицкий епископ Дософей со архимандриты и со игумены, и з священники всретиша их на поле. А сам митрополит со всеми соборы, с кресты и з святыми иконами стрете их у Устретенья монастыря. И ту, молебны пев и обедню совершив, поидошя во град, благодаряще бога и пре­чистую его матерь. И от того часа божиею милостию и молитва|л. 16|ми святыя богородица облачное темное небо своими тихиями благо и разстворено бысть, и ясно солнечныя заря изви с тепло­тою. Князь же великий и митрополит благодарная хваления воздашя Христу богу и пречистой его матери. И поновив святыя иконы, от многих лет сустаревшихся, и украсив их сребром и зла­том, отпустишя их в Володимер и проводишя их в 28 году. Того же лета месяца июня в 26 день преставися брат великого князя князь Семен колужской Иванович.
Лета 7027 на Федорове неделе, заговев, отпустил князь великий Василей брата своего князя Андрея Ивановича на удел на Старицу. Того же лета повеле розобрати князь велики внутри го­рода старую церковь Вознесенье, а новую заложил каменую. Того же лета священа |л. 16 об.| бысть церковь Леонтей чюдотворец за Неглинною. Того же лета поставлена бысть церковь Введение святыя богородица на Устретенской улице камена. Тое же осени Олексей чюдотворець многих людей простил различными недуги одръжими ^р). Того же лета Магмед-Аминя, царя казанского, в животе не стало. И князь велики посадил в Казани царя Шиг-Алея, городоцкого царевича Шивлеярова сына. Тое же весны жил князь велики в селе в своем в Острове от месяца майя до заговенья до Петрова. А, приехав на Москву, летовал в Воронцове на своем дворе. Того же лета был на Москве крымской посол князь Апак да Магмат пашя от царя Магмед-Гирея. И вельми их одарил князь велики. Того же лета посылал князь велики воевод своих князя Василья Василье­вича Шуйского и иных своих воевод на Литовскую землю ратью. Они же |л. 17| воевашя и пленишя многие места по самую Вильну и посторонь Вильны, и за Вильну. И возвратишяся, дал бог, по-здорову.
Лета 7028 князь велики Василей Иванович со отцем своим Варламом митрополитом отпу­стишя и проводишя святыя иконы, что принесены бышя от Володимеря на Москву на обновле­ние и украшение, яже многими леты обетшавшя; и обновивше их, украсишя лепо сребром и зла­том. И проводиша святыя иконы все народи московстии са посады, иде же поставишя церковь нову во имя пречистыя владычица нашея Богородица честнаго и славнаго ея Стретенья и прово­ждения, и уставишя сий празник празновати по вся лета сентября в 15 день. Того же лета совершися город на Туле камен. Тое же зимы февраля в 9 день постави архиепископа Ростову Иваня ^с) Варлам ^с) |л. 17 об.| митрополит. Того же месяца в 16 постави Пимина епископом на Вологде и в Пермь.
Лета 7029 преставися князь Дмитрей Иванович Жилка, брат великого князя Василья, углечской фев[раля] в 14 день. Тое же весны казанци сеиты и уланы, и князи великому князю Василью своея клятвы правду изменили, взяли собе и.з Крыму царевича Саип-Кирея царем в Ка­зань; а Шиг-Алея царя и с царицею ис Казани выслали; а великого князя послов и гостей, пере­грабив, у себя задръжали. Того же лета июля 28 день безбожный гордый крымский царь Маг-
_________
^р) Далее текст писан более темными чернилами, как и начало рукописи.
^с-с) Написано по счищенному

-14-

мед-Кирей забыл своея клятвы и правду, на ны воинствует, ни з дружбы с первыя, ни з даров безчисленых, ни клятв своих воспомянул, собрася своею братьею и своими детьми, и со всеми своими со многими крымскими людми, и Болыния Орды |л. 18| Заволжьския, и с нагаи, и вскоре без­вестно прииде на великого князя вотчину. И при березе Оки реки с воинством пришед. И ту убьени бышя воеводы великого князя Иван Шереметев да князь Володимер Курбъской Карамышов, да Яков да Юрьи Замятнины. И, преиде реку Оку, коломенския места повоевал и плен немал собрал, и на святыя церкви скверне поругался. И князя Федора Лопату ранена поймали, и оку­пил его Хабар Образцов под Переславлем в Рязани. А сам царь стоял на Коломне на Северке две недели. А сын его Салтан богатырь с татары был под Москвою в великого князя селе в Острове. И на Угреше монастырь ожгли и много сел и деревень пожгли, и коширской посад пожгли. И лю­дей много и скоту в полон поведошя безчислено. Благоверному же нашему государю великому |л. 18 об.| князю Василью зело оскорбившуся о бывшем и благоутробием ^т) своим ^т) на многия дни, о беде въсплакавшу и на дерзнутаго и на презирателя клятв иних дружбы помянувшя, на сведетеля бога поставив и своих людей крови отмщение ему на бога возложившу Скулфянина. И выиде князь велики с Москвы на Волок. И нача збиратися с воеводами своими и с людьми. И послышев то окаянный царь Магмед-Кирей и вскоре возвратися и з братьею своею, и з детьми, и со всеми своими вой во своя места полны крови крестьяньскими, не дожидаяся великого князя соб­ранья.
Лета 7030 майя в весне, яже по нахожении безбожнаго царя, воинство велико и многона­родно урядив, в 11 день месяца майя от царствующаго града Москвы князь ве|л. 19|лики и з своею братьею со князем Юрьем и со князем Андреем и со многими воеводами с великою силою подвижеся. И Коломну града достиг. И при березех Оки реки обоих стран устави великое воинство. И людей имал у воевод и у детей боярских в полк по списком, хто сколько возмог дати. И не вскоре возвратися во царствующий град Москву.
Лета 7031 декабря в 18 день Варлам митрополит оставил святительство, соиде на Симанов, а з Симанова сослан в Вологодцкой уезд на Каменое. Тоя же зимы поставлен на митрополью Да­нил, игумен Иосифова монастыря, февраля в 27 день. Тое же зимы марта 23 день Данил поста­вил Иону епископа на Рязань из Новагорода Великого из Юрьева монастыря. Того же месяца в 30 день поставил епископа во Тверь Акакия. Того же |л. 19 об.| году приидошя на Москву послы ли­товские Петр Станиславов да Богуш и взяша с великим князем перемирье на 5 лет. Того же лета декабря безбожный Магмед-Кирей царь подвижеся с Перекопи с своею братьею и з своими детьми, со многими людьми. И пришед Азторокань одолев и возгордеся зело. И согласившеся межу со­бою во Асторокани ногаи, абие нападают на мучителя и убишя царя проклятаго и сына его, и прочих с ними крымских врагов 100 000 и 30 000, от дву тысяч ногай побежен бысть окаянный гордый мучитель. Тое же зимы князь Василей Васильевич Шемячич пойман бысть. Тое же весны Сап-Кирей царь в Казани зла много христьянству навел и кровь пролья ^у), яко воду. Благоче­стивый же великий князь Василей зжалися о том и пошел от царьствующаго града Москвы и з своею братьею со князем Юрьем и со князем |л. 20| Ондреем, со многим воинством на втораго мучителя на казанского царя на Сап-Кирея на крестьянского кровопийца. И достизает Новагорода Нижнего а[в]густа 23 день. И свой ход тогды отложил х Казани для осени, поздо. А отпустил под Казань царя Шиг-Алея в судовой рати по Волзе, а с ним воевод своих со многими людьми. Тако же и полем конную рать многих людей отпустил. А велел пленити казанские места по луговой стране и по горней; и плениша и бой был полевым воеводам с казанскими татары на Свияге на Отякове поле. И поможе бог великого князя воеводам над татары: многих татар побишя а иные в Свияге потопошя. А великого князя люди, судовая и полевая рать, возвратишася здрави, мног плен с собою черемисской приведошя. Тогды же и на |л. 20 об.| Суре город поставишя древян.
В лето 7032 сентября в 1 день князь велики Василей з братьею возвратишяся из Новагорода на Москву сентября в 15 день. Того же лета майя отпустил князь велики под Казань царя Шиг-Алея в судовой, а с ним воевод своих князя Ивана Бельского и князя Михаила Горбатого, и иных воевод; а полем конную: Ивана Хабара и иных воевод своих со многими людьми. Уведав же злочестивый Сап-Кирей, царь казанский, крепкое и грозное великого князя воинство, страхом и боязнию обдержим и с великим срамом побеже изс Казани. И казанци взяшя в Казань царем
_________
^т-т) Исправлено из благоутробии своем.
^у) В рукописи над п выносное л.

