ЖИТИЕ ПРЕПОДОБНОГО СИМОНА ВОЛОМСКОГО

ДРЕВНЕРУССКИЙ ТЕКСТ. /по списку ОР ГИМа,
Синод. собр. № 406, к. XVII века/ (публикация Говоровой, ее исследование).

Житие и страдание преподобнаго отца нашего священномученика Симона иже на Волмах, устюжескаго новаго чюдотворца.,

Иже святое житие поживших, и веру божественную сохранших, святых преподобных отец великих и в постных(2)* подвизех просиявших, и непрестанными к Богу молитвами велику победу на враги показавших, красная же и суетная мира сего отвергших будущия ради жизни, яже уготова Бог любящим Его, аще бо иногда еллинстии баснотворцы и нечистыя языцы, иже Бога незнающии Творца небу и земли, праздники же и поклонение идолом своим приносяще, и елико можаху кождо их тщахуся от имений своих без ума тем предлагаху, колми же нам(2 об.) паче божественною посещенным от Вседержителя Спаса Христа, и святым крещением просвещенным подобает бо достойным памяти святых, праздновати духовне, и от Христа Бога дарованная тем чюдеса похваляти во псалмех и пениих, служаще Господеви день и нощ, памяти их подобает яже предивная слышахом истинну от неложных свидетелей, достоит сице писанию предати, и о сем бо чаяние мзду будущих благ от Господа нашего Иисуса Христа приятие,(3) послушателем же, и повелителем, и сказателем, иже вправду сведущым паче же тем иже душевный разум имущим, и тем святых, жития и делы исправляюще своими труды, не мним убо иже прежде помянутая аще молчанию предати, то никако же в забвение прейдет изыдем и навыкнем известно: откуду сей таковый светилник возсия, егда от Иерусалима или от Сиона, ни рече: но в наших родех таковый светилник(3 об.) процвете, понеже бо от Святаго Духа дарованием Крест Христов на рамо взем и тесным путем шествовав, и вниде в радость Господа своего, аще мы ленимся воспомянути о сих, но сами чюдеса вопиют: и по смерти бо живи суть во веки, аще ли же дерзнем слово рещи о сем святем преподобнем отце о нем же нам слово предлежит: то веру несуменну к нему имуще рцем: таковых бо святых отец терпеливому житию аггели подивишася, похвалиша, их же имена(4) написана суть на небесех о сем бо пишет в поучении своем, Великий Василий глаголя: будите ревниви, право живущим человеком, и сих имена напишите на сердцых своих, о сем бо пре писании велми страшит слово, занеже не стяжах в себе всегда добрых дел нимало, но на Бога надежду имея, и на Пречистую Его Пресвятую Богородицу Марию, и на молитвы сего святаго и блаженнаго отца росийскую похвалу новаго чюдотворца, преподобномученика Симона им же посети Господь Бог и Спас наш(4 об.) людей своих в последняя наша роды прояви сицеваго чюдотворца, и всячески житие его преписати попекохся елико могий яже о нем како прежде быша труды его, и хождение, и чюдодействие, некоим писателем и о имени его писание по тонку изъявися не како и смутно ово зде, ово инде и на многия части человеки глагола на бяху чюдодействия святаго. И вся елика возмодно яко воедину пленицу собрав или яко цветцы от многих во(5)едино да незабвена будут святаго отца исправления и чюдеса. Понуждену же ми бывшу недостойному на таковое духовное дело пастырем пустыни тоя и иными старцы. Иже многа лета имущими в пустыни той и велико по Бозе житие живших ми мужы в добродетелех преизрядно. Мне же убо страстному дерзнувшу преписати святаго отца житие и чюдеса, прочая же и достовернейшая чюдеса навык от самого того писания иже прежде быша от неко(5 об.)его слагателя и от многочюдотвориваго его гроба, иная же от слышания от неложных свидетелей сему же буди послух Дух Святый иже научивый преписати душе полезная учения и исправления святаго отца. Рече бо Господь испыта и те писания, в тех имате обрести жизнь вечную. В них бо сокровен Сын Божий, истинна и мудрость Отчая, Его же аще обрящет человек блажен будет. Аз же глаголю: уясни язык мой, Спасе мой, разшири уста моя, и наполнюся даже глаголати подобная,(6) и творити полезная, иже мне окаянному, по неизглаголанному милосердию подав словесную кормлю на послужение сицевому полезному благонравию, в совершенном житии отца нашего, но да приимет добромыслием начало повести сея божественнаго и добляго и правдиваго его жития и хождения и терпеливаго страдальчества. Молю же вы Всеосященнейший Соборе, и христоименитое и богоизбранное совокупление, молите за мя смиреннаго и грешнаго, яко пону(6 об.)дисте мя преписати житие и подвизи преподобнаго отца нашего новаго страдалца Симона чюдотворца общаго Бога в помощъ молитвами его призываю. Сам бо рече Господь призовите мя и услышу вас всяк бо просяй приемлет, и ищай обретает, и толкущему отверзается, приемлет такожде и ко всем в него верующим: яко без Мене не можете творити ничего же. Но Господи Господи мой, аз начах о Тебе Самом. До зде прекратим, на предлежащая возвратимся.,(7)

Сей убо преподобный отец наш священномученик Симон родися в лето 7094 году, септеврия в 18 день на память святаго преподобнаго отца нашего Евмения епископа гортунскаго, в царьство благовернаго царя и великаго князя Феодора Ивановича Всея Росии, в первое лето царства его. Рождениеже его града Волока Ламскаго в монастырской отчине Пресвятыя Богородицы Честнаго и славнаго Ея Успения яже именуется Иосифов.,(7 об.) от отца именем Михаила. Матере же имяне необретохом, но се ведуще яко бяста Божии угодницы правдивы пред Богом и человеки, и всяческими добротами украшени яко же Бог любит.

И по днех неколицех по рождестве его, принесоста родителя его в церковь Божию воздающе славу Богу. Яко же обещастася, купно же иереови повелевающе яко да крещением божественным совершив крестит его, иерей же огласив его, и по обычаю над ним молитвовав и с радо(8)стию духовною и сотщанием крести его, во имя Отца, и Сына, и Святаго Духа. И Симеона во святом крещении нарек того имя быти. Возведе же его абие от купелныя воды крещения, и благодать приимша богатно Святаго Духа. Абие егда убо по святом крещении преиде неколико время месяцей и егда от доен бысть законом естества и от сусцу отъятся и от пелен свобождься. И тако абие отроча растяше прочее время по обычаю теле(8 об.)снаго восзраста, и преспевая душею и телом и духом исполняяся разума и страха Божия бе на нем дондеже достиже возраста, и поживе со отцем своим двадесять лет, в послушании и в земных трудех и во всем повинуяся отцу своему во всяком исправлении.

Бысть же в лето 7114, в царство благовернаго и великаго царя и великаго князя Василия Ивановича Шуйскаго. Попущением Божиим и за грехи всего мира, воста на Рускую Землю, рать и война от полских(9) и от литовских князей многие росийския грады и страны и места селенени быша опустеша, и людие мнози убиени быша, а инии разыдошася в разныя страны и места.

