Ксенос И.Г. Окружное послание, составленное И.Г.Ксеносом и изданное старобрядческими епископами 24 февраля 1862 г. с приложением Устава и Омышления, составленных тем же автором. Изданы Н.Субботиным. М., 1893. 226 с.

Опись А, №2145.

См. библиографию.

Автор - Иларион Кабанов, писал под псевдонимом "Ксенос".

Возлюбленным чадом единыя, святыя, соборныя, апостольския, древле-православно-кафолическия церкви всем и повсюду пребывающим, хранящим и соблюдающим священные догматы правыя веры и предания святых Апостолов и святых и богоносных отец, пастырей и учителей вселенских.

Благодать и милость и мир от Бога Отца и Господа нашего Iсуса Христа и Пресвятаго и споклоняемаго Духа да будет со всеми вами. Аминь.

Всяко тщание и подвизание должни есмы имети, возлюбленнии, еже последовати учению божественных писаний и хранити священныя каноны и предания святых Апостолов и святых отец, иже на седми вселенских и девяти поместных соборех в различныя времена собравшихся на истребление богомерских ересей и на утверждение правых велений, о них же Божественный Апостол взывая, глаголя: Помните наставники ваша, иже глаголаша вам слово Божие, ихже взирающе на скончание жительства, подражайте веру их; и: в научения странна и различна не прилагайтеся [ко евреям, зач. 334].

Внимающе сему, должни есмы блюстися всяких ересей и раздоров, явленных же и не явленных; держати же и хранити догматы веры и предания церковная цела же и не превратна, по реченному: Не прелагай предел вечных, яже положиша отцы твои [Притчей, гл. 22]. Сего ради прилежно "испытаем писания и предания отец, и от сих возревнуем: и якоже обретохом церковь от Христова сошествия, сице ту храним, сице и предадим, а не отлучаем себе от отец наших, иная прочитающе, а иная разумевающе" [Соборник Бол., лист 337, на обор.].

Сия убо во уме обносяще, подобает нам средним царским путем шествовати, не уклоняющеся ни на десно, ни на шуе, и от всяких злохулений отвращатися удалятижеся кривосказательнаго учения и лжеименнаго разума. Яко мнози лжепророци (лжеучители) изыдоша в мир [1 Иоан, зач. 73], иже положиша на небеси уста своя, и язык их переходит по земли [Пс., 72], от них же овии убо явлено ратующе древняя святых отец законоположения и уставы, овии же древлецерковным преданием последующе, но не правомудрствующе, иже от десна украдаеми и аки по ревности древлецерковнаго благочестия, истее же рещи, по своему лжеумствованию, составляют богопротивнаго мудрования свитки и лжесловесных учений тетради, и дающе им под именем святых благовидная названия, развращают правое учение святыя церкве, и ядом своего мудрования напояют сердца незлобивых и влекут в смерть. Яже вся исчисляти несть настоящаго времене; обаче вкратце некая воспомянути необходимо нужно и зело благопотребно есть.

Обносимы убо сутъ тегради некия лжесоставленныя, не точию священному писанию не согласныя и здравому разуму противныя, но и богохульнаго мудрования пренаполненныя, яже зде на среду да предложатся:

1-я. Первое место занимает тетрадь под название сицевым: Апокалипсис седмитолковой.

2-я тетрадь под заглавием: Книга Евстафия Богослова.

3-я тетрадь, содержащая ложное толкование Амфилохиево вторыя песни Моисеевы.

4-я тетрадь под названием: Слово от старчества, инока Захария ко ученику своему Стефану.

5-я тетрадь: лжесоставленное толкование десяти перст и десяти рогов зверя.

6-я тетрадь: О бражнике.

7-я тетрадь: О винном сотворении.

8-я тетрадь: О картофеле, мнимо от Пандока и других книг.

9-я тетрадь, содержащая странное мудрование о духовном антихристе.

10-я: тетради лжепророческия, в них же назначается время и день кончины мира и втораго пришествия Христова.

Яже вся суть ложная и баснословная сочинения, в нихже проповедуется пресечение Христопреданнаго священства, скончание новоблагодатнаго закона, царствование последняго антихриста, который якобы возседает на престолех олтарей господствующей ныне в России церкве, яже аки бы иному богу верует и покланяется, исповедуя под именем Iисуса - не Христа Спасителя, но противника Его - антихриста.

Таковая безместная и нелепая мудрования посеяна быша злонамеренно от помрачивших совесть безпоповцев и неприметно вкрадаются в Христоименитыя люди, дышащие простотою и незлобием и не могущие различити истину от лжи.

