Андрей Денисов

Слово надгробное блаженныя памяти боголюбивому Выго-пустыннаго общежительства Екклисиарху Петру Прокопиевичу
сочинено того же общества господином

Киновиархом Андреем Дионисиевичем.

См. старообрядчество. XVIII век.

Опубликовано в журнале “Русская старина” т. 26, ноябрь, 1879 г., СПб, Ив. Д. Беляевым.

Кто есть человек (возглашающу пророку) иже поживет и не узрит смерти. Кто от Адама рожденных, земля еси и в землю паки пойдеши Адаму реченных избежати возможет. Кто смертных страшнаго сего смертнаго таинства восприяти не воздолженствует. Ельма убо, о боголюбивая чада пустынная, потаися от нас церьковнаго благолепия торжественник; скрыся от нашею очию любезный боголюбия ревнитель; покрыся смертными облаки братская красота; умолча язык сладость слова Божия точащий; затворишася уста молитвы соборныя к Богу и святым его мироухающая; зайде сладкий нашего зрения свет; скрыся от очию нашею любезная свеща; взяся в горкия сия дни пустынное утешение; скончася в скорбное сие время раб Божий Петр, бодрый служитель церковный. Чесо ради никто зде от боголюбивых возможе сие разлучение понести без жалостнаго сердца, никто без скорбныя души, никто без плачевнаго лица. Вси же жалостными уязвишася сердцы: старейшии возскорбеша, церковнии восплакаша, общежители возслезиша, скитяне возрыдаша, сироты восхлипаша; вси же возтужиша таковаго усерднаго красителя церковнаго, таковаго разженнаго слову Божию служителя, таковаго ревнительна к делу Божию тщателя и в скорбных случаях вселюбовна утешителя, и в напастех скора молитвами вооружителя, и тепла всех к молитвам возбудителя. Тем же убо неправедно нам мнится быти таковаго слову красителя без слова гробу отдати, и якоже в земли тело, сице в молчании жизнь его скутати, и ниже любви духовныя, ниже родственныя воспомнити, и лишити себе же и прочия любовныя сладкаго того изображения, и якоже незрим есть телом, не зрети его душевныма очима оставити. Аще бо грубейшие от поселян умершия своя частыми воспоминании повествуют, и поселянская его дела, елика или в ратайстве дивна, или в ловительстве чудна, или в домостройстве им мнится добра, та вся высоко вещают и друг другу проповедуют, и на гроб приходяще, и друг другу любовнаго своего показующе, дела его и словеса возвышают, много себе теми повестми утешение устрояюще. Не много ли паче нам, мужа сего в духовных подвизех от юности усердно подвизавшагося и многия сладости и любви духовныя нам виновнаго словом изобразити должно есть; не яко да он воспочтится, не требует бо сего смиренная она душа; но да мы словом изображена его, яко жива зряще утешаемся и поелику возможно пользы наслаждаемся, и воспоминающе любовно любовнаго нашего любви точителя, любовно на поминание души его воздвигнемся; чесого у нас ныне, якоже саморучным его писанием, сице душею его просит и желает и любезно приемлет. Убо всежалостная чада церковная, понеже любовными вашими пламы скорбите и желаете достойнаго желания сего мужа зрети же и беседовати с ним; приидите ныне отрем слезы от очию нашею и жалость сердца нашего, и с повестию сею походим с ним умныма очима, и воспомним краткостию слова пребывание его с нами, и поне сице сотворим утешение себе от многия жалости.

Бе бо сей раб Божий от юны версты научен красоты благочестия, и от преятия родитель взгромажден ведением древняго благоверия, якоже и отчество его и вся поморская страна, яко велие прародительное наследие святых отец древнее благочестие преятием друг от друга лобызаша, и отцы сыном и тии же своим чадом преподаша ведение и слышание святоотеческаго православия, с киим поучением и просвещением сей раб Божий воспитовашеся. Не от невежд же некиих и слова непричастных древлецерковное благочестие всероссийское всей поморской страны в нынешняя времена смущенная проповедася и уяснися. Сице и рождение сего от прародителей и родителей, от них же последованием благоверие восприят, не неведущих писания производится, якоже слово ниже хощет показати.

