ЛАВРЕНТЬЕВСКАЯ ЛЕТОПИСЬ

Назад    Оглавление    Вперёд

В лѣ^т̑ . ҂s҃ . ѱ҃ . н҃ѳ . [1251] поєха Глѣбъ на Бѣлоѡзеро въ свою ѿчннү ჻

В лѣ^т̑ . ҂s҃ . ѱ҃ . ѯ҃ . [1252] приде Неврюнъ и прогна кнѧзѧ Андрѣѧ за море . того же лѣта престависѧ Ст҃ославъ Всеволодичь ჻

В лѣ^т̑ . ҂s҃ . ѱ҃ . ѯ҃а . [1253] родисѧ Борисү Василковичю сн҃ъ Дмитреи ჻

В лѣ^т̑ . ҂s҃ . ѱ҃ . ѯ҃в . [1254] Ӕрославъ Ӕрославичь Тферьскыи, поєха в Ладогү .

В лѣ^т̑ . ҂s҃ . ѱ҃ . ѯ҃г . [1255] престависѧ Костѧнтинъ Ӕрославичь . того же лѣта родисѧ Борисү сн҃ъ Костѧнтинъ ჻

В лѣ^т̑ . ҂s҃ . . ѱ҃ ѯ҃е . [1257] поидоша вси кн҃зи въ Ѡрдү . и чтивъ Оулавчиѧ . и всѧ воєводы єго . и возвратишасѧ во своӕ си . того же лѣта Глѣбъ приде ѿ Кановичь . ѡженивсѧ в Татаре^х . тоє же зимы бы^с̑ число . и изочтоша всю землю Рүсьскүю . только не чтоша кто слүжить оу црк҃ви ჻

В лѣ^т̑ . ҂s҃ . ѱ҃ . ѯ҃з . [1259] кн҃зь Алексан^дръ бѣжа из Новагорода . приєха в Ростовъ . на сре^дхр^с̑тьє ^Д. кр^с̑тъ ч^с̑тныи целова въ ст҃ѣи Бц҃и и гробү Леѡнтьєвү челомъ оудари . блж҃ныи же Кир[ил]ъ ^Е єп^с̑пъ и кнѧгини Василкова Мр҃ьѧ . съ сн҃ьми своими Борисомъ и Глѣбомъ почтоша єго . ѡнъ жє с великою любовью /л.247об./ прїимъ, въз^дасть имъ ч^с̑ть и дары многы . и єха к Володимирю ჻

В лѣ^т̑ . ҂s҃ . ѱ҃ . ѯ҃ѳ . [1261] Родисѧ Александрү сн҃ъ Данилеи .

В лѣ^т̑ . ҂s҃ . ѱ҃ . о҃ . [1261] изгнаша поганыхъ ѿ всѣ^х градовъ не терпѧ насильа и^х . тог^да же Изосимү оубиша на Ӕрославлѣ злаго престүпника . того же лѣта престависѧ Кирилъ єп^с̑пъ . того же лѣта поставленъ бы^с̑ Иѡа^{н Ж}. єп^с̑пъ ჻

В лѣ^т̑ . ҂s҃ . ѱ҃ . о҃а . [1263] престависѧ кнз҃ь Алексан^дръ Ӕрославичь . ноӕ^б̑ . дı҃ . того же лѣта родисѧ Глѣбү с҃нъ Михаи^л̑ .

В лѣ^т̑ . ҂s҃ . ѱ҃ . о҃в . [1264] престависѧ А[н]дрѣи ^З Сүздальскыи . того же лѣта сѣде Ӕрославъ братъ єго ჻ └└└└

Влѣ^т̑ . ҂s҃ . ѱ҃ . о҃д . [1266] оумре цр҃ь Б^еркалїи .

В лѣ^т̑ . ҂s҃ . ѱ҃ . о҃s . [1268] Дмитрїи Александровичь . и инѣ^х кнз҃еи с нимъ . Ӕрославь . Ӕрославичь . посла с Новъгоро^дци на Нѣмци . и много избиша Новогоро^дцевъ добры^х мүжии . и пособи Бг҃ъ кн҃зю Дмитрею Александровичю ჻

В лѣ^т̑ . ҂s҃ . ѱ҃ . о҃з . [1269] Престависѧ Дмитреи Ст҃ославичь . постригсѧ и въ скымү . ѿ Игна^т̑ѧ єп^с̑па Ростовьского ჻

В лѣ^т̑ . ҂s҃ . ѱ҃ . о҃ѳ . [1271] престави^с̑ кнѧгини Мр҃ьѧ Василкова . де^н̑ . ѳ . въ Зачатьє . /л.248/ въ дн҃ь ѡбѣдню поють . тү сүщү сн҃ү єѧ Борисү съ кнѧгиною ^А и з дѣтми . и положиша и ^Б оу ст҃го Сп҃са . въ своємъ манастыри . того же лѣта престависѧ Ӕрославъ кнз҃ь велїкыи . и везоша єго во Тфѣрь . и положинъ ^В бы^с̑ оу Күзмы Дамьӕна въ црк҃ви ჻

В лѣ^т̑ . ҂s҃ . ѱ҃ . п҃ . [1272] сѣде на столѣ кн҃зь великыи Василеи Ӕрославичь . а Дмитреи Александровичь иде к Новүгородү . и посла по немъ Семена воєводү . и оумиришасѧ и разидошасѧ ჻

В лѣ^т̑ . ҂s҃ . ѱ҃ . п҃а . [1273] престависѧ кнѧгини Глѣбова Феѡдора .

В лѣ^т̑ . ҂s҃ . ѱ҃ . п҃д . [1276] престави^с̑ кн҃зь великыи Васїлеи . а по немъ сѣде Дмитреи Алеѯан^дровичь .

В лѣ^т̑ . ҂s҃ . ѱ҃ . п҃е . [1277] престависѧ Борисъ Василковичь в Татаре^х . Дмитрии же съ мтр҃ью пренесе тѣло ѡц҃ѧ своєго в Ростовъ . а кнз҃и вси поидоша на Ӕсы ჻

В лѣ^т̑ . ҂s҃ . ѱ҃ . п҃s . [1278] ѡженисѧ Михаило Глѣбовичь . того же лѣта приидоша кнз҃и ис татаръ . побѣдивше Ӕсы . того же лѣта престависѧ кнз҃ь Глѣбъ Василковичь . и сѣдоша в Ростовѣ Борисовичи . Дмитреи . и Костѧнтинъ ჻

В лѣ^т̑ . ( ҂s҃ .) ѱ҃ . п҃ѳ . ^Г [1281] рать бы^с̑ на великого кнз҃ѧ Дмитреѧ . Кодаи . ^Д Алчедаи прише^д /л.248об./ к Переӕславлю кнѧзѧ не обрѣтше . гра^д и цр҃квї пожгопıа . и села Переӕславьскаѧ и Ростовьскаӕ пограбиша . а въ . в҃ . є лѣто дрүгаѧ рать бы^с̑ на великого кн҃зѧ Дмитреѧ . Түкатемерь . и Алынь . кнѧзь же иде к Ногрю ^О ჻