Оберегая стадо Христовых словесных овец от душепагубнаго учения и во отвращение таковых нелепых мудрований и всескверных плевел, посеянных посреде чистыя пшеницы благоверия, предлагаем послание сие и молим все Христоименитое достояние, вкупе с богомудрым философом, преподобным Максимом Греком, глаголюще: "Не всяким ветром учения обноситися, но со многим опасством и трезвенным разумом искушати духи, сиречь яже от неких писуемыя книги, аще воистину от Бога суть, по Божественному Апостолу и Евангелисту Иоанну, сиречь аще согласны суть по всему с писанным Святым Духом пророческим и апостольским и евангельским священным и правым словесем, и неблазненным богословским догматом возсиявших по них всюду вселенныя Богодухновенных святителей и учителей. Аще же не по всему согласуют, ниже сошествуют с Богодухновенными писании яже от неких писуемыя книги, отринути и гнушатися их подобает, аки хульных и скверных и Бога нас отлучающих... Да внимаем себе, Господа ради, и не без искуса веруем всякому духу учения, но да искушаем прилежно писания, аще по всему согласуют апостольским и пророческим преданием и учением. Аще бо по нечесому разликуют, да не приимем я, но да отвержем от себе, аки лукаваго беса плевел, сеянных посреде чистыя пшеницы благоверия на прельщение и погибель душам нашим" [Максима Грека, слово 10].

Последуя учению преподобнаго мужа, возвратимся на вышепредложенная сочинения и разсмотрим безпристрастным оком лежащая в них ложная мудрования. Начнем же сице:

1. Апокалипсис седмитолковый, в нем же надписуется, аки бы напечатан повелением благочестиваго государя царя Иоанна Васильевича, всея Руссии, и аки бы имать четыреста одну главу, а не двадесят две, яко же в Апокалипсии святаго Иоанна Богослова содержится, и аки бы Иоанн Богослов толкует словенскою речию. В сей богомерзкой тетрадке толико зловредных мудрований написано, яко не точию глаголати, но и помыслити ужасно. Тамо (и во инех ложных сочинениях) четвероконечный крест злословится (оле дерзости!) образом сквернаго богопротивнаго антихриста, идолом, мерзостию запустения, кумиром, стоящим на месте святе, и прочая нелепая порицания на оный воспущаются: имя Iисус приписуется имени самого последняго антихриста; евхаристия, совершаемая под именем онем и четвероконечным крестом, нарицается змииным блеванием и агньцем антихристовым; конечнее же проповедуется истребление священной хиротонии во всей вселенней.

Таковое богоборное учение священному писанию и церковному учению есть несогласно, крестохульно, еретическо, душепагубно и отнюд ложно. Ложно, яко подписуется, аки бы напечатан повелением государя царя Иоанна Васильевича; но печатнаго издания не точию книги, но ниже единаго листа таковаго содержания нигде бяше и отнюдь несть. Ложно, яко объявляет 401 главу; но по содержанию везде у любителей онаго в малой тетрадке обносится. К сему же и во Апокалипсии святаго Иоанна Богослова не 401, но 22 главы положены суть: откуду же 379 глав приложишася? Ложно, яко баснословит, аки бы Иоанн Богослов толкует словенскою речию; но Иоанн Евангелист во Асии Христа проповеда, тамо же Евангелие и Апокалипсис по откровению Божию написа суть; в Словенех же не бяше и словенскою речию не толковаша. Славеном же первозванный Андрей благовести спасенную проповедь; но и той четвероконечнаго креста не хуляше, о чесом зри в житии его [Книга О вере, лист 70, и Минея Четия, ноября 30]. Отсюду же и ясно зрится: яко псевдоименитый Седмитолковый Апокалипсис сей составлен не от Иоанна Богослова, но от некоего вседерзостнаго баснослова, и есть лжесоплетенная выдумка от безпоповцев, на погибель душам христианским выпущенная. О хулах же, в нем обносимых, речется послежде в своем месте.

2. Тетрадь под заглавием: Книга Евстафия Богослова истее же рещи, площаднаго суеслова, в ней же проповедуется, яко антихрист убиет три цари великия: веру, любовь и надежду, а прочия седмь, седмь таинств церковных имеют происхождение свое (оле мрачнаго заблуждения!) от зверя морскаго (его же Даниил [гл. 7] виде, десять рогов имуща) от него же и антихрист произыти имать, и сего ради будут антихристу ближния и сродныя, яко от того же корене произрасташе и тем же отродком и погибоша. И что будет безместнее суетнаго и безумнаго непщевания сего!

3. Тетрадь, содержащая ложное "Толкование Амфилохиево вторыя песни Моисеовы", есть несогласное священному писанию, а по сему не приемлется православной церковию.

4. Тетрадь под названием "Слово от старчества". В нем же, аки бы инок Захария беседова ко ученику своему Стефану, о антихристе, и возвести ему, яко священнический и иноческий чин до конца истребится, и прочая ложная соплетения тамо зрятся, яже не что иное суть, точию баснословия, слуху благоразумных отвратительная.

5. Тетрадь, лжесоставленное "Толкование десяти перст ног тела, показаннаго Навуходоносору, и десяти рог четвертаго зверя, виденнаго Даниилом", наводимое о царех богохранимаго государства Русскаго, есть с книгою святаго пророка Даниила и толкованием святых отец не согласно, неправды же и ложнаго предсказания наполненное, в нем же ничтоже истинно, но вся суть суетна и ложна; десять бо перст и десять рогов знаменует разделение Римской монархии на десять частей, а не десять царей державы Русския, един другому последующих.