Отец же отрока сего, Михаил, обнища имением и отъиде на ину страну, сего же преподобнаго отрока Симеона остави сира. Преподобный же отрок видя себе свободна и отъиде к царствующему граду Москве, и тамо вдаде себе неокему ризошвецу да его научит, и егда же(9 об.) научися таковыя хитрости, и отъиде оттуду в поморския страны, и живяще во граде Устюге, и кормяся от трудов своих. Овогда портища шияше, овогда работаше. И поживе в том граде время неколико, и отплы во страны студенаго моря, и прииде во остров Соловецкий, во обитель преподобных отец Зосимы и Саватия, и ту пребысть во обители преподобных три лета, труждаяся во швалне, и ту научися божественному писанию извыче вскоре, и неточию(10) книжному учению прилежа, но и заповеди Божия внимаше себе. Еще же по вся дни прихождаше ко святей церкви, и в сладость послушаше Святаго Божественнаго нения. Любяше же отрок той беседовати со старцы духовными и вопрошая их о спасении душ человеческих, они же хваляще житие иноческаго пребывания. Слышав же сия отрок от старец зело распаляшеся сердечным пламенем, и тако люблением любляше иноческий образ. И абие отъиде из обители(10 об.) преподобных отец Зосимы и Саватия, и прииде во область Двинскую на реку Пинегу в монастырь Пресвятыя Богородицы, яже именуется Грузинская на Черную гору, яже преименовася Красная, чюдес ради Пресвятыя Богородицы, и молит ту игумена Макария чтобы его сподобил иноческаго образа. Игумен же незамедленно вниде в церковь и рече к нему: чадо, зде младым отроком монашескаго труда немощно понести., Отрок же моляшеся ко игумену со слезами, отче святый что(11) помышляеши суетная мира сего, не поминая рекшаго: аще кто не оставит отца, или матерь, или братию, или сестры, и всего своего рода не может быти мой ученик. И абие игумен прекланяется на умоление отрока, и наказует сице его внемли убо себе чадо, егда како уским и прискорбным путем обещаваешися ити, да не совратила тебе любы мира сего, ни память родителей твоих, отвратит твой помысл от добраго сего подвига,(11 об.) тебе же чадо буди всегда мати умиление души, брат же твой помышляй течение к горнему, сестру же стяжи сожительницу неотторжену память исхода, чада же любезныя стяжи воздыхания сердечная, раба же стяжи тело свое, други же, святыя силы, яже во время исхода позвати тя имут. Мнози бо иноцы быавют, но не вси, во едину меру сравняются, и абие сокращает наказание.,(12)

И по многом наказании приводит игумен отрока ко святей трапезе, вкупе последуют и братия тоя обители, и постриже его во святый ангельский образ, месяца ……. и наречено бысть имя ему Симон, сущу же ему от рождения, 24 лет во 118, году. И вкупе со отъятием власов, и плотская обрезует желания, оставль мир и вся яже в нем, вся узы мирскаго жития растерзав,(12 об.) о нем же ныне моление просиши уский путь да явит ти скорбная: стояние всенощное, хлеба в скудость, воды в меру, бесчестия, хуления, и насмеяния, и ругания, отрезание своих воль, терпения, преобидения, хуления, без правды терпети, нужда всякая, оболгаему – не гневатися, уничижаему – радоватися, осуждаему смирятися. Блажени путем тем ходившии яко тех есть Царствие Небесное. Добро опечалити родителей, но Господа(13) ради, ови убо опечалившии спасение получиша, ови иже множицею монашеское житие возлюбиша погибоша, и муце вечней предашася, извествуетбося многажды и то: родитей по плоти оставив, мати твоя и братия, ищут тебе, и вскоре добраго учителя Нашего Иисуса Христа, забывают рекшаго: той брат мой и сестра и мати ми есть сии суть творящии волю Отца Моего, иже есть на Небесех, и ходят(13 об.) и яко некий орел легкима крилома к воздуху на высоту возлетев. Тако и сей преподобный, отбеже всех прочих житейских вещей, и оставль род свой и вся ближники – и ужики. И предаде его игумен некоему старцу духовну, и наказав его о терпении и о послушании ко игумену и братии, наипаче же к наставнику своему. Преподобный же Симон предаде себе игумену и творяше всю волю его, и послушание ко всей братии,(14) свою же волю до конца отверг. По семже от игумена посылаем бывает в пекарню, и в поварню, и тамо с молчанием работает. на братию труды полагает, огнь возгнещая, и дрова секий, геенский огнь во уме помышляя, дабы его избыти. И вся службы монастирския со смиреномудрием проходя, и послушанием, бдением же и на земли леганием всегда удручая тело свое. Собора же братии никакоже отлучашеся. И пребысть в той(14 об.) обители время не мало. И научен от наставника своего всему иноческому житию, и на память имый давидово слово: виждь Господи смирение мое, и труд мой, и остави вся грехи моя, и прочая, в делех же чернеческих благоискусен бысть во всем, в соборном же пении и в трудех первый обреташеся, по совершении же последний. и бысть любим всеми и почитаем и хвалим. Он же не хотя славы от человек, славою земною будущия славы лишитися.(15) и нача размышляти како бы ему уединитися, и единому во уединении жити. И поведа мысль свою отцу своему игумену Макарию дабы его благословил и отпустил места себе поискати покойна и уединена. Игумен же Макарий – прозре о нем сердечныма очима, и наказав его от Святых Писаний отпусти его с миром, яко хощет тако и творит. Преподобный же отходит оттуду тайно, и прииде в Великий Нов град, и тамо обходя многия(15 об.) веси и окрестныя места, Ладогу, и Корелу, и не обрете себе места места по нраву. И прииде паки к царствующему граду Москве. И оттуду умысли ити во страну студеннаго моря. И прииде ко граду Вологде, и хождаше по всем святым местом. И с Вологды поплове – рекою Сухоною, вниз на Устюг Великий, и обрете некоего человека, поселянина христианина имянем Антония, по реклу Безсона от веси Устьюжеския. Пловущим же им(16) начат преподобный Симон ко прашивати Антония а таковом месте, где бы ему уединитися от человек. Антоний же поведа ему место завомое – Вóлмы. На реке Кичменге, отстояние имея от реки Сухоны и от веси Стреленския поприщ 20, и множае. А от другую страну отстояния имать вниз по речке Кичменге 25 поприщ до веси Сараевския. Окрест же прилежаше места того леса пустыя, блата, и мхи, и лесы черныя, и чащи непроходимыя.(16 об.) Преподобный же Симон слышав сия, велми возрадовася, и моля его да отведет тамо. Приидоста же ко граду Устьюгу, и взяша память чюдотворца праведнаго Прокопия, и от града того поидоста по реке Югу вверх, до веси Кичменския, по речке Кичменге в весь Сараевскую, и от тоя веси поидоста – до желаемаго места того зовомаго Вóлмы. Преподобный же Симон пришед на место, и много походив, и виде место благопотребно ко уедине(17)нию жителству, и доброплодно ко плодородию земных. Возрадовася велми душею, и паде на землю нача молитву творити со слезами. Молитва: Господи Иисусе Христе Сыне Бога Живаго, упование всех концей земли и в море далече, призри убо с небесе и виждь место сие, и благослови е, имене недостойнаго раба Твоего, удостой в настоящем сем месте. молитвами Пречистыя Твоея Матере, и Присно Девы Марии. Но якоже Тебе Христе изволшу(17 об.) тако и сотвори. Нашего убо разума ум несовершен есть и всякаго убо неведения исполнь. Но сам Господи Ты настави мя якоже веси, вся бо Тебе возможна суть., И Ты о Всемилостивая Госпоже Владычице Богородице Мати Христа Бога нашего, услыши мя надостойнаго раба Твоего. Се ныне к Тебе единой прибегаю, теплое мое Ты заступление и покров, требующаго Твоея помощи на Тебе бо упова душа моя, но Сама мя настави и сохрани(18) от уст всепагубнаго змия зияющаго ищущаго поглотити. Сохрани Владычице и хотящим на месте сем работати, и молитвы к Богу возсылати, о благоверных царех и о благоверных царицех, и о благородных чадех их, и о всех христолюбивых князех, и о воинстве их., и за вся православныя христианы о спасении, и утвержении, понеже спасение их, укрепление спокой нам бывает, и беспечалие. Даже тихо и безмятежно(18 об.) житие поживем, со всякою верою благою, Богу же вся хотящу спасти, и в разум истинный привести. И востав от молитвы рек аминь.,