Егда бо грех ради наших Никоном патриархом перемена 6лагочестивых святоотеческих уставов учинися, и светлое светлейших святых отец чиносодержание отлагашеся, своя же его уставоположения утвержахуся, и знаменающиися крестным знамением по святых отец Божиим уставом, тии проклинахуся, и по старопечатным и старописанным святым святоцерковным и царственным и архиереосвидетельствованным книгам содержателю благочестия, знаменосцы же и чести достойные отцы яко злодеи тогда прогоняхуся и вязахуся и мучении тяжкими искушахуся, и тьма тяжка покры тогда Россию, мечь и огнь поядающь села и домы и пустынная места за содержание древняго святоотеческаго благочестия; от лет сие смущение седмыя тысящи сто шестьдесят втораго году, с Никонова патриаршества. От тогда противящийся Никонову новопреданию и опасный хранитель святоотеческих древних содержаний, священный архиерей и Божий человек, Павел епископ коломенский, за имя Божие и за свидетельство Исус Христово за древлецерковное православие, муж свят и достойный чести, с безчестием послан. бяше в заточение в поморскую нашу страну, в Олонецкий уезд, в Палеостровский монастырь; паче же рещи яко некий Моисей и Аарон Божиим изволением на утверждение новаго израиля, беззлобивых и богобоязливых поморских людей прислан бяше. Идеже несколько время пребыв, поучая свободно народы, утверждая жити в святоотеческом благочестии, нововыниклых уставов Никоновых соблюдатися наказуя. Коего учения и благословения архиерейскаго страны сея жители вкупе же и родители сего раба Божия Петра слышатели же и свидетели зело бяху.

По сих же явися ин муж свят и благочестив, игумен Досифей с Тихвины Николы Беседнаго монастыря, благочестия ради крыяся, старостию и добродетельми украшенный, иже часто прибегая в пустынной некоей Куржетской обители, ея строении преподобнаго некоего старца Ефросина, в ней же и святыя церкви бяху. В них же собираяся со многими отцы, великыми постники и знаменосцы, иже от многих стран и от Соловецкия обители изшедшии, яко ангели некия, земнии и небеснии человецы, службу Богови за весь мир приношаху и житием добродетельным просвещаху. И бяху мнози в них разумом божественнаго писания обогащени и безстрастия светом просвещени, священнаго и иноческаго чина знаменосцы. Откуду тогда в зиму гонения лютаго на благочестие весна сияше пресветла от оных знаменосцев благоверия. Тогда мнози от знаемых и сродных сего раба Божия во ону обитель прихождаху и просвещахуся, исповедахуся и святых безсмертных таин причащахуся. Аще и послежде защитницы Никоновы и ненавистницы древлесодержательнаго благочестия, архиерейстии посланнии с Новаграда, оле плача и жалости! не токмо разпудиша стадо Христово (по реченному апостолом: все хотящии благочестно пожити о Христе Исусе гоними будут); но и святыя церкви тыя в Куржетской обители огнем пожгоша. Обаче одушевленныя церкви благодатныя, по апостолу, — вы есте церкви Бога жива, старожитнии они отцы остальцы Соловетския и прочих обителей, крыяхуся по пустыням поморским около Онега езера, пачеже около отчества сего поминаемаго нами Петра, Повенца именуемаго. И тако древлеправославное благочестие храняшеся и проповедашеся, и в домех благочестивых богобоязнивых мужей светяшеся, и пустынная места благочестивыми от гонения наполневахуся. И сей раб Божий Петр от младенчества благочестивыми повестьми питаем со сродники своими возрастааше. И тако не токмо от издревле сие наше православие евангельскими, апостольскими и соборными догматами украшено есть, и священными книгами засвидетельствовано; но и в смущенныя сия дни архиерейским и священных мужей благословением и проповедию насаждено и страдальческою кровию утверждено есть, в нем же сей раб Божий в юны версты слышанием просвещаем возрасте; такоже от прародителей и родителей, наученных святым книгам сущих и вероятельства достойных восприя последованием уставы древлецерковныя.