6. Тетрадь "О бражнике", подложно подписуемая, аки бы из бесед Евангельских, в ней же баснословится, како бражник бражничал на земли, и по смерти у врат святаго рая стоя, порицаше святаго Давыда царя и Соломона, вкупе же Апостола Петра и Иоанна Богослова, и тако вниде в рай. Сочинена, вероятно, от некоего кощунника и служащая поводом претыкания, к растленной жизни.

7. Тетрадь "О винном сотворении", аки бы бес научи человека хмельное питие варити, и человек той у царя за то честь выслужил, ложне надписуемая, аки бы из Стоглавника царя Иоанна Васильевича. Но в Стоглаве сего несть. Паче же таковое мудрование блаженный кир Зиновий мних, ученик преподобнаго Максима Грека, в 45 слове книги своея отревает, глаголя: "Хмель несть от беса, яко бес творити не может ничесо же, едины мечты творити может: хмель же Божия тварь, рекшаго: да прорастит земля былие травное; проявлено же убо, яко тогда и хмель прорасте, Божим повелением онем". (Ниже) "А о еже мнихом с хмелем не пити, и сие несть закон, ниже многа осуждения достойно мню, за еже умыслити соблюдати не влаема мнихом ума притворити им не питие, а сего ради к таковому уставу произвестися" [Книга Зиновия мниха, слово 45]. Отсюду убо явствуется, яко аще хмель не от беса есть, то и питие оно не бес научи творити, но человецы сами изобретоша. Сия же глаголем, ложныя басни отревающе, а не пиянству двери отверзающе. Вемы бо Апостола вопиюща: брашно (и питие) не поставит нас пред Богом [1 Коринф. зач. 140]. И паки: Не упивайтеся вином, в нем же есть блуд [к Ефесеям, зач. 229]. И премудраго Соломона, глаголюща: не винно вино, и проклято есть пиянство [Притчей гл. 2], его же всяк християнин удалятися должен есть и бегати: пияницы бо царствия Божия не наследят [1 Коринф. зач 134].

8. Тетрадь "О бульбе или картофеле", аки бы из Пандока и других книг, и крыющейся тайно голубицы подложныя выписки, на употребляющих оный тяжкое запрещение наводящия, ея же ни в Кормчей, ни в Номоканоне несть. И сие мудрование еретическо есть, понеже Богосозданное зелие, на пищу человеком дарованное и по естеству употребляемое, глаголет быти нечисто и ложно ссылается на книги, в коих и следа о сем несть: всяка же лжа от диавола есть, той бо есть отец лжи и во истине не стоит.

9. Тетрадь "О духовном антихристе", богопротивное сочинение, благочестивому слуху невместимое, хулы же в нем обносимыя не леть есть и писанию предати.

10. Тетрадь, лжепророческим духом составленная, назначающая время и день кончины мира и второго и страшнаго пришествия Христова, есть воистину богоборнаго учения наполненная, яко вопреки пречистых словес самого Христа Бога [Мф. зач. 102, Мр. зач. 62 и Деяний зач. 1] от продерзателей произведенная.

Сия убо вышеозначенныя и другия тем подобныя сочинения, от наглых невежд составленныя, суть ложныя и церкве чуждыя, яже предложивше и ложное учение во онех содержащееся объявивше, которое отвергаем и отметаем. и в направление здраваго разсуждения предлагаем зде вкратце всем последователем древлецерковнаго благочестия:

Первое

Святая православно-кафолическая церковь и священство, вкупе с приношением безкровныя жертвы, пребудут до скончания века и до дне суднаго по неложному обетованию Господню, яко же глагола Сам пречистыми своими усты: на сем камени (праваго исповедания Петрова) созижду церковь Мою, и врата адова не одолеют ей [Мф. зач. 67]. И: "якоже Христос не умирает, тако и священство Его по чину Мелхиседекову до века не престанет" [Кириллова лист 77].

Второе

Господствующая ныне в России церковь, а равно и греческая, верует не в иного Бога, но во единаго с нами: "Творца небу и земли, видимым же всем и невидимым" [Символ веры]. Глаголю же Святую Троицу единосущную и нераздельную: Отца безначальна, Сына собезначальна и Духа Святаго сопрестольна. Исповедует и плотское смотрение Христово, во искупление рода человеческаго содеянное. Почитает и честные праздники Владычни вкупе с нами (по древнему календарю) не привидением, но детельне: Рождество Христово, Сретение, Богоявление, Распятие, Погребение, тридневное Воскресение и на небеса преславное Вознесение, и прочая; такожде и Пречистыя Богоматере, и святых угодников Божиих. Поклоняется святым иконам древняго изображения, с надписанием имене Христова: IС ХС. Лобызает честный гвоздь и хитон Христов, святыя и чудотворныя иконы, святых угодников Божиих мощи. И сими всеми явственно доказуется, яко во единаго и того же верует Бога, единаго и того же с нами исповедует Христа. И таковаго ради верования ея, крещение совершаемое от нея в три погружения: во имя Отца и Сына и Святаго Духа, и хиротония, на основании священных правил и свято-отеческих событий, приемлется без повторения.