И постави себе кельицу малую яко лакти единаго, близ реки Кичменги. Вселивжеся преподобный отец священномученик Симон в Воломскую пустыню, в лето 7121 года, месяца июля в 26, на память святаго священномученика Ермолая и иже с ним. Пришедый же с ним человек зовомый Антоний(19) виде оскудение потребных, еже на препитание, отиде во своя. Преподобный же Симон оста един на месте том, упова на Господа Бога, яко не оставит его ту гладом умрети. И нача жити ту во многих трудех, и подвизех, лесы посекая, и землю очищая, к насеянию плодов земных, и хождаше во окретныя места и веси, и у христолюбивых людей прошаше себе на препитание, отиде в потребных и к насея(19 об.)нию земных, и колико кто что подаваше ему. Он же нача мотыкою на том месте землю копати, и ту потребная насеваше, и елико ему Бог подаваше, тем питашеся от своих потов и праведных трудов, и благодарение Господу Богу воздаваше на всяк день. Пребысть же преподобный отец Симон на том месте пять лет никому же ведом токмо единому Богу. Труды же его(20) бяху таковы: яковы же от уст его слышахом около идеже сечаше лес, или землю копая, егдаже постизаше его нощь, и тогда Божия воздаваше, и коленное поклонение Богови исправляше, и паки по утреннии день зело рано востая от сна и исхождаше на прежнее свое дело и труждаяся не ленотсно. Егдаже познаша его ту пребывающа в жителстве об нем окрест живущии людие, начаша к(20 об.) нему приходити, един по единому. Преподобный же Симон виде многи люди приходяща к себе, и моляшеся им, да поне мало помогут ему очтстити место к распространению, идеже бы насеяти потребная на общее питание братии. Тии же человецы ови блажаху его, инии же ненавидяще его ту живуща, и противная глаголаху к нему, и много утесняюще его, и пакости ему деяху, дабы отшел от места того. Он же(21) преподобный вся сия со благодарением претерпеваше., И во дни державы благочестивейшаго Государя Царя и Великаго Князя, Михаила Феодоровича Всея России Самодержца, иде преподобный к царьствующему граду Москве, и поведа о такове месте, Великодержавному Государю Царю и Великому Князю Михаилу Феодоровичу Всея России Самодержцу. И молит его о том месте чтобы повелел, в таком месте непроходимом, обитель составити и братию(21 об.) собрати. Благочестивый же Государь Царь, слышав от преподобнаго Симона таковое прошение, и поразуме его наленостное и тудолюбивое житие, повеле быти по его прошению, даде ему на тот черной и непроходимой лес, свою царьскую жаловалную грамоту, еже владети ему тем местом окрест того началнаго места на вся страны по десяти поприщ. Преподобный же Симон пришед от царьствующаго града Москвы, с таковою жа(22)ловалною грамотою и паки нача призывати многия к себе земледелцы, на распространение места, и на болшия труды себе вдаде. Неленостно нача лесы посекати, и место очищати, исполняя своя обещания, еже о создании дому святыя Божия церкви, ради спасеннаго прибежища, христианскому народу, дабы в толиких пустынных, и непроходимых местах и Имени Божию прославдятися. Егда же видя еже(22 об.) от трудов своих будет лесу на поставление церкви, тогда умоляет туже пребывающего брата именем Андреана еже спотрудитися ему в таковеделе блазе, и божии любви пребывающа между има. Бысть же дело вскоре, по глаголющему: человеку начинающу, Богу же все совершающу. И абие вскоре поставиша церковь, во имя Всемирнаго Воздвижения, Честнаго и Животворящаго Креста Господня, присово(23)купиша же и трапезу и келарницу, и под трапезою устроиша житницу, на собрание потребных. Искони же ненавидяй добра, враг диавол, злу же радуя и наводя на вся по Бозе живущая, наипаче же в пустынных местех пребывающыя, всякия неприязненныя наводит сети и крамолы, дабы он супостат диавол не един в погибели мучителней был., И абие возмущает злых человек, да разорят то(23 об.) пустынное место. И абие злии человецы зажгоша ту церковь никому же ведущу. Но токмо по утреннем пении и часы отпев, егда приспе время хлеба ясти братии, и видеша извнутрьуду испод трапезы дым велий исходящь, и восташа вскоре, и не возмогоша пламене угасити, но едва потребных мало изнесше, церковь, погоре вся до основания. Преподобный же отец Симон, о сем мало поскорбе, по(24)том же возложи упование на Господа Бога, и на Пречистую Его Богоматерь, и по неколице времени воздвиже вместо погоревшия, новую церковь, абие прииде преподобный Симон во град Ростов, и испросив благословение от преосвященаго Варлаама Митрополита Ростовскаго и Ярославскаго, и взя потребная на освящение церкви. По сем и священства сана сподобляется, в лето 7128, генваря в 23 день, и прииде из Ростова в(24 об.) туже пустыню глаголемыя Волмы, и овяти тое новую церковь, Всемирнаго Воздвижения Честнаго и Животворящаго Креста Гоподня. Видевше же окаяннии бесове, от преподобнаго себе поругаемы и никако же возмогоша его от места того отгнати. Вложиша паки ин злый помысл, окрест ту живущим земледелцем, да убиют преподобнаго, и удержати имут место то в наследие себе, во един же от дний собрашася трие вкупе, и пришедше в то(25) в пустынное место, и обретоша преподобнаго единаго лес секуща., и ем же его ово ласканием увещавающе его, ово же претивше ему мучением, но и на кладу некаку полагаху его, емше за власы страшаху его, посечением, да отдаст имцарьскую жаловалную грамоту. Преподобный же моляся им пождат мало, да обрет ту грамоту отдаст им., они же не сотворше ему ничтоже зла, пустивше его(25 об.) чаяху желание свое получити. Преподобный же Симон прииде от них к живущим своим людем, и сказа им вся о себе, овии же во отшествии на трудех монастырских, и собрашася купно еже бы похватити злых тех человек. Они же окаяннии и суровии немилостивии человецы, иже прежде страшаху преподобному смертию, неведомо камо убегоста. Приспе же время праздник святаго и праведнаго иже Христа юродиваго Прокопия(26) Устюжескаго чюдотворца., людие же из всех весей по обычаю на праздник на память чюдотворца Прокопия исходити из домов своих обыкоша на Устьюг Великий для молебнаго пения, славу и хвалу воздавающе Господу Богу и Пречитей Боогородице и угоднику их праведному Прокопию., такожде и ту живущии людие ис того пустыннаго места нарицаемыя Волмы таможе на праздник святаго Прокопия отъидоша, уведа(26 об.)вше же тии окаяннии и немилостивии злии человецы и убийцы, разшествие ис того пустыннаго места людем ту живущим во град Устюг, праздника ради чюдотворца Прокопия. И пришедше окаяннии убийцы нощию в то пустынное место, и обретоше преподобнаго единаго [преподобнаго] пребывающа, и похватиша святаго яко злии волцы, и много мучиша различно раны многи наложиша ему, и огнем жгоша(27) да отдаст им царьскую жаловалную грамоту., Он же рече им господие и братие потерпите мало да шед возму грамоту и отдам вам., они же окаяннии и пустиша его а сами радостни бяху. Преподобныи же Симон прииде в церковь Всемирнаго Воздвижения Честнаго и Животворящаго Креста Господня, и пад на помост церкрвный пред образои Пресвятыя Богородицы рек: молитва.,