Прадеда бо его отец бяше рода князей Мышецких с Новгородския области, именуем Борис Александрович, муж благ и благочестив и добродетелен, якоже последованием родителей ведению даже до нас дойде. Той во время смущения Русския земли, егда от шведов и поляков волновашеся Россия, и мнози принуждаемы бываху целовати крест чужестранных кралей; сей же благородный князь не восхоте в том учинити поползновения, но якоже крепок во благочестии, сице своим природным государем вернейший явися, не поддадеся чужестранным иноверным кралем, не восхоте креста за них целовати. А понеже велие налегание тогда от противных бяше и бедствоваше Россия конечным бедством, остави сей отечество свое и поместья и вотчины, и пресельник бывает в Заонежской пятине, аки в пустыне некоей в лесожительном селце, Пудожская гора именуема, в нем же, во иноческом чину Боголеп преименованный, благочестно преставися. Сын же его Иван Борисович священства и иночества чином назнаменован, Иона во иночестве именуем упокоися. Того же дети Порфирий священник и Евстафий пресельники на место Повенец именуемое быста, незнатно и убого суще; якобы последи от них и рода их тое место населися,и из рубища нищеты и неволи очистися и знатно в сих странах учинися. Сего бо Евстафия дети Иаков, иже и дед бяше сего поминаемаго Петра, муж в сих странах знаменит и разумен, в гражданстве же славный от великих государей самолично многажды милосердие гражданству же и сему Повенцу получивый; а наипаче во время воеводства на Олонце князя Терентия Васильевича Мышетскаго, от него же по любви к милосердию благородия сродственнаго велие милосердие тогда получи. Такоже и братия сего вси священному писанию научени и церковными древними уставы просвещени, и в гражданстве и в странах сих знаменити бяху. От них же Дионисий не токмо в мире правдою и добродетелию поживе, но и оставив мир, пустынное житие лобызав, добре Богу девятолетно потрудися; свидетели же житию и словесем его братства сего старожители суть. Помяновеннаго же Иакова сын Прокопий произнесый сию добрую отрасль в мирстем житии умре. Мати же сего добляго Евфросиния, во иночестве Екатерина, зело боголюбива и благочестива бяше; яко многия ея ради веры и любви к Богу единочадых своих сего Петра и дщерь едину и вся мирския покои не пожале во время гонения веры оставити, да благочестно во благочестии скончается. От таковых прародителей и родителей сей наш Петр произшедый и от младенства священным книгам и древнему благочестию научен бяше, в девятоенадесять лето возраста сего мира и мирскую прелесть оставляет. Возжада бо (рече с пророком) душа моя к Богу крепкому и живому, услышав глас евангельский и поревнова, ощутив преславный Владыки глагол; и возъусерствова почув реченное: аще кто оставит отца и матерь, жену и чада, села и имения сторицею приимет, и живот вечный наследит. И теплым тщанием исполнитель сему учинися; отбеже бо покоев телесных, отскочи красоты славы сластей, яже тогда преизобильствоваху, и насельник с сверстники и сродники некиими своими пустынных мест бывает, с псалмопевцем ревнуя и вопия: се удалихся бегая и водворихся в пустыни, чаях Бога спасающаго мя. Тепл бо бяше верою и разжен усердием; глаголаше бо: аще ми и гладом умрети в пустынных местех, но лучши произволяю терпети Христовы ради любви в прародительском церковном благоверии, нежели жити в селех грешничих в смущении о благочести, в мятежах и молвах и гресех мира сего.Егда же приложися пустынным недром не лености и дряхлости вдадеся, не сну и унынию послужи, не своевольству и безвременному скитанию ссебе вручи; но весь всего себе всеусердно Богови на службу отдаде; церковную службу исполняти в келиях по уставу возъусердствова, ей же от младенства научен бяше. Правило же келейное по благословенію отц усердно исправляше; чтению же священных писаний, яко райския сладости, по дни и по нощи выну наслаждатися не преста, читая, преписуя, каталоги устояя (устрояя?) даже до смерти в сих упражняяся; в посте же и трудех пустынных юность свою смиряаше, усердно многи пустынные труды подъемля, в них же не оставляше молитвеннаго правила и священных писаний прочитания; тепл бо бяше и усерден, в во всех делех остатися не хотяше, яко рещи усердному делателю многая дела уступают. О чистоте же тако телесней яко и душевней велие прилежанние имеяше, поминая рекшаго — блажени чистии сердцем, яко тии Бога узрят; размышляя же о не хранении чистоты беду не малу апостолу глаголющу, кроме тоя никто же узрит Господа. Прочее рещи о всех добродетелех подвизаашеся, ко всем ревноваше, ову творяше, другой поучашеся, о иной ревноваше,. иная слезами и моленьми наполневаше, и во всех добрых делех не последний хотяше быти. Часто же о сих поучашеся и отеческая словеса о чистоте и смирении умнем поучающая выну прочиташе, и о смертней памяти и суде страшнем всегда наказовашеся. О службе же церковней и о уставе тоя зело прилежание от младенческих ногот имеяше, не токмо что от родителей и от отец древнейших научен бяше, но уставы древлецерковныя в обиходники монастырския прочиташе, и с них воедино некое краткое собрание преписоваше; попечение бо велие имеяше да вся по отеческим уставом богоугодно исправлена будут. Чесо ради многаго его тщания и искусства достоин явися екклесиарх церковныя службы, и украситель торжественный, и всебратственный пользодатель, и многий помощник строении общежительству, тако Богоявленскаго, яко Крестнаго девическаго.