Вины же нашего непоследования пастырем тоя церкви суть важныя и благословныя. Понеже убо попущением Божиим, чрез Никона бывшаго патриарха, древлецерковная предания изменишася. И впоследствии собором (с присутствием греческих патриархов) 1667 года ужаснейшая клятва и анафема на содержащих древняя святоцерковная предания произнесеся и строгое преследование и гонение воздвижеся с мучением. И по сих от пастырей поборающих по новоизложенным догматом и преданием бранныя книги издашася, в них же святейшее и поклоняемое имя Христа Спасителя нашего (Iсус) злохульно поречено, аки бы не знаменует Спасителя и Исцелителя душ наших, но некоего иного Iсуса равноухаго [Розыск, часть I, глава 15, лист 18]. К сему же (оле дерзости!) именоваша чудовищными ничего не значащим [Никифор Астраханский, стр. 87, издание 1854 г.]. Двуперстное сложение на изображение крестнаго знамения такожде поречено: арианством, македонианством, несторианством, злобожным разделением, арменством, арменскою ересию, арменским кукишем, Ариевою пропастию, адовыми вратами, волшебным знамением, демоносидением и чортовым преданием! [Никифор Астраханский, стр. 336]. Но и в трехперстном сложении своем учение имеет само с собою несогласно. В Скрижали бо, в Пращице и в предисловии Псалтырей повелевается в трех перстах исповедовати оба таинства: таинство Троицы, вкупе и смотрение; два же последние перста имети праздны [Скрижаль, 805; Пращица: ответ 54; лист 116; Псалтыри разных изданий]. В инех же книгах - в трех перстах таинство Троицы, в последних же двух таинство смотрения [Обличение: лист 24. Увещание Плат. митр. л. 45; и Никифор Астраханский стр. 121]. К сим же и иная суть изменения и применения, отъятия и приложения, яже зде исчисляти не удобно есть. Изволяяй же да чтет во Ответах иеродиакона Александра, в 50-м ответе Поморских ответов и в сочинении Никодима инока, в шести статиях и тридесяти показаниях.

Сих ради совесть наша не допущает нас быти в подчинении пастырем тоя церкви, иже к крайнему сожалению здравомыслящих, не обращают должнаго внимания на исправление своих полемических книг и не уничтожают означенных жестокословных порицаний, - порицаний отвратительных, благочестивому слуху не вместимых, и христианским пастырем отнюд не свойственных.

Аще же некогда, благодатию Божиею озарившеся, отложат вышеупомянутая порицания и соборне оставят своя новодогматствования, а "святую старожитность возлюбят и приимут и порученным себе хранити ю повелят" [книга О вере, глава 25, лист 195 на обор.], и начнут последовати всем древлецерковным преданием неизменно, и устроится церковь в таковой точности догматов и преданий, якоже бяше от лет равноапостольнаго князя Владимира и до лет Никона, бывшаго патриарха: "тогда весь вал того предела в ровеник обратится, и единым к другим прихождение учинят сердца" [книга О вере, л. 185 на обор.; глаголы преп. Максима Исповедника: Минея Чет. генв. 21]. И мы без всякаго увещания человеческаго пойдем ко общению ея. А донележе пребывают соблазны и претконовения, возмущающия совесть нашу, то мы не можем, вопреки убеждению своея совести, последовати новоизложенным догматом и преданием.

И сего ради несмы раскольницы и раздорницы, но чада единыя святыя, соборныя, апостольския, древлеправославнокафолическия церкве.

Объявивше убо свое исповедание и священное желание, засвидетельствованное пред всеведящим Богом: якоже удаляемся от порицающих древлецерковная предания, тако не обещаемся и хулами безпоповским, в вышепредложенных тетрадках обносящимся, на которыя чиним ныне опровержение. И молим живущаго в вышних, единаго безначальнаго Царя славы, да послужит сие образцом ученым пастырем господствующей ныне в России церкви, яко да и тии обратят должное внимание о вышепредложенных жестокословных порицаниях, от предместников их сочиненных и в свет изданных. Мы же всякаго злохуления отвращаемся и мудрствуем сице:

Третие

О святейшем и поклоняемом Христове имене Icуc.

Пресвятое, пресладкое, прелюбезное и превожделенное имя Христа Спасителя нашего пишем и произносим во чтении и пении тако: Iсус, якоже от древних святых преводников вначале на словенский наш язык преведеся. И тако писашеся и произношашеся до лет Никона, бывшаго патриарха, якоже яве зрится в славянороссийских древлеписьменных и древлепечатных книгах и на безчисленных святых и чудотворных иконах. Посему убо и впредь должно есть содержатися сие древнее начертание и произношение неизменно, непреложно и неприкосновенно, не приемля никоих нововведений, ни силлогистических внушений, и сохраняти оное без приложения и умаления. Сие бо, по сказанию святых отец, знаменует: Спаса, Избавителя, Врача и Исцелителя душ и телес наших. Сице убо исповедающе, со Апостолом глаголем: сие есть пресвятейшее имя кроме котораго несть иного имене под небесем, даннаго в человецех, о нем же подобает спастися нам [Деяния зач. 10]. И сие есть покланяемое имя, еже паче всякаго имене, да о имени Iсусове всяко колено поклонится небесных и земных и преисподних, и всяк язык исповесть, яко Господь Iсус Христос, в славу Богу Отцу [Филипписеом зач. 240].

