Ко входуЯков Кротов. Богочеловвеческая историяПомощь
 


Архимандрит Софроний (Сахаров)

ЛИТУРГИЧЕСКИЕ МОЛИТВЫ

Оп. в кн. «Письма в Россию».

Боже Великий, Троице Святая, Единосущная и Нераздельная, Царю и Творче всех веков, почтивый ны образом Твоим и в видимом зраце естества нашего подобие живописавый умнаго существа Твоего, сподоби нас обрести милость и благодать пред Тобою, во еже славити Тя в невечернем дни Царствия Твоего со всеми от века святыми: отцы и праотцы, пророки и апостолы, мученики и исповедники, преподобнии и святители, молим Ти ся, услыши ны и помилуй.

* * *

Боже, Отче Вседержителю, основание Сый всему сущему, и вечности, и времени, властию Твоею положивый пределы нашего временного бытия на земли и в Сыне Твоем Собезначальном даровавый нам чрез воскресение жизнь вечную и царство непреложное, приими нас, припадающих к Тебе, и укрепи нас Духом Твоим Святым в сей час предстояния нашего страшному Престолу Твоему и к безкровному священнодействию и к неосужденному причастию Божественных Тайн, молим Ти ся, услыши ны и помилуй.

* * *

Господи, Иисусе Христе, Слове Божий и Боже, Един Сый основание незыблемое Церкве Твоея, юже Крестом Твоим и смертию создал еси. Духа же Святаго низпослани-ем освятил и оживотворил еси во веки, сподоби нас неосужденнаго предстояния Святей Твоей сей Трапезе и достойнаго причащения пречистаго Тела Твоего и Честныя Крове Твоея, молим Ти ся, услыши ны и помилуй.

* * *

Царю Небесный, Душе Святый и Благий Утешителю, Едине даяй силу утружденным и крепость изнемогающим, без Него же вей сильнии утомятся и крепции ослабеют, сытии взалчут и молодые согнутся, услыши ны в скорби нашей, обнови нас в силе Твоей и возведи к достойному служению Тебе, молим Ти ся, услыши ны и помилуй.

* * *

Отче Святый и Благий, хвалим Тя, благословим Тя, кланяем Ти ся и благодарим Тя, яко великия ради милости Твоея избрал еси место сие и освятил храм сей к славословию пресвятаго имене Твоего, и жертвенник к приношению безкровныя жертвы пресвятаго Тела и честныя Крове Христа Твоего. Тем же смиренно молим Тя, николиже отступи от нас, но якоже в веках на жертвы Отцов наших Духа Твоего Святаго низлослал еси в безмерной благости Твоей, сице и ныне не презри молений и служб наших, но сотвори нас быти служители Новаго Завета иже в Крове Христа Твоего, да причастники суще Святых Твоих Таинств, явимся сынами света Твоего в Сыне Твоем Единородном.

* * *

Ей, Отче Святый, отверзи умные очи сердца нашего и даждь нам воистину познати Тебе, Творца и Бога нашего; сотвори ны сообразны Слову и Сыну Твоему, да вообразится внутрь нас Его непостижимый Образ, по нему же создал еси человека; сподоби ны быти селением Духа Твоего Святаго и не ктому селением греха; вложи в сердца наша огнь Божественныя Твоея любве; прииди и вселися в ны вечным вселением со Единородным Сыном Твоим и Духом Твоим Святым.

II

Отче Благий, Сыне Единородный, Душе Святый, Троице Святая и всезиждительная, непостижимым повелением Твоим призвавшая нас от небытия в жизнь сию, и Тебе Единаго, воистину сущаго Бога познание нам даровавшая, сподоби нас в сей страшный час священнодействия принести Тебе разумное благодарение и непорочное славословие и яви ны достойны воздати Тебе жертву духовную о гресех наших, молим Ти ся, услыши ны и помилуй.

* * *

Отче Святый, Сый от века и прежде всех веков, безпредельный, неизменный, предвечный Источниче всего сущаго, приими молитву нашу, даруй нам свободу от печали греховной, возведи ум наш к видению неизследимых судеб Твоих и исполни сердца наша Светом Твоего Богоразумия, да сподобимся служити Тебе в духе и истине даже до последнего издыхания нашего, молим Ти ся, услыши ны и помилуй.