Откуду же общежительство сие начало прият и како устроися, нужда нам вкратце объявити зде, да скажуще о нем екклесиарха тоя покажем, екклесиарха же повествующе общежительетво явим; да неведущии ведением, ведущие же памятованием обновят своя слуха; ибо малая сия речка, или кто како об нем помыслит, общежительство сие, глаголю, истече от источника великаго, Соловецкия глаголю преподобных отец и мирских молитвенников Зосимы и Савватия обители, яко благословением, тако чином и уставом образом сицевым. Егда бо древле соловецкие отцы не приимаху новых уставов Никона патриарха, древлесодержания церковнаго нимало уступати дерзаху; бяху бо в них тогда мужи честни и святи от многолетних подвигов постных просвещени и разумом божественннаго писания озарени. В них же два прочих превосходяща в премудрости и разуме и во всем ведении священных писаний; един Герасим Фирсов именовашеся, его же премудрость и разум каков бяше является от писания его, еже написа о знаменовании креста на лицах своих; вторый же черный дьякон Игнатий, муж, святолепен и подвижник велий, и божественнаго писания вельми читатель и внешняго наказания искусен.

Бяху жо тогда в Соловецкой обители мнози отцы святоподвижнаго их ради жития прозорливым даром и знамении и чудесы облагодатствовани. В них же бе некий отец Гурий именуемый, аки благоуродствуя пребываше, многая прорицания тогда предвещааше. Егда еще Никон митрополитом бывый, по мощи святаго Филиппа посылаем бяше; тогда той святый старец приезд его и яже о нем прежде прорече, и ина многа памяти достойна, глаголаху отцы, той прорицаше; молитвенник бо велий и постник бяше многолетен, и чистоты ради умныя предвидяше дальная, яко близ сущая. Той великий отец часто помяновенному Игнатию отцу повелеваше изыти из обители Соловецкия: Бог тебе, глаголя, повелевает отсюду изыти. Чесо ради стужившу отцу Игнатию и некогда молящу святаго сего старца: «Почто убо, о святче Божий, аки мя непотребна уда от обещания своего от обители преподобных изгоняешь?» Святый же той старец — "Иди иди, Игнатие, — рече, — не имея сумнения, хощет бо Бог состроити тобою велию обитель в славу Его". Обители же Соловецкой разорение предрече, яже послежде зельным страданием древле Соловецтии отцы за древнее благочестие скончани быша.

Поминовенный же Игнатий изыде из Соловецкия обители по глаголу святаго старца и по благословению отец, и Богом подвизаем прииде в сия поморскии пустыни, пребываше близ Повенца, отечества помяновеннаго Петра, и часто в дом родителей его прихождаше, якоже и прочии отцы Соловецкие, и благословения сподоблеваху. Пребываше же еей отец Игнатий во многих вышеестественных подвизех, и в вышепомяновенной Куржетской обители с священноигуменом Досифеем и прочими отцы схождашеся и единоумно о благочестии усердствоваху. Бе бо добродетельнаго ради жития и премудрости всеми знаем и именит; еще же живый в пустыне сей чистоты ради его сердечныя и безстрастнаго жития прозорливый дар от Бога имеяше; иже видяхуся добродетельны быти, их же провидя он последи отпасти благодатнаго жития, и предрече о них, иным наказанным быти за прегрешения их объяви, другия зело ревнители являющися от очию своею отгна преступники быти предсказа, вся же сия по предречению отца сего сбывахуся. Многи же сей отец священный просвети учением, научи благоверию, наказа добродетелем. Чесого ради мнози прицепившеся к нему и моляху его с ним пребывати и предводительством его спасенным быти, еже и сотвори боголюбивая она душа, памятуя проречение и повеление святаго старца Соловецкаго Гурия. И нача сей в пустыни общее житие не токмо по благословению отец Соловецких, но и благословением помяновеннаго игумена Досифея, бяше бо ему отец духовный, иже повеле ему женеск пол особь в пустыни от братии отстраивати, и велиим опаством целомудренное наблюдати житие, иже и велиим опаством по священным писанием общежительнии же и целомудреннии уставы предводительствоваше.