Обаче же и пишемое и произносимое нынешними греками и россиянами тако: Iисус хулити не дерзаем и не нарицаем е именем иного Iисуса и именем противника Христова, яко же нецыи безпоповцы зломудрствуют. Ибо ныне в России господствующая церковь, вкупе же и греческая, под сим именем исповедует того же Христа Спасителя, по плоти родословима сына Давыдова, сына Авраамля, родшагося от колена Iюдова, от Пречистыя Девы Марии без семене, наитием Святаго Духа, и осмодневное обрезание приемша, таже от Симеона Богоприимца на руку восприята, во Египет отшедша и оттуда возвращьшася, и в Назарете воспитана, и во Iордане от Предтечи крещьшася, и посем лик апостольский собравша, и проповедавша Евангелие царствия Божия, таже от ученика предана, распята, и погребена, и воскресшаго в третий день и в четыредесятый вознесшагося на небеса, и сидяща одесную Отца. Веруем же, яко паки приити имать со славою судити живым и мертвым. Из всего вышеозначеннаго преясно показуется, яко того же исповедует Христа Сына Божия, Единосущнаго Отцу, и несть зде, и невозможно подразумевати иного бога, или иного "и Iсуса" никакоже.

Видится же и в древних некиих книгах тако напечатано; яко же в конце Библии острожской печати, изданной в лето 7089-е, на последнем лист, в два столбца расположенном, идеже на словенском диалекте напечатано IС (Iсус), на греческом же Iисус (Ιησοΰς).

Еще подобает ведати: Киевский митрополит Петр Могила в 1646 году издаде малый Катихизис, в онь-же нововнесе трехперстное сложение, поливательное крещение, и имя Христа Спасителя, вместо IС (Iсус), напечата Iисус. Сей Катехизис святейший Иосиф, патриарх Московский, в 7157 году, вторицею издаде, и несогласная церковному преданию мнения, яко же трехперстное сложение, поливательное крещение, и нововводное имя Iисус из него исключи; но суду хульна, еже бы Iисуса нарещи иным богом, или иным Iисусом, отнюд не изнесе. Такоже и весь освященный всероссийский собор, собравшийся в царствующем граде Москве, в царстких палатах [Служебник в 10 лето Iосифа патриарха, в предисловии л. 7 на обороте], ссылаясь о исправлении церковнаго пения на Беседы Апостольския, изданныя в Киеве Захарием Копистенским в лето 7131, в них же во многих местех Христово имя напечатано Iисус, видеша, и в церковное употребление того не прияша, обаче и суда хульна, еже бы Iисуса нарещи иным богом, не точию не изнесоша, но даже о сем и не глаголаша. Аще же бы отцы всероссийскаго собора Iисуса разумели быти иного бога, то всяко, предосторожности ради, пред будущим родовом сие объявили бы: ибо сие дело велико есть и молчание отнюдь недостойно. Аще же не объявиша, то яве есть, яко имя Iисус несть имя иного бога и несть имя противника Христова. И вся погрешность заключается точию в приложении к имени IС (Iсус), единой гласной буквы И, юже приложив, печатают и произносят Iисус.

И понеже убо святейший московстии патриарси: Иов, Ермоген, Филарет, Иоасаф и Иосиф, во употребление сего имени не введоша, и мы не вводим, и якоже они хулы и поношения на оное не положиша, и мы не полагаем: паче же и злохуление безпоповское, не Духом Божиим действуемое, уничтожаем и отвергаем, такожде и богопротивное ругательство на святейшее и поклоняемое имя IС (Iсус), обносимое в Розыске, Пращице и других книгах, и служащее величайшим соблазном и камнем претыкания, отражаем и отреваем, и всех хульников имене Христова предаем суду того самаго всемогущаго Iсуса, иже, егда приидет во славе своей, воздаст комуждо по делом его и комуждо по начинанию сердца его.

Четвертое

О честном и животворящем кресте.

Веруем убо и исповедуем, яко честный и животворящий крест Христов, от трех древ: кипариса, певга и кедра, в тридневную смерть Господа нашего Iсуса Христа соделан бысть, яко же предрече о сем Исаия Боговиднейший от лица Господня глаголя: и слава Ливанова к тебе приидет, кипарисом и певгом и кедром вкупе, прославити место святое мое, и место ногу моею прославлю [Исаия гл. 60]. По сказанию бо учителей церковных, простое дерево креста от кипариса бяше, прекое от певга, на нем же руце Христовы пригвождены бяху, подножие же от кедра, яко же и церковь воспевает [Октай: в среду и пяток на утр. третияго гласа], взывающе: "на кипарисе и певге и кедре вознеслся еси, агньче Божий". На нем же и дщица (по сказанию некиих [Григория Омиритскаго беседа с Ерваном, третияго дне]), от древа масличнаго устроена бяше, юже Пилат повеле положити верху главы Христа Спасителя, яко же вещают божественнии Евангелисти [Иоан., зач. 60]. Сей трисоставный крест Христов сицев видом есть [показано изображение восьмиконечного креста].