В лѣ^т̑ . ҂s҃ . ѱ҃ . ч҃ . [1282] ходи Игнатии єп^с̑пъ второє въ Ѡрдү . за прїчетъ црк҃вныи . того же лѣта Кирилъ митрополитъ по ѡклеветанью разгнѣвасѧ на єппа Игна^т̑ѧ . и расмотривъ пакы блг҃ви єго . того же лѣта Кирїлъ митрополи^т̑ престависѧ в Переӕславлѣ ჻

В лѣ^т̑ . ҂s҃ . ѱ҃ . ч҃а . [1283] поставленъ бы^с̑ Максїмъ митрополи^т̑ Сүздалю ჻ того же лѣта прсстависѧ Романъ Володимирїчь Оуглечьскыи . того же лѣта кн҃зь великыи Дмитрїи приде ѿ Ногүѧ . и смирисѧ съ братомъ съ Андрѣємъ . а Семена оубиша ჻

В лѣ^т̑ . ҂s҃ ѱ҃ . ч҃г . [1285] Приєха митрополи^т Максимъ Сүз^далю . того же лѣта заложена бысть цр҃кви ст҃го Сп҃са на Тфѣри . того же лѣта приведе кн҃зь Андрѣи цр҃вїча . и много зла сьтвори кр^с̑тьӕномъ . кнѧзь же великии Дмитрїи съчтасѧ съ бра^т̑єю цр҃вича прогна . а боӕры Анд[р]ѣєвы ^Ж изыма ჻ ~ /л.249/

В лѣ^т̑ . ҂s҃ . ѱ҃ . ч҃д . [1286] Дмитреи . и Костѧнтинъ . раздѣлиста себѣ ѿчинү свою . и сѣде Дмїтрїи на Оуглѣче полѣ . а Костѧнти^н̑ в Ростовѣ . того же лѣта родисѧ Костѧнтинү сн҃ъ Александръ . а Дмитрию сн҃ъ Михаило . того же лѣта престависѧ Феѡдоръ єп^с̑пъ Володимерьскыи ჻

В лѣ^т̑ . ҂s҃ . ѱ҃ . ч҃s . [1288] сѣде Андрѣи Алексан^дровичь на Ӕрославлѣ . а Ѡлексан^дръ Федоровичь на Оуглечѣ полѣ . того же лѣта поставленъ бы^с̑ Ӕковъ єп^с̑помъ Володимерю ჻ того же лѣта престависѧ Игнатеи єп^с̑пъ Ростовъскыи . того же лѣта поставленъ бы^с̑ Тарасии єп^с̑помъ Ростовү ჻

В лѣ^т̑ . ҂s҃ . ѱ҃ . ч҃з . [1289] сѣде Дмитрии ^З Борїсовичь Ростовѣ . тог^да же бѣ много Татаръ в Ростовѣ . и изгнаша и^х вѣчьє^м̑, и ѡграбиша и^х . того же лѣта кн҃зь Костѧнтинъ иде въ Ѡр^дү ჻

В лѣ^т̑ . ҂s҃ . ѱ҃ . ч҃и . [1290] сщ҃ена бы^с̑ церковь ст҃ыѧ Бц҃а на Оустюзѣ . Тарасьємъ єп^с̑помъ . при кн҃зи Дмитрии . того же лѣта заратишасѧ Татаровѣ . того же лѣта бы^с̑ знаменїє в лүнѣ . бы^с̑ аки кровава . и потомъ преложисѧ въ тмү . того же лѣта заратися Тогта с Телебүгою . и с Алгүємъ . и по/л.249об./може Бг҃ъ Тогтѣ .

В лѣ^т̑ . ҂s҃ . ѡ^т̑ . [1292] престависѧ кнѧзь Александръ Дмитриєвичь . тоє же зимы ѡженисѧ кн҃зь Иѡа^н̑ Дмитриєвичь . оу Дмитрїѧ у Ростовъского ჻

В лѣ^т̑ . ҂s҃ . ѿа҃ . [1293] сѣде на Костромѣ кнз҃ь Иванъ Дмитреєвїчь . того же лѣта поидоша вси кн҃зи въ Ѡрду . и вл^дка Тарасїи . того же лѣта престависѧ кн҃зь Михаило Глѣбовичь въ Ѡрдѣ . и прїнесенъ бы^с̑ в Ростовъ . того же лѣта прїидоша из Орды кн҃зи . Андрѣи . Дмитреи . Феѡдоръ . Костѧитинъ . а с ними . цр҃ь Дюдень . прїде ратью на велїкого кн҃зѧ Дмитриѧ . кнѧзь же бѣжа въ Пъсковъ . Татаровѣ же взѧша Володимерь . Переӕславль . Москвү . Волокъ . и всѣ градовъ . д҃ı . и много зла створиша в Ру^с̑скои земли . оубѣжавъ же кнѧзь Андрѣи оу брата ^А въ Плесковѣ . и иде к Новүгородү . а рать възвратисѧ назѧдь ^Б. того же лѣта сѣде на кнѧженїє въ Ӕрославли кн҃зь Феѡдоръ . а Ѡлексан^дръ Костѧнтиновичь на Оуглечѣ . полѣ ჻ того же лѣта кнз҃ь велїкыи Дмїтреи Алеѯандровичь . прїде изо Пъскова /л.250/ во Тверь . а Ѡндрѣи из Новагорода в Торжекъ . и смиристасѧ с братомъ ჻

В лѣ . ҂s҃ . ѿв҃ . [1294] престависѧ кнз҃ь великыи Дмитреи Александровичь въ Волоцѣ . и положенъ бы^с̑ в Переӕславли . и по немъ сѣде бра^т єго велїкии кнѧзь Андрѣи . того же лѣта престависѧ кн҃зь Александръ Федоровичь . того же лѣта престависѧ кнѧзь Дмитреи Борисовичь Ростовьскыи . и по не^м̑ сѣде бра^т̑ єго кнз҃ь Костѧнтинъ Борисовичь . того же лѣта ѡженисѧ кн҃зь Михаило Ӕрославичь . понѧ дщерь кнѧжю Дмитреєвү Борисовича Аннү . того же лѣта ѡженисѧ кнз҃ь Ѡндрѣи понѧ кнѧгиню Василисү . дчерь кнѧжю Дмитреєвү Борисовича Ростовьского ჻

В лѣ^т̑ . ҂s҃ . ѿ . г҃ . [1295] Тарасїи вл^дка єха на Оустюгъ . и по немъ ѣде кнз҃ь Костѧнтинъ, и ӕтъ вл^дку . и люди ѡколо єго изьима . того же лѣта прїєха Максимъ митрополитъ ис Кыєва . Ӕкова вл^дкү Володимерьскаго сведъ сь єп^с̑пьи . того же лѣта кн҃зь великыи Андрѣи иде въ Ѡрдү . и съ кнѧгинею . того же лѣта поставленъ бы^с̑ . Семенъ єп^с̑пмъ Володимерю ჻

В лѣ^т̑ .҂s҃ . ѿ . д҃ . [1296] || бы^с̑ нелюбїє межи кн҃зьми . Андрѣємъ великымъ кнз҃емъ . и Иваномъ Переӕславъскїмъ . и Даниломъ Московьскїмъ . Михаиломъ Тферьскымъ . и сведе и^х на любовь вл^дка Семеѡнъ . и вл^дка Измаило ჻

В лѣ^т̑ . ҂s҃ . ѿ . е҃ . [1297] ѡженисѧ в Ростовѣ . кнѧзь Юрьи Даниловичь . того же лѣта престависѧ кнѧгини Борисова Василковича . того же лѣта кн҃зь Александръ Глѣбовичь взѧ лестью кнѧженїє Смоленьскоє по^д ѡц҃емъ своимъ ^В ჻

В лѣ^т̑ . ҂s҃ . ѿ . s҃ . [1298] кнѧзь Федоръ Ӕрославъскыи, иде ратью къ Смоленьскү .