Сему же отцу ученик и сообещник бывает кроткий, аще ныне кто таков, Даниил, благословением священнаго отца игумена Досифея, бяше бо ему сын духовный и стаинник благочестия. Молящу же Даниилу священнаго сего игумена да благословит и научит у какова искусна отца в накаэании быти; священная же она глава, аки Богом подвизаем: "иди, — рече, — и в ваших поморских странах пребывающа Соловецкаго старца Игнатия послушай; сей бо мощен тя наставити на путь спасения"; еже и сотвори Даниил, бысть ему сын и сообщник общежительства его и несколько время терпяше с ним и братиею многи скорби пустынныя и гонительная волнения. По сих же отцу Игнатию многи души во благочестии и добродетелех научившу и направившу и скончавшуся о Христе; осталец же онаго общежительства Даниил смиренный, скитаяся по пустыням с некоею братиею, место от места пременяя многаго ради тогда гонительнаго волнения; и многое попечение имеяше, аки некий великий долг, да общежительное обещание по благословению отец в общежительных святых уставах исполнит. Бяше же тогда в пустыни сей живя священный отец, предревний великаго жития подвижник, авва Корнилий староскитский, Ниловы пустыни древлеобещник, знаемый еще древле бяше и любим добродетельнаго ради жития святейшему патриарху Филарету, и несколько времени у него жил бяше. Той аки ангел некий в вышеестественных подвизех просвещаше пустынная сия недра, и всем нам отец духовный и сладостный наказатель бяше, Даниилу же и помяновенному нами Петру. Бяху же инии отцы: древле Соловецкий отец Геннадий, Качалов по роду имянуемый, Иосиф Соловецкий же и ины отцы и пустынножители, с малою дружиною живуще и молитвами своими дебри сия освящающе.

Даниил же в малом общежительстве живя, древле Соловецких отец благословением аки искру во угле, или аки благовонное миро в алавастре носяй, соблюдая. Усердствуя же он о общежительстве, возъусердствоваше же и прочая братия, возревноваша же и отцы, благословляюще и повелевающе о нем пещися; яко же и нас с приснопамятным Петром моленьми, отеческими благословеньми, советов принужденьми принудиша общежительнаго не жития точию, но и попечения тяготы вкусити. Разсуждающе тое тогда, да обдержанием общежительства в пустыне сей благочинное житие утверждается, всякое же безчиние изничтожается, и да не попустится своевольным злым людем место пустынное жительство быти, яко же и бысть; ибо тогда воровских людей терние в лесах сих вкоренятися наченшееся, благодатию Христовою обдержанием общежительства сего изничтожися. И мирно, и благопокорно, и ведомо житие сие тако царскому величеству, яко властем градодержательным общежительством сим исходатайствовася; яве бо по Христовым и апостольским преданием повелевающим Бога боятися и царя почитати, и Божия Богови и кесарю кесарева отдаяти. Сия вся Богу помогающу, благое от Божиих писаний и благопокорное разсуждение общежительство сие источает. И тако сие общежительство, яко же рехом, от Соловецкия обители произтекшее есть, чином же и благословением Соловецких отец вкорененное, и священноигумена Досифея благословением насажденное, к сим же и староскитскаго отца Корнилия и прочих отец пустынных молитвами и благословением утвержденное, изперва место из места пременяя гонительных ради случаев бяше; со священным отцем Игнатием близ Пурнозерских езер прежде водворяшеся, пренесе же ся на Саро-озеро, идеже после отца Игнатия соблюдашеся; по сих близ Боровскаго скита при малом езерки крыяшеся, идеже мы благодатию Божиею совокупихомся и живяхом, по благословению священнаго отца Корнилия и прочих отец пустынных и Соловецких отец Геннадия и Иосифа. Таже Богу извольшу преселихомся к Выгу реце, идеже не токмо древнейшии отцы Корнилий и Виталий благословением и присещением многажды нам присутствоваху; но и Соловецкия обители священник Пафнутий и пустынножительный старец поживе во общежительстве лет седмь, всерадостно благословляше устав общежителъства и церковныя службы и возвещая вся благочестивыя уставы же и обычаи Соловецкаго монастыря, и сладостно прилагашеся сего общежительства уставу. К сим же и древний старый священник Феодосий, страдавый многолетно за благоверие, той прилувся быти в общежительстве сем, усердно похваляя и благословляя чины вся, и Бога благодарствуя о уставе общежительства сего, и сам желаше сообщежитель и служитель быти.