Но убо последи вольнаго распятия Христова, аще и от трех древ, аще и от единаго, аще от злата или сребра, или меди и прочих металлов творит церковь святая крест Христов с воображением плоти Его, равно приемлется и почитается; или токмо един крест, без плоти Христовы, начертывается, яко же на антимисах, на просфирах, на всенощных хлебах, на артусе, на панагиарном хлебе и на инех различных церковных вещех воображается, образ того же креста Христова исповедуется; тем же и на самех главах священных храмов поставляется. Не точию же, но и сокращенне творимый, во образ того же креста Христова приемлется: яко же водружальный крест, иже под престолом поставляется, сицев вид имать: [изображены семиконечный крест: дщица раположена поверх вертикального древа; шестиконечный крест без дщицы и четвероконечный крест].

Подобне и четвероконечный крест не сень есть ветхаго сеновнаго завета и не упразднися от новоблагодатнаго закона Христова. Множае же не есть образ богопротивника антихриста и не кумир, и не мерзость запустения, стоящая на месте святе, яко же в вышереченных тетрадках злословится; но образ есть креста Христова, от дний апостольских и доныне приемлемый православно-кафолическою церковию, и видотворимый "сению и начертанием" [Триодь постн. во вторн. 4 недели поста: 2 песнь втораго творца, последний стих]. Сению убо: егда осенением руки, свещами, дуновением и ограждением себе рукою крестное знамение воображается. Начертанием же: внегда маслом, мvром, вапы и всяким вещественным видотворением крест начертавается. И сице в тайнодействиях церковных приемлется, и запечатлевает я: якоже в маслопомазании, в мvропомазании, в пострижении власов, в дуновении священника над водою, и во осенении рукою и свещами, и во ограждении нашем рукою, внегда знаменует лица своя. Такожде полагается и на священных одеждах диаконских, священнических и архиерейских, иже, внегда облачитися кому от священных, осеняет первее вещь, не крест освящая, но вещь благословляя, и потом целует крест и облачится [Устав больш., лист 10].

А яко крест не освящается осенением руки, но начертание своим освящает, свидетельствует святый Каллист патриарх, глаголяй: "идеже убо начертан бывает крест, благословляет, и освящает, и просвещает, и вся спасенная дает" [Евангелие поучительное на Возвижение честнаго креста, л. 402].

Полагаетжеся таковое воображение креста и на священных покровцах ими же покрываются божественный Агнец на дискосе, и животворящая кровь в потире. Иже убо, идеже с залогом воспоминания Христова за ны страдания воображается, или начертавается, образ креста Христова и есть и глаголется, яко же научают о сем святии и богоноснии отцы, им же церковь последуя, исповедует, яко сению и воображением креста сокрушаются вся сопротивныя силы, яко же явствуется в молитве на крещение человеком над водою, юже иерей, осеняя крестовидно свещами, дуновением и рукою глаголет: "да сокрушатся под знамением воображения креста Твоего, вся противныя силы" и проч. [Потребник большой, л. 102].

Не точию же с залогом воспоминания Христова страдания воображаемое креста знамение не отметается, но с благоговением приемлется и почитается; но идеже аще по прилучаю просто начертан или сложен есть вид креста: +: и таковый убо, аще и не почитается святолепне, но обаче и не гаждается и не безчествуется, яко же гласит 73 правило шестаго вселенскаго собора: "Иже на земли крест написан, да загладится. Сиречь: аще на земли образ креста от некоего написан будет или сложен, да потрен будет или развержен, да не от человек неведящих или от животин попран будет и поругано будет победное наше оружие" [Кормчая, л. 200]. Но и в правилах Илии архиепископа Новгородскаго завещавается: "аще же не спати: благословенно есть, яко и не ходити по них и не попирати ногами. Понеже святая церковь латин именует крестопопирателями, паче же и проклинает, глаголющи: "Проклинаю латинское лицемерие о начертании честнаго креста, еже латины творят: входяще в церковь и крест на земли двема перстома начертавше, и сего целовавше, возстают, и паки попирают ногами своими, и тако попирателие кресту являются" [Рукопись древлеписьменная, писана в лето 7078]. Согласно сему и премудрый кир Зиновий Мних пишет, глаголя: "Отселе же крестный образ на земли творящих проклинати заповедуем" [Книга Зиновия Мниха, глава 56].

Под сию клятву церковную подпадают неизбежно кресторугатели безпоповцы, иже ужасными злохуленьми гаждающии четвероконечный крест, мерзостию запустения нарицающии и печатию антихристовою (оле дерзости!) именующии.