-15-

Асафа-Кирея, крымского же царевича. Царь Шиг-Алей и воеводы великого государя достигошя Казани. И божиею помощию конная великого князя рать на Свияге многих татар побишя и по граду начашя бити, и во граде многих людей побишя. И казанци |л. 21| не мога терпети тоя нужи и добишя челом воеводам государьским, да и шерть дашя на всей воли государьской и служити прямо государю и неотступным быти и до своего живота.
Лета 7033 тое же осени ноября в 15 день приидошя к великому князю послы из Казани Аппай улан, и Бахты-Килдей князь, и прочий и бишя челом великому князю от всей земли Казан­ской за свою вину и о цари Сафа-Кирее. И государь их пожаловал по их челобитью и по про­шенью, а в Казань послал своего посла князя Василья Даниловича Пенкова да диака Офонасья Курицина в марте. Тое же весны априля в 2 день Данил митрополит поставил на Коломну епи­скопа Васьяна Топоркова, а Олексея, игумена кириловского, поставил на Вологду епископом апреля в 9 день. Того же лета послан делати Коломна город камен. Того же лета ездил князь велики Ва|л. 21 об.|силей с великою княгинею в объезд на Волок и в Можаеск. Тое же весны поставишя Новой монастырь Девичь у града Москвы за посадом близ монастыря святого Савы, а в нем цер­ковь пречистый богородици Одегитрия да Произхождение честнаго креста, да Прохор, и Никанор, и Тимон, и Пармена, да теплая церковь святый Амбросей Медиоламский, а вне монастыря церковь Усекновение Ивана Предтечи. Того же лета бысть засуха велика от троицина дни до успения богородици, и мгла бысть велика 4 недели, солнца и луны не видеть, и земля горела, и дымове велики, и ярового хлеба и сен бысть скудно. Того же лета вь Ярославле и в ыных городех тамошних не родилося никакое жито, ни обилье, ни сен. Тое же осени сентября в 10 день ездил князь велики в объезд и приехал на Москву в лето 7034 ноября в 10 день.
Ле|л. 22|та 7034 ноября в 28 день князь великий возложи на великую княгиню Соломаниду опалу. И ноября в 29 день великая княгини Соломания пострижена бысть в черници безплодия ради у Рожества пречистые на Рве и нареченна бысть инока ^ф) Софья. И не по мнозе отпустил ея князь великий в Каргополе, и велел ей устроити в лесу келью, отыня тыном. А была в Каргеполе пять лет и оттоле переведена бысть в Девичь манастырь в Суздаль к Покрову пречистые. Тое же зимы генваря в 24 день в неделю князь великий Василей женил[ся] вторым браком, а по­нял княжну Елену, дщерь князя Василья Лвовича Глинского. А венчал их Данил митрополит на Москве в соборной церкви у Пречистые. Тое же зимы марта в неделю 3 поста поставлен в Новгород и во Псков архиепископ |л. 22 об.| Макарей из Можайска ^х), с Лужков архимандрит. Того же месяца в 11 день в неделю 4-ю поста поставлен в Ростов и вь Ярославль архиепископ Кирил, из Суздаля из Ефимьева монастыря архимандрит.
Лета 7035-го сентября выехал князь велики с Москвы во град Можаеск на свою царьскую потеху и с великою княгинею Еленою. Тое же осени приидошя к великому князю в Можаеск литовские послы от короля Жигимонта пан Петр Станиславович, воевода полотцкий, да пан Богуш Богвитонов моршялка. И взяшя с великим князем перемирье на 6 лет до рожества Христова лета 7041-го. Октября выехал к великому князю служити из Литвы князь Федор Михайлович Мстисловской. И князь велики даст ему в удел Кременець, Мышегу, Суходров. А после того дал за него племянницу свою княжну Настасью, большую княж Петрову дочь царевичеву. Тоя же осени отпу|л. 23|стил князь великий из Можайска литовских послов, а х королю Жигимонту послал своих послов Ивана Васильевичи Лятцкого да диака Елизара Циплятева. Тако же и цесаревых послов, зело почтив их, отпустил и папина бискупа. А к цесарю римскому королю и к брату его Тфердинаиду послал князь великий своих послов Ляпуна Осинина да Ондрея Волосатого да толмача Власа Игнатьева в диаче место. А к папе послал князь великий Еремея Трусова да Шарапа Лодыгина. Тоя же зимы декабря был князь великий у Пречистой на Тихвине молитися. Тоя же зимы февраля пожаловал князь великий князя Михаила Глинского, выпусти его из нятства и казну его отдал ему, и вотчиною его своим жалованьем пожаловал доволне. И велел ему женитися у болярина своего у князя Ивана Васильевичи у Немого. Того же лета |л. 23 об.| жил князь великий и с великою княгинею Еленою в своем селе в Воробьеве до успенья пречистые. Того же лета повелением государя великого князя Василья поставиша церковь камену с приделы на его дворе Преображение Христово, а в другую церковь святого великого мученика Георгия у Фроловских ворот во граде, а третьюю Бориса и Глеба на Орбате за Неглинною.
_________
^ф) Написано по счищенному.
^х) Над строкой написано в.

-16-

Лета 7036 сентеб[ря] приходил с великою похвалою Ислам, царевич крымской, Магмед-Кироев сын, да Юсюп царевич Епанчин сын, да два царевича Ахмата Хромого дети, да Бахтиязыр мурза, Кайдекеш мырза и иные многие мырзы, а с ними рати избранных казаков 40 000. И хо­тели Оку реку перелести под Ростиславлем. И слышя сиа князь великий, часа того выехал из града Москвы и з своею братьею на рожество богородици. А перед собою воевод послал со мно­гими людьми. А во граде оставил бояр своих и воевод ^ц) князя Бо|л. 24|риса Ивановича Горбатого да Михаила Юрьевича, да казначея Петра Ивановича Головина. И град велел окрепити и животы людем с посадов в град велел возити, и пушки и пищали во граде велел пристроити. Воеводы же великого князя князь Василей Семенович Одоевъской да болярин и воевода князь Иван Иванович Стригин Щетина Оболенский, да князь Федор Михайлович Мстисловской, да князь Федор Василье­вич Лопата Оболенский з братьею и иные воеводы с Ысламом с царевичем билися и стрелялися об реку от утра и до вечера. И от берега татар отбили и многих татар в реце побили. И Ислам царевич, не постояв ни часа, вскоре от берегу побежал и из земли пошел прочь с великим сра­мом в рожество пречистые в неделю. И воеводы послашя за ним многих детей боярских за реку. И многих татар беглых |л. 24 об.| побили и изамаша Изсламова любовника Янклыч мурзу. А были толды дожщи великие, в Оке была вода прибыльная. А на Москве и во всех городех толды в осаде си­дели неделю.
Лета 7037 декаб[ря] был князь великий Василей Иванович и с великою княгинею Еленою на Вологде и в вологодцких монастырех, и на Белеозере, и в Кирилове, и в Ферапонтове. А ис Кирилова поиде к Москве, на Вологду же и вь Ярославле был, ездил молитися.
Лета 7038 априля отпустил князь великий воевод своих князя Ивана Федоровича Бельского да князя Михаила Васильевича Горбатого и иных своих воевод в ^ч) судовой ^ч) на казан­ского царя Сафа-Кирея. А наряду было в судех добре много. А в конной полем отпустил воевод своих князя Михаила Лвовича ^ш) Глинского да Василья Ондреевичя Шереметева и иных воевод своих. И поможе бог вели|л. 25|кого князя воеводам, многих людей казанских побишя июля в 10 день и острог на Булаке взяли, и многих татар и черемису побили, да и города мало не взяли. Город стоял часы с три без людей, люди все из города выбежали, а ворота городовые все отворены стояли. И не взяли города потому, что воеводы Глинской з Вельским меж себя спор учинили о местех: которому ехати в город наперед. И по грехом в те поры тучя пришла грозна, и дожщь был необычен велик. И которой был наряд, пищяли полуторные и семипядные, и сороковые, и затинные, привезен на телегах на обозных к городу, а из ыных было стреляти по городу, и посошные и стрельци те пищали в тот дожщь пометали. И того же дни вылезчи из города казанци, в город обоз и весь наряд взяли. А тогды же убили вое[во]ду ^щ) князя Федора Васильевича |л. 25 об.| Лопату да князя Ивана Иосифовича Дорогобушского Порашу, да Игнатья Жулебина, да Григория Ондреевичя Сабурова, да Федора Замятнина Сабурова, да Ивана Кляпикова. Великого князя воеводы судовые и конные стояли под городом 20 ден, били из пушек. А отступили от города июля в 30 день. А Волгу перевезлися июля в 31 день. А от Волги пошли на украинные муромские и на темниковские на успение пречистые. Того же лета августа в 24 день с середы на четверг на шестом часу нощи на память священномученика и апостола Евтихия и на пренесение мощей Петра чюдотворца родися великому князю Василью Ивановичю сын Иван от Елены. А крестили его у живоначяльныя у Троицы в Сергиеве монастыре троетцкой игумен Иасаф Скрипицин с старцом з Данилом, что ис Переславля, да старцем с Касьяном |л. 26| з Босым, что из Осифова.
В лето 7040-го майя прииде к великому князю Василью весть ис Крыму, что крымской царь копитца со многими людьми с похвалою, хочет итти на великого князя украину. И князь великий, слышяв то, послал на Коломну на берег воевод своих князя Ивана да князя Семена Федоровичев Бельских, да бояр своих князя Михаила Васильевича Горбатого да Михаила Семеновича Во­ронцова, и иных воевод, а с ними княжат и дворян своего двора и детей боярских изо многих городов безчислено много. А наряд был великой: пушки и пищали изставляны по берегу на вы­лазе от Коломны и до Коширы, и до Сенкина, и до Серпохова, и до Колуги, и до Угры, добре было много, столько и не бывало. Тоя же зимы декабря поймал князь великий царя Шиг-Алея, что был |л. 26 об.| на Казани.
_________
^ц) Написано по счищенному.
^ч-ч) Написано над строкой.
^ш) Написано дважды.
^щ) во пропущено.

-17-

Лета 7041-го родися великому князю сын Юрьи октября в 31 день. Тое же зимы князь ве­ликий женил брата своего князя Андрея Ивановича, а дал за него дщерь князя Ондрея Ивано­вича Хованского княжну Ефросинью. Того же лета августа в 19 день на первом часу дни солнце гибло до шестаго часа дни.
Лета 7042-го дек[абря] в 3 день с середы на четверг во фторый на десять час нощи против Варварина дни преставися князь великий Василей Иванович всеа Русии в чернецех и в скиме, а наречен бысть во мнишеском чину Варлам. И положен бысть на Москве в церкви в Архангиле Михаиле, иде же лежит отець его князь великий Иван Васильевичь. А всех лет поживе князь великий Василей 55 и 8 месяць и 9 ден. А из них на великом княженьстве был 31 лето и 8 месяць и 9 ден. А осталися сынове его князь вели|л. 27|ки Иван да князь Юрьи. И прияшя великое княжение после отца своего великого князя Василья сын его князь великий Иван Васильевич всеа Русии 3-х лет и 4 месяць и 11 дней.
Лета 7041-го августа о великого князя Васильеве смерти. Князь великий Василей Ивано­вич всеа Русии начат мыслити ехати в свою отчину на Волок на Ламский на осень тешитися. И прииде к великому князю весть с поля месяца августа в 11 день, что к Рязани идут люди крым­ские. В головах у них царь Сап-Кирей, что был на Казани и с Казани его выслали, да Ислам царевич Магмед-Киреев царев сын, со многими людьми Московские земли воевати. Князь же ве­ликий Василей Иванович вскоре посла по братию свою по князя Юрья и по князя Андрея Ивановичев. Братья же его князь Юрьи и князь Андрей приехашя к нему на Москву. Тогда же князь великий послал воевод своих с Москвы на Коломну на берег на О|л. 27 об.|ку князя Дмитреа Федоровича Бельского да князя Василья Васильевичя Шуйского, да князя Михаила Васильевича Горбатого, да Михаила Семеновича Воронцова, да Ивана Васильевича Лятцкого. А князя Семена Федоро­вича Бельского да князя Ивана Федоровича Овчину Телепнева, да князя Дмитреа Щереду Федо­ровича Палецкого наперед тое вести князь великий послал в Мещеру. И по тем вестем послал князь велики к ним гонца. И повелеша им возвратися вскоре на Коломну же с людьми. А тогда бысть на Коломне ^ъ) наместник воевода князь Иван Федорович Бельской. И снидошася воеводы многие на Коломну, а с ними люди многие, дворяне великого князя, княжата и дети боярские. А безбожнии татаровя приидошя на Рязань августа в 15 день в пяток на оспожин день и посады на Рязани пожгошя, и ко граду приступающа, но град не взяшя. А на Рязани тогда бысть |л. 28| наместник и воевода князь Андрей Дмитреевич Ростовской, а с ним были дети боярские рязанци. А безпожнии татарове волости воююще, жьгуще, в плен ведуще. Князь же великий Василей Ива­нович розосла грамоты и гонци въскоре по всем городом и повеле людем итти к собе, а иным на берег к воеводам. А сам князь великий з братьею своею с князем Юрьем и с князем Андреем Ива­новичи и с воеводами поиде с Москвы против безбожных татар на Коломну в пяток на оспожин день. И, пришед, ста в своем селе в Коломенеском. Воеводы же великого князя з берегу послашя за реку под люди воеводу князя Дмитрея Щереду Федоровича Палетцкого, а с ним дворяне великого князя и дети боярские. И прииде князь Дмитрей Череда к Николе Зараскому на Осетр. И прииде к нему весть, что люди крымские оттуду верст з десять в Беззубове поместье Ларивонова. И ту на них прииде князь |л. 28 об.| Дмитрий и потопта их и многих избиша, а иных живых поимаша и к великому князю отослаша. И тогда же бысть после оспожина дни в 20 день августа, в среду бысть на небеси в солнци знамение, яко восходящу солнцу на втором часу дни. И бысть сверху солнца, аки срезано помалу, и нача в солнци прибывати гибели от перваго часа и до третьяго часа дни. И бысть на солнце, аки до трети изгибе, з стороны, аки ускирь ^ы). И исполнит солнце на пятом часу дни, яко и пръвие бысть, на небеси же бысть светлость, не бысть ни облака. Людие же поразсудив и глаголаху в собе, яко быти в царстве пременинию некоему. Лето же тогда бысть сухо, и курева дымные хождаху. Тогда же воеводы великого князя з берегу послашя за реку воеводу князя Ивана Федоровича Телепнева Овчину, а с ним княжат и дворян великого князя и детей бояръских. Князь же Иван доеде сторожей татарских и потопташе их и побишя. Татарове же побегошя и намчашя наших людей на многие люди. И тут |л. 29| князя Ивана повстретишя. И его с людьми розстолкнули, а иных и възяшя. А сами татарове пошли из земли вскоре: начаяху за собою многих людей. Воеводы же великого князя за ними ходили да их не дошли и возвратишася. Князь же великий Василей Иванович всеа Русии возвратися ис Коломенского
_________
^ъ) Написано по счищенному.
^ы) В рукописи р выносное.