Сице убо сие общежительство от пустынных и освященных отец первозачатием проистече, толиких же и таковых священных мужей благословением строительствовано бяше; его же екклесиарх и состроитель и многоусердный пользователь бяше поминаемый раб Божий Петр. Но не таково бяше сие общежитие и особноскитское пребывание тогда, егда снидохомся, яко же ныне зрится. Бе бо тогда стадо Христово в сих поморских пустынях, аки в нощи бурной и темней, в гонительных волнениях и от безчинных людей во обуреваниях, по пустыням и по местом страдальчески без чина и паствы скитающеся; и рещи по Григорию Богослову, яко смокву в пустыни обретохом Израиля, и яко зерно едино или второе зрело в безгодне грозде благословением Господним убо соблюдено и начаток освящен, обаче мало и скудно и не наполняя уста ядущему, и яко стяг на холме, и яко древо ядреное на горе, или аще ино что от единаких же и не множайшим видом. Егда же благодатию Божиею и благословением отец совокупихомся в сие общежительство в таковых пустых хлебонеродных местех, в толиких бурях и волнах неисчисленных, в толиких ратех и напастех безпрестанных; о, коликих трудов и потов в строительство сего общежительства воздолженствовало! о, коликих подвигов бедовметных и попечений многопечальных возтребовало, — телесное житие состроити и душевное спасение устроити, в неплодных местех прекормление примыслити и душевную трапезу (да не гладом помрут) всегда уготовити, нивы лесораслыя с трудами пахати да и терновидные нравы со многими поты изтерзати, одеждами в нищих местех одеяти и общежительными святых отец обычаи ненавыкших людей украсити, горы своевольныя поравняти, чащи миролюбных обычаев искореняти, сено со огнем разделити, воды страстныя застановити, возгорения похотная и яростная загасити, волны многочисленныя утишити, противу ратей премножайших ополчатися. Колицы же и какови противности и злодыхательни рати на церковь же и братство сие быша и суть от диавольска злорыкания, от бесовския зависти от гонителей жития, от раздорников лукавствия, от иудоподражательных злодыхательства, от безчинных свирепства, от своевольных шатания, от злообычных роптания, от гладных случаев, от нужды потребных, от вне и от внутрь, от невежества и от предприятия, мнится сие от самыя преисподния геэнны волны сия на корабль благоверия гремеша и гремят, от самых челюстей чермленаго змия бурливыя воды сия на церковное благочестие восклокоташа. О, с коликою ужастию прешедшия рати тыя помыслити! О, с коликим жалостным плачем о оных пророчески возопити: яко аще не бы Господь в нас (помогая нам) ввнегдавозстати человеком и бесом на ны, убо живы пожерли быша нас; внегда прогневатися яярости их на ны, убо вода потопила бы нас.