* * *

Господи Иисусе Христе, Боже Спасителю наш. Един Сый воистину Краеугольный Камень, на Нем же зиждится всякая жизнь, призри милостивно на ны, недостойныя рабы Твоя, дерзающия в надежде на благоволение Твое приноси-ти Тебе мольбы и моления наша, и Кровию Твоею омый нас от всякаго греха, молим Ти ся, услыши ны и помилуй.

* * *

Душе Святый, Боже Великий и Дивный, Света Источниче и Жизни Подателю, Благий Утешителю и Вседержавный Заступниче, Истины Откровение и тайносовершительная Сило, в сей страшный час непостижимой Вечери Христа не отврати лица Твоего от нас, присно оскорбляющих Тя, но прииди и милостивно склонись к немощи нашей, и, вся совершив, введи ны в Чертог Его неповинными и неосужденными, молим Ти ся, услыши ны и помилуй.

* * *

Господи Иисусе Христе, Сый Отчее сияние, существа и естества Его неизменное и всесовершенное начертание, источниче премудрости и благости неизследимая пучино, от-верзи сердце наше и утверди ум наш во еже знати Тебе единаго истиннаго Сына Божия, вземлющаго грехи мира.

Се бо страхом и верою предстоим Тебе, в бездну милости Твоея отчаяние душ наших повергающе. Омый и очисти ны от всякого греха и неправды, силою Духа Твоего Святаго яви нас быти служители Новаго Завета Твоего еже в Крови Твоей, Иисусе Боже наш; сотвори ны достойны приносити Тебе сию страшную жертву о наших гресех и о всем мире Твоем; да причастники суще Божественных Твоих Тела и Крове, обрящем мзду верных Твоих служителей и мудрых строителей в день великий воздаяния Твоего праведнаго.

III

Отче Благий, Сыне Единородный, Душе Святый, Троице светоначальная и животворящая, яже всякую тварь, видимую и невидимую, от не сущих во еже быти неизреченною премудростию приведшая и неисчетною силою содержащая, яже во прочих Твоих о роде нашем благодеяниях, пренебесное сие служение нам даровавшая, сподоби нас благодатию Твоею о величестве Тайны сея веровати и ра-зумети и сердцем чистым и умом просвещенным службы сея священнодействие якоже достойно совершати, молим Ти ся, услыши ны и помилуй.

* * *

Сый Владыко, Боже Отче Вседержителю, от всея твари поклоняемый и воспеваемый, сподоби нас Тебе Единаго воистину сущаго Бога и Отца нашего благодарити и славословити за величество любве Твоея, еюже нас недостойных тако возлюбил еси, якоже Сына Твоего Единороднаго дал еси нам, да в Нем и чрез Него сынами света Твоего явиши ны. Духом Твоим Святым удовли ны в час сей к достойному предстоянию у Престола Твоего и к неосужденному совершению сея словесныя и безкровныя жертвы, молим Ти ся, услыши ны и помилуй.

* * *

Иисусе Христе, Боже Спасителю наш, Едине истинный Архиерею, Святый и Непорочный, очисти ны от всякия злобы и лукавства и даждь нам участие и наследие со всеми от века святыми в неизследимой Тайне любве Твоея, яже к нам, причастием Божественных Твоих Тела и Крове, молим Ти ся, услыши ны и помилуй.

* * *

Душе Снятый, Вечности Царю и Жизни нетленный Подателю, по множеству скорбей и воздыханий наших умножи милость Твою в нас, и низложи вся борющия и враги, и буди Сам Ты действуяй в нас вся благоугодная Тебе, и освяти всех нас души и телеса освящением неотъемлемым, молим Ти ся, услыши ны и помилуй.

* * *

Владыко Вседержителю, Иисусе Христе, Пребезначального Отца Собезначальный Сыне и Слове, неизреченнаго ради милосердия Твоего все домостроительство спасения нашего прекрасно совершивый и по безмерному благоволению Своему вручивый немощным людям служение сему великому таинству спасения мира. Сам, Господи, щедрый и милостивый, пощади и помилуй нас, прости нам вся прегрешения наша вольная и невольная; заступи ны силою Твоею от всякаго неприязненного нападения; сотвори ны неприступны для всех козней вражиих и неприкосновенны всякия скверны, от врага находящия; сохрани ны неизменно в путех воли Твоея; утверди ны в истине слова Твоего, свобождая нас от всякого неможения и неведения.