-18-

и поиде к Москве, и бысть на Москве, а братию свою князя Юрья и князя Андрея отпустил по их отчинам по уделам. А сам князь великий начат мыслити ехати молитися к живоначальной Троицы и преподобному чюдотворцу Сергию.
Лета 7042-го сентяб[ря] и поиде князь великий Василей Иванович всеа Русии и з ^ь) своею ^ь) с великою княгинею Елиною и з детьми со князем Иваном и со князем Юрьем Васильевичи к жи­воначальной Троици и к преподобному чюдотворцу Сергию на память чюдотворца Сергия. И туто князь великий молился и праздновал чюдотворцеву память, и молебная съвръшив. И от Троицы поеде с великою княгинею ^э) |л. 30| и з детьми в свою отчину на Волок на Ламской тешитися, а ехал на свое село на Озерецкое. И тут начат немощи. И явися у него мала болячка на левой стране на стегне на згибе з булавочную голову, връху же у нея несть, ни гною в ней несть же, а сама багрова. И оттоле приеде в троецкое село в Нахабну. Из Нахабну же поеде нужно, обдержим болезнию, в Покровское в Фуниково и ту празновал покрову пречистые богородици. И оттуды поеде в свое село Покровское и пребысть ту два дни, в третьи же день приеде на Волок нужно в неделю после покрова. И того же дни бысть пир на великого князя у дворетцкого его тферскаго Ивана у Юрьевича у Шигоны Поджегина. Наутрия же в понедельник князь великий великою нужею доиде до мыльны и за столом седе в постельных хоромех великою нужею. Наутриа же того во фторник бысть погодие велико тешитися государю. И посла по ловчих своих по |л. 30 об.| Федора по Михайлова сына Нагово да по Бориса по Васильева сына Дятлова, да по Бобрища по Пуш­кина. И не унявся, хотя тешитися. И поеде в свое село в Колпь болезнью обдержим, скорбяще. До села же того едучи, мало бысть потехи. В Колпь же приехав и седяще за столом с нужею. И посла по брата своего по князя Андрея Ивановича на потеху к собе. Князь же Андрей приеде к нему вскоре. Тогда же князь великий великою нужею выеха с князем Андреем Ивановичем на поле с собаками, и поездишя мало, токмо две версты от села, и возвратишася в Колпь. И седящим за столом з братом своим со князем Андреем Ивановичем изнемогающи, и оттоле стола у него не бысть, но вкушающи мало на постеле. И нача к болезни своей призывати князя Михаила Лвовича Глинского, а к Москве послал въскоре по дохторов своих по Миколая |л. 31| по Булева да по Фефила. И Миколай, и Фефил приехаша. И по совету со князем Михаилом со Львовичем нача прикладывати к болячке муку пшеничную с медом пресным и лук печен, и от того болячка нача рдетися. Он же нача боле прикладывати, и учинися на болячке аки прыщь мал, и появися в ней мало гною. Живе же князь великий в Колпи две недели, восхоте же ехати на Волок, но не можаше ехати на кони, и понесоша его на носилах пеши боярские дети и княжата на собе. И приехав князь великий на Волок. А из болячки мало гною изсякаючи, верху же у нея нет, рана же у нее аки иглою уткнуто ^ю), а не прибудет ее, ни убудет. И повеле же князь великий прикладывати масть к болячке, и нача из болячки итти гной и помалу и поелику больши, яко до полутаза и по тазу. И бысть же князь великий |л. 31 об.| в скорби и в болезни в велицей, тогда же в грудех ему бысть тя­гость. И того ради взяша горошки из семянники, и с того пронесе ему на низ, а болезнь его тяшка. И после того порушися ему ества, не нача ясти. И тогда посла стряпчего своего Якова Иванова сына Мансурова и диака своего Меньшого Путятина к Москве тайно по духовные грамоты отца своего и по свою, которую писал, едучи в Новгород и во Псков. А на Москве не повеле того сказывати митрополиту, ни бояром. Яков же Мансуров и Меньшой Путятин приехашя с Москвы вскоре и привезошя духовные отца его и ево, от всех людей и от великие княгини утаив, и крыющеся и от братии своей от князя Юрья и от князя Андрея, и от бояр своих, и от князя Михаила Лвовича Глинского. И, слушав духовных, свою духовную велел зжечи. И до Москвы же князь велики доеде, а того у него не ведал нихто, развее Шигоны и Меньшого Путятина. Бысть же от пятници в нощи проти|л. 32|ву Дмитреевы ^я) суботы ^я) знамение: с небеси спадошя множество звезд яко велия градовыя тучи или дождевые тучи проливахуся на землю. И видеша то знамение с небеси множество людей на Москве и на Волоце и всеа земли Рускиа области. И тогда же в суботу противу Дмитреева дни на 6-м часу нощи повеле к себе привести тайно Меньшому Путятину ду­ховные грамоты и пустишя в думу к себе к духовным грамотам дворетцкого своего тферскаго Ивана Юрьевича Шигону и дияка своего Меньшого Путятина. И нача мыслити князь великий: кого пустити в ту думу и приказати свой государев приказ. А бояр тогда было на Волоце с вели-
_________
^ь-ь) Написано над строкой.
^э) Л. 29 об. оставлен незаполненным.
^ю) В рукописи утккунуто.
^я-я) ы суб написано по счищенному.

-19-

ким князем: князь Дмитрей Федорович Вельской да князь Иван Васильевич Шуйской, да князь Михайло Лвович Глинской, и дворетцкие его князь Иван Иванович Кубенской, Иван Юрьевич Шигона. |л. 32 об.| Тогда же приеде к великому князю брат его князь Юрьи Иванович. Князь же великий таяше от него болезнь свою. И мало у него пребысть, и отпусти его в свою отчину в Дмитров. Он же не хоте ехати, князь же великий отпусти его. И тогда же пред чюдотворцевою памятью Варлаама Хутынского в нощи той много у него выиде из болячки гною, яко боле таза, и выиде из нее сторжень боле полуторы пяди, но и еще не весь сторжень выиде из нее. Князь же великий о том обвеселихся, чаять болезни своей облехчения. И тогда посла к Москве по гетмана своего по Яна по Малого. Ян же въскоре приеде и нача прикладывати к болячке масть ^а) обутчную. От Яновы же масти мало оток поляже. Тогда же князь великий посла к Москве по боярина своего по Михаила по Юрьевича Захарьина. И боярин Михайло Юрьевич вскоре к нему приехашя. И начат мыслити князь велики з бояры своими, которые с ним. А дияков было с ним: Елизарей Циплятев, Офо|л. 33|насей Курицин, Меньшой Путятин, Третьяк Раков. И учал мыслити князь великий, как ему ехати к Москве. И приговорил князь великий ехати ему с Волока в Осифов мона­стырь к Пречистой молитися, възя же Филипово заговейно в своем селе на Буе городе. А брат его князь Андрей Иванович с ним же. Наутрия же приеде в Осифов монастырь Пречистые ми­лости Иосифа игумена гробу поклонитися. И стретоша великого князя игумен з братиею и з свя­щенники и весь клирос церковной во вратех монастыря с образы и с кадилы. Князь же великий егда приеде ис Колпи на Волок, и с Волока в Осифов монастырь в каптане и не исхождаше от постели нимало, но пребываше на постели. И обращаху его со страны на страну, понеже изнеможе от зельные болезни. И брашна мало вкушаше. А в каптане у него были князь Дмитрей Ива­нович Шкурлятев да князь Дмитрий же Щереда Федорович Палетцкой |л. 33 об.| того ради, что обращаху его, едучи. Егда же приеде в Осифов монастырь и как его встретил игумен з братьею, и тогда великого князя взяша два под руки: князь Дмитрей Шкурлятев да князь Дмитрий Палецкой. И поидошя к храму Пречистые. И егда в церкви диакон начат октенью творити за государя великого князя, и не можаху в слезах проглаголати. А игумен и братия горци плачюще и просяще милости господа бога и пречистые его матере. Великая же княгини и з детьми туто же стояше, плакахуся горци у пречистые богородици о государеве здравии. Бояре же и вси людие плачюще и моляще бога о государе. Князь же великий выиде из церкви и возлег на одре, не можаше бо сидети от зельные болезни, изнемогжа. И начашя божественую литургию. Князь же великий на одре лежаше в паперти церковней. По отпущении же божественые литургии несошя великого князя в келью. Игумен же моли государя, |л. 34| чтобы вкусил брашна. Князь же великий великою нужею вкуси мало брашна. И тогда князь великий посла брата своего князя Андрея Ивановича з бояры своими в трапезу ести. И ту ночеваху в Осифове монастыре. Наутрия же князь великий поеде к Москве, а брата своего князя Андрея отпустил в свой удел. А великого князя повезоша в каптане. А у великого князя сидели в каптане князь Дмитрей Шкурлятев да князь Дмитрий Палетцкой. Станы же великого князя быша частый. И нача ^б) думати ^б) з бояры, чтобы ему въехати в град Москву не явно, понеже бо тогда люди многие иноземци и послы. И приеде князь великий в веденье пречистые в свое село в Воробьево. И бысть в Воробьеве два дни, от болезни зельныя стража и изнемогающи. Тогда же приеде к великому |л. 34 об.| князю с Москвы в Воробьево отец его Данил, митрополит всеа Русии, посетити его, а с ним владыка Васьян коломенской и Дософей, владыка крутицкой, и бояре великого князя, которые были на Москве, князь Василей Васильевич Шуйской, Михайло Семенович Воронцов и казначей Петр Иванович Головин, и иные многие дети боярские, которые с великим князем не были на Волоце. Много же бысть тогда во всех людех слез и рыдания, видяще такова государя в немощи лежаща. Князь же великий повеле на Москве реке мост мостити под Воробьевым противу Нового монастыря, понеже бо тогда река еще не крепка стала и просекоху лед, и столбы бьяху, и мост намостиша. А тогда бысть на Мо­скве городничей Дмитрей Иванович Волынской, а с ним Алексей Хозников и иные. На третей же день в неделю пое|л. 35|де князь великий в славный град Москву. Как приеде на мост на новомощений, тогда же у великого князя у каптаны в оглоблех въпряжены два санника. И как санники возхождаху на мост, и тогда мост обломися. Каптану же великого князя дети боярские удръжаху,
_________
^а) В рукописи с выносное.
^б-б) В рукописи нача е думати; ср. в Софийской II летописи нача едучи думати (ПСРЛ, т. VI. СПб., 1853, с. 269).