Мы же, яко искупленнии честною и боготочною кровию, на кресте излиянною за спасение всего мира, со святыми богословцы единомудрствуем о честном кресте Христове, храняще и соблюдающе пределы вечныя, от отец положенные, неприкосновенно, свято и ненарушимо. И распятие убо Господа нашего Iсуса Христа, пишем на трисоставнем кресте неизменно; прочее же, идеже от церкве кий вид креста где положися, тако и храним непреложно, и яко образ креста Христова приемлем и почитаем, со Апостолом вопиюще: мне же да не будет хвалитися, токмо о кресте Господа нашего Iсуса Христа [к галатом зач. 215]. "Того убо и мы известно держимся креста Господня, похвалы всех: есть бо нам спасение сие древо, оружие миру, непобедимая победа" [Икос кресту]. Но и идеже аще по случаю начертан или сложен есть вид креста (+), и той не безчестим и не хулим, первообразнаго ради креста Христова; но, по завещанию святых отец, от всякаго поругания тщимся сохранити, елико сила. Всяко же крестохуление и кресторугательство отреваем и отметаем и уничтожаем.

К сим же возбраняем и запрещаем творити крест (+) на неподобных местех, идеже не почесть, но поругание может бывати воображению его [Матфей Правил. состав 200, глава 3]: яко же на земли, на подовех, на коврах, на игралищных видах, и идеже аще курением дыма или зловония некоего безчествуется, и прочих тому подобных. Аще ли же где что таково обретается, повелеваем заградити, или потерти, или разврещи, по силе 73-го правила шестаго вселенскаго собора святых и богоносных отец.

Пятое

Безпоповцы, не исповедующие приношения безкровныя жертвы на лицы вселенныя, дерзостное ругательство наводят на евхаристию, ныне совершаемую в Греческой и Российской церкви. Но таковым продерзателем затыкают уста восточнии учители: священнейший Иоанн Китрожский, преподобный Матфей Правильник и всечестный Севаст Арменополь, иже о римских опресноках пишуще, и причащатися онем не повелевают, но благословне и за простые не вменяют, призывания ради Господня и Святаго Иакова брата Божия священных припеваний, над ними совершаемых [священнейший Иоанн Китрошский (Кормчая древлеписьмен. гл. 4 [57?]); Матфей Правильник сост. 800, гл. 12; Севаст Арменополь кн. 5, ответ 3 архиеп. Димитрия Хоматина]. Аще же убо о опресноках Римския церкве таково есть заключение толкователей священных правил, и от святыя церкве не испределено: убо мудрование безпоповское о евхаристии Греческия и Российския церкве зловредно есть. Ругательство же, наводимое ими на таинства, совершаемая по древлецерковному преданию в нашей православно-кафолической церкви, зело богохульно и пагубно есть.

Сих ради вин, завещаваем православным христианом зловреднаго учения безпоповскаго не слушати, и вся сочинения их, вышепоименованная и иная, направленная на истребление церковных таинств и в поругание святыни, не согласная священному писанию и церковному учению, повелеваем огнесожжению предати, яко плевел, сеянных от врага на прелесть душам христианскаго рода, яко же гласят священная правила и преподобный Максим Грек совещавает [Правила свв. апостол 60; шестаго всел. собора 63; седьмаго всел. собора 9; Максима Грека слово 3 (10?)].

Шестое

К сему завещаваем и молим, вкупе с верховным Апостолом Павлом, творити молитвы, моления, прошения, благодарения за вся человеки [1 Тим. зач. 282]; изряднее же о здравии, и о спасении, и о царстей победе, иже от высочайшия и вседержащия Божия десницы поставленнаго, и славою и честию венчаннаго, самодержавнейшаго, Богохранимаго, великаго Государя нашего, Царя и Великаго Князя Александра Николаевича, и всего Августейшаго Дома его, и о всей палате и воех его [Соборник Бол. лист 360 на обор.], о нем же и на святой проскомидии божественныя литургии, в числе великих седми, пятая приносится просфира, и приноситися будет, яко же о нем, тако и о будущих преемницех престола и скипетра его, в род и род, и до века, яко да Господь Бог соблюдет его здрава, мирна и долгоденствующа, да подаст ему победу на враги да оградит державу его миром, и да покорит под нозе его всякаго врага и супостата, и да вложит в сердце его благая и полезная о святей церкви, яко да и мы в тишине их тихое и безмолвное житие поживем во всяком благочестии и честности [Стоглав, гл. 9; Служебник Иова патриарха; Служебник Филарета патриарха; Служебник Иоасафа патриарха; Служебник Иосифа патриарха; Потребник Бол. лист 709; Номоканон прав. 210; Беседы апостольск. лист 2421].

Седмое

Паки же вторицею завещаваем и молим кривосказательных учений бегати, и лжесоставленная сочинения, не согласная сказанию и толкованию святых отец, не приимати отнюд, но отметати я, и единомудрствовати вкупе со святою церковию, единогласно и единомысленно, яко же святии отцы предаша и научиша.