О Всемилостивая Владычице Богородице, ходатайца к Сыну Своему(27 об.) и Богу нашему Иисусу Христу, Тебе бо Матерь сладкаго ми света ходатайцу Тебе бо вси спасенное упокоение и пристанище предлагаем раби Твои, буди нам заступление и помощ и крепкая поборница, на Тя бо уповахом и надеемсяна Тебе, о Тебе бо все упование наше есть, и яко сподобила мя грешнаго Своего раба в пустыни сей водворитися, сына Твоего и Бога моего славити Всесвятое Имя Его и ныне Ты призри Владычице(28) на пустыню сию, и живущих в пустыне сей, имене Твоего ради, иже ижи молитву приносити к Сыну Твоему, и Тебе Владычице, о благопотребных царех, и о благоверных царицах, и о их благородных чадех, и за вся православныя христианы. Призри Владычице на рабов Твоих, и почитающих день скончания моего. Призри и на мя смиреннаго раба Твоего, и приими моление мое сие. И сотворь молитву сице рек: Владыко Господи Иисусе Христе, приими с миром(28 об.) дух мой, и посли аггела Своего мирна от Пресвятыя славы Своея наставляюща усердно ко Трисолнечному Божеству, да невозбранен ми будет восход от началника тмы со отступными его силами, и не посрами мене пред аггелы Твоими и лику избранных мя причти. И востав от молитвы, причастися Святых Страшных и Безсмертных Христовых Таин. И выйде преподобный Симон рече им: господие мои творите якоже хощете.,(29) Они же окаяннии каменносердечнии суровии злии убиицы похватиша его, и паки много мучиша и наругающеся ему и ножи разбодоша святое тело его. И наконец честную его аггелом говейную главу отсекоша. И повергше тело его близ келлии его., скончажеся преподобный отец и священномученик Симон, в лето 7149, месяца, июля, в 12 день на память святых мученик, Прокла и Лария. Тело же преподобнаго отца священномученика(29 об.) Симона, лежаше на земли, многия дни никемже вредимо, ни от зверей, ни от птиц ни от скота ту живущаго. Кровже его течащая из святаго тела его съсядеся яко камень., Пришедше же людие от града Устьюга, и видеша преподобнаго Симона лежаща мертва на земли, зело умучена, и огнем опалена, и уранена, и во главу усечена, и повержено умученное святое тело его близ келлии его. И взяша тело его оттуду(30) и понесоша не раменах своих во святую церковь, Всемирнаго Воздвижения Честнаго и Животворящаго Креста Господня., плачющеся, и рыдающе со многими слезами, яко лишишася таковаго отца и наставника своего. И призваша от града Устьюга от обители Архангелского монастыря, иеромонаха Ефрема, и певше надгробная со псалмы и песнми, и погребоша тело преподобнаго отца священномученика Симона, честно, и положи(30 об.)ша святаго мощи близ церкве о левую страну юже сам созда. Всехже лет живота его преподобномученика Симона пятьдесят пять лет, и десять месяц, и уже лета доволна мимо идоша по убиении святаго, ни от кого же преписана и брегома. И видех сия аз грешный и зело возболезновах об нем, яко таковаго светилника великаго отца паче же и чюдотворца, чюдное пребывание забвения глубиною покровено(31) бысть, и со тщанием всие дело произыдох от любве еже ко святому и от многих малая елико возмогох достигнут и многими леты умолчанная с прилежанием сочетовая, аки худейший и малейший дар писанием дело положих. Вы же господие мои не позазрите моему дерзновению Господа ради, не похищая бо на се упразднихся, но ныне аще кого от вас Бог наставит, и его святаго преподобствие. И вы Господа ради(31 об.) сие изъясните, и недостаточная наша исполните, да сугубу мзду приимете от Господа, а яз убогий припадая к честней его и многоцелебней раце со умилением вопию: О честная и освященная и аггелом говейная главо преподобне и преблаженне отче наш Симоне, принесох сие мое малое неписанийце, аще бо и неизъяснено светлостию любомудрия зане от сквернаго сердца и от чистых устен, и твоего достоинства, суще недостойно по(32) премнозей твоей почести, от Бога и достоинству, но благоутробием отеческим свойстве не прийми негрубость словесно сердце, но паче же реку и душу болезни исполнь сущу помилуй, и удостоившу сия Христу Царю и Богу всех принеси, и моли за мя грешнаго недостойнаго раба твоего яко да избавлен буду вечнаго осуждения твоими молитвами., о Христе Иисусе Господе нашем ему же слава со Отцем и со Святым Духом, ныне и присно и во веки веков Аминь.(32 об.)

Чюдеса преподобно священно мученика Симона, Воломскаго Новаго Чюдотворца.

