Ко входуБиблиотека Якова КротоваПомощь
 

Чин

Како приимати от раскольников и отступников к православной вере приходящих,

печатася в царствующим граде Москве лета Господня 1720 месяца июля в 3 день

 

Cм. библиографию.

Исповедуемый прежде да читает символ веры потом же сие исповедание да глаголет:

Верую и исповедую святую восточную и великороссийскую церковь, в ней же ныне пребывает благочестивейший государь царь Петр Алексеевич, и вси духовнаго и мирскаго чина люди, сущу православну такову, яко же из начала веры уставися от Христа и апостол и от соборов вселенских и поместных.

Верую и исповедую во святей восточней и великороссийстей церкви вся святыя седмь тайн и протчая церковная молитвословия и последования от архиереов и от всего священнаго чина, по определенному, яко же издревле установленная от Христа и от апостол и от соборов вселенских и поместных, и ныне совершенных действуются, и истинныя святыя суть таинствы и в наше суть спасение, верую и приемлю.

Верую и исповедую яко во святей восточней и великороссийстей церкви все догматы суть православны и никакими ересми и расколами неосквернены суть.

Верую и исповедую, яко во святей великороссийстей церкви вся новопечатныя книги, их же церковь содержит, суть православны, и никаких в себе ересей и противностей и нововводств не имеет.

Верую и исповедую и приемлю, предание святыя восточныя и великороссийския церкве, еже знаменатися тремя первыми персты, и по псалмех глаголати, аллилуия по трижды, с приглашением слава Тебе Боже, сущее и православное есть таковое предание.

Верую и исповедую и приемлю святое воображение креста Христова сицевым † видом воображенное на просфирах и на прочих вещах и местах, и поклоняюся и лобызаю.

Верую и исповедаю быти православно, и приемлю пишемое и печатное имя Iисусово со двумя буквами сице: "Iиcъ..."

Верую и исповедую и приемлю молитву Iисусову пишему и печатану сице соборне верными глаголемую: Господи Iисусе Христе Боже наш помилуй нас. яко есть святая, и предания древния святыя восточныя церкви. и глаголати всегда тако обещаваюся.

И прочая вся яже ныне содержит святая восточная и великоросийская церковь приемлю и исповедую, и верую яко вся та суть православна содержания ея, тако и покаряюся и пребыти в ней Божиею помощию желаю и обещаюся.

Аще ли же в вышеписанных не пребуду, или в чесом явлюся сопротивляяся, тайно или явно, повинен буду суду церковному и градскому без всякаго милосердия и прощения, и сам себе осуждаю смерти аминь.

Посем повелеть оному раскольщиков проклинать сицевым образом:

Проклинаю всех тех которые святейшаго Никона патриарха называют еретиком и неправославным, да будут прокляти и анафема.

Проклинаю всех таковых иже православных патриархов Восточных и Московских по Никоне и до сего настоящаго лета престолы правящих не исповедают быти православными, но паче называют раскольниками и еретиками, и всех архиереов и до священника такожде называющих, да будут прокляти и анафема.

Проклинаю всех таковых иже ныне не веруют и не исповедуют, яко во святей Восточней и Великороссийстей церкви от архиереев и иереев совершается под видом хлеба тело Христово и под видом вина кровь Христова, таковии да будут прокляти и анафема.

Проклинаю всех таковых иже ныне не веруют и не исповедуют, яко во святей Восточней и Великороссийстей церкви от архиереев и иереев совершаются все святыя седмь тайны, и прочая их церковная чинодейства, таковии да будут прокляти и анафема.

Проклинаю всех иже ныне не крестятся тремя первыми персты, но крестятся двумя персты, указательным и средним, и протчих учат творити тако, да будут прокляти и анафема.

Проклинаю всех таковых иже ныне глаголют по псалмех аллилуия по дважды, а не по трижды, и протчих учат тако творити, да будут прокляти и анафема.

Проклинаю всех хулящих и отмещущих воображаемый крест Христов на просфирах сицевым † образом и пишемое имя Спасителево сице Iисус, и молитву сию: Господи Iисусе Христе Боже наш помилуй нас, да будут прокляти и анафема.

Проклинаю всех таковых иже еретиков и раскольников бывших Аввакума протопопа и Никиту попа, прозванием Пустосвята, и Лазаря, и Феодора, и всех тогда бывших приемлют, и ныне им последуют, и не проклинают, но исповедуют их мучениками и страдальцами, да будут сии и со онеми и последующими им прокляти и анафема.

Проклинаю всех разных 9-ть толков, иже ныне восточней великороссийской церкви, и ея пастырем не покоряются и учат не покарятися яко же поповщина, онуфриевщина, они же и аввакумовщина, софонтьевщина, они же и стариковщина, они же и лесеновщина [лысенковщина?], и кадильники, и протчих их толков поповщина и безпоповщина, перекрещеванцы, и не перекрещеванцы, федосеевщина, и андреевщина, иже за рубежем, и в Поморье, и в Польше, на Ветке, и на Керженце и во всех градех и во уездах, как мирских, так и старцев и стариц, и лживых их попов и учителей отрицаюся, да будут прокляти и анафема.

Аще же аз вышеписанных всех противников и раскольщиков проклинал ложно и лестно да буду я проклят и анафема не прощен в сем веце и в будущем, аминь!

 
Ко входу в Библиотеку Якова Кротова