Во всех же сих нужных братских строениях я ратех от диавола наносимых безчисленных, велий бяше ревнитель, и усердный подвижник, и теплый молитвенник, и духовный ратоборец, и теплейший советник, и помощник правительствовати братство, и боголюбивый учитель, и украситель церковный сей наш церковныя службы екклесиарх. Многолетныя же его всебратственныя и всецерковныя подвиги и труды не сего краткаго времене и не моего грубаго ума подробну представити пред ваша боголюбны очеса; аще и потребно нам сицевая слышати, да воздвизаемся на таковое усердие; аще и должно нам трудами его память поновляти, да незабвенно имеюще толикия его всебратственныя и всецерковныя подвиги, долг любви помяновением души его любовно отдати возъусердствуем; но краткости ради сия вся молчанием минуем. Обаче не премолкнут нивы и горы древния труды его возвещати, идеже он, брат, слезами припадаше, у всех прощения прошаше, взаимно же всем, вселюбное прощение изливаше; вся церковныя люди, вся любовныя и сродственныя лица плачаше на молитву Богу за себе воздвизаше, и ныне и тогда и нами и чрез нас вас убо, о священное совокупление, умильно молит, и слезоточительно просит, и вечное любовное целование деет: "здрави будите, — глаголя, — здрави любезнии отцы, здрави сладчайшая дружино, здрави единоревнительнии друзи, любовнии сродственники, церковная чада, богособранные сироты, здрави вси боголюбезнии и сладчайшии мои будите, и за мя возставше Владыце молитеся, пролейте боголюбныя ваша слезы, к царствующим Царю возшлите за мя любовная воздыхания всемилостивому Спасу. Простите мя, священии отцы, елико согреших Богу и вам, простите мя, любезная дружино, вся богособранная церковная чада, и елико вас кого согрубих простите ми и за мя молитеся; помяните мою к вам любовно худую любовь; помяните яко о Христе пребывахом, ядохом и пихом, советовахом, усердствовахом о Бозе с вами, в скорбех утешахомся, в напастех увещевахомся, словом Божиим наказахомся, церковными торжествы наслаждахомся, и ныне праведным праведнаго и милосердаго Владыки моего судом от вашея сладкия любви один отлучен есмь, и не вем что срящет мя, в путь отхожу вечный и не знаю кое получи получу пребывание. Аще бо, возлюбеннии мои, и подвизахся худым моим подвизанием о убогой души моей, и усердствовах с вами о церковном благочестии; но кто свесть и известит мне, прежде Владычня правосудия, приятна ли моя убогая дела или отказана, вписана ли в книги животныя или отриновена от лица Божия. Понеже во многих века сего мятежех, во многих вышесильных попечениих, во многих паче нашея силы братских тяготоношениях или помрачением занят бых, или жестотою окалянихся, или неведением падохся, или моленьми человеческими склонихся, или многими сношеней бурями погрузихся и нелепными мысльми прогневах моего Владыку, или словесы неугодными милосрдно его досадих, или безумными делы противу заповедей Его возборствовах и покаянием сих очистити не дойдох. Увы мне аще сими занят буду от лукавых мытоимцев; горе мне аще возхвалятся надо мною темнии бесове; ох мне аще осужден буду в мучительныя руце их. Аще ли милосердия ради моего пресладкаго Владыки и заступлением общия всех христиан Заступницы всесладчайшия Владичицы и молитвами всех святых небесных сил и всех святых Божиих угодников и наших теплых молитвенников, и ваших ради святых молитв, ваших ради церковных и келейных поминовениих, ваших ради теплослезных прошений; аще помилован пройду темная темных князей воздушная без пакости мытарства, аще милосердием Божиим покрыт дойду, вместо крова дивна, пресладкаго Владыки моего светосияния. О, колико возрадуюся и возвеселюся, о, колико возпою и возблагодарю моего Владыку, о, коликими гласы пророческими возкликну: благословен Бог, иже не предаст нас в ловитву зубом их; помощь наша во имя Госнодне сотворшаго небо и землю. Колико же должен буду памятствовати вашю сладчайшую любовь, ваши за мя умилительныя молитвы, ваша любовная убогой моей души помяновения. О, аще бы, дал Господь за вашими молитвами моей грешней души отраду, должен бы был возопити за вы ко Владыце; должен бы сладчайшия моя други, возмолити: призри, призри, пресладкий Владыко, на Твоя люди бедствуемыя выну, призри на твой виноград, его же насади десница Твоя, призри в тяжких мира сего волнах на обуреваемыя Твоя рабы, отжени лукаваго диавола от них злобу, защити от бесовских злоковарств, волны утиши, напасти отжени, ратующия утоли и в мире мирно сия церковная чада сохрани и небесному Твоему царствию причастники учини. О, аще бы умилосердился всесладкий наш Владыка и дал бы нам места светла в прекрасных кровех своих и совокупил с вами в вышнем прекраснем Иеросалиме; о, да дал бы с вами вечно нам возрадоватися, вечно в вечности небесной возвеселитися. О, колико бы тогда возрадовалися, колико бы возликовствовали, колико неизреченно восторжествовали бы, иже на земли в воюющей церкви, единодушно Его света в Троицы славимаго Бога славословихом, да даст нам и в небесней ликующей церкви благодарно и утешительно славити ег во вся веки аминь. Тем же, духовная моя братия, и друзи любезнии, и спастницы, и знаемии, не забудите мене егда молитеся; но видяще мой гроб, поминайте мою любовь и молитеся Христу, да учинит дух мой со праведными".