Чюдо, 1. О некоем муже именем Агапите, пермитине.,

В лето 7153, года, марта в 20, день, прийде в тое пустыню, человек некий именем Агапий, родом пермитин., велми болен ногама многоевремя, и припадая ко гробу святаго, зело плакашеся здравия прося, скорый же на помощь, преподобный священномученика Симон услыша воздыхание(33) его и горькия слезы, и вскоре тому здравие подаде. Он же о сем возрадовася зело, и прослави Бога, и Пречистую Богоматерь Пресвятую Владычицу нашу Богородицу, и величаше преподобнаго отца нашего Симона Воломскаго Новаго Чюдотворца. И положи обещание свое, ежа неизыти из тоя пустыни вся дни живота своего. Но и пострижеся ту во иноческий образ. Поживе же ту неколико время в добром наказании и исправлении и по(33 об.)слушании. Потом же наваждением вражиим прииде ему во ум неподобная мысль, он же раскаявся и убеже из пустыни той в мир. И паки в туже болезнь впаде горши перваго. И абие воспомянув свое согрешение еже преступи обещание свое. И паки возвратися в тое же в пустыню ко преподобному Симону чюдотворцу. И по вере своей постави часовню новую над гробом преподобнаго своима рукама яже есть и до ныне(34) видима всеми, и паки получи исцеление, славя Бога, и его преподобнаго священномученика Симона.,

Того же году месяца марта в 28 день, прииде в ту пустыню зовомую Волмы, жена некая именем Мария, одержима очную болезнию многое время, и слыша от многих о чюдесех преподобнаго, отца Симона Воломскаго Новаго Чюдотворца, обещася ити она ко преподобному отцу священно(34 об.)мученику Симону. По времени же прииде в ту пустыню, и с верою приложися у гроба святаго, и отре лице свое покровом., и абие в том же часе, исцеление получи, бысть здрава, яко николиже боле, пойде во своя славя Господа Бога, и Пречистую Богородицу и угодника их преподобномученика Симона.,

Чюдо, 3. О жене Ирине, пришедшей от Студенаго моря.

Того же году, июля в 16 день, прииде в тое пустыню жена некая именем Ирина, ис помория, Студенаго моря, болна(35) сущи очима, и ногама, и обещася ити в пустыню ко преподобному священномученику Симону и пришедши помолися с верою знаменася у гроба святаго, и получи исцеление вскоре: пойде здрава яко николиже боле, славя и благодаря Бога, и угодника Его преподобнаго священномученика Симона.,

Чюдо 4 . О некоем человеце Спиридоне, Сараевския волости,.

155 году октября в, 5 день, прииде в ту пустыню, человек некий именем Спиридон(35 об.) Сараевския волости, деревни именем Подола, болен бе очима от многа времене, яко немощи ему нимало света зрити, и во един от дней, пррде ко гробу святаго и припаде со слезами, прося исцеления: и отре ока своя покровом, иже есть на гробе святаго, многий же в милости во всем подражая своему Владыце, вскоре тому исцеление дарова, и видяще ту таковое преславное чюдо, вси прославиша Бога, и уго(36)дника Его преподобнаго Симона.,

Чюдо, 5. О дву женах исцелевших у гроба святаго.,

Того же лета приидоша в ту пустыню две жене, едина именем Ирина, другая же Улияния, обе Сверхоюжья: и внидоста в часовню, падше у гроба святаго, и молящеся со слезами, и воставше приложишася гробу святаго, поведаше о себе яко много скорбехома, едина очима болезнующи зелне, другая же внутреннею болезнию,(36 об.) велми страждущи, и по явлению и извещению преподобномученика Симона, прежде бывшаго к ним, обещахомся ити в сию пустыню, и у гроба святаго приложитися, и от того времене от тех болезней облегчение прияхома, молитвами преподобнаго, и поидоста в домы своя радующеся и благодаряще Бога, и угодника Его Симона.,

Чюдо 6. О жене именем Антониде, Стреленския волости.

Не мню праведно, ниже достойно и сие умолчати,(37) еже о чюдеси преподобнаго отца священномученика Симона, в лето156го, месяца ианнуария в 17: день, привезоша в пустыню жену некую имянем Антониду Стреленския волости, одержима бе тяжко внутреннею болезнию, и от тоя зелныя болезни, неможаше владети руками и ногами, и все тело ея разслабе поведаху же о ней свои ея: яко есть ей в недузе сем 2, лета, не владе собою нимало, и пред сими денми(37 об.) мало она яко от сна воспрянувши, поведа нам благую свою мысль: еже бы везоме быти ей в Воломскую пустыню, и видети гроб преподобнаго Симона, яже слышах о чюдесех бываемых от гроба святаго., и по желанию ея привезохомю семо, и несоша ея в церков Всемирнаго Воздвижения Честнаго Креста Господня, и певше молебная Господу Богу, и Пречистей Богородице, И несоша ю в часовню ко преподобному., И полагают близ гроба(38)святаго., она же на мног час со стенанием и слезами моляся святому здравия прося, глаголя: О святче божий преподобне отче Симоне, помози ми, и избави мя от болезни сея, сия же и ина многа словеса на молитву простираше, тогда же дивный в чюдесех, и скоры на помощь, услыша моление ея, абие дарует ей здравие: воставше бо от одра своего болезненаго сама о себе, никому же коснувшуся ей, припаде ко гробу святаго лю(38 об.)безно лобызаше, многу слыша в себе крепость, нача владети рукама и ногама, и помолишися изыде здрава, яко николиже боле, вси же бывшии ту видевше таковое великое чюдо, воздаша хвалу Господу Богу, и угоднику Его преподобномученику Симону, яко молитв ради его, та жена Антонида получи, от таковыя великия скорби здравие, и радуяся о Господе Бозе, поидоша вси в домы своя.

Чюдно убо(39) показуется словопроповеди, еже о ныне бываемых чюдесех в лето 171го, месяца марта в 17 день, некий человек имянем Никита, по реклу Чертихин из веси Стреленския волости прииде в Воломскую пустыню ко преподобному Симону., и поведа о себе: бывшу мне болезновати левою рукою годищное время, яко ни двигнути могущу ея. И слышав от многих о чюдесех преподобнаго отца священномученика Симона бывающих от гроба его, яко(39 об.) мнози приемают в различных скорбех исцеление: и той Никита возстенав от сердца нача призывати со слезами на помощь преподобнаго Симона, о исцелении тоя болезни, и положи обещание еже дойти до гроба преподобнаго, и помолитися: и от того времене нача тою рукою владети, и по обещании своем прииде в пустыню, и помолшися у гроба святаго совершенное здравие получи, и бысть рука его здрава(40) яко и другая, и отиде в дом свой радуяся и благодаря Бога, и угодника Его преподобнаго отца Симона.,

172го году октября в 14, день, прииде в пустыню жена некая именем Христина, бе глуха, яко нимало слышати можаше, жителством волости Сараевския, и припаде ко гробу преподобнаго отца священномученика Симона, на мног час моляся со слезами прося от скорби тоя помощи, и обле(40 об.)гчения, и молитвами святаго в то время(? на полях) получи исцеление у гроба его, анча слышати ушима яко и прежде, и благодаря Бога, и преподобнаго отца Симона, и иде в дом свой радуяся.,