-20-

а у санников гужи обрезаху. И оттуды же князь великий возвратися и покручиняся на город­ничих, а опалы на них не положил. Поеде князь великий на пором под Дорогомиловым. И вьеде в славный свой град Москву в ворота в Боровитцкие. И внесоша его в постельные хоромы. И того же дни приеде к великому князю брат его князь Андрей Иванович. И нача князь великий думати з бояры. А бояр у него тогда бысть: князь Василей Васильевич Шуйской, Михайло Юрьевич, Михайло Семенович Воронцов и казначей Петр Иванович Головин, и дворецкий его тверский Иван Юрьевич Шигона; и диаков его: Меньшой Пу|л. 35 об.|тятин, Федор Мишурин. И призва их к собе. И начат князь велики говорити о своем сыну о князе Иване и о своем великом княжении, и о своей духовной грамоте, понеже бо сын его бе млад, токмо трех лет на четвертой, и как строитися цар­ству после его. И тогда князь великий приказа писати духовную грамоту диаком. своим Мень­шому Путятину да Федору Мишурину. Тогда же князь великий прибави к собе в думу к духовной грамоте бояр своих князя Ивана Васильевича Шуйского да Михаила Васильевича Тучкова, да князя Михаила Лвовича Глинского. Князя ^в) же Михаила Лвовича Глинского ^в) прибавил по­тому, поговоря з бояры, что он в родстве жене его великой княгине Елене. И тогда же приеде к ве­ликому князю брат его князь Юрьи Иванович вскоре на Москву. И нача же князь велики думати с теми же бояры и приказывати о своем сыну великом князе Иване и о великой |л. 36| княгине Елене, и о своем сыну князи Юрьи Васильевиче, и о своей духовной грамоте. И нача же думати с отцем своим Данилом митрополитом и с владыкою коломенским Васьяном, и с отцем своим духов­ным Алексеем протопопом, чтоб ему в иноческий образ облещися, понеже бо давно мысль его предлежаше в чернечество. Еще же бе князь велики на Волоци, приказал отцу своему духовному протопопу Алексию да старцу Мисаилу Сукину, чтобы есте того не учинили, что вам мене положити в белом платье, хоте бы яз и здоров был; но мысль моя и желание сердечное предлежит в чернечество; и платье с Волока на дорогу велел с собою готово вести. И еще же ему на путь едучи к Москве и призва к себе дворецкого тверскаго Ивана Юрьевича Шигону да диака своего Меньшого Путятина, и нача им мысль приказывати о чернечествии же, чтобы его не положили в белом платие. И тогда же князь великий тайно взем святыя дары и маслом свящался. А развее отца |л. 36 об.| его Данила митрополита и владыки Васьяна коломенского, и Алексия протопопа, и Мисаила старца не ведал того нихто. И тогда же противу недели перед Николиным днем в нощи явъствено маслом свящался. В неделю же перед Николиным днем повеле собе приготовити слу­жебные дары. Повеле в Рожестве пречистые литургию служити на пръвом часу дни отцу своему духовному Алексию протопопу да благовещенскому попу Григорью Микитину. Дивно же есть се: дотоле не можаше обратитися с стороны, на неих лежаше, но обращаху его. И повеле собе сказати, как дары понесут, а собе повеле принести кресла и постели и въста сам, мало же его при­нял Михайло Юрьевич. И седе князь велики в креслех. И принесе ему протопоп Алексий дары. Он же вста сам на ноги своя и приим честные дары честно и прослезися дору же и пречистой, хлеб мало взем и укропу же, и кутии, и просфиры |л. 37| мало вкуси, и возлеже на постелю. И призва отца своего Данила митрополита и братью свою князя Юрья Ивановича и князя Андрея, и бояр своих всех, бе бо тогда мнози бояре сьехашася из отчин, слышяв государеву немощь. Князь же великий Василей Иванович нача ^г) говорити отцу своему Данилу митрополиту и братии своей князю Юрью и князю Андрею, и боляром своим всем: “Приказываю своего сына великого князя Ивана богу и пречистой богородици, и святым чюдотворцем, и тебе, отцу своему Данилу, митрополиту всеа Русии. И даю ему свое государьство, которым меня благословил отець мой государь князь великий Иван Васильевич всеа Русии. А вы бы, моя братия князь Юрьи и князь Андрей, стояли крепко в своем слове, на чем есмя крест целовали, и крепости про ^д) и о земском бы есте строении, и о ратных делех противу недругов моего сына и своих стояли общо, была бы православных хрестьян |л. 37 об.| рука высока над безсерменством. А вы бы, бояре и боярьские дети и кня­жата, как есте служили нам, так бы есте ныне и впредь служили сыну моему Ивану и на недругов все были заодин, и хрестьянства от недругов берегли, а служили бы есте сыну моему прямо и неподвижно”. Тогда же, наказав братье своей и бояром, отпусти от себя митрополита и братию свою, а оставил у себя бояр своих всех: князя Димитрея Федоровичь Бельской з братьею и Шуй­ских князей, и Горбатых, и Поплевиных, и князя Михаила Лвовича Глинского. И нача говорити
_________
^в-в) Написано на правом поле со знаком вставки.
^г) Написано над строкой.
^д) Так в рукописи; здесь очевиден пропуск.

-21-

своим боляром: “Ведаете сами: кое от великого князя Володимера киевского ведетца наше государьство Владимерское и Ноугородцкое и Московское. Мы вам государи прироженные, а вы наша извечныя бояре. И вы, брате, постойте крепко, чтобы мой сын учинився на государстве государем, была бы в земле правда и в вас бы розни |л. 38| никоторые не было. Да приказываю вам: Михайло Лвович Глинской человек, к нам приезжщей, и вы б того не молвили, что он приежщей, держите его за здешнего уроженца, занеже мне он прямой слуга. И были бы есте все вопче и дела зем­ского и сына моего дела берегли и делали заодин. А ты б, князь Михайло Глинской, за моего сына великого князя Ивана и за мою великую княгиню Елену, и за моего сына князя Юрья кровь свою пролиял и тело свое на раздробление дал”. Князь же великий вельми скорбяще и изнемогающи, болезни же своей не чюяше. А раны у него не црибаваше, токмо дух от нея тяжек идущи же из нея, не жив - смертный. И призва тогда князя Михаила Глинского да Михаила Юрьевича, и докторов своих Николая Булева да Фефила, чтоб прикладывати к болячке масть или бы нечто пустити в рану, чтоб от нея духу не было. И нача ему |л. 38 об.| говорити боярин его Михайло Юрьевич, тешачи государя: “Государь князь велики, чтобы водка нарядити и в рану пущати и выжимати, ино, государь, видя.тобя, государя, такова истомна, чтоб, государь, спустити з день или з два, чтоб было, государь, хотя мало болезни твоей облегчение, ино бы того да водки пустити”. Князь же великий призва Николая и нача ему говорити: “Брате Миколае, видел еси мое великое жалованье к собе. Мочно ли тобе что сътворити, масть или иное что, чтоб облегчение болезни моей?” Нико­лай же отвеща великому князю: “Видел есми, государь, к собе твое государево жалованье ве­ликое, аще бы мощно тело бы свое роздробил тобя ради, государя, но моя мысль не имети, опричь божьей помощи”. Князь же великий отвратися и нача говорити детем боярским и стряпчим своим: “Братие, гораздо Миколай надо мною познал мою бо|л. 39|лезнь, что непособная, надобе, брате, промышляти, чтобы душа не погибла в веки”. Стряпчия же и дети боярския при нем заплакаху горко помалу его для, а, вышед вон, горко плакаху и рыдаху, и быша яко мертви, видяще государя при конци. А противу недели тоя нощи, коли причастися пречистых тайн и утешися мало, и нача аки во сновидении пети: “Аллилугиа, аллилугия, слава тобе боже!” И потом, пробудився, начат говорити: “Како, господеви годе, тако и бысть. Буди имя господне благословено отныне и до века!” Приказа же князь велики отцу своему духовному Алексию протопопу с вторника к среды дек[абря] в 3 день и повеле собе держати запасный дары. И тогда же прииде к нему игумен троиц­кий Исаф, и рече ему князь велики: “Помолись, отче, о земском строении и о сыне моем Иване, и о моем согрешении. Дал бог и велики чюдотворець Сергий |л. 39 об.| мне вашим молением и прошением у бога сына Ивана. И яз крестил его у чюдотворца и дал есми его чюдотворцу, и на раку чюдотворцеву его положил. И вам есми, отче, своего сына на руки дал. И вы молите бога и пречистую его матерь и великих чюдотворцов о Иване о сыне и о моей жене горчици. Да чтоб еси игумен прочь не ездил, ни из города вон не выежщал”. В среду же прииде к нему отець его духовной Алексий протопоп и принесе ему честный дары из Благовещенья. Князь же великий не можаше с постели възстати, но под плечи подняху его, и причастися святых тайн. По причащении же мало възвару вкуси и призва к собе бояр своих князя Василья и князя Ивана Васильевичев Шуй­ских и Михаила Воронцова, и Михаила Юрьевича, Михаила Тучкова, князя Михаила Глинского, Шигону, Петра Головина, диаков своих Меньшого Путятина, |л. 40| Федора Мишурина. И бышя у него тогда бояре от третьяго часа до седмаго. И приказав им о своем сыну великом князи Иване Ва­сильевиче и о устроении земском, и како бы тии правити после его государьства. И поидошя от него бояре. А у него остася Михайло Юрьев да князь Михайло Глинской, да Шигона и бышя у него до самыя нощи. И приказав о своей великой княгине Елене и како ей без него быти, и как к ней бояром ходити. И о всем им приказа, как без него царству строитись. И тогда приидошя к великому князю братиа его князь Юрьи и князь Андрей и начата притужати, чтоб нечто мало вкусил. Князь же великий вкуси единые миндальные каши мало, токмо к устом принесе. И пои­дошя от него братия. И повеле к собе воротити брата своего князя Андрея. Тогда же |л. 40 об.| бысть у него Михайло Юрьев, князь Михайло Глинской, Шигона. И нача им говорити князь велики: “Вижу сам, что живот мой к смерти приближаетца, хощу послати по сына своего Ивана и хощу его благословити крестом Петра чюдотворца, и хощу послати по жену свою по великую кня­гиню, и хощу ея наказати, как ей по моем животе быти”. О сей же речи возвратися князь велики: “Не хощу послати по сына по своего по великого князя Ивана, понеже сын мой мал, а яз лежу в великой своей немощи, ине, чтоб от мене не дрогнул сын мой”. И князь Андрей и бояре начаша