Сия убо и такова и вящше сих, раб Божий Петр, в жизни сей жив, изобразил словесы же и делы образ полезен нам попечения души. Сицевыя же умиленныя гласы и вещи, словесы же и писаньми во изходе души своея и ныне нам возглашаше и возглашает, сицевыми любовными пламы вся боголюбивыя души объемлет, сицевым, нестерпимым вечным рачительством сердца наши убодает.

Тем, боголюбное пустынное сочленение, христолюбнии отцы и благоверная дружино и вся усердная чада церковная, воспомним любовь любовнаго благочестия рачителя; воспомним, люди церковнии, церковнаго усерднаго красителя; воспомним, любители благоверия, о благоверном житии всетщательно попекшагося; воспомним, вси благочестивии, всем нам многаго утешения духовнаго и пользы виновнаго; возопием молебно Владыце всяческих, возмолим всеусердно Творца небу и земли, воскликнем к нему: небесный Отче вседержителю и Сыне единородне и Душе святый изходяй, презри умершаго согрешения, и иже зде в церкви Тебе послужившаго, в церкви первенец сотвори его радоватися и славити Тя со всеми огождьшими Тебе. Помолим христианом теплую Заступницу, преславную Заступницу, преславную Богородицу: Царице мати милосердия, милосердо помилуй твоего раба, часто Тебе, о всепетая Мати, воспевающаго, и радуйся, Невесто неневестная, зде возглашающаго, тамо со всеми святыми умоли пресладкаго Владыку душу его упокоити в небесных селениих. Помолим архангельский. собор и всех святых лики: о, архангели и ангели всесветлейший соборе, Михаиле и Гаврииле со всем воинством безплотным, помозите Божиему и вашему рабу, иже в здешнем житии памяти и службы вам усердно торжествовавшаго и на помощь себе призывавшаго, в тамошнем пребывании любовни и милостиви продстатели ему будите. Велиции апостоли Петре и Павле и Иоанне Богослове со всеми апостоли, будито тепли пособники теплому нашему молителю. Вси святии Божии угодницы, угодити вам службами потщавшагося милостиво заступите. Теплый наш молитвенниче святителю Николе, усерднаго вашего служителя, яко отец милосердый, приими в защищение. Преподобнии отцы наши и всего мира молитвенники Зосимо и Савватие, Сергие и Варлааме, не презрите вашего торжественника. Вси российские чудотворцы, не оставите ваши праздники любовно творившаго. Пострадавшие за благочестие страдальцы российстии, помяните любовно срачительствующаго во благоверии и поминавшаго вас рачительно. Соловецкие отцы и исповедницы, благовкрия любящему вы любовь воздадите. Сладчайший Мемноне церковный и наш подвижниче, объими любовно твоего и нашего срачителя. Дионисие старче и боатства сподвижниче, приими любезно любезнаго своего сердоболя.. Екатерина боголюбивая, восприими свое чадо, его же Божия ради любви оставила младша. Вси преставльшиися и милость Божию получившии отцы пустыннии и братския обещники, приимите любовно усердно вы зде помииавшаго. Вси души праведных, утешите вашим утешением от скорби сея грядущаго вашего рачителя. Отсюду, отцы пустыннии, любезное братство, с поминанием провождайте, тамо отшедшее спасшееся братство любовно приимайте; отсюду, любезнии сродницы и други, с моленьми и слезами отпустивше, помяновением сердобольствуйте, тамо, любовнии ему спасшиися дуси, праведных радостно в радость прияти Владыку умоляйте. Вси же вкупе тако в небесней яко и в земней церкви славяще прославим и благодаряще возблагодарим Христа Сына Божия, искупльшаго ны честною своею кровию от пленения диаволя, и смертию смерть поправшаго, и тридневно воскресшаго, и всем правоверно в него верующим вечное пресветлое воскресение даровавшаго, с безначальным его Отцом и с пресвятым истинным животворящим Духом во вся веки.

Аминь.