В лѣ^т̑ . ҂s҃ . ѿ . з҃ . [1299] престависѧ кнѧгини Костѧнтинова . того же лѣта Максимъ митрополитъ сѣде въ Володимери на столѣ . а Семена вл^дкү посади в Ростовѣ . того же лѣта престависѧ кнѧзь Федоръ Ӕрославьскыи ჻

В лѣ^т̑ s҃ . ѡ^т̑ . з҃ . [1301] заратисѧ Иванъ кн҃зь да Костѧнтїнъ . смири и^х вл^дка Семенъ . в се же лѣто бы^с̑ бүрѧ силна в Ростовѣ . цр҃кви . д҃ . изъ ѡснованїѧ изверже ჻

В лѣ^т̑ . ҂s҃ . ѡ^т̑ . ı ҃ . [1302] Престависѧ кнз҃ь Иванъ Переӕславъскыи . того же лѣта ѡженисѧ кнз҃ь Костѧнтинъ въ Ѡрдѣ оу Күтлүкорткы . /л.251/ а Федоръ оу Велъбласмыша Михаиловича ^Г. того же лѣта Костѧнтинъ жени сн҃а Алексан^дра ჻

В лѣ^т̑ . ҂s҃ . ѿ . аı҃ . [1303] престависѧ кн҃зь Данило Московьскыи .

В лѣ^т̑ . ҂s҃ . ѿ^т̑ . вı҃ . [1304] престависѧ Тарасїи єп^с̑пъ Ростовъскыи . того же лѣта престависѧ кнѧзь велїкыи Андрѣи в черньцехъ ჻

В лѣ^т̑ . ҂s҃ . ѿ . m҃ . ^Д [1305] избишасѧ в Ростовѣ два колокола велїкаѧ . того же лѣта престависѧ баскакъ Күтлүбүгъ . того же лѣта прїиде из Орды кнѧзь Михаило Ӕрославичь на велїкоє кнѧженїє ჻ того же лѣта престависѧ Максимъ митропли^т ჻

В лѣ^т̑ . s҃ . ѿ . еı҃ . [1307] престависѧ въ Ѡрдѣ кнѧзь Костѧнтинъ Борисовичь ჻

В лѣ^т̑ . ҂s҃ . ѿ . s҃ı . [1308] поставленъ бы^с̑ Петръ митрополитъ ჻

В лѣ^т̑ . ҂s҃ . ѿ . иı҃ . [1310] родисѧ кнѧзю Василью Костѧнтиновичю сн҃ъ Феѡдоръ .

В лѣ^т̑ . ҂s҃ . ѿ . ѳ҃ı . [1311] Семенъ вл^дка ѿписасѧ єп^с̑пьи . того же лѣта поставленъ бы^с̑ Прохоръ єп^с̑пъ Ростовү ჻

В лѣ^т̑ . ҂s҃ . ѿ . к҃а . [1313] сѣде на цр^с̑твѣ . Ѡзбѧ^к̑ . въ Ѡрдѣ ჻

В лѣ^т̑ s҃ . ѿ . к҃в . [1314] престависѧ Семенъ вл^дка . положенъ бы^с̑ в Сүза^длѣ . того же лѣта ѡженїсѧ кнз҃ь Феѡдоръ Михаиловичь . оу Дми/л.251об./трїӕ Жидимирича ჻

В лѣ^т̑ . ҂s҃ . ѿ . к҃г . [1315] прїиде из Орды кнѧзь Михаило Ӕрославичь . а с нимъ послове Таитемерь . Махрожа Инды . сии же быша в Ростовѣ и много зла створїша . тог^да же Михаило поиде к Торжкү . и выєха Афанасїи противү ємү . и бы^с̑ бои . и поможе Бъ҃ кн҃зю Михаилү ჻

В лѣ^т̑ . ҂s҃ . ѿ . к҃д . [1316] приде изо Ѡрды кнѧ^з̑ Василеи Ростовъскыи . а с нимъ послы Сабанчи . и Казанчии ჻

В лѣ^т̑ . ҂s҃ . ѿ . к҃е . [1317] приде изо Ѡрды кнѧ^з̑ Юрьи Даниловичь на велїкоє кнѧженїє . а с нимъ Кобгады ^А. и бисѧ съ кнѧземъ Мїхаиломъ . и поможе Бъ҃ Михаилү кнз҃ю . и кнѧгиню Юрьєвү ӕша Кончакъ ჻

В лѣ^т̑ . ҂s҃ . ѿ . к҃s . [1318] приєха Конча в Ростовъ, и много зла створи . и цркв҃ь ст҃ыѧ Бц҃а пограби . и вси цр҃квї и манастыревѣ и села . и люди плѣниша . того же лѣта поидоша въ Ѡрдү кнз҃ь Юрьи . и Михаило . тог^да же оубиша въ Ѡр^дѣ кнѧзѧ Михаила Ӕрославича . и везоша єго на Москвү ჻

В лѣ^т̑ . ҂s҃ . ѿ . к҃з . [1319] привезоша кнѧзѧ Михаила с Москвы въ Твѣрь . а Юрьєвү кнѧгиню съ Твѣри въ Ростовъ ჻ /л.252/

В лѣ^т̑ . ҂s҃ . ѿ . к҃и . [1320] Кнѧзь Юрьи прїєха в Ростовъ . а из Ростова єха в Новъгоро^д . того же лѣта престависѧ сѧ ^Б Юрьи Александрови^ч̑ . Ростовъскыи . того же лѣта быша зли Татаровѣ в Ростовѣ . и собравшесѧ людїє изгониша и^х из града ჻

В лѣ^т̑ . ҂s҃ ѿ . к҃ѳ . [1321] м^с̑ца инѧѧ . кѳ . ^В въ . г҃ . ча^с̑ дн҃и погыбе слн҃це . и ѡсталосѧ єго ӕко двою дн҃и м^с̑ць . и по єдиномъ часѣ пакы наполнисѧ . того же лѣта моръ [б]ы^{с̑ Г} на люди . и на кони . того же лѣта престависѧ кнз҃ь Дв҃дъ Ӕрославъскыи ჻