-22-

говорити великому князю и притужати: “Государь князь велики, пошли по сына по своего по князя Ивана и благослови его, и пошли государь по великую княгиню”. Тогда же князь великий посла по великую княгиню бра|л. 41|та своего князя Андрея да князя Михаила Глинского. А наперед великие княгини повеле принести к собе сына своего князя Ивана плача для от великие княгини, а сам на собя постави крест Петра чюдотворца. А тогда бысть у него Михайло Юрьев да Шигона, да стряпчих его бысть в то время Иван Иванов сын Челяднин да шурин его князь Юрьи Глинской. И принесоша к великому князю сына его на руках князя Ивана шурин его князь Иван Глинской. А за ним прииде Огрофена Васильева жена Ондреевича. Князь же великий снем с собя крест Петра чюдотворца и приложил к кресту сына своего и благословил его крестом, и рече ему: “Буди на тобе милость божия и пречистые богородици и благословление Петра чюдотворца, как благо­словил Петр чюдотворець прародителя нашего великого князя Ивана Даниловича. И доныне буди на тобе благословление Петра чюдотворца и на твоих детех и на внучатех от po|л. 41 об.|да в род. И буди на тобе мое грешнаго благословление и на твоих детех и внучатах от рода в род”. И при­каза же тогда Огрофене, штоб еси Огрофена от сына моего Ивана не отступала ни пяди. И от­пусти сына своего великого князя Ивана. Тогда же прииде к нему великая княгини Елена, едва же дръжаху ея брат его князь Андрей Иванович, а о другую сторону боярыни Олена Иванова жена ^е) Ондреевича Челяднина. Бьющи же ся великая княгини и плачеся горько, слезы же ея непре­станно текущи от очию ея, яко источник велий. Много же бысть слез, плача и рыданиа въ всех людех. Князь же великий тешашеа глагола ей: “Жено, предстани, не плачи, болезнь ми есть легчи, не болит ми ничто, благодарю бога”. Понеже бо князь велики не чюяше болезни своей и на мал час уняв ея, князь великий. И предста от слез великая княгини. И начат говорити великая княгини: “Государь князь вели|л. 42|ки, на кого меня оставляешь и кому, государь, дети приказываешь?” Князь же великий отвещай рече: “Благословил есми ^ж) своего Ивана государьством, великим кня­жением, а тобе есми написал в духовной своей грамоте, как в прежних духовных грамотах отець наших и прародителей по достоянию, как прежним великим княгиням”. И нача великая бити ^з) челом ^з) о сыне князи Юрьи, чтоб его благословил. И посла князь велики по сына по своего по князя Юрья. И принесошя ^з) к нему ^з) князя Юрья. Еще бе князь Юрьи мал, бе единого году. И бла­гословил его князь великий: дасть ему крест пасеинской и повеле тот крест отнесть по преставлении своем боярину своему Михаилу Юрьевичю. А о вотчине тако же отвечал, приказал есми и в духовной грамоте написал по достоянию. И хоте ей наказывати о житье ея, но в кричанье не успею ни единого слова наказати. Она же не хо|л. 42 об.|тяще итти от него, а от вопля не преста, но отосла ея князь велики сильно, и простися с нею и отдаст ей последнее целование свое. Жалостно же бе тогда видети, и слез и рыдание исполнено то время. И тогда князь великий посла по владыку по коломенского по Васьяна и по старца по Мисаила по Сукина. И в то время попыта игумена кириловского на то, понеже мысль его была преже того постричися у Пречистые в Кирилове монастыре. И сказашя ему, что игумена кириловского нет на Москве. И тогда посла по игумена по троицкого по Асафа. Мисайло же пришед к нему и повеле ему принести платье черное. Прииде же к нему Данил митрополит и братья его князь Юрьи и князь Андрей, и бояре все, и дети боярские. И нача ему говорити митрополит и владыка Васьян, чтобы князь велики послал |л. 43| по пречистые образ чюдотворные большие въладимерския, еже Лука еуангелист написа, и по Николу, чюдо­творца Гостунского. Князь же велики посла по пречистые образ и по Николу чю[дотворца] ^и). И принесошя пречистые образ и Николу чюдотворца вскоре. И призва к собе дворецкого своего тверскаго Ивана Юрьевича Шигону, и посла его ко отцу своему духовному Алексию протопопу, повеле ему принести к собе дары служебные из церкви. И повеле его възпросити, во обычай ли ему то дело, егда разлучаетца душа от тела. Протопоп же отвеща, что ему мало того бывало. И по­веле ему внити в комнату з дароношением. И повеле ему стати противу собя, стряпчему своему Федьцу Кучетцкому велел стати с протопопом по ряду, занеже бо Федець видех, когда преставление |л. 43 об.| отца его великаго князя Ивана. И тогда повеле диаку своему крестовому Данилку пети канун великой мученицы Екатерине и канун на исход души. И отходную повеле собе говорити. И, как начал канун пети, и забывся мало и прочкнувся от сна и нача говорити, аки видение виде великоя христова мученица Екатерина ^й). . . пора царьствовати ино госпожа царствовати. И воз-
_________
^е) Написано дважды.
^ж) Далее, очевидно, пропущено сына.
^з-з) Написано по счищенному.
^и) В руко­писи не дописано.
^й) Далее в рукописи, очевидно, пропуск.

-23-

будився, аки от сна, и приим образ Екатерины великомученици, и любезно приложися к ней, и коснуся рукою правою ^к) образу ея, понеже бо в те поры рука ему больна сущи. И тогда же принесоша ему мощи великомученицы Екатерины, и приложися к мощем и руку свою правою. И леже на одре своем, и призва к собе боярина своего Михаила Семеновича Воронцова, и поцеловася с ним, и |л. 44| прости его. И от того часа время долго полежав. И прииде к нему отець его духовной Алексий протопоп, хотя ему дары дати. Он же, уняв его, и рече ему: “Видиши сам, что лежу болен, а в разуми ^к-1) своем, и егда станет душа от тела разлучатися, тогда ми дай дары. Смотри же мя ра­зумно и бреги”. И мало время пождав, и призва к себе брата своего князя Юрья Ивановича, и рече ему: “Помнишь ли, брате, коли отца нашего великого князя Ивана не стало назавтрее Димитреева дни в понеделник, понеже бо немощь его томила день и нощь; а ^л) мне, брате ^л), тако же смертный час и конець приближаетца”. И пождав мал час призва отца своего Данила митропо­лита и владыку коломенского Васьяна, и братию свою, и бояр своих: “Видите сами изнемогоша и х концу приближися, а желание мое давно бысть по|л. 44 об.|стричися. Постригите мя!” Тогда же отець его Данил митрополит и боярин его Михайло Юрьевич похвалиша ему то дело, что добра дела желает. И ста ему встречю брат его князь Андрей Иванович и Михайло Семенович Воронцов и Шигона глаголаху: “Князь велики Владимер киевской умре не в черньцех, не сподобились праведного покоя, и иные великие князи не в чернцех преставися, не с праведными обрели по­кой”. И бысть промежу ими пря велика. Князь же велики призва к себе отца своего Данила митро­полита и рече ему: “Исповедах есми тебе, отче, всю свою тайну, еже желаю чернества, чего так дол[го] ^м) желати, но сподоби мя облещися во мнишеский чин, постриги мя”. И мало пождав и рече ему: “Так ли ми, господине митрополит, лежати и на|л. 45|чат креститися и говорити аллилугиа, аллилугия, слава тебе, боже!” И начат говорити, из ыкосов словеса выбираючи, а иные словеса тихо в собе глаголати, и крестящеся, рече: “Радуйся, утробо божественаго воплощенна”. И потом начат глаголати: “Ублажаем тя, преподобие отче Сергие, и чтем святую память твою, наставниче иноком и сбеседниче ангелом”. И потом конец его приближашеся, не нача языком изглаголывати, но просяще пострижения и емлюще простыню, начат целовати ея. И тогда рука его пра­вая не начат подыматися. И подносяще ему боярин его Михайло Юрьев, он же не престаше творяще на лицы своем крестъное знамение и зряще горе на правой на образ пречистые богородици, иже пред ним на стене стоит. Тогда же Данил митрополит посла старца Мисаила, повеле при­нести |л. 45 об.| платье черное в комнату, а потрахель бе и постризание у митрополита с ним. А отрицание же бе еще тогда исповедал князь великий митрополиту, когда дары взял в неделю перед Николиным, и приказал митрополиту тогда, аще ли и не дадут мене постричи, но на мертва меня положите платие чернеческое, бе бо издавна желание мое. Прииде же старець Мисайло с платием, а князь велики приближашеся к концу. Митрополит же взем патрохиль и подасть чрез великого князя игумену троицкому Иасафу. Князь же Андрей Иванович и боярин Михайло Се­менович Воронцов не хотеша дати великого князя пострищи. И глагола Данил митрополит князю Андрею: “Не буди на тебе нашего благословлениа в сий век, ни в будущий, занеже сосуд сребрян добро, а позлачен того лутчи”. И князь великий отхожа|л. 46|ше, но спешаху стричи его. Да митрополит положи на игумена на троицкого патрохель, и сам постриже его и положи на него переманатку и ряску, а манатии не бысть, занеже бе спешачи несучи, выронили. И взем с собя келарь троиц­кий Серапион Курцов манатию и положиша на него. И скиму ангельскую и еувангелие на груди его положиша. И стояши же близ его Шигона и, как положили еувангелие на грудех, и виде Ши­гона дух его отшедша, аки дымец мал. Бе же в те поры плачь и рыдание во всех людех и зельное стенание от великих людей и до простых, паче же и во всей земли. И просветися лице его, аки свет, и бысть бел, аки снег. По преставлении же его от раны духу не бысть, и изполнися храм той бла­гоуханна. Преставижеся князь великий Василей Иванович всеа Русии, в иноче|л. 46 об.|ском чину наречен бысть Варлам, в лета 7042-го месяца дек[абря] в 3 день, с среды на четверг, 12 час нощи противу Варварина дни. И тоя же нощи облекошя его во всю чернеческую одежу. Данил же митрополит взем сам бумагу хлопчату и воды мало возпусти на неа и оттрех его от пояса. Тогда бысть плач и рыдание неутешно во всех людех. Данил же митрополит и бояре уймоху людей от плача, но не слышети бе во мнозем кричании, что друг к другу глаголаху. Еще же бе великая княгини тогда
_________
^к) Написано дважды.
^к-1) В рукописи рузуми.
^л-л) Написано дважды.
^м) В рукописи не дописано.