Ино чюдо хощу вам поведатибратие, сбывшееся в лето 175го, июня в, 8 день, человеку некоему устьянцу, чадромския волости, именем Григорию: скорбящу ему люте ногама своима, годищное время, яко нимало посту(41)пити могущу о себе, во едину же нощь бывшу ему в тонце сне, и слышит к себеглас глаголющь: Григорие Григорие, аще хощещи исцеление получити, и от належащия тебе болезни свободитися, то вскоре получиши здравие, токмоположи обещание еже ити в Воломскую пустыню, гроб преподобномученика Симона видети, и помолитися ему, что терпети в той пустыни до скончания своего, да будет ти(41 об.) здравие от скорби сея, он же Григорий возбнув от сна, и нача своих ту вопрашивати, кто ми о сем глагола., еже ми дати обещание и быти в пустыни Воломской, у преподобнаго мученика Симона чюдотворца, домашнии же его вси отрицахуся, яко не токмо глаголати нам о сем, но и слышания мы ни от кого о таковей пустыни, и о преподобнем Симоне никогда вслухи наша бывало, он же Григорий вня в сердцы своем, непросту быти явле(42)нию сему, нача преподобномученика Симона молити о помощи в скорби той, и положи обещание еже ити в тое Воломскую пустыню, и пострищися ту., и от того времяне нача своима ногама владети и ходити, и егда слыша в себе совершенное здравие, пойде от веси до веси, вопрошая о той Воломской пустыни, бе бо растояния до тоя пустыни сто поприщь и вящши. И дойде до монастыря Николая Чюдотворца, иже зовется(42 об.) на Маркуше(?) в Важеском уезде, и неции ту знающии жителие поведаша ему о той пустыни, и того же лета месяца июля в 18 день прииде той Григорий в пустыню ко преподобномученику Симону, и много моляся у гроба его, и вся сия нам о себе, и о исцелении своем подробну поведа, и поживе в той пустыне здрав, в добром послушании, и пострижеся ту во иноческий образ, и наречено бысть имя ему Гурий, и бе(43) благодаря Господа Бога, и Пречистую Его Богоматерь, и угодника Их преподобнаго отца священномученика Симона, и не исходя ис той пустыни, и преставися.,

179го году, месяца септеврия в 10, день, Иерей некий имянем Косма, по прозванию Молоков, служитель церкви Рождества Гопода нашего Иисуса Христа Бобровскаго яму, скорбя ногами, и неможаше отнюдь исходити из дому своего десять седьмиц, и вящши, и прииде(43 об.) ему во ум о преподобнем отце священномученике Симоне, яко многа и различна бывают от него исцеления с верою приходящим, и нача его он молити, и в помощь призывати, дабы от тоя скорби помощь получити, и изрече: аще молитв ради твоих преподобне отче Симоне получю себе здравие от скорби сея ногоболия то без всякаго сомнения немедленно иду во обитель твою отче, и молебная совершу Господу Богу,(44) и Пречистей Богородице, и гробу твоему поклонюся. И от того дне почю в себе от скорби тоя облегчение нача ногама своима поступати, и ко церкви Божии церковнаго ради служения ходити и день от дне отлагая, медляше изжидая благополучна времене к пути, и паки найде на него таяжде болезнь горши перваго, яко и составы всеми своими весь ослабе, ниже двигнути можаше. Он же Иерей воспомянув прежде обещанная, еже обещася(44 об.) ко преподобному, нача пред всеми ту живущими покаяние приносити, еже умедли своим хождением в пустыню ко преподобному, и припаде верою паче перваго со слезами, нача преподобномученика молити, и в помощь призывати, умилно глаголя: святче Божий Симоне, не прогневайся на мя закосневшаго моим хождением аще мя ныне твоими к Богу молитвами, от болезни свободиши: то вскоре без всякаго размышления иду во обитель(45) твою преподобне, и гроб твой вселюбезне да целую, и пакив мале времени той иерей Козма получи себе совершенное здравие, яко николиже боле, и востав от ложа болезненаго иде вскоре ко преподобному пешима ногама, и прииде пев молебная, и освященныя воды причастися и гроб преподобнаго целовав, иде в дои свой радуяся, благодаря Бога, и угодника Его преподобнаго священномученика Симона, Новаго Чюдотворца.,(45 об.)

180го году, септеврия в 14 день, прииде в Воломскую пустыню, Святицкой волости, жена некая именем Евпраксия, и поведа о себе: бывшу мне в болезни тяжцей зело, и от тоя великия болезни, отяшася нозе мои на полгодищное время и вящши, не можаше нимало воставати ни двигнутися, и слышах бывающая чюдеса от преподобнаго Симона, яко призывающыя его с верою различна исце(46)ления приемлют, и сицевая слышах обещахся яз ити в Воломскую пустыню помолитися, и гробу преподобнаго отца священномученика Симона приложитися, и от того часа слыша себе от скорби тоя облегчение, и нача ногама своима ходити, иде в Воломскую пустыню пеша, и молебствовав у гроба святаго приложихся: иде во своя славя и благодаря Бога, и преподобнаго отца Симона:

Чюдо, 12. О муже именем(46 об.) Димитрии Исакове.,

181го, марта в 11, день, прииде в Воломскую пустыню, Бобровскаго яму с Сухоны реки, Димитрий Исаков сын попов, и поведа о себе сице: бывшу ми в болезни тяжцей зело, и от тоя болезни найде разслабление не могий рукама и ногама, и всем телом своим владети, и двигнутися: и положи обещание еже ити ко преподобному отцу священномученику Симону, иноческий образ(47) восприяти, и во обители святаго быти в терпении, и не по мнозех днех нача собою владети, и пришед в пустыню пешима ногама, и пев молебная: и гробу святаго приложися и бысть здрав яко и первее, и пострижеся ту, и нареченно бысть имя ему Дионисий.,

Многажды убо нам и скорби к лучшей жизни бывают, или к плотстей или к душевней в будущее,(47 об.) якоже и ныне скажем бывшее сего преподобнаго отца священномученика Симона, бе убо обычай таков пустыни тоя, за умаление братии и белцов без стражи и всякаго опасения всему скоту ходити в диких лесех, и во 181м году месяца иуния в 25 день, во время жатвенное не прииде скот монастырьской з дикаго леса, братиям же и белцом утрудившимся от земледелия чрез весь день до нощнаго времене, и ни еди(48)ному же могущу пойти заблуждшаго того монастырьскаго скотиннаго стада искати, и во утрий и вторый и третий день, много труждьшеся вси по диких лесех искавше и не обретоша: братия же и белцы велми о сем скорбяще: инии же плачюще преизлиха слезы испущающе воспоминающе пустынную скудость, и уже всем отчаявшимся: мняху яко зверие поядоша, и по сем на моление обратишася: на(48 об.)дежду имуще на преподобнаго отца Симона, поминающе жителства его скудость, и пустынное озлобление, и в день верховных апостол Петра и Павла, по отпетии вечерни вси изыдоша из церкви велми печалующе, и се стоящии слышаша топот велий и всем зрящим на ту страну идеже слышашеся, и видеша свое стадо скотское борзо бежаща к монастырю, и за ним зверя велия бежаща, и(49) ревуща, зовома медведя и окрест животинного стада борзо бегающа и во едино совокупляюща яко пастырь, и на скотной двор со скоты прииде: абие зверь той невидим бысть, братия же и белцы скорошедше видети мняху яко вреждени суть скоти от зверя, приидоша же и видеша скот свой весь здрав, и ничим же врежден, и ужасахуся вси ужасом велиим, друг ко другу умилно взирающе(49 об.) единогласно глаголюще: О дивное чюдо братие., како Бог прославляющих Его прославляет угодники своя, по реченному: волю боящихся Его сотворит, и молитву их услышит и от всех скорбей их избавит их, и вси купно прославиша Бога, идоша во церковь певше молебная и преподобнаго отца священномученика Симона гроб с радостию, вкупе же и со слезами лобызающе: кийждо во своя разыдошася славяще Бога, и(50) Пречистую Его Богоматерь, и по сем дивном бывшем чюдеси, и до сего дне скот по диким лесом хождаше бестраже, и всякаго опасения, и никим же врежден бываше, молитвами преподобнаго отца священномученика Симона.,