В лѣ^т̑ . ҂s҃ . ѿ . л҃ . [1322] прїде изо Ѡрды кнѧзь Иѡанъ . Данїловичь . а с нимъ поганыи Ахмүлъ . и плѣниша много людїи . и посѣкаше ^Д. и Ӕрославль пожже мало не весь . тоє же зимы прїде изъ Ѡрды кнѧзь Дмитреи Михаиловичь на великоє кнѧженїє ჻

В лѣ^т̑ . ҂s҃ . ѿ . л҃г . [1325] поиде въ Ѡрдү кнз҃ь Дмитреи Михаиловичь . тоє же зимы оубиша в Ордѣ кнѧзѧ Юрьѧ Данїловича ჻

В лѣ^т̑ . ҂s҃ . ѿ . л҃д . [1326] родисѧ кнз҃ю Иванү Данїловичю сн҃ъ Иванъ . того же лѣта оубиша в Ордѣ кнз҃ѧ Дмитреѧ Михаиловича на рѣцѣ на Кондраклѣ . того же лѣта заложена бы^с̑ цр҃квь ст҃аѧ Бц҃а на /л.252об./ Москвѣ . авгү^с̑ . д҃ . того же лѣта ѡженїсѧ кнз҃ь Федоръ Васїльєвичь Ростовьскыи . тоє же зимы престависѧ Петръ митрополитъ Кыєвьскыи . де^н̑ . к҃ .

В лѣ^т̑ . ҂s҃ . ѿ . л҃е . [1327] Сщ҃ена бы^с̑ црк҃ви ст҃аѧ Бц҃а на Москвѣ Прохоромъ єп^с̑помъ . того же лѣта и Шевъкала оубиша на Тфери . того же лѣта кнѧзь Иванъ Даниловичь иде въ Ѡрдү . тоє же зимы прииде изо Ѡрды рать на Рүсь . е҃ . темниковъ . а с ними кнз҃ь Иванъ Данилови^ч̑ . и плѣни гра^д Твѣрь и всеи земли много зла сътворисѧ . а кнз҃ь Александръ бѣжа въ Пъсковъ . тога оубиша кнз҃ѧ Иѡана Ӕрославичѧ Рѧзаньскаго ჻

В лѣ^т̑ . ҂s҃ . ѿ . л҃s . [1328] Кнз҃ь Иванъ Даниловичь, сѣде на великомъ кнѧженїи . и бы^с̑ всеи земли тишина . того же лѣта престависѧ Прохоръ єп^с̑пъ Ростовь-

скыи . се^н̑ . з҃ . того же лѣта прїєха митрополи^т Фегностъ . того же лѣта ѡженисѧ кн҃зь Костѧнтинъ Васильєви^ч̑ . Ростовъскыи . оу великого кнз҃ѧ Ивана Даниловичѧ ჻

В лѣ^т̑ . ҂s҃ . ѿ . л҃з . [1329] заложены быша двѣ цр҃кви на Москвѣ . Иѡа^н̑ Лѣствѣчнїкъ . и Петра ап^с̑ла . того же лѣта црк҃ви /л.153/ ст҃го Спс҃а заложена бы^с̑ ჻

В лѣ^т̑ . ҂s҃ . ѿ . л҃ѳ . [1331] престависѧ кнз҃ь Федоръ Васїльєвичь Ростовъскыи . того же лѣта престависѧ кнѧгїни Иѡанова Ѡлена ჻

В лѣ^т̑ . ҂s҃ . ѿ . м҃ . [1332] бы^с̑ гла^д по всеи земли ჻

В лѣ^т̑ . ҂s҃ . ѿ . м҃в . [1334] соз^дана бы^с̑ цр҃кви ст҃го Михаила на Москвѣ . ѡдиного лѣта . тоє же зимы ѡженисѧ кнз҃ь Семенъ Ивановичь ჻

В лѣ^т̑ . ҂s҃ . ѿ . м҃е . [1337] престависѧ Антонїи єп^с̑пъ Ростовъскыи . того же лѣта поставленъ бы^с̑ Гаврїло єп^с̑пъ Ростовү ჻

В лѣ^т̑ . ҂s҃ . ѿ . м҃и . [1340] поиде в Ордү кнѧзь Иванъ Даниловичь . того же лѣта кнз҃ь Алексан^дръ поиде в Ордү . а сн҃а Федора напередь ѿпүсти . тоє же ѡсенї оубиша в Ордѣ кнз҃ѧ Олексан^дра Михаиловичѧ . и сн҃а єго Феѡдора . тоє же ѡсени выиде из Орды Товлүбии . ѿпүщенъ цр҃мъ къ Смоленьскү ჻

В лѣ^т̑ . ҂s҃ . ѿ .м҃ѳ . [1341] Престависѧ кн҃зь великыи Иванъ Даниловичь . тоє же весны кнз҃ь Семенъ Ивановичь съ братьєю поиде в Ордү . того же лѣта выиде из Орды кнз҃ь Семенъ на велїкоє кнѧженїє . тоє же зимы оубиша кнз҃ѧ Глѣба Ст҃ославича Брѧнци ჻

В лѣ^т̑ . ҂s҃ . ѿ . н҃д . [1346] поставленъ бы^с̑ Иванъ єп^с̑помъ Ростовү ჻ /л.253об./

В лѣ^т̑ . ҂s҃ . ѿ . н҃е . [1347] ѡженисѧ кнз҃ь Андрѣи Федоровичь ჻

В лѣ^т̑ . ҂s҃ . ѿ . ѯ҃ . [1352] поставленъ бысть Сп҃съ в Новѣгородѣ в Нижнемъ кн҃земъ Костѧнтиномъ Васильєвичемъ : ~

В лѣ^т̑ . ҂s҃ . ѿ . ѯ҃а . [1353] престависѧ кнз҃ь великыи Семенъ Ивановичь . того же лѣта престависѧ митрополитъ Фегностъ . того же лѣта престависѧ кн҃зь

Андрѣи Ивановїчь . того же лѣта сѣде на великомъ кнѧженїи . кн҃зь Иванъ Ивановичь ჻

В лѣ^т̑ . ҂s҃ . ѿ . ѯ҃в . [1354] поставленъ бы^с̑ Алексѣи митрополитъ ჻

В лѣ^т̑ . ҂s҃ . ѿ . ѯ҃г . [1355] престависѧ Костѧнтинъ кнз҃ь Сүзальскыи . ноӕ^б̑ . к҃а . в тои же дн҃ь пострижесѧ кнѧгини Мр҃ьѧ Федорова ჻

В лѣ^т̑ . ҂s҃ . ѿ . ѯ҃д . [1356] престависѧ Иѡа^н̑ . єп^с̑пъ Ростовъскыи . анри^л̑ . вı҃ . тоє^ж весны поставленъ бы^с̑ Игнатеи єп^с̑помъ Ростовү . того же лѣта престависѧ Гаврїло єп^с̑пъ . се^н̑ . ѳ҃ .