-24-

не ведала преставлениа великого князя. Бояре же унимаху людей от плача того ради, чтоб не слышети в великие княгини хоромех. Тогда же Данил митрополит взем братию великого князя князя Юрья и князя Андрея Ивановичев в переднюю избу и приведе их к крестному целованью на том, что им слу|л. 47|жити великому князю Ивану Васильевичи” всеа Русии и его матери великой княгине Елене, а жити им на ^н) своих уделех, а стояти им в правде, на чем целовали крест великому князю Василью Ивановичю всеа Русии и крепости промежу ими с великим князем Васильем. А государьства им под великим князем Иваном не хотети, ни людей им от великого князя Ивана к собе не отзывати, а противу недругов великого князя и своих латынства и безсерменства стояти им прямо вопче заодин. А бояр и боярьских детей и княжат на том приведе к крестному цело­ванию, что им великому князю Ивану Васильевичю всеа Русии и его матери великой княгини Елене и всей земли хотети им добра вправду и от недругов великого князя и всеа земли от безсерменства и от латынства стояти вопчи заодин, а иного им государя мимо вели|л. 47 об.|кого князя Ивана не искати. Тогда же Данил митрополит з братьею великого князя и з бояры поиде к великой кня­гини Елене тешити ея. Великая же княгини виде митрополита и бояр к собе грядущи и бысть яко мертва и лежа часа з два. И едва ^о) очютися, тешаще же ю митрополит и братия великого князя и бояре, и поидошя от нее вси. А у великого князя остася игумен Иасаф троицкий да старець Мисайло Сукин. И начашя наряжати и браду ему исчесав, яко же подобает быти по чернеческому чину, и положиша под него постелю черну тавтяну, и принесошя под него от Михайлова Чюда одр. И положиша тело его на одре. Егда же преставися князь великий, тогда начата его наряжати старци осифовские, а великого князя стряпчих отослаша. |л. 48| И тогда начата у него пети заутренюю его диаки крестовые с протопопом, и часы, и каноны, и все отпета, яко же бе и при живом. И тогда поиде к нему народ мног прощатися: боярские дети, и княжата, и гости, и вси людие, которые не быша у него. И бысть плачь и рыдание во всех людех велий. Наутрия же в четверг на 1 часу дни Данил митрополит повеле звонити в большой колокол. Бояре же его, поговоря с митрополитом и з братьею великого князя, повеле в Архангеле ископати гроб ему подле отца его великого князя Ивана Васильевича противу дверей Семиона Летопроводца. И, поговоря с митрополитом, послаша шатирнечего Русина Иванова сына Семенова, снем с него меру, и по­веле ему гроб привести камен. Тогда же прииде Данил митрополит и с ним владыка Васьян коломенский и Дософей крутицкий, |л. 48 об.| а инии же владыки быша тогда в своих областех, понеже не поспеша. Архимандриты же тогда быша чюдовский Иона, симановский Филофий, андрониковской Зосима, игумен осифовский и протопопы все, и игумены московские, и ^п) все священники. Тогда же пришедше братиа его князь Юрьи и князь Андрей Ивановичи, и бояре все, и весь на­род плачющеся и рыдающе горько. И повелеша тогда пети диаком певчим, большой станицы стати в дверех у комнаты и начата пети “Святы боже” большую. Тогда взяшя тело великого князя инока Варлама старци троицкие и осифовские и понесоша его на главах. И вынесоша его в пе­реднюю избу. И бысть слез и рыданиа множество в людех. И понесоша его на крыльцо. А за ним грядуща с свещами и с кандилы, и поюще “Святый боже”. И как |л. 49| снесошя его на площадь, ино бысть слез и кричания от народа, яко и звону в колоколы не слышети, яко же и земли возстанути. Великую же княгиню Елену несоша еа из ^р) ее ^р) в санех на себе дети боярские на лествицу. А с нею шли бояре князь Василей да князь Иван Васильевич Шуйские, Михайло Семенович Воронцов, князь Михайло Лвович Глинской, боярыня же бысть тогда с великою княгинею княжь Федорова Мстисловского княгини Настасья.
Месяца декабря в 11 день, в четверг, после великого князя Васильевы смерти в осмы день поймали бояре великого князя Васильева брата князя Юрья Ивановича дмитровского на Москве и бояр его и диаков. И посадили князя Юрья в Набережную полату. И там и преставися, на мерт­вом и железа обтерли. И положиша его в Архангиле на площади на той стороне, где опальные князи кладутца. А отчину его велели на великого князя ведати. |л. 49 об.|
Того же лета стоял князь Андрей Иванович в Боровску против короля. Пришел в Боровеск на троицын день. Того же лета августа 3 день отъехал в Литву князь Семен Федорович Бель­ской да Иван Ляцкой с службы из Серпохова. Много учинили пакости земли Московской. Иван Ляцкой оставя на Москве матерь и жену и дочерь девицею. Того же лета зделали одного ^с) лета
_________
^н) Написано над строкой.
^о) В рукописи едпа.
^п) Написано по счищенному.
^р-р) Так в рукописи
^с) Написано по счищенному.

-25-

на Москве город земленой Китай. Того же лета августа в 5 день князя Михаила Глинского велел князь великий и великая княгини поимати. И посадили его в камену полату за дворцом. И там и преставися, на мертвом и железа обтерли. И положиша его за Неглинною у Микиты чюдотворца. И после того з год спустя выкопали его и погребли у живоначальныя Троицы в Сергиеве мона­стыре. Того же лета приходили литовския воеводы под Стародуб и под Почеп. Тогды же и Радо|л. 50|гощь сожгли и наместника радогощского Матфея Лыкова с собою свели. А стародубские и почапские посады приказчики городовые, а не литва сожгли. А пошли литва из земли лета 7043-го сен[тября] 4 день. Того же лета в пяток приходили в Чернигов литва и к Смоленску. И в Рославле литва посады же пожгли, а нараньи в суботу побегли. Наместник на Смоленску тогды был князь Никита Васильевич Оболенской, а на Стародубе был наместник князь Федор Васильевич Телепнев Овчина. Того же лета приходили гости ногаи с коньми, сорок тысящ лошядей пригоняли, и кони были дешевы.
В лето 7043 в великой мясоед ходили в Литовскую землю великого князя воеводы зиме князь Михайло Васильевич Горбатой Кислой, да князь Никита Васильевич Оболенской, да князь Иван Овчина, и иные многие воеводы со многими со тмочисле|л. 50 об.|ными людьми, воевали литовские места до Вильны и за Вильну и вывоевали: многие места пусты доспели и людей многих высекли нещадно, и многое множество литвы полону привели; а из Литовские земли, дал бог, пришли здорово. Того же лета июля в 9 день родися князю Андрею Ивановичю в Старице сын Владимер. Того же лета июля 20 литовскиа воеводы Гомью засели коромолою. А наместник был на Гомьи князь Дмитрей Щепин. А пришли под город июля 10 день, а город взяли июля 17, на память святого священномученика Анфиногена. А воеводу гомейского и детей боярских отпустили, огра­бив, на Москву. Того же месяца пришли литовские воеводы Торновской и иные многие воеводы со многими людьми ис-под Гомья к Стародуби, да с ними великого князя изменник князь Семен Бельской. И |л. 51| стояли под городом пять недель, подкопывалися под стену под городовую. Да, подкопався, город сожгли и воеводу князя Федора Васильевича Овчину Оболенского и иных воевод с собою свели и детей боярских, а иных детей боярских и чернь побишя безчислено много. А в те поры, как литва была под Стародубом, ходили в Литву великого князя воеводы, князь Василей Васильевич и иные воеводы, воевали литовские городы во Мстиславле и в Дубровне, и в Орше, и в ыных городех остроги поймали и посады сожгли. А из Смоленска с нарядом был Дмитрей Данилов подо Мстиславлем. И многие села выжгли и полону много привели. В те же поры, как литовские люди под Стародубом стояли, великого князя люди в Литовскую землю за рубеж вшед 30 верст за Опочкою, на ^т) озере ^т) на Себеже зделали земляной город китай и воевод и людей в городе устроили. А стоял в те по|л. 51 об.|ры на Опочке Михайло Семенович Воронцов. А на Чернице и на пристани стояли князь Михайло Кубенской да Дмитрей Воронцов и иные воеводы со многими людьми. Того же лета августа 18 приходили в Резань крымские мурзы, воевали на Смедве и на Безпуте. Воеводы были тогды великого князя в Литовской земли со всеми людьми, а князь Андрей Иванович стоял в Боровску же. Того же году, в новом лете, сентября Казань отложилася, великому князю изменили.
В лета 7045 царь казанской зиме, генваря, на всеедной неделе под Муром приходил, посады под Муромом и сел и деревень пожег, от Мурома и до Новагорода воевал. И ходил за царем из Елатьмы князь Михайло Кубенской, а из Володимеря князь Роман Одоевской да Василей Шереметев, а из Мурома князь Михайло Курбъской - тот передовой полк. Тое же зимы в вели­кой мясоед приходили послы |л. 52| литовского короля на Москву, взяли мир на пять лет. Того же году по Велице дни пошли в Литву великого князя послы Василей Григорьевич Морозов да князь Дмитрей Палецкой, да диак Григорей Загрязской о миру же против литовских послов. Того же лета майа 2 отступил с вотчины из Старицы князь Ондрей Иванович, великого князя Васильев брат, на память святых мученик Бориса. Да, не доехав Новагорода Великого, воеводы великого князя кня[зь] Иван Овчина и иные взяли его на душу, что было его пустить на [о]тчину ^у) на его на Старицу. И князь Ондрей приехал к Москве. И князь великий Иван Васильевич и великая княгини Елена велели его поимати. И посадили его в полату в Набережную з дворца июня 1 день, в суботу, на канун заговейна Петрова. А княгиню его посадили в Берсеневской двор, где сидела Шемячичевская княгини з дочерьми. А сына его князя Володимера дали Федору Карпову блю|л. 52 об.|сти.
_________
^т-т) Написано дважды.
^у) В рукописи тчину с выносным т.