Добро есть Божественное Писание всем верным проповедати, и святых Его почитати лепо есть: яко же и днесь святаго отца Симона, о чюдеси слово пред(50 об.)ложити хощем: во 188м году авгаста в 13 день, муж некий имянем Артемий, житель Сараевския волости с супружницею своею Епистимиею иместа у себе сына единаго имянем Евтихиа, и разболеся у нею отрок, и болезнь его бе крепка зело, жена же Артемиева, положи обещание ко преподобному отцу Симону сицево: аще за молитвы святаго будет отроча мое здраво, да иду с ним в Воломскую пустыню, и(51) помолюся у гроба святаго священномученика Симона с сим отрочатем, болезнь же отрочате крепляшеся зело и от тоя великия болезни, умре, и лежа мертвый отрок на одре своем нощеденство, мати же отрочате пася гроб и погребалная яже довлеяше, и нача поношати на святаго сице глаголя: увы мне, преподобна отче Симоне, сего ли ради велию веру имех ко святыни твоей, еже умрети чаду моему, кто бо(51 об.) наследник будет нашему стяжанию, с кимли пойду ко честному гробу твоему, или кому повем милость твою великую юже на многи изливаеши., и ина многа поносная на святаго глаголющи: а ныне с нам же обещахся ити ко твоей святыни, хощу вести ко церкви на погребение, и абие лежай мертвый отрок оживе, и нача плакати по обычаю детску, и от того временеоздраве, и по неколице(52)времени прииде мати со отроком в Воломскую пустыню к преподобному Симону, пев молебная, и гробу припадая умилне сице глаголя: преподобне отче священномучениче Симоне, не прогневайся на мя грешную, толико дерзнувшую рещи на святыню твою, от многия бо печали сия ми быша, и от неразумия моего, на отчаяваюся бо моего спасения тебе моего помощника имея, и слезами омывая лице моляся святому(52 об.) отцу Симону, и тако со всяцем благодарением прия отроча свое, и радостно в дом свой возвратистася, слвяще Святую Торицу Отца, и Сына, и Святаго Духа и хвалу воздающе великому в чюдесех преподобному отцу Симону.,

Чюдо 15. О муже именем Илии Иванове, Серебренике.,

188м году, августа в 14 день: прииде в Воломскую пустыню к преподобномученику Симону града Устьюга, посацкий человек имянем Илия Иванов(53) Сребраников, и поведа о себе: бывшу ми в тяжцей болезни десять седмиц, яко всем телом своим не можаше владети ни двигнутися, и бывшу мне в тонце сне приидоста ко мне два монаха благолепна зело, и рекоста друг ко другу: что сотворим трудоватому сему, един же от нею рече ко другому, помажем сего трудоватого, и начаста мя мазати из некоего сосуда: рукама своима, по челу, и(53 об.) по главе, и по персем, и по рукама, и по ногама, и наполнися дом вони благоуханны, и рече, един от нею: Илие, бедет тебе здравие вскоре, аз же вопросих ею, вы святая отца откуду еста, она же рекоста: мы есма Воломския пустыни началника, и рече има аз, како имена ваю, един рече имя мое Симон, другий же имене своего не поведа но токмо рече иде скоро в Воломскую пустыню,и(54) помолися у гроба преподобнаго священномученика Симона, и в том часе невидима быста, и последи того видения в третий день, нача собою владети, скоро прииде в Воломскую пустыню: пев молебная пад у гроба преподобномученика Симона прошаше совершеннаго исцеления., и в том часе здрав бысть всем телом своим, иде в дом свой радуяся, славя Бога: на угодника его блаженнаго Симона.

Ино чюдо хощу поведати вам о преподобнем, того же лета, и месяца, человек некий града Любима: именем Симеон Исаков, прииде поведающи о себе подробну, случися мне быти в велицей болезни чревоболия многия лета, и от многия зелныя болезни многи дни без сна пребыти, не дающи ми ни малы ослабы: еже почити телесно., единою же от дней ослаби ми тая тяжкая болезнь малым облегчением(55) бысть яко в восторзе, и абие прииде ко мне монах благообразен, и сединами зело украшен, и рече ми: Симеоне Симеоне востани вскоре, и помолися Господу Богу, и Пречистей Его Богоматери, и положи обещание еже ити тебе в Воломскую пустыню и помолитися у гроба преподобнаго отца священномученика Симона., абие воспрянув яко ото сна, и нача помышляти в себе, яко ни от кого ни где же о такове пустыни: и преподобнем(55 об.) Симоне слышав, по мале же от болезни свобождение приемлет, и поеха ко граду Архангелскому: купецких ради вещей, и бых тамо и возвратихся: и о зиме во граде Великом Устюзе, бывшу же ему во озимении, и прииде прежде помянутыя пустыни старец сказа подробну Симеон же возрадовася зело: и иде в Воломскую пустыню, и пев молебныя, приложися у гроба преподобнаго отца священномученика Симона,(56) приемлет совершенное исцеление, яко николиже болезнова, пойде в дом свой радуяся: и славя и благодаря Бога, и угодника Его священомученика Симона.

Чюдо 17. О новописанной иконе преподобно священномученика Симона.

Праведно убо мню и сие изглаголати, еже бысть в царьство благочестиваго великаго государя царя и великаго князя, Феодора Алексеевича, всея Великия и Малыя и Белыя Росии Самодержца. В лета 7189 году, тогда убо живущим(56 об.) во граде Велицем Устюзе. И окрест Воломския пустыни преподобнаго отца священномученика Симона, еже не добро быти на гробе святаго без написаныя иконы образа преподобнаго понеже старая икона кая бысть написана в лето 156 году, мерою пядница, что писал Устюга Великаго Архангельского монастыря старец Исаия Голцов. И не же умыслиша градстии людие благ совет сотворше, со старой иконы пядницы, преписати,(57) надгробную новую полную икону на гроб святаго якоже довлеяше. И избраша мужа благонравна и добродетелна житием, изографа: именем Михаила Гавриилова зовома Чистого, иже и сожитель бысть преподобному Симону, и знаяше его образ, и яко на жива зря образ писаше. И егда бысть сие благое дело в совершение прииде: образ чюдотворца написася. Тогда градстии людие вземше икону ту(57 об.) понесоша из града честне провождающе, тояже пустыни старец Симеон, и вкладчики, любезне образ лобызав приемлют: и во свою пустыню повезоша с радостию велию зело. И егда достигоша пустыни яко за пол поприща сташа: и ко обители святаго послаша: яко да сретят ю. И сия слышав иеромонах Иона строитель, зело возрадовася: собирает братию, и белцов. Братия же и вси слышавше: духовне(58) возвеселишася сретают ю честне, со святыми иноками, с кандилы и фамианом, со псалмы, и песньми и пении духовными, и со звоном, радующеся: и духовне торжествующе день той певше молебная, полагают образ чюдотворцев на гробе препододнаго Симона, над мощами его, на слву и хвалу святаго. По убиении же святаго преиде лет четыредесять едино. Многа же исцеления бывают от гроба и от образа(58 об.) святаго приходящим с верою и до сего дне. И сошедшеся духовне вкупе сице рцем ему:

Ублажаем блаженное и богоподражательное житие твое, яко чистотою преподобия своего вышния благости чюдодейство святых священномученик кровопролитие показал еси. Удивляемся предивным, и великим чюдесем твоим, яко присно текущий источник всем неоскудно исцеления проливаеши. Почитаем Честныя(59) и многоцелебныя мощи твоя: яко бо светообразная луча всем притекающим световидное откровение простираеши. Поклонаемся шары начертанному святому образу твоему, и телом еже получити нам велию милость твою: яко да твоим благим и всемилостивым ходатайством, еже о нас Всесилнаго Бога умилосердити возможеши, и вышния Его благодати получити сподобимся, и тако моления(59 об.) ради святаго своего, в настоящем сем житии от Бога обрящем милость, и будущаго избавимся мучения, и присносущнаго наслаждения причастницы будем, и Царствия Небеснаго наследницы явимся благодатию и человеколюбием истиннаго Бога, и Спаса Нашего Иисуса Христа, с Ним же Отцу купно: и Святому Духу: слава и держава, честь и поклонение – ныне и присно и во веки веков.

Того же году апреллиа(60) во 2 день, прииде в Воломскую пустыню к преподобному отцу священномученику Симону, Тотемскаго уезда, Уфтюжской волости, церковной диак Тимофей Яковлев Попов исповеде о себе: бывшу ми [мне] в немощи главоболия и от тоя тяжкия болезни изнемогоста очи мои: и отъяся желаемый мною свет, год и шесть месяц, и вящши, и не разуме когда день когда нощ; и тоя ради болезни от церкве отставлен бысть,(60 об.) и нача по миру ходити для препитания, и слышав от неких, о чюдесех преподобномученика Симона, Новаго Чюдотворца, яко многим дарует здравие, тогда яз обещахся ити помолитися преподобномученику Симону Воломскому чюдотворцу и ко гробу его приложитися с теплою верою, и в том часе абие отиде от очию моею яко чешуя, и нача свет видети желаемый всеми, совершенно даже до сего дне молитвами(61) святаго преподобномученика Симона, и пев молебныя Господу Богу, и Пречистей Богородице, и угоднику их, преподобномученику Симону, и пойде в дом свой радуяся.

Того же лета, месяца июня в 25 день, человек некий Стреленския Волости имянем Лука Симеонов, скорбяще зело огненною болезнию, и от тоя великия болезни оглох, и лежа десять седмиц без памяти, и абие(61 об.) приде во ум о чюдесех бывающих от преподобнаго Симона Воломскаго Новаго Чюдотворца, и положих во уме обещание сицево, еже ити в Воломскую пустыню к преподобному отцу священномученику Симону Чюдотворцу, и пети молебная у гроба его, и от того времени от тоя великия болезни по мале оздраве, и нача потонку слышати., и иде в Воломскую пустыню, ко преподобному Симону, и пев млебная Господу Богу, Пречистей(62) Богородице, и преподобнаго Симона ко гробу припад, и много моляся со слезами, и абие совершенное исцеление прия, и получи, пойде в дом свой радуяся, славя и благодаря Господа Бога, и угодника Его преподобнаго Симона прославляя.

Во 190м году, ианнуария в 30 день прииде в Воломскую пустыню человек некий зовомый Василий, рождение и воспитание его Важескаго уезда Кокшенские чети, поведа(62 об.) о себе бывшее чюдо от преподобнаго Симона., бывшу ему Василию, в тяжцей болезни, и в люте разслаблении не владея ни рукама, ни ногама, и ни единым удом тела своего може двигнути, токмо едва дыша, лежа на одре, и от тоя моноготрудныя скорби, ожидая себе смертнаго посечения, и в памят ему прииде преподобномученика Симона Чюдотворца, бываемая от него велия чюдодействия, и нача молитися и на(63)помощь преподобнаго призывати, и бысть в тонце сне, и виде в дому своем три иконы, первая икона Вседержителя Спаса: вторая Пречистыя Богоматере, наричемы Казанския, третия преподобномученика Симона., и глас бысть от образа преподобнаго отца Симона, Василие, Василие, о Василие., пойди в Воломскую пустыню, отпой молебная Господу Богу Вседержителю и Пречистей Его Богоматере, и ко гробу преподобномученика Симона, с верою припади: и прощения(63 об.) проси, и от твоего праведнаго прибытка от имении дар принеси, и конечное исцеление, получиши у гроба его, и абие ощутився от сна своего, и по мале нача он Василий от тоя необычныя скорби телесными уды владети, и на нозе воставати, и ходити, а явление преподобнаго ни во что же положи, и у некоего поселянина наяся скот пасти, и по мале времени он Василий в ту же болезнь впаде горши и перваго., и бысть ему(64) в тонце сне, второе явление видит человека пришедша незнаема и глаголет ему О Василие иди скоро в Воломскую пустыню, и завещание гласа во первом явлении бывшаго от образа преподобномученика Симона, скоро исполни, он же Василий и то видение в забвение положи., и бысть ему третие явление страшно в восторзе, слышит глас глаголющ с велиим ужасом и запрещением, О Василие, жестокосердый и преслушный,(64 об.) како дерзнул еси противитися силе Божии, веси како непокоривыя Бог мучит, не усомнися иди скоро в прежде реченную киновию и повеленное тебе благодарение соверша, да не зле сею болезнию постраждеши, и горкою смертию живота твоего гонзнеши: и воста от страшнаго видения, ужасеся зело, и слезы от очию точа на многи часы, глаголя, Господи помилуй: и свитающи дню, устремися(65) в путное шествие, и идяше путем плачася и дряхлуя, и прииде в Стреленскую волость в деревню Новосилие, помышляше во уме своим дабы не ити в пустыню: за скорбь велию понеже бо изнеможе, и бысть в тонце сне, и се преподобный явися глаголя: иди Василие не размышляй, и преди реченная соверши, и привед мску, повелевает ему на ню сести, и воста от сна укрепився, абие пути касается., егда же ему шествующу(65 об.) путем, воздух же ясен велий явися, мраз же бысть велий зело, оно муже Василию идущу путем, велми от мраза изнеможе, и вси удове тела его ослабеша, и нача плакати, и горце рыдати, и от великия студени измерзати, и всеконечне изнемогати, бе бо то место глаголемый Воломский волок, оно муже Василию молящуся, глаголя святче Божий Симоне помилуй мя: и абие молитвами святаго отъиде от него велий(66) мраз, и велия теплота обья его, оно муже мужу укрепившуся, и теплотою духа обвеселившуся, и дойде во обитель богоспасаемую глаголемую Воломскую пустыню, в дом святаго преподобномученика Симона, велие благодарение воздаде Вседержителю Богу, и Пречистей Богородице наричеме Казанския, и преподономученику Симону припаде ко гробу, и на мног час плакася, и прощения прося о своих согрешениих, и от целбоноснаго гроба исцеления дар прием, и совершенное здравие получи.(66 об.)

* цифры в скобках обозначают листы в рукописи.