В лѣ^т̑ . ҂s҃ . ѿ . ѯ҃е . [1357] Алексѣи мїтроııолитъ ходи въ Ѡрдү .

В лѣ^т̑ . ҂s҃ . ѿ . ѯ҃s . [1358] бы^с̑ поводь великаѧ по Петрове дн҃и, ӕко и веснѣ ჻

В лѣ^т̑ . ҂s҃ . ѿ . ѯ҃з . [1359] престависѧ кнз҃ь Иванъ Ивановичь . ноӕ^б̑ . в҃ı . того же лѣта ходиша вси кн҃зи в Ѡрдү . тоє же /л.254/ зимы оубиша цр҃ѧ Күлъпү ჻

В лѣ^т̑ . ҂s҃ . ѿ . ѯ҃и . [1360] оубиша цр҃ѧ, Наврүса . и по немъ седѣ ^А Ходирь . и да кнѧженїе великоє Дмитрию Сүждальскомү . и коємүждо кн҃зю ѿчинү свою . тоє же зимы . фе^в̑ . г҃ . ча^с̑ нощи, знаменїє бысть на нбси ѡблакъ акы кровавъ . и свѣтъ ӕко зарѧ ჻

В лѣ^т̑ . ҂s҃ . ѿ . ѯ҃ѳ . [1361] оубиша цр҃ѧ Ходырѧ тог^да же ѡграбиша кнѧзеи Ростовъскы^х въ Ѡрдѣ . и пүстиша и нагыхъ ჻

В лѣ^т̑ . ҂s҃ . ѿ . о҃ . [1362] Ходиша кнз҃и Московъскыє . Дмитрии Ивановичь . Иоа^н̑ Иванови^ч̑ . Володимеръ Ѡндрѣєвичь . на Галицкого кнѧзѧ Дмитреѧ, и прогнаша и . а кнѧгиню полониша . тоє же зимы кнѧзь Дмитрїи Ивановичь . сгони с Переӕславлѧ Дмитриа кнз҃ѧ Сүз^дальского . а самъ сѣде на великомъ кнѧженїи . тоє же зимы сътворисѧ нелюбьє межи кнз҃ьми Ростовъскыми Костѧнтиномъ и Андрѣємъ ჻

В лѣ^т̑ . ҂s҃ . ѿ . о҃а . [1363] кнѧз҃ь Дмитреи Ивановичь ходи ратью на Сүждаль . того же лѣта приєха в Ростовъ кнз҃ь Андрѣи Федоровичь . а с нимъ Иванъ Ржевъскыи съ силою великою ჻

В лѣ^т̑ . ҂s҃ . ѿ . о҃в . [1364] кнз҃ь Костѧнтинъ поєха /л.254об./ на Оустюгъ . тоє же весны престависѧ Игнатеи єп^с̑пъ Ростовъскыи . на то же лѣто моръ бы^с̑ в Новѣгородѣ в Нижнѣмъ . на тү же ѡсень моръ бы^с̑ на Костромѣ и въ Ӕрославлѣ . Тоє же ѡсени поставленъ бы^с̑ Петръ єп^с̑пъ Ростовү . на тү же зимү и веснү моръ бы^с̑ в Переӕславли ჻

В лѣ^т̑ . ҂s҃ . ѿ . о҃г . [1365] престависѧ кнз҃ь Андрѣи Новогородъскыи . ию^н̑ . в҃ . В тои же дн҃ь престависѧ кнѧгини Мр҃ьѧ . Костѧнтинова Ростовъского . на тү же ѡсень моръ бы^с̑ в Ростовѣ .

В лѣ^т̑ . ҂s҃ . ѿ . о҃д ^А. [1368] кнз҃ь Андрѣи Полоцькыи воєва Хорванъ . да Родиє ^Б. а кн҃зь Володимеръ Андрѣєвичь прише^д ратью взѧлъ Ржевү ჻ того же лѣта престависѧ кн҃зь Васїлеи Махаиловичь . Твѣрьскыи в Каıпинѣ . тоє же ѡсени м^с̑ца де^к̑ . к҃а . Ѡльєрдъ ^В кнз҃ь Литовъскыи и бра^т єго Кестүтѣи, приходили ратью к Москвѣ . и заставү Московъскүю побили на Тростнѣ . кнз҃ѧ Стародүбьскаго ^Г. кнз҃ѧ Семена Дмитреєвича . Кропивү . кнз҃ѧ Костѧнтина Ѡболеньского . Ѡкиньфа Шүбү Федоровича . Дмитриѧ Минина . мно/л.255/гихъ боӕръ съ многою дрүжиною . а оу града оу Москвы стоӕше три д҃ни, и въ своѧ сы възвратившесѧ ^Д. а на тү зимү кнз҃ь Володимеръ Ѡндрѣєвичь Московьскыи . ходилъ в Новъгоро^д Великии . Плесковичемъ на помощь ჻

В лѣ^т̑ . ҂s҃ . ѡ^т̑ . о҃и . [1370] по многи ночи . быша знамениѧ . нб҃о ӕко крававо . и столпы по нб҃ү . на тү же зимү м^с̑ца ноӕ^б̑ . к҃s . прїиде в дрүгии рѧдь Ѡльгердъ кнз҃ь Литовъскыи . в силѣ тѧжцѣ к Волокү . и потомъ с Волока на Николинъ д҃нь приде к Москвѣ . и стоӕ оу горада . и҃ . дн҃ь . загородьє пожже а города не всѧ . кнз҃ь же великии Дмитреи Ивановичь, взѧ миръ съ Ѡлгордомъ ^Е. Ѡлгирдъ же ѿиде въ своӕ си . тог^да же раненъ бы^с̑ кнз҃ь Василеи Ивановичъ оу города оу Волока на мостү . и престависѧ в черньцехъ ჻