-26-

А сыну княж Ондрееву тогды от рода два года. И у Федора у Карпова княж Ондреев сын побыл немного, и у Федора его взяли да к матери же его посадили в тын. А был с матерьи в тыну и до выпуска. А коли князя Андрея в полату посадили, и толды княж Андреевых бояр князя Федора Пронского, трех князей Ленинских, князя Ивана да дву княж Юрьев, князя Ивана Хаванского Кривого, Умного Ивана Колычева, князя Бориса Палецкого велел князь велики и великая кня­гини казнити их торгового казнию, бити кнутием да всадити в стрельню в наугольную в Свиб­лову. И сидели и до великие княгини смерти. А князя Федора Прон[ского] ^ф) тут в тюрьме не стало. Того же лета и преставися князь Ондрей Иванович, на мертвом и железа отерли. И положиша его в Архангиле, и где кладут опальные же князи, по конець брата его князя Юрья. Того же лета имали татарове туль|л. 53|скую украину, Сежу. Тогды же убили князя Василья Веригина Волкон­ского. Того же лета приходили в Одоев крымские татареве, пришли под город о вечерни, а нараньи прочь пошли.
В лета 7046 априля в 2 день преставися великая княгини Елена на память преподобнаго отца нашего исповедника Никиты, игумена никомидейскаго, со вторника на среду в 7 час нащи. И положена бысть в Вознесениа. Того же дни князь велики Иван пожаловал княж Юрьевых бояр Ивановича, из нятства велел выпустити. А княж Ондреевых Ивановича бояр пожаловал князя Ивана Ондреевича Хованского да трех Пенинских ^х), да князя Бориса Палецкого, да Ивана Ум­ного Колычева, и дияков княж Ондреевых ^х), и всех детей боярских, и дворян его. Того же лета июня дал князь велики Иван Васильевич сестру свою двуродную княжну Настасью |л. 53 об.| княж Пе­трову дочь царевичеву за боярина за своего за князя за Василья за Васильевича за Шуйского. А после великие княгини смерти в 6 день великого князя бояре поймали князя Ивана Овчину Телепнева и посадиша его в полату в Набережную, и где Глинской сидел. И тягость на него, железа, ту же положиша, что и на Глинском была. Там и преставися.
Лета 7047-го октября 21 день бояре поймали диака Федора Мишурина на княж Андреевъском дворе. Платье с него ободрали донага, а его вели до тюрьмы нага, а у тюрем ему того же часу головы ссекли. Тое же осени ноября преставися князь Василей Васильевич Шуйской, а же­нат был с полгоду. А после его родила княгини его княжну Марфу. Того же лета фев[раля] в 2 день Данил митрополит оставил митрополичество неволею, что уча л ко всем людем быти немилосерд и жесток, уморял у со|л. 54|бя в тюрьмах и окованых своих людей до смерти, да и сребролюбие было великое. А сослан в Осифов монастырь на Волок. Того же месяца в 9 день, в неделю мясопустную поставлен бысть в митрополиты троицкой игумен Сергиева монастыря Иасаф Скрипицин архи­епископом Великого Новагорода и Пскова Макарием.
Лета 7049-го декабря в 20 день, на память Петра чюдотворца, князь великий Иван Василье­вич всеа Русии, приговоря со отцом своим с митрополитом Иасафом и з бояры, велел княж Он­дрееву Ивановича княгиню и сына ее Володимера Андреевича из нятства выпустити. А сидели в городе в старом на Шемячичевском на Берсеневском дворе отынени у Офонасья у Великого. И перевел ее и сына ее князя Володимера на княж Ондреевъской двор, и села ее дворцовые отда­вал. А после того и весь ей княж Ондреевъской удел отдал и бояр и диаков у нее устроил. А по городом по ее и по воло|л. 54 об.|стем пожалованы дети боярские великого князя. Того же дни велел князь великий в Переславле из тюрмы ис тына выпустити княж Андреева сына углецкого князя Дмитрея. А сидел пойман 49 лет и 4 месяцы, а пойман 7 лет. И жил в Переславле на том же своем дворе в тыне. А дети боярские у него на бреженье и стряпчие всякие были ему даны, и ключники, и сытники, и повары, и конюхи великого князя. И платья ему посылал князь великий с Москвы, и запас всякой был у него сушильной и погребной сполна, чего бы похотел. И ездити было ему по посадом по церквам молитися вольно, куды хотел. И пожил немного и там преставися, а у ве­ликого князя на Москве не бывал. И положиша его у Дмитрея у Прилуцкого на Вологде, где лежит брат его князь Иван, а во иноцех Игнатей.
Лета 7050-го марта митрополита Иасафа сослал князь велики на Белоозеро в Кирилов, а на его место в митрополиты учинил ноугородцкого владыку Мака|л. 55|рия в великое говенье. И в Новгород на владычество митрополит жеребьевал о чюдовском архимандрите о Ионе да о хутынском игумене о Федосье. И остался жеребей на престоле хутынского игумена, того митропо-
_________
^ф) В рукописи Прон с выносным н.
^х-х) Написано по счищенному.

-27-

лит и в архиепископы приговорил совръшити и совръшил его в том же лете в мае. Майя же князя Ивана Шуйского в чернцех и в скиме ^ц), положен бысть на Москве у Богоявленья. В те же поры на Белеозере в поиманье не стало князя Ивана Бельского, уморен бысть гладом, 11 ден не ел. Да на нем же чепей и желез, тягости, было пудов з десять. А иные люди говорили, что повеле­нием князя Ивана Шуйского да князя Ондрея Шуйского князь Иван убьен бысть Гришею Оже­говым да Митькою Клобуковым, да Петроком Зайцевым. И положен бысть у Троицы в Сергиеве монастыре.
Лета 7050-го приходили к великому князю к Москве литовские послы пан Ян Глебов с товарыщи и взяли перемирья на 7 лет. |л. 55 об.| А против того великого князя послы боярин Василей Гри горьевич Морозов да углетцкой дворецкой Федор Семенович Воронцов Демид, да диак Постник Губин пошли в Литовскую землю с троицина дни и того же лета и пришли назад поздорову, исправя посольство.
Лета 7052-го декабря в 28 день положил князь великий опалу свою на боярина своего на князя на Ондрея на Михайловича на Шуйского. И убьен бысть на дворце ото псарей. И дневал в Куретных воротех. И оттоле послан в Суздаль, где их родители кладутца.
Лета 7053-го апреля отпустил князь велики под Казань воевод в судех: князя Семена Пункова ^ч) да князя Василья Серебряного с товарыщы. А на Гостин остров пригребли майя 14 день, майа же 28 в Новгород пригребли поздорову.
Лета 7054-го казанские князи и мырзы из Казани злочестиваго царя выслали, а к великому князю присылали бити челом |л. 56| послов своих в великое говенье, чтоб князь великий их пожаловал, дал им царя. А оне во всей хотят воле в великого князя быти. И князь великий посылал в Казань Останю Ондреева. И по великого князя приказу перед Останею все казанские люди великому князю шерть пили ^ч-1), что им во всем в великого князя воле быти. И пришел Останя к Москве поздорову. И князь великий после велика дни на шестой неделе отпустил в Казань на царство из Касимова городка царя Шиг-Алея. А послал в Казань на царство его сажати бояр своих князя Дмитрея Федоровича Бельского да князя Димитрея Федоровича Палетцкого, да диака Постника Губина сына Моклокова. И ис Казани выехали, не хотя царя Шиг-Алея в Казани, июня в 8 день Костров, Бибарс, Енбарс, Кулай, Кул-Ахмет, Чебан, Отучев, Шебан мырза, Азяк мырза, Куй мырза. А царя Шиг-Алея въстречали в Василегороде Би|л. 56 об.|юрган сеит, Баубек князь, Чапкин мырза, Карамет бакшей, Курбатых царицын дядька, Манук Отолык-Бараш князь, Ислам мырза, Чюры Нарыкова брат. А берегом встречали царя с черемисою Исуп Аталыков, брат царю Шиг-Алею. А пошел царь в Казань, из Василягорода июня в 8 день, на семой неделе по велице дни, во вторник. А царь Шиг-Алей сел на Казани на царстве в понедельник, на сшествие святого духа. А бояре великого князя, приведшы к шерти всее землю Казанскую, пошли ис Казани июля в 1 день, на Кузьма-Демьянов день, и пришли к великому князю на Ко­ломну августа в 4 день. А ис Казани пришли с ними послы. А отпустив князь великий в Казань царя Шиг-Алея, того же лета был на Коломне и з братьею, со князем Юрьем с Васильевичем да со князем Володимером Ондреевичем. А с ним были на Коломне и в Серпохове многие воеводы и сила великая всего Московского государства, столько кажут |л. 57| людей на Коломне от начала не бывало. Июля в 21 день, назавтрее Ильина дни, велел князь велики на Коломне у своего стану перед своими шатры казнити бояр своих князя Ивана Ивановича Кубенского да Федора Демида Семеновича Воронцова, да Василья Михайловича Воронцова же, что был попреж того дмитров­ской дворецкой, за некоторое их к государю неисправление. И казнили их - всем трем головы посекли, а отцов духовных у них перед их концем не было. И взяшя их по повеленью по великого князя приятели их и положиша их, где же которой род кладетца. А боярина и конюшего Ивана Петровича Федоровича в те же поры ободрана нага дръжали, но бог его помиловал, государь его не велел казнити за то, что он против государя встречно не говорил, а во всем ся виноват чи­нил. А сослал его на Белоозеро, а тягости на него не велел положити. А животы их и вотчины их всех велел князь вели|л. 57 об.|ки поймать на себя. Тогды же после тое казни и неодиножды был на Коломне на пытке Иван Михайлович Воронцова. Того же лета царь Шиг-Алей из Казани утек, что было ему в Казани немочно пробыти. А после его старой казанской царь Сафа-Кирей Казань
_________
^ц) Далее, очевидно, пропущено не стало.
^ч)> В рукописи н выносное.
^ч-1) Так в рукописи.