Осмое

И о пришествии святых пророк Илии и Еноха веровати, яко же учит святая церковь, яко пред кончиною мира сего послани будут от Бога ко изобличению прелести антихристовы, во своей си истой плоти, чувственно, видимо и самообразно, и плотскими смертными человеки видены будут, и проповедят благоверьствие роду человеческому, сотворят же чудеса и знамения, и ничтоже ни от кого же постраждут даже до конца своего си порицания, потом же исполнят мучение свое, и, от антихриста убиени бывше, скончаются, и уже не токмо яко пророцы, но и яко мученицы венчаются победными венцы от венцедателя Бога [Святый Иппол.; св. Иоанн Злат.; Ефрем слово 105; Св. Феофилакт; Св. Симеон Метафр., июль в 20 день; преп. Иоанн Дамаск.; Св. Андрей Кесарийск.; Синаксарь в неделю мясопустную; Пролог, июля в 20 день; Святцы Иосифския, июля в 20 день, и инии].

Девятое

Такожде и о антихристе подобает со святою церковию единомудрствовати. Аще бо и мнози суть антихристы, по святому Иоанну Богослову [1 посл. Иоан. зач. 71], но обаче своеобразне и особне антихрист глаголется, иже в конец века приидет, чувственно, видимо и самообразно [Книга древлеписьменная Иоанна Дамаскина, слово о антихристе], его же есть пришествие по действу сатанину, попущением Божиим [2 Солуняном, зач. 275]. Родитижеся имать от племене еврейска, от колена Данова, седьмаго сына Иакова, ветхозаветнаго патриарха, от нечистыя жены, мнимыя девицы, всескверныя же всяко. "Родится убо от блуда, яко же рехом, и вскормится в тайне и напрасне возставится, и сопротивится и царствует". Воздвигнет же велие гонение и мучение всем в вере Христове пребывающим. Царствовати же имать три лета и пол, яко же учит священное писание и богоноснии отцы сказуют [Св. Ипполит, Зерцало душезрит., Синоксарь в нед. мясопустную, Книга О вере гл. 30 лист 270, Иоанн Дамаскин кн. 4 гл. 27, Учителии церковнии. Даниил гл. 7, Св. Иоанн Злат., Преп. Ефрем Сирин, Кирилл Иерусалимский и инни]. Его же Господь наш Iсус Христос убиет Духом уст своих и упразднит явлением пришествия своего [2 Солун. зач. 275]. Ят бо будет вкупе со своим лжепророком, и жива ввержена будета оба в езеро огненное, горящее жупелом, яко же глаголет наперсник Христов и Евангелист Иоанн во Откровении своем, и святый Андрей Кесарийский изъясняет [Св. Андрей Кесарийский в толковании на Апокалипсис. гл. 19].

Десятое

О дни же и часе кончины мира и втораго пришествия Господа Бога и Спаса нашего Iсуса Христа никтоже весть, ни ангели небеснии, токмо сам Той един [Мф. зач. 102; Мр. зач. 62; и Деяний зач. 1]. Тем же никомуже от земнородных о сем ведати невозможно есть и испытословити отнюд не подобает, по реченному: вышших себе не ищи, и крепчайших тебе не испытуй [Iсуса Сираха глава 3], и прочая.

В заключение же послания сего объявляем всем православным христианом, яко, помогающу Богови, составлен будет Устав, или краткое изложение догматов и преданий древле-православно-кафолическаго исповедания единыя святыя, соборныя и апостольския церкве, который и предан будет в руководство и окормление всем православным, священным же и мирским, во еже праве и известно ведати о догматех веры и о преданиях, о седми таинствах церковных и о инех нуждных и богословных винах.

Наконец, паки завещаваем и молим, иже древлецерковная предания лобызающих, хранити вся заповеди Божия и предания церковная неизменно, свято и нерушимо, и удалятися всяких ересей и раздоров и иностранных обычаев, имети же между себе согласие и единомыслие во всем, мир и любовь, яже есть соуз совершенства, и еже себе не угодно, инем не творити [к Колос. зач. 254, Деян. зач. 36, к Коринф. зач. 167, Псал. 76].

Бог же мира и отец щедротам, Бог всякия утехи, собираяй расточенныя и вселяяй единомысленныя в дом свой, да соберет расточенныя овцы во ограду пажити своея и да подаст единодушие и единомыслие всем православным христианом благодатию и человеколюбием своим: яко да будет едино стадо и един пастырь [Иоан. зач. 36]. Аминь.

Сие Окружное послание издадеся [написася] в царствующем граде Москве, в лето 1862 [7370-е], месяца февраля в 24 день.

Подлинное подписали:

Антоний, архиепископ Владимирский.
Онуфрий, епископ Браиловский.
Пафнутий, епископ Казанский.
Варлаам, епископ Балтовский.
Священноиерей Петр, блюститель Московский.
Священноиерей Федор Вохонский.
Архиепископа Антония диакон Кирилл.
Белокриницкаго монастыря инок Олимпий.
Дьяк Симеон Симеонов.

[По другому списку:

Антоний, архиепископ Владимирский.
Онуфрий, епископ Браиловский.
Пафнутий, епископ Казанский.
Варлаам, епископ Балтовский.
Священноиерей Петр, блюститель Московский.
Священноиерей Федор Вохонский.
Священноинок Евфросин.
Священноинок Илия.
Иеродиакон Пахомий.
Иеродиакон Ипполит.
Священнодиакон Митрофан
Инок Алимпий].