В лѣ^т̑ . ҂s҃ . ѿ . о҃ѳ . [1371] выиде из Орды кнз҃ь Михаило Ѡлександровичь на великоє кнѧжениє . и въсхотѣ сѣсти на столѣ в Володимери . и не приӕша єго . а ркүчи такъ взѧлъ єси лж҃ею великоє кнѧжениє . того же лѣта . ию^н̑ . еı҃ . кнз҃ь великыи Дми/л.255об./треи Ивановичь поиде въ Ѡрду ჻ В то же времѧ за кнз҃ѧ Володимера Андрѣєвича ѡбрүчиша Ѡлгердовү дчерь именемъ Ѡленү . того же лѣта кнз҃ь Михаило Тфѣрьскои поиде ратью къ Костромѣ взѧти ю . и не слүчисѧ ємү . и оувернүсѧ на Молозѣ, и Мнологү ^Ж взѧ . и Оуглечѣ поле . и Бѣжицкыи Верхь . того же лѣта бы^с̑ знамениє въ слнц҃и . мѣста черны, аки гвозди . а мъгла стоӕла по рѧдү съ два мѣсѧца . толь велика мъгла была ӕко за двѣ сажени пре^д собою не видѣти чл҃ка в лице . а птици по аиєрү ^З не видѧхү лѣтати . но падахү на землю съ въз^дүха . на тү же ѡсень кнз҃ь великыи Дмитреи Ивановичь . выиде изъ Ѡрды . на тү же зимү кнз҃ь великыи Дмитреи Ивановичь, посла рать на Рѧзань на кнз҃ѧ на Ѡльга . и воєводү с ними посла кнз҃ѧ Дмитреѧ Волыньского . кнз҃ь же Ѡлегъ събра воѧ многы, изыде противү и^х . и стрѣтошасѧ на Скорнищевѣ . и бы^с̑ имъ брань люта . и сѣча велика . и поможе Бг҃ъ кнз҃ю великомү Дмитрею . а кнѧ/л.256/зь Ѡлегъ оубѣжа в малѣ дрүжинѣ . и сѣде тог^да на кнѧженьи на Рѧзаньскомъ кнз҃ь Володимеръ Проньскыи . тоє же зимы м^с̑ца де^к̑ . л҃ . кнз҃ю великомү Дмитрею Ивановичю родисѧ сн҃ъ Василеи . тоє же зимы кнз҃ь Володимеръ Андрѣєвичь Московъскыи ѡжєнисѧ оу великого кнз҃ѧ оу Ѡлгирда Гедименовича Литовьского ჻

В лѣ^т̑ . ҂s҃ . ѿ . п҃ . [1372] кнз҃ь Ѡлегъ Рѧзаньскыи . приде ратью на Рѧзань на кн҃зѧ Володимера Проньского . и согна єго . тоє же зимы кнз҃ь Михаило Твѣрьскыи подвелъ втаи рать Литовъскүю на гра^д Переӕславль . кнз҃ѧ Кѣстүтьӕ Ѡлгердова брата . да кнз҃ѧ Андрѣѧ Ѡлгердовича Полотьсково . и ины многы кнз҃и . по пасцѣ на дрүгои не^дли въ вторникъ . посадъ около града пожгоша . а города не взѧша . а людїи множество и боӕръ в полонъ поведоша . а Литвы множьство иссѣ-

коша Переӕславци . а инаѧ погань в рѣцѣ истопоша въ Трүбежѣ по^д Переӕславлемъ . а кнз҃ь Михаило в то же времѧ взѧ гра^д Дмитровъ ჻

В лѣ^т̑ . ҂s҃ . ѿ . п҃а . [1373] кнѧзь Михаило Твѣрьскыи . приде ратью к Торжкү, и взѧ градъ Тор^ьжекъ ჻ /л.256об./ того же лѣта Ѡлгердъ кнѧзь Литовъскыи поиде ратью к Москвѣ . слышавъ же кнѧзь великыи Дмитреи Ивановичь . поиде противү . и стрѣтошасѧ оу града оу Лүбүдьска . и стоӕхү рати прѧмо себѣ . а промежү ими врагъ крүтъ . и не лзѣ снѧтисѧ полкома на брань . и взѧша миръ и разидошасѧ ჻ того же лѣта авгү^с̑ . еı҃ . на праз^дникъ Оуспениѧ ст҃ыѧ Б^дца . бы^с̑ чюдо въ градѣ Москвѣ . оу гроба ст҃го Петра митрополита . прощенъ бы^с̑ нѣкыи ѡтрокъ седмии ^А лѣ^т̑ . зане не имѣӕше рүкы . прикрчевшимсѧ к персомъ ^Б. и нѣмү сүщү ємү . и не могүщү прогл҃ати . єг^да же пресщ҃енныи митрополитъ Алексѣи скончавше ^В бж^с̑твенүю литүргию . тог^да прогл҃а ѡтрокъ . и простресѧ ємү рүка . и бы^с̑ цѣла . ӕко и другаѧ ჻

В лѣ^т̑ . ҂s҃ . ѿ . п҃г . [1375] кнз҃ю великомү Дмитрию Ивановичю родисѧ сн҃ъ Юрьи в Переӕславълѣ . и кр^с̑ти єго прпб^дныи игүменъ Сергеи . ст҃ыи старець ჻ того же лѣта болѣзнь бы^с̑ тѧжка преп^дномү игүменү Сергею . стм҃ү . но Бъ҃ помилова . разболѣсѧ въ великоє говѣниє . и пакы з^дравъ бы^с̑ . и въста /л.257/ къ Семеновү дн҃и . того же лѣта кнѧзь великыи Дмитреи Ивановичь, собравъ вои много и поиде к Твѣри . на кнз҃ѧ Михаила Александровича . и пришедше ѡстүпиша градъ Твѣрь . кнз҃ь Михаило затворисѧ въ градѣ . и стоӕвъ кнз҃ь велїкыи Дмитреи ^Г оу града . е҃ . не^дль . и всѧ предѣлы Твѣрьскиѧ повоєваша . кнѧзь Михаило Твѣрьскыи видѣ изнеможениє градү . высла из града вл^дкү Твѣрьского Єоуфимьѧ . и с нимъ боӕръ свои^х . бьѧ челомъ кнѧзю великомү Дмитрею Ивановичю ѡ мирү . кнз҃ь же великыи Дмитреи . не хотѧ видѣти разорениѧ градү . и взѧ миръ съ кнз҃емъ с Михаиломъ . тог^да оубиша по градомъ Семена Ивановича Добрыньского ჻ ~

В лѣ^т̑ . ҂s҃ . ѿ . п҃д . [1376] кнз҃ь великыи Дмитреи Ивановичь . посылалъ брата своєго кнз҃ѧ Володимера Ѡндрѣєвича ко Ржевѣ . и стоѧ оу града . г҃ . не^д . поса^д пожже . а града не взѧ ჻

В лѣ^т̑ . ҂s҃ . ѿ . п҃е . [1377] престависѧ митрополить Алексѣи всеѧ Рүси ჻

В лѣ^т̑ . ҂s҃ . ѿ . п҃s . [1378] бы^с̑ побоище на Вожѣ великомү кнз҃ю . Дмитрею Ивановичю . с безбожнымъ . /л.257об./ Мамаємъ . и пособи Бг҃ъ кнз҃ю великомү ჻

В лѣ^т̑ . ҂s҃ . ѿ . п҃и . [1380] ѡрдыньскыи кнз҃ь Мамаи . събравъ воѧ многы . поиде на великого кнз҃ѧ Дмитреѧ Ивановичѧ . то же слыпıавъ кнз҃ь велїкїи събра воѧ многы . и поиде противү . и стрѣтошасѧ за Дономъ на оусть Непрѧдвы . и бы^с̑ сѣча зла, ака же не бывала в Рүси . и поможе Бг҃ъ кн҃зю великомү Дмитрею Ивановичю . и тү оубьєни быша на сүимѣ . кнз҃ь Федоръ Романовичь Бѣлоѡзерьскыи . сн҃ъ єго кнѧзь Иванъ . Семенъ Михаиловичь . Микүла Васильєвичь . Михаило Ивановичь . Ѡндрѣи Серкизовъ . Тимофѣи Волүи . Михаило Бреньковъ . Левъ Морозовъ . Семенъ Меликъ . Ѡлександръ . и инии мнози . кнз҃ь же великыи Дмитреи Ивановичь . съ прочими кнз҃и Рүскыми и воєводамї ставъ на косте^х и похвали Ба҃ . и того всенепорочнүю мт҃рь . и възвратисѧ въ свою ѿчинү побѣдивъ своѧ врагы ჻