-28-

засел и всех казанских князей высек и Чюру Нарыкова велел изсечи. А брат Чюрин и иные ка­занские люди прибежали в те поры из Казани на Москву к великому князю служити, а князь велики в те поры в объезде.
Лета 7055-го сентября в 16 день поехал князь велики и з своею братьею, со князем Юрьем и с князем Володимером, к живоначальной Троице в Сергиев монастырь молитися. А оттоле при­ехав, был на Москве в Воробьеве два дни, а из Воробьева был на Волоке, а с Волока во Ржеве да в Старице, а из Старицы во Тфери. А изо Тфери на подводах гонял, был в Новегороде в Великом да во Пскове, да во |л. 58| Псковском же уезде у Пречистые в Печерах. И даде к Пречистой в Печеры 90 деревень. А от Пречистые ис Печер был во Псковском пригородке в Вороначе у Бо­риса у Сукина, что был Борис наместник на Вороначе. А из Воронача был во Пскове, а изо Пскова в Русе, а из Русы в Новегороде в Великом, а из Новагорода у Пречистые на Тихвине. А от Пре­чистые от Тихвинские перенялся прямо на ям на Волочек. И пригнал на Москву на подводах декабря в 10 день в третьем часу нощи с суботы на неделю безвестно. От Пречистые от Тихвин­ские к Москве в пол-4 дни перегнал для того, что чаяли по полоняниковым вестем крымского царя или царевичев к Москве. Да и того для, что ис Казани Кадыш князь и вся земля прислали к великому князю к Москве трех татаринов с тем, что оне царя казанского Сафа-Кирея в городе |л. 58 об.| в Казани осадили, только у него его людей 70 человек. И князь великий прислал бы к ним своих людей ^ш). А велит им князь велики поймав царя к себе прислати, и оне пришлют. А велит его в Ка­зани убити, и они его убьют. Декабря же в 13 день, в понедельник, начат князь великий Иван помышляти женитися и советовал о том со отцем своим Макарием, митрополитом всеа Русии. И митрополит о том назавтрее того во фторник после заутрени у соборные у Пречистые церкви молебны пел. Да во фторник же у митрополита все бояре были, и те, которые в опале были, по митрополиче по них посылке. И с митрополитом все бояре у великого князя были, и выидошя от великого князя радостны. И декабря в 17 день, в пятницу, был у великого князя митрополит и все бояре. Князь же великий перед бояры рече митрополиту: “Милостию |л. 59| божиею и пречистые его царици богоматери и великих чюдотворцев Петра и Алексиа, и Ионы, и Сергия чюдотворца, и всех руских чюдотворцев молитвами и милостью, положа на них упованье, а у тебя у отца своего благословяся, помыслил есми женитися. И ты, отець наш, меня благословил помышляти женитися. И яз по твоему благословленью умыслил и хощу женитися, где ми бог благоволит и пречистая его богомати, и чюдотворци Руские земли. А помышлял есми женитися в ыных царст­вах, у короля у которого или у царя у которого. И яз, отче, тое мысль отложил, в ыных государьствах не хочю женитися для того, что яз отца своего государя великого князя Василья и своей матери остал[ся] ^щ) мал, привести мне за себя жену из ыного государства, и у нас нечто норовы будут розные, ино межу нами тщета будет. И яз, отче, умыслил: хочю женитися в своем государстве, |л. 59 об.| у кого ми бог благоволит по твоему благословленью”. Митрополит же и бояре от радости заплакаху, видяще такова государя млада суща, а ни с кем советующа, развее божия по­мысла, таков благ помысл хотяще исполнити. И рече ему митрополит: “Бог тебя, царя и госу­даря, и пречистая его богомати и все чюдотворци благословляют такой великой и доброй помысл совръшити. Да и яз, грешный, благословляю тебя женитися, где, государь, умыслишь по божью строению. А буди на тебе, на государе, божиа милость, а наше грешных благословление, и съвръши бог твою мысль исполнену в благое дело”. А бояря тако же рекоша государю и похвалиша доб­рый его совет на благое дело. Декабря же в 19 по великого князя приказу во все городы во все приказы розослали х ключником, кото|л. 60|рым села дворцовые приказаны, и ко всем посельским грамоты. А велено им з женами к Москве быти на рожество Христово к великого князя радости, а, приехав, явитися им велено казначею Федору Ивановичю Сукину да диаку Якову Григорьеву сыну Захарова. Декабря же в 22 день розослал князь велики во все городы Московского государства окольничих и княжат, и боярских детей сверстных, и диаков введеных и дворцовых. А в Новгород и во Псков послал окольничего Ивана Дмитреевича Шеина, а с ним тамошних диаков смотрити у князей и у детей боярских дочерей. А которые при великом князе бояре и князи, и боярские дети, и княжата, и князь велики сам у них их дочерей смотрил, пожаловал и нарек себе в великие княгини Романову дочь Юрьевича Захарьича Настасью. И велел ей быти на своем дворе в своих |л. 60 об.| полатах. А у ней велел быти матери ее Ульяне Романове жене Юрьевича,
_________
^ш) В рукописи людех.
^щ) В рукописи л выносное.

-29-

да княгине Настасье княж Василья Васильевича Шуйского, да бабке своей княгине Анне княж Василья Глинского. Генваря в 3 день положил князь велики свою опалу на князя Ивана на княж Иванова сына Дорогобужского да на князя Федора на княж Иванова сына Овчинина Оболен­ского, велел их казнити смертною казнью: князю Ивану головы ссечи, а князя Федора велел на кол посадити; и животы их и вотчины велел на себя взяти. Февраля в 3 день, на святого Семиона богоприемца и Анны пророчици, бысть радость государю благоверному царю и великому князю Ивану Васильевичю всеа Русии и всей Руской земле: женился государь наш, взял за собя Рома­нову дочь Юрьевича Анастасию, венчался у Пречистой богородици в соборной церкви. А венчал его Макарей ^ъ), |л. 61| митрополит всеа Русии, а отець его духовной протопоп Федор шол перед ним со крестом, а з святою водою шол и кропил великие княгини отец духовной Рожества пречистые протопоп Федор Лопот ^ы). А тысяцкой был у великого князя брат его князь Юрьи Васильевич, а боярин - брат же его князь Володимер Ондреевич, а друшки были князь Дмитрей Федорович Вельской да Иван Михайлов сын Юрьевича. А великие княгини друшки были князь Иван Ивано­вич Пронской Турунтай да Михайло Яковлев сын Морозова. А конюшей был князь Михайло Васильевич Глинской. А свечи несли Василей Михайлов сын Юрьева. Февраля в 6 день, на тре­тей день после великого князя радости, женился князь Иван княж Федоров сын Мстиславского. А дал за него князь велики дщерь князя Олександра Борисовича Горбатого княжну. А сам князь Олександр |л. 61 об.| был на службе в Муроме, а из Мурома ходил воевати казанские места.
Того же лета априля в 12 день, на память святого священномученика Василья, епископа Парийского, на святой недели во фторник, на десятом часу дни загореся на Москве в Новом го­роде в Москотильном ряду меж Ильинского хресца и меж Варварского. И выгореша в Новом городе мало не все дворы, а церквей подылось древяных 18, а лавки все гостиный суконничи ^ь) и всех торговых людей погорешя. А осталось у того пожара на Ильинской улице двор Ивана Петровича, что был Гостин двор, Тре[ть]яка Порунова, да и за его двор по левой стране до Въскресения, от Воскресения до Козьмы-Демьяна и до Троицы, а от Троицы и до Мироносиц, а от Ми­роносиц до Николы до Старого, те все церкви и дворы бог сохранил, не горели. |л. 62| Да и лавок на Никольском кресце з десять или мало болыпи не згорели же, а в них сидели с хлебы и с колачи и з солью. Да за теми же лавками стояли житницы с хлебом торговых людей, и те бог сохранил, не згорели же. А после того в 9 день в среду априля же в 20 день, на преподобнаго отца нашего Федора Трихина, рекше Власенаго, на 11 часу дни загореся за Язую ^э) у Семиона святого. И вы­гореша мало не все за Язуе ^э). А ^ю) князь великий в те поры жил и с великою княгинею в Воробьеве ^ю). А говорили про оба пожара, что зажигали зажигальники. И зажигальников мно­гих имали и пытали их. И на пытке они сами на себя говорили, что они зажигали. И тех зажи­гальников казнили смертною казнью, глав им секли и на колье их сажали и в огонь их в те же пожары метали. А после того того же лета явились на Москве по улицам и по иным городом, и по селом, и по деревням многие сердечники, выи|л. 62 об.|мали из людей сердца. А после того того же лета июня в 21 день, на святого мученика Ульяна Тарсянина, на 10-м часу дни загореся на Арбате на Здвиженской улице Вздвиженье честнаго креста, и начашя горети на все четыре стороны, и выгорешя Арбат весь и Церторья мало не до Всполья, и Заниглинье все, и до Всполья все за городом, и Псковская улица, и Златоустыская, и к Володимеру Святому, и до Воронцова, и до Заяузья, и Великая улица, и весь посад ^я) большой. Да и в новом городе все церкви и дворы, ко­торые были после пожару поставлены, згореша. Да и в старом городе ^а) Благовещенье, что на великого князя дворе, все образы и книги и все церьковное строение погорешя. Да и в казнах в великого князя и в постельных крест животворящее древо, |л. 63| на нем же распят господь наш Исус Христос, и мощи святых и пречистые образ Редегитцкая, и иные святые образы карсунского письма и греческаго и цареградцкого, и платья, и все казны выгорешя. И на дворце все запасы погорешя. И на Казенном дворе все полаты и погребы выгорешя, только осталась одна Большяя казна, что от Архангила, да и Вознесенье, и у чюдотворца у Олексия, и у Офонасья Святого, и у Исповедников, и у Риз Положенья, что на митрополичем дворе, в церквах святовство все вы­горешя же. А чюдотворца Алексиа в те поры из ^б) церкви ^б) вынесли и поставиша его перед Архан-
_________
^ъ) Далее имеется корешок срезанного листа с остатками букв в верхней его части.
^ы) В рукописи т выносное.
^ь) В рукописи соконничи.
^э) Так в рукописи.
^ю-ю) Написано на правом поле со знаком вставки.
^я) Напи­сано дважды.
^а) В рукописи городом.
^б-б) Написано над строкой.

-30-

гелом в паперти. Да и митрополич двор, и князя Володимера Ондреевича двор, и житницы ве­ликого князя, и конюшни, и боярские дворы и детей боярских, и монастыри, и дворы все погорешя же. Да и кров|л. 63 об.|ли на церкви на Пречистой богородицы и на всех на каменых церквах згорешя же. Да и в полатах и в погребех в княжих и в боярских в городе в старом и в новом животы и запасы все погорешя же. А в кою пору тот пожар был, и князь велики в те поры был и с великою княгинею в селе в своем в Воробьеве. А митрополит Макарей, а с ним протопоп и ключари в те поры сидели в соборной церкви в Пречистой и не мога огненаго зноя терпети и дымной вони, да перешли мимо Архангила в Воденые ворота в тайник. А ис тайника в полночь митрополит спустися на взруб по ужишу, не измога огненаго зженья терпети и дымной вони, да переехал за реку в великого князя сад. А из саду назавтрее на первом часу дни переехал в свой монастырь в Новинской из Дорогомилова и жил в том монастыре. И князь великий и со всеми бояры к нему на думу приежщал.