Ей, Господи, благий и кроткий, по дару Духа Святаго Твоего благоволи нам быти непостыдными слугами Святых Твоих Таинств; сподоби нас без порока прейти путь сей служения даже до последнего издыхания нашего и дажда нам благоугодное Тебе слово во отверзении уст наших, во еже призывати благословение Твое на приносимые нами Дары.

IV

Отче Благий, Сыне Единородный, Душе Святый, Троице единосущная и нераздельная, от небытия в жизнь сию всяческая всезиждительным Твоим повелением приведшая и неисчетною силою содержащая, человеки нетленным светом Твоего богоразумия просветившая и причастники безначальные Твоея жизни явившая, приими благоволением исповедание сие от нас, недостойных раб Твоих, и даждь нам обрести благодать пред Тобою, молим Ти ся, услыши ны и помилуй.

* * *

Сый Владыко, Боже Отче Вседержителю, Безначальне, Неизменно, Непостажиме, даровавый нам в Сыне Твоем Единородном и возлюбленнем обручение будущаго наследия и славу сыноположения, низпосли на ны Духа Твоего Святаго, иже да совершит ны во всяком деле блазе, наипаче же в сей страшный час священнодействия Божественных Твоих Тайн, молим Ти ся, услыши ны и помилуй.

* * *

Господи Иисусе Христе, Начальниче Жизни, вся носяй глаголом силы Твоея, давый Себе измену смерти и из прободеннаго ребра Твоего источивый человеком нетленную жизнь, не отврати Лица Твоего от нас, недостойных раб Твоих, и приими смиренную службу сию нашу, и милость Твою богатую излей на ны в веце сем и в грядущем непреемнем Царстве Твоем, молим Ти ся, услыши ны и помилуй.

* * *

Душе Святый, Боже живый и животворяй, вечности Сый вечность, яко Сый прежде всех веков, от Него же исходит всякий свет бытия, милостивно призри на немощь естества нашего, помяни болезни наши и скорби, труды и злострадания и силою Твоею удовли ны к достойному совершению сего Божественнаго священнодействия, молим Ти ся, услыши ны и помилуй.

* * *

Боже Отче Безначальный, Сый благословен во веки, открывый нам тайны безкровнаго священнодействия и положивый нас грешных во еже приносити Тебе Дары же и жертвы о гресех наших и о всем мире Твоем, Сам Великий Царю, призри на ны в час сей предстоящия Святому сему Престолу, на нем же преложитися имут непостижимыя Тайны Тела и Крове Единороднаго Сына Твоего и Бога нашего, и свобода нас от всякия скверны плоти и духа. Просвети и освяти ны, да чистою совестию и просвещенным сердцем восприимем часть святынь и соединимся Самому Христу Твоему, истинному Богу нашему, рекшему: ядый Мою Плоть и пияй Мою Кровь во Мне пребывает и Аз в нем; да всельшуся в нас Слову Твоему, явимся храм Пресвятаго Твоего Духа, обновленнии в естестве нашем по дару сему.

Ей, Отче Святый, призри милостивным оком на ны, непотребныя рабы Твоя, и не отвержи ны от Лица Твоего, ни единаго же из нас посрамиши за еже недостойным нам быти святынь Твоих. Ты бо еси Бог наш. Бог миловати и спасати, и Тебе, Безначальному Отцу со Единородным Твоим Сыном и Святым Духом славословие, благодарение и поклонение приносим на всякий день и в век века.

V

Отче Благий, Сыне Единородный, Душе Святый, Троице Единосущная Светоначальная, Царю и Творче всех веков, рекий из тьмы возсияти свету, облистай в омраченных сердцах наших незаходимый свет Твоего боговедения и в скудельных сосудах естества нашего яви непобедимую силу Твою, неприступны показав ны ни для единыя тмы, и к правде Твоей, юже открыл еси нам, да не приложится ни единое беззаконие, но да будет во всем непорочна и свята служба наша пред Тобою, молим Ти ся, услыши ны и помилуй.

* * *

Боже Отче Вседержителю, якоже во дни оны излил еси Духа Твоего на апостолы и всех, иже беху с ними, и даровал еси им возвещать величия Твоя языками всей земли, сице и ныне, излий богатно Духа Твоего Святаго на ны, недостойныя рабы и рабыни Твоя, и сотвори ны, призывающия страшное Имя Твое, сыны и дщери безначального света Твоего причащением Божественных Тайн Тела и Крове Христа Твоего, молим Ти ся, услыши ны и помилуй.

* * *

Иисусе Сладчайший Христе, Крестную смерть прияти изволивый нашего ради спасения, да живуще не ктому себе живем, но Тебе единому, за ны умершему и воскресшему, сподоби нас достойно причаститися святых Твоих Тайн, да все, еже есть мертвеннаго в плоти нашей пожерто будет нетленным Твоим животом, молим Ти ся, услыши ны и помилуй.

* * *

Душе Святый, Свете неименуемый. Свете неизследимый и сокровенный, прииди и вселися в ны, и очисти ны от всякия тьмы неведения, напоив ны потоками познания Твоего; возстави ны низложенныя грехом, свобода ны порабощенныя страстьми, исцели ны от всякия язвы, таящияся в нас, причащением Божественныя и нетленныя Пищи, Тела и Крове Христа, молим Ти ся, услыши ны и помилуй.

* * *

Боже Отче Вседержителю Благий, Сый благословен во веки, призвавый ны в вечную славу о Христе Иисусе, Иже един Праведник сый, за ны неправедный пострада, Иже не сотвори ни единаго греха, грехи мира всего в Теле Своем на Крест вознесе, и клятву, тяготевшую на нас, излиянием Крове Своея разруши, Иже в немощи плоти явил есть нам образ Твоего совершенства, молим Тя, Отче Снятый, исполни ны свыше силою Твоею, да последуем стопам Его; сотвори ны подобники быти Благому Сыну Твоему в веце сем непостояннем и превратном, да не похулится нас ради истиный путь Твой, ниже поругаем бывает от сынов противления.

Ей, Отче Святый, тако возлюбивый ны, яко дати нам Сына Твоего Единороднаго, Иже душу Свою положил есть по нас, да живи будем во веки, во благоволении Твоем приими службу сию нашу и яви ны достойны бьгт причащения Тела и Крове Христа Твоего и вселения Духа Твоего.

* * *

Господи, Ты Сам научи меня всему... дай мне радость познания воли Твоей и путей Твоих... Научи меня воистину любить Тебя всем моим существом, как Ты заповедал нам... Устрой мою жизнь так, как Ты в Предвечном Совете Твоем мыслил обо мне... да, даже обо мне, ибо Ты никого не забыл и никого не создал на погибель... Я безумно растратил данные Тобою мне силы, но теперь, при конце моей жизни. Ты все Сам исправь и Сам всему научи меня... но так, чтобы действительно Твоя воля совершилась в жизни моей, разумею я о том или не разумею до времени... Не попусти мне ходить чужими путями, ведущими во тьму... но прежде, чем усну я смертным сном, дай мне, недостойному, увидеть Свет Твой, о Свете Мира...

* * *

Господи Иисусе Христе, Единородный Сыне Безначального Твоего Отца, отверзи очи омраченной души моея, яко да и аз разумно узрю Тебя, Творца и Бога моего.

Молю Тебя: не отвержи мене от Лица Твоего, но, презрев все мое окаянство, всю мою низость, яви мне свет Твой, о Свете Мира, и даждь мне познать любовь Твою к человеку.

О Сладчайший Христе, от Отца ниспославый на святыя Твоя ученики и апостолы Духа Святаго, Сего, Благий, ниспосли и на ны недостойныя и тем научи ны познанию Твоему и открый нам пути спасения Твоего.

Возсияй ми. Боже, Боже мой. Свет Твой истинный, яко да во свете Твоем узрю и аз Славу Твою, яко Единородного от Отца, и да вообразится внутрь мене Образ Твой непостижимый, по нему же создал еси человека.

О Боже, Спасителю мой. Свете ума моего и Крепосте души моея, да вселится в мене доброта Твоя, да пребуду и аз непрестанно в Тебе, присно нося в себе Духа Твоего Святаго, иже да даст ми уподобиться Тебе, Единому Господу моему, якоже быша подобии Тебе вей от века святыя Твоя.

Ей, Господи Иисусе Христе, по неложному Твоему обетованию, прииди со Отцем и Духом Святым и обитель Твою сотвори внутрь мене

 

 
Ко входу в Библиотеку Якова Кротова