В лѣ^т̑ . ҂s҃ . ѿ . п҃ѳ . [1381] въ празникъ Воскресенїѧ ^Д Гн҃ѧ . прииде изъ Цр҃ѧграда на Рү^с̑ . пресщ҃енныи Киприӕнъ митрополи^т̑ на свою митронолью /л.258/ на Москвү . кнз҃ь же великыи Дмитреи Ивановичь приӕ єго с великою ч^с̑тью ჻

В лѣ^т̑ . ҂s҃ . ѿ . ч҃ . [1382] м^с̑ца авгү^с̑ . дı҃ . кнз҃ю великомү Дмитрею Ивановичю родисѧ сн҃ъ кн҃зь Ѡндрѣи . и крести єго Федоръ игүменъ Симановъскыи . того же лѣта цр҃ь Токтамышъ приде ратью на великого кнз҃ѧ Дмитреѧ Ивановича . и на всю Рү^с̑скүю землю . и то слышавъ кнз҃ь велїкыи Дмитреи Ивановичь что самъ цр҃ь идеть на него, со всею силою своєю . и неВперёдбои противү

ємү . ни по^днѧ рүки на цр҃ѧ . но поѣха въ свои гра^д Костромү . Цр҃ь же переше^д Ѡкү взѧ гра^д Серпоховъ . и посємъ Москвү . авгү^с̑ . г҃ı . и посла Татары и взѧ гра^д̑ Переӕславль . ида взадь, взѧ гра^д Коломнү .

В лѣ^т̑ . ҂s҃ . ѿ . ч҃а . [1383] кнз҃ь великыи Дмитреи Ивановичь, выгна Киприӕна мїтрополита . и бы^с̑ ѿтолѣ мѧтежъ в митрополии .

В лѣ^т̑ . ҂s҃ . ѿ . ч҃г . [1385] м^с̑ца марта . к҃е . на Бл҃говѣщениє ст҃ыѧ Бц҃а кнз҃ь Ѡлегъ Рѧзаньскы взѧ гра^д Коломнү ჻ того же лѣта . ию^н̑ . к҃s . кнз҃ю великомү Дмитрею Ивановичю, родисѧ сн҃ъ кнз҃ь Петръ . и кр^с̑ти єго Сергѣи игүме^н̑ прп^дѡбныи ста/л.258об./рць ^А ჻

В лѣ^т̑ . ҂s҃ . ѿ . ч҃s . [1388] м^с̑ца маиа . ѳ҃ı . долгоночи ^Б престависѧ х^с̑ртолюбивыи кнз҃ь великыи Дмитреи Ивановичь всеӕ Рүси . того же лѣта кнз҃ь великыи Василеи Дмитреєвичь . сѣде на великомъ кнѧжении въ градѣ в Володимери на своємъ столѣ ჻

В лѣ^т̑ . ҂s҃ . ѿ . ч҃з . [1389] выиде изъ Царѧграда пресщ҃енныи Кипрїӕнъ митрополитъ всеѧ Рүси . а с нимъ два митрополита послове . [Матѳеи] ^В Андрѣи . Анопольскыи . да [Никандръ] ^Г Ганъскыи ^Д. да архиєп^с̑пъ Ростовъскии Феѡдоръ . Михаило єп^с̑пъ Смоленьскыи . Єремиѧ єп^с̑пъ Рѧзаньскыи . и преста мѧтежь в митрополии . и бы^с̑ єдина митропольѧ Кыєвъ . и Галичь и всеѧ Рүси ჻

В лѣ^т̑ . ҂s҃ . ц҃ . [1391] м^с̑цѧ се^м̑ . к҃е . престависѧ прп^дѡбныи игүменъ Сергѣи . ст҃ыи старець . тоє же ѡсени м^с̑цѧ ѡ^к̑ . к҃д . приде из Орды на Москвү кнз҃ь великыи Василеи Дмитреєвичь ჻

В лѣ^т̑ . ҂s҃ . ц҃ . г҃ . [1394] м^с̑цѧ ноӕ^б̑ . к҃и . какъ ѡбѣдню поють престависѧ пресщ҃нныи Федоръ архиєп^с̑пъ Ростовъскыи . и Ӕрославъскыи . пасъ црк҃вь Бж҃ью . е҃ . лѣ^т̑ .

В лѣ^т̑ . ҂s҃ . ц҃ . д҃ . [1396] Поставленъ бы^с̑ Григории єп^с̑пъ Ростовү . м^с̑ца марта . ѳı҃ . индикта . /л.259/ . д҃ .

В лѣ^т̑ . ҂s҃ . ц҃ . вı҃ . [1404] престависѧ блг҃овѣрныи кнз҃ь Александръ Ростовъскыи . нареченыи . въ мнишьскомъ чинү . Андрѣи . ию^н̑ . ѳı҃ .

В лѣ^т̑ . ҂s҃ . ц҃ . г҃ı . [1405] инъдикта . г҃ı . престависѧ Арсении преже бывшии єп^с̑пъ . того же лѣта престависѧ кнз҃ь Михаило Юрьєвичь . Ростовъскыи . того же лѣта заратисѧ кнѧзь велїкии Васїлеи Дмитреєвичь . съ своимъ тьстемъ кнѧземъ Витофтомъ Литовьскымъ .

В лѣ^т̑ . ҂s҃ . ц҃ . д҃ı . [1406] ию^н̑ . s҃ı . г҃ . ча^с̑ д҃ни . бы^с̑ изгыбель слнц҃ю ჻

В лѣ^т̑ . ҂s҃ . ц҃ . еı҃ . [1407] индикта . еı҃ . престависѧ пресщ҃енныи митрополи^т̑ Киприӕнъ Києвъскыи . и всеѧ Рүси . семъ . е҃ı . въ . а҃ . ча^с̑ нощи . пасъ црк҃вь Бж҃ью лѣ^т̑ . л҃ . того же лѣта престависѧ блг҃овѣрныи кнз҃ь Костѧнтинъ Ѡндрѣєвичь Ростовъскыи . нареченыи въ мнишьскомъ чинү Касьӕнъ . апри^л̑ . к҃з . того же лѣта м^с̑ца ию^н̑ . и҃ . престависѧ бл҃говѣрнаѧ великаѧ кнѧгини Дмитреєва Єоудокѣѧ . наречена въ мнишьскомъ чинү Єфросиньѧ ჻

В лѣ^т̑ . ҂s҃ . ц҃ . sı҃ . [1408] индикта . а҃ . се^м̑ . и҃ . поиде великии кнѧ^з̑ Василеи Дмитреєвичь къ Смолиньскү . и взѧ гра^д Дмитровець . и поиде к Вѧзмѣ . /л.259об./ и взѧша по Вѧзмою перемирьє . со цтемъ своимъ с Фитоотомъ ^Е. ѿ Ржтва ст҃ыѧ Бц҃а до Петрова дн҃и . того же лѣта погорѣ гра^д Ростовъ . и црк҃ви каменаѧ, сборнаѧ ст҃аѧ Бц҃а падесѧ . и колоколы разлиӕшасѧ . и иныхъ цр҃квии погорѣ . д҃ı . и людии много истопе ჻ ию^н̑ . к҃д .

В лѣ^т̑ . ҂s҃ . ц҃ . зı҃ . [1409] индикта . в҃ . се^м̑ . дı҃ . поиде кнз҃ь великыи Витофтъ на зѧтѧ своєго на кнз҃ѧ великого Васильѧ Дмитреєвича . и то слышавъ кнз҃ь велїкыи поиде противү ємү . и снидошасѧ ѡ рѣцѣ ѡ Оугрѣ, и взѧша миръ . на тү же зимү поиде безбожныи кнз҃ь Єдигѣи на великого кнз҃ѧ Васильѧ Дмитреєвича . ида к Москвѣ, съжже гра^д Серпоховъ . а людеи множество изсѣче . а ины^х в полонъ поведе . и приде к Москвѣ м^с̑цѧ . де^к̑ . въ . е҃ . и ста оу города . а воѧ роспүсти по всеи земли Рү^с̑стѣи . ѡни же гра^д Переӕславль пожгоша . а в Ростовѣ и въ Юрьєвѣ . и по всѣмъ погостомъ и по селомъ, кр^с̑тьӕномъ много зла створиша . инѣ^х изсѣкоша . а инѣхъ в полонъ по-

имаша . а Єдигѣи стоӕше оу города . г҃ . не^дли . и сождасѧ с вои свои/л.260/ми . и поиде прочь канонъ Петровѣ памѧти митрополичѣ . а людеи множьство в полонъ поведе . а градү зла ничтоже не створи . тоє же зимы престависѧ кнз҃ь Ѡндрѣи Федоровичь Ростовъскыи . нареченыи въ мнишьскомъ чинү Афонасѣи ჻

В лѣ^т̑ s҃ . ц҃ . иı҃ . [1410] интикта ^А . г҃ . выиде пресщ҃енныи митрополитъ Фотѣи, Кыєвъскыи и всеӕ Рүси . изъ Цр҃ѧграда на Кыєвъ . и приде на Москвү въ Великъ дн҃ ь. априлѧ . к҃в . ^Б того же лѣта прише^дши безбожныи Татаровѣ изгономъ к Володимерю . и градү много зла сътвориша . и црк҃вь сборнүю ст҃ыѧ Бц҃а разграбиша . и иконү чюдотворнүю ѡдраша . а гра^д пожгоша . ѿ того ѡгнѧ и колоколы разлиӕшасѧ . а людии множьство иссѣкоша . а ины^х в полонъ поведоша . сиє же зло створисѧ м^с̑ца ию^л̑ ჻

В лѣ^т̑ . ҂s҃ . ц҃ . ѳı҃ . [1411] интикта ^А . д҃ . мѣсѧца . се^п̑ . к҃s . свершисѧ храмъ прч^с̑тыа Бц҃а в Ростовѣ зборнаѧ . иже бѣ изгорѣла ѿ пожара . а сщ҃ена бы^с̑ м^с̑цѧ . ѡ^к̑ . а҃ . бг҃олюбивымъ Григорьємъ єп^с̑помъ Ростовьскымъ . и Ӕрославъскымъ ჻

В лѣ^т̑ . ҂s҃ . ц҃ . к҃ . [1412] индикта . е҃ . м^с̑цѧ ѡ^к̑ . s҃ . създана бы^с̑ црк҃ви каменнаѧ . /л.260об./ Бл҃говѣщениє ст҃ыѧ Бц҃а на Дорогомиловѣ . бг҃олюбивымъ єп^с̑помъ Ростовъскымъ . и Ӕрославъскимъ Григорьємъ . того же лѣта поиде кн҃зь великїи Васїлеи Дъмитреєвичь въ [О]рдү ^В. а из Орды приде тоє же ѡсени ჻

В лѣ^т̑ . ҂s҃ . ц҃ . к҃а . престависѧ благовѣрныи кнз҃ь Юрьи Ѡндрѣєвичь Ростовъскыи . нареченыи во мнишьскомъ чинү Герасимъ ჻

В лѣ^т̑ . ҂s҃ . ц҃ . к҃в . [1414] Погорѣ гра^д Твѣрь весь . и поса^д . тоє же зимы ѿєха кнзь Ӕрославъ Володимеричь в Литвү ჻

В лѣ^т̑ . ҂s҃ . ц҃ . к҃г . [1415] Престависѧ блг҃овѣрныи кн҃зь Костѧнтинъ Володимеричь Ростовъскыи нареченыи въ мнишьскомъ чинү Касьӕнъ . того же лѣта родисѧ кнз҃ю великомү Василью Дмитреєвичю сн҃ъ Василеи . марта . к҃а . того же лѣта погорѣ гра^д Москва . того же лѣта погыбе солнце . ию^н̑ . з҃ . в пѧтницю было . и скры лүча своѧ зеленѣ ѿ лица земнаго ჻

В лѣ^т̑ . ҂s҃ . ц҃ . к҃д . [1416] поставленъ бы^с̑ Семенъ єп^с̑помъ Новүгородү Великомү . митрополитомъ Фотѣємъ . м^с̑ца марта . к҃в . в не^длю . того же лѣта приєхали кнз҃и /л.261/ Новъгороскиє на Москвү . к великомү кнѧзю Василью Дмитреєвичю . кн҃зь Иванъ Васїльєвичь . кнз҃ь Иванъ Борисовичь . а сн҃ъ єго напере^д приєха за два года Александръ . того же лѣта градъ Кострома заложена бы^с̑ ჻

В лѣ^т̑ . ҂s҃ . ц҃ . к҃е . [1417] м^с̑цѧ ию^л̑ . въ .в҃ . ча^с̑ нощи . престависѧ блг҃овѣрныи кнѧзь Иванъ Васильєвичь . великого кнз҃ѧ сн҃ъ . зѣло превжелѣнныи ^Г ємү . того же лѣта кнз҃ь Данило Борисовичь приєха на Москвү ჻

В лѣ^т̑ . ҂s҃ . ц҃ . к҃s . [1418] пакы ѿбѣжаша кнз҃и Новъгородьскыє Данило да Иванъ Борисовичи ჻

В лѣ^т̑ . ҂s҃ . ц҃ . к҃з . [1419] Престависѧ кнѧгини Настасьѧ . Костѧнтинова Дмитреєвичѧ . мѣсѧца ѡктѧбрѧ ჻

Назад    Оглавление